Bala Timirttiyaa 5: Mayraama Xoossaa Aayyiyo

Ha bala timirttiyau denddoy aybee? “Xoossaa aayyiyo bonchiyoogee . . . allaga xoossau goynniya daroti woosa keettaa yiido wode eesuwan aakkiis. . . . Eti [kase allaga xoossau goynniya, Kiristtaane ammanuwau laamettidaageeti] goynuwau mishettiyoogeenne haymaanootiyaa kaalliyoogee, ‘gita aayyiyo’ gidida xoosseenne ‘geelaꞌo xoossee’ ammanuwan shaꞌan qoodettiya layttau deꞌidaba.—Ze Niwu Inssaykilopidiya Biritanika (1988), Vooliyum 16, sinttaa 326nne 327.

Geeshsha Maxaafay woygii? “Neeni shahaarada attuma na7a yelana; a sunttaa Yesuusa yaagada sunttana. I gita gidana; qassi Ubbaappe Bolla Xoossaa Na7a geetettana; . . . hegaa gishshau, ne yelana geeshsha na7ai Xoossaa Na7aa geetettana.”—Geddi ootti xaafiday nuna; Luqaasa 1:31-35.

Ha xiqisee Mayraama Xoossaa aayyiyo gidennan, “Xoossaa Na7aa” aayyiyo gidiyoogaa yootees. ‘Saloti ayyo gidanau danddayenna’ Xoossaa a shahaaranau danddayay? (1 Kawotu 8:27) A hegaadan mule gabeykku. Mayraamo xeelliyaagan hegaa mala kirqqay merettanaadan oottiday Sillaasiyaa timirttiyaa. Efisoona Yaaꞌay 431 M.Ln, Mayraamo Tiꞌotokos (“Xoossaa yelidaaro” giyo birshshettay deꞌiyo Giriiketto qaalaa), woykko “Xoossaa Aayyiyo” yaagidi iyyo goynnanau ogiyaa dooyiis. He yaaꞌaa shiiqido Efisoona katamay xeetan qoodettiya layttau yelettiyoogaa xoossee, Arxxemiisi eeqa goynuwau waanna soho gididi takkiis.

Yaatiyo gishshau, Mayraamiyyo goynniyoogan deꞌiya darobay, giishin corattidi goynuwau dabaabaa kiyiyoogaa milatiyaabay yiidoy, “saluwaappe wodhdhida” Arxxemiisi misiliyaa goynuwaappe. (Oosuwaa 19:35) Kiristtaane timirttiyan guyyeppe gujettida harabay, goynuwan Mayraami misiliyaanne hara misiliyaa goꞌettiyoogaa.

Kaallidi deꞌiya Geeshsha Maxaafaa xiqiseta beꞌa: Maatiyoosa 13:53-56; Marqqoosa 3:31-35; Luqaasa 11:27, 28

TUMAA:

Mayraamaa Xoossaa Naꞌaa aayyiyooppe attin, Xoossaa aayyiyo gidukku. Sillaasiyaa timirttee Mayraama Xoossaa Aayyiyo giyo goynuwaa yeliis