Ubba Haymaanootee Loꞌꞌoo?
NUUNI deꞌiyoy keehi daro haymaanootee deꞌiyo alamiyaana. Alame yuushuwan 19 gita haymaanootetinne 10,000 gidiya guutta haymaanootetti deꞌiyoogaa issi mata wode xinaatee qonccissiis. Haymaanootee hegaadan daridoogee asay dooranau metootanaadan oottiis. Yaatin ay haymaanoote neeni doorinkka dummatetta medhennee?
Issi issi asay, dumma dumma haymaanootee issi deriyau liiphiyaa kessiya dumma dumma ogiyaa mala gees. Ubba ogeekka issi sohuwaa gattiyo gishshau, augaanne doorin etau dummatetta medhenna. Ubbaa Danddayiya issi Xoossaa xallay deꞌiyo gishshau ubba haymaanootee akko gattiya oge gidana bessees giidi eti qoppoosona.
Ubba Haymaanooteekka Xoossaakko Efiya Ogee?
Taarike wodiyan bonchettida haymaanoote asttamaaretuppe issuwaa gidida Yesuus Kiristtoosi ha allaalliyaa xeelliyaagan woygidee? I ba erissiyo ashkkaratuyyo: “Un77o penggiyaara gelite” yaagidi yootiis. Aybissi? “Bashshau efiya penggee aaho; ogeekka woggaa. Hegaara geliya asaikka daro. Aissi giikko, de7uwau efiya penggee un77o; ogeekka xuntta. Qassi hegaara biya asatikka amaridaageeta.”—Maatiyoosa 7:13, 14.
Yesuusi tumuppe issi issi haymaanootetti “bashshau” efoosona giiddi deꞌii? Woykko, Xoossan ammanennaageetu xallay aaho ogiyan biyoogaa, qassi eta haymaanootee aybanne gidin, Xoossan ammaniyaageeti deꞌuawau efiya xuntta ogiyaara biyoogaa tamaarissidee?
Yesuusi naaꞌꞌu oge xallay deꞌiyoogaa yooti simmidi sohuwaara: “Bolla baggaara dorssa milatidi, inttekko yiya wordduwaa hananabaa yootiyaageetuppe naagettite; shin tumaappe eti garssa baggaara wanggireellotu mala” yaagiis. (Maatiyoosa 7:15) Guyyeppe i: “Saluwan de7iya ta Aawai giidoogaa oottiya urai saluwaa gelanaappe attin, ‘Ta Godau, ta Godau’ giya ubbai gelenna” yaagiis. (Maatiyoosa 7:21) Issi uri hananabaa yootiyaagaa geetettikko, woykko Yesuusa ba ‘Goda’ giyaaba gidikko, i haymaanootee baynna asa gidennan, Xoossan ammaniya asa giyoogee bessiyaaba. Yaatiyo gishshau, loꞌꞌo gididay ubba haymaanootiyaa gidennaagaanne ammanettana koshshiyoy ubba haymaanootiyaa asttamaaretuuna gidennaagaa Yesuusi akeekissidoogee qoncce.
Xuntta Ogiyaa SHaakki Erana Danddayettii?
Xoossaakko efiyay ubba haymaanootiyaa gidenna gishshau, shaꞌan qoodettiyaageetu giddoppe deꞌuwau efiya xuntta ogiyaa waatidi erana danddayiyoo? Kaallidi deꞌiya leemisuwaa beꞌa: Issi gita kataman neeni oge balidabadan qoppa. Ogiyaa bessanaadan asa oychanau qoppadasa. Issoy i loyttidi eriyoogaa ammanettidi haddirssa baggi baanaadan neeyyo yootees. Haray neeni ushacha baggi baanaadan yootees. Issoy qassi neeni loꞌꞌo giido ginaa dooranaadan yootees. Wurssettan, haray ammanttiya karttaa kessidi nena suure ogiyaa bessees. Qassi neeni baydda ogiyan xeellanaadan karttaa neessi immees. Neeni biyoosaa gakkanaagaa keehippe ammanettikkii?
Hegaadankka, likke gidida haymaanootiyaa dooranau, ammanttiya kaaletuwaa demmiyoobi nuussi koshshees. Kaaletuwaa demmiyoobi deꞌii? Ee, deꞌees. Hegee, “Xoossaa maxaafa ubban Xoossaa Ayyaanai de7ees. Qassi he maxaafati . . . tumatettaa tamaarissanau, balaa seeranau, mooruwaa suurissanaunne xillotetta de7uwau zoriyaa immanau maaddoosona” yaagiya Geeshsha Maxaafaa.—2 Ximootiyoosa 3:16.
Tumu haymaanootiyau efiya ogiyaa demmanau neeni kaaletuwau goꞌettana danddayiyo Geeshsha Maxaafaa birshshettay ne qaalan deꞌennan aggenna. Ha maxeetiyaa attamissiya Yihoowa Markkati, Ooratta Alamiyaa Geeshsha Maxaafaa Xuufetu Birshshettaa geetettiya ammanttiya birshshettaa daro doonatun giigissidosona. SHin neeni Yihoowa Markka gidana xayikko, loꞌꞌo haymaanootiyaanne iita haymaanootiyaa shaakka eranau qoppiyo wode, hara birshshettata goꞌettanau koyana danddayaasa. Yaatiyo gishshau, kaallidi deꞌiya huuphe yohotun, hara haymaanootetikka goꞌettiyo Wolayttatto Geeshsha Maxaafaa birshettaa goꞌettida.
Kaallidi deꞌiya huuphe yohota nabbabiyo wode, neeni eriyoobaa Geeshsha Maxaafay giyoobaara geeddarssa. Loꞌꞌo haymaanootiyaa iita haymaanootiyaappe nuuni waati shaakki erana danddayiyaakko Yesuusi yootidobaa hassaya. I: “Lo77o mitta ubbai lo77o aife aifees; shin iita mitti iita aife aifees. Lo77o mitti iita aife aifanau danddayenna; qassi iita mittikka lo77o aife aifanau danddayenna” yaagiis. (Maatiyoosa 7:17, 18) ‘Loꞌꞌo mittaa’ shaakki eranau maaddiya, Geeshsha Maxaafay yootiyo heezzu loꞌꞌo ayfeta akeeka.
[Sinttaa 3n deꞌiya misiliyaa qonccissuwaa]
Geeshsha Maxaafay issi uri tumu haymaanootiyaa demmanaadan maaddiya, ogiyaa bessiya ammanttiya kartta mala