Yesuusi Xoossaa Xillotettaa Loytti Qonccissido Ogiyaa

“Yesuusa suuttan asai a ammanidi, ba nagaraa maarotettaa demmanau, Xoossai a immiis; Xoossai hegaa ba xillotettaa bessanau oottiis.” —ROO. 3:25.

1, 2. (a) Geeshsha Maxaafay asaa naatu hanotaabaa nuussi ay yootii? (b) Ha huuphe yohuwan tobbana oyshati awugeetee?

EDENE gannatiyan denddida, Geeshsha Maxaafay yootiyo makkalay keehi erettiyaaba. “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis” giyaagee qonccissiyoogaadan, Addaamee oottido nagaray kaalettidobay nuna ubbaa bochees. (Roo. 5:12) Nuuni suurebaa oottanau ay keena baaxetiyaaba gidikkonne, nuussi Xoossaa maarotettaa koshshiya moorobaa oottoos. Kiitettida PHauloosikka azzanidi hagaadan giis: “Taani ixxiyo iitabaa oottaisippe attin, taani dosiyo lo77⁠obaa oottikke. Taani aiba ufaissi bainna asee!”—Roo. 7:19, 24.

² Nuuni ubbay nagarancha gidiyo gishshau, kaallidi deꞌiyaagaadan oychiyoogee bessiyaaba: Naazireete Yesuusi nagara laattennan yelettidoy ayba ogiyaanee, qassi i aybissi xammaqettidee? Yesuusa deꞌoy Yihoowa xillotettaa loytti qonccissidoy ayba ogiyaanee? Ubbaappe aaruwan, Kiristtoosa hayquwan polettidabi aybee?

Xoossaa Xillotettaa Xeelliyaagan Denddida Mootuwaa

3. Seexaanay Hewaano cimmidoy ayba ogiyaanee?

³ “Xalahe halaqaa woikko Seexaanaa” giyo beni shooshshau haarettiyoogan, nu mayzza aawanne aayo gidida Addaameenne Hewaana Xoossay ubbabaa haariyo maatau eeyyatettan haarettennan ixxidosona. (Ajj. 12:9) Hegee waanidi hanidaakko ane qoppa. Seexaanay, Xoossaa Yihoowa haaroy suure gidiyoogaa xeelliyaagan siree merettanaadan oottiis. I Hewaano: “Xoossai tumu inttena, Gannatiyan de7⁠iya mitta teeraa ubbaappekka mooppite giidee?” giidi oychiyoogan hegaa oottiis. Xoossay issi mittaa teeraa bochoppite, bochikko intte hayqqana giidi odido azazuwaa Hewaana zaarettada yootaasu. Hegaappe simmin, Seexaanay Xoossay worddotidobadan mootiis. Dabloosi, “CHii, intte ainnekka haiqqekketa” yaagiis. Hewaana Xoossay loꞌꞌobaa diggidabadaaninne mittaa teeraa maada, ba huuphe kandduwaa maara kessiyoogan Xoossaa mala gidana danddayiyoogaa ammananaadan oottidi o cimmiis.—Doo. 3:1-5.

4. Asaa naati Seexaanau haarettidoy ayba ogiyaanee?

⁴ Asaa naati Xoossaa haaruwaappe kiyikko, ufayttanaagaa Seexaanay yootiis. Addaamee Xoossay ubbabaa haariyo, suure gidida maatau exatiyoogaappe ba maccaasiyaa giidobaa siyiis; qassi mooppite gido mittaa teeraa iira issippe miis. Addaamee Yihoowa sinttan geeshsha gididi deꞌiyoogaa aggidoogee, huqqunniya deexo nagaraunne hayquwau nuuni haarettanaadan oottiis. Hegaadankka, asaa naati ‘ha saꞌaa xoossaa’ gidida Seexaanau haarettidosona.’—2 Qor. 4:4; Roo. 7:14.

5. (a) Yihooway ba giidoogaa naagidoy ayba ogiyaanee? (b) Xoossay Addaamenne Hewaani zerettatuyyo immido hidootay aybee?

⁵ Yihooway ammanttiya ba qaalaa naagidi, Addaameenne Hewaana hayqqanaadan pirddiis. (Doo. 3:16-19) SHin hegaa giyoogee Xoossaa halchoy attiis giyoogaa gidenna. Xoossaa halchoy mulekka attenna! Yihooway Addaameenne Hewaana hayqqanaadan pirddido wode, eta zerettati kehabaa hidootiyo loꞌꞌo gaasoy deꞌiyoogaa yootiis. Seexaanay qirbbiyaa masunxxissana “zerettay” yelettanaadan halchidoogaa yootiyoogan i hegaadan oottiis. Gidoppe attin, qaalaa gelido Zerettay masunxxida qirbbee paxin, “[Seexaanaa] huuphiyaa qoxxana.” (Doo. 3:15) Geeshsha Maxaafay Yesuus Kiristtoosa xeelliyaagan, “Hegaa gishshau, Xoossaa Na7ai xalahe halaqaa oosuwaa xaissanau qoncciis” yaagidi, ha waanna qofaa loytti qonccissees. (1 Yoh. 3:8) SHin Yesuusa deꞌoynne hayqoy Xoossaa xillotettaa loytti qonccissidoy ayba ogiyaanee?

Yesuusa Xinqqatee Malaatiyoobaa

6. Yesuusi Addaameppe nagaraa laattibeennaagaa waatidi erana danddayiyoo?

⁶ Yesuusi asa gamma gakkiyo wode, issi wode polo gidida Addaameera bixe lagge asa gidees. (Roo. 5:14; 1 Qor. 15:45) Hegaa giyoogee Yesuusi polo gididi yelettana koshshiis giyoogaa. Hegee waanidi hanana danddayii? Kiitanchaa Gabreeli Yesuusa aayee, Mayraamiyyo, “Geeshsha Ayyaanai ne bolli yaana; Ubbaappe Bolla Xoossaa wolqqai nenan shemppana; hegaa gishshau, ne yelana geeshsha na7ai Xoossaa Na7aa geetettana” yaagidi qonccissidi yootiis. (Luq. 1:35) Yesuusi naatettan deꞌiyo wode, Mayraama i yelettido hanotaabaa issi issibaa ayyo yootennan aggukku. Yaatiyo gishshau, issitoo Mayraamanne Yesuusa dichida aaway Yooseefi, Yesuusa Xoossaa beetamaqidasiyan demmido wode, guutta naꞌaa Yesuusi, “Taani ta Aawaa keettan de7anau bessiyoogaa erekketii?” yaagidi oychiis. (Luq. 2:49) Yesuusi naatettaappe doommidi, i Xoossaa Naꞌaa gidiyoogaa eriyoogee qoncce. Hegaa gishshau, Xoossaa xillotettaa loyttidi qonccissiyoogee i xoqqu oottidi xeelliyooba.

7. Yesuusau deꞌiya alꞌꞌobay aybee?

⁷ Yesuusi goynnanau shiiquwan ubbatoo beettiyoogan ayyaanaabaa keehippe koyiyoogaa bessiis. I polo gidiyo gishshau, Ibraysxxe Geeshsha Maxaafaappe siyiyoobaanne nabbabiyoobaa ubbaa eriyaabanne akeekiyaaba milatees. (Luq. 4:16) Ayyo hara alꞌꞌobaykka dees; hegeekka asaa naatu gishshau yarshshana danddayiyo, polo gidida a bollaa. Yesuusi xammaqettido wode woossiis; he wode i Mazamure 40:6-8n deꞌiya hiraagaa qoppennan aggenna.—Luq. 3:21; Ibraawe 10:5-10 nabbaba.a

8. Xammaqiya Yohaannisi Yesuusi xammaqettennaadan digganau malidoy aybissee?

⁸ Xammaqiya Yohaannisi Yesuusi xammaqettennaadan digganau koyiis. Aybissi? Yohaannisi Ayhudati Higgiyaa kanttiyoogan oottido nagaraappe simmanaadan xammaqiyo gishshataassa. Yohaannisi Yesuusau mata dabbo gidiyoogaadan, Yesuusi geeshsha gidiyoogaanne i simmana koshshiyo nagari baynnaagaa erennan aggenna. Yohaannisi xammaqiyoogee baassi bessiyaaba gidiyoogaa Yesuusi yootiis. Yesuusi, “Nuuni xillotetta ooso ubbaa hagaadan polanau bessiyo gishshau, ha77⁠i tau eeno ga” yaagiis.—Maa. 3:15.

9. Yesuusa xinqqatee ay malaatii?

⁹ Yesuusi polo asa gidiyoogaadan, Addaameegaadan polo naata yeliyo abbee deꞌiyoogaa qoppana danddayees. SHin, Yihooway ayyo qoppidoy hegaadan gidenna gishshau, Yesuusi hegaa oottanau mule koyibeenna. Xoossay Yesuusa saꞌaa kiittidoy qaalaa gelido Zeretta woy Mase gididi oottanaadaana. Hegee Yesuusi ba polo bollaa yarshshiyoogaa gujjees. (Isiyaasa 53:5, 6, 12 nabbaba.) Yesuusa xinqqatee malaatiyoobay nuugaara issi mala gidennaagee tuma. Yesuusi Xoossau ba huuphiyaa geppida Israaꞌeela asaappe issuwaa gidiyo gishshau, hegee Yihoowau ba huuphiyaa geppiyoogaa gidenna. Hegaappe, Yesuusa xinqqatee Geeshsha Maxaafan Masiyaa xeelliyaagan kasetidi odettidoogaadan Xoossaa sheniyaa polanau ba huuphiyaa sheedhidoogaa malaatees.

10. Masee oottiyo Xoossaa shenee ay ay gujjii, qassi hegaa xeelliyaagan Yesuusau aybi siyettidee?

¹⁰ Yesuusa xeelliyaagan Yihoowa shenee, Xoossaa Kawotettaa mishiraachuwaa sabbakiyoogaa, erissiyo ashkkara oottiyoogaanne eti sinttappe harata erissiyo ashkkara oottanaadan giigissiyoogaa gujjees. Yesuusi ba huuphiyaa sheedhidoogee, Yihooway ubbaa haariyo suure maatau exatidi, yedetaanne iita hanotan hayqqiyoogaa genccanau eeno giyoogaakka gujjees. Yesuusi saluwan deꞌiya ba Aawaa wozanappe siiqiyo gishshau, Xoossay koyiyoobaa ufayttidi oottiisinne ba bollaa yarshsho oottidi immiyoogan wozanappe ufayttiis. (Yoh. 14:31) Nagaraunne hayquwau aylle gidida nuna wozanau a polo deꞌuwaa waagay Xoossau shiiqana danddayiyoogaa eriyoogeekka i ufayttanaadan oottiis. Yesuusi ha wolqqaama aawatettaa kiyanau ba huuphiyaa sheedhidoogan Xoossay ufayttidee? Ee, ufayttiis!

11. Yesuusi qaalaa gelido Mase woy Kiristtoosa gidiyoogaa Yihooway ekkidoogaa bessidoy ayba ogiyaanee?

¹¹ Yesuusi Yorddaanoosa SHaafan xammaqettidi kiyiyo wode, Xoossaa Yihooway ufayttidoogaa qonccissidoogaa oyddu Wonggeliyaa xaafeti markkattidosona. Xammaqiya Yohaannisi, “Geeshsha Ayyaanai saluwaappe haraphphedan wodhdhishiininne [Yesuusa] bolli uttishin, taani be7aas. . . . Taani hegaa be7ada, Xoossaa Na7aa gididoogaa markkattais” yaagiis. (Yoh. 1:32-34) Hegaa bollikka, Yihooway he wode, “Taani siiqiyo ta Na7ai, tana ufaissiyaagee hagaa” yaagidi yootiis.—Maa. 3:17; Mar. 1:11; Luq. 3:22.

Hayqqana Gakkanaassi Ammanettiis

12. Yesuusi xammaqetti simmidi heezzu laytta baggan ay oottidee?

¹² Hegaappe simmidi heezzu layttanne baggaa, Yesuusi ba Aawaabaanne Xoossay ubbabaa haariyo maatay suure gidiyoogaa ba kumetta wolqqan asaa tamaarissiis. Hidootaa Biittaa kumettaa tohuwan hemettiyoogee daafurssiyaaba gidikkonne, i tumaabaa loyttidi markkattennaadan aybinne diggibeenna. (Yoh. 4:6, 34; 18:37) Yesuusi Xoossaa Kawotettaabaa harata tamaarissiis. Maalaalissiya ogiyan sahettidaageeta pattiyoogan, namisettida daro asaa miziyoogaaninne ubba qassi hayqqidaageeta denttiyoogan, he Kawotettay asaa naatuyyo ay oottanaakko bessiis.—Maa. 11:4, 5.

13. Woosaa xeelliyaagan Yesuusi ay tamaarissidee?

¹³ Ba tamaarissiyoobaaninne asaa pattiyoogan baayyo sabettiyoogaappe, Yesuusi ba huuphiyaa kaushshidi ubba asay Yihoowa bonchanaadan oottiyoogan loꞌꞌo leemiso gidees. (Yoh. 5:19; 11:41-44) Yesuusi nuuni woossana bessiyo keehippe koshshiyaabaakka erissiis. Nu woosay Yihoowa giya, Xoossaa ‘geeshsha sunttay anjjettanaadaaninne A shenee saluwan hanidoogaadan, saꞌankka hanana mala,’ Seexaanaa iita haaruwaa sohuwan Xoossaa suure haaroy eqqanaadan, oychiyoogaa gujjana koshshees. (Maa. 6:9, 10) ‘Kasetidi, Xoossaa kawotettaanne [Xoossaa] xillotettaa koyiyoogan’ he woosaara moggiyaabaa oottanaadankka Yesuusi nuna zoriis.—Maa. 6:33.

14. Yesuusi polo gidikkokka, Xoossaa halchuwaara gayttidaagan oottiyoobau baaxetana koshshidoy aybissee?

¹⁴ I yarshsho gididi hayqqiyo wodee matattin, baayyo imettida keehi gita aawatettaa gishshau, Yesuusi keehippe unꞌꞌettiis. A Aawaa halchoynne a loꞌꞌo sunttay Yesuusi iita waayiyaanne meqetti baynna hanotan hayqqiyoogaa gencciyoogaara gayttidaba. Yesuusi hayqqanaappe ichashu gallassaa kasetidi, hagaadan yaagidi woossiis: “Ha77⁠i ta shemppoi daro un77⁠ettiis; yaatin woigoo? Taani, ‘Ta Aawau, tana ha saateeppe ashsharkkii’ yaagoo? CHii, taani ha saatiyan yiidoogee hagaa gishshassa.” Asau meretan siyettiya ha qofaa yooti simmidi, Yesuusi ba huuphe koshshaappe keehi koshshiyaabau ba qofaa laammidi, “Ta Aawau, ne sunttaa bonchcha” yaagidi woossiis. Yihooway sohuwaara, “Taani ta sunttaa bonchchaas; qassikka gujjada bonchchana” yaagidi zaariis. (Yoh. 12:27, 28) Ee, Yesuusi suuretetta equwaa xeelliyaagan asaa naatuppe ooninne paacettibeenna wolqqaama paaciyaa paacettanau eeno giis. SHin saluwan deꞌiya Aaway yootido he qaalaa siyidoogee, Yihooway ubbabaa haariyo maataa loytti qonccissanaadaaninne bonchissanaadan Yesuusau minotettaa immidoogee qoncce. Qassi i hegaa muruta ogiyan oottiis!

Yesuusi Hayqqidoogan Polettidabaa

15. Yesuusi hayqqanaappe guuttaa kasetidi, “Polettiis” giidoy aybissee?

¹⁵ Yesuusi mittan barchetidi kaqettido wode waayetti hayqqana haniiddi, “Polettiis” yaagiis. (Yoh. 19:30) Yesuusi xammaqettoosappe doommidi heezzu layttanne baggan hayqqana gakkanaassi Xoossay maaddin keehi gitabaa poliis! Yesuusi hayqqiyo wode biittay keehi wolqqaama hanotan qaaxxin, Rooma wotaaddaratu mato halaqaa gidida a woridaageetuppe issoy, “Tumu hagee Xoossaa Na7aa” yaagiis. (Maa. 27:54) Yesuusi bana Xoossaa Naꞌaa giidoogau hara asay baceessishin mato halaqay siyennan aggenna. Yesuusi daroban waayettidaba gidikkonne, ba suuretettaa equwaa naagidi, Seexaanay bulla worddancha gidiyoogaa qonccissiis. Xoossay ubbabaa haariyo maatau haarettiya ubbaa xeelliyaagan, Seexaanay hagaadan giis: “Asi ba shemppuwaa gishshau, bau de7⁠iyaabaa ubbaa immana.” (Iyy. 2:4) Yesuusi ammanettidaagaa gidiyoogan, Addaameenne Hewaana eta gakkida he deexxenna paaciyaa genccana danddayiiddi aggidoogaa qonccissiis. Ubbaappe aaruwan, Yihooway ubbabaa haariyo maatay suure gidiyoogaa Yesuusi ba deꞌuwaaninne ba hayquwan bessiisinne loytti qonccissiis. (Leemiso 27:11 nabbaba.) Yesuusa hayqoy hegaappe harabaa polidee? Polidoogee sirissenna!

16, 17. (a) Kiristtaanetu wodiyaappe kase deꞌida Yihoowa Markkati a sinttan geeshsha gididi deꞌanau danddayidoy aybissee? (b) Yihooway ba Naꞌay ammanettido gishshau woytidoy ayba ogiyaanee, qassi Godaa Yesuus Kiristtoosi ubbatoo ay oottii?

¹⁶ Yihoowa ashkkaratuppe daroti Yesuusi saꞌaa yaanaappe kase deꞌidosona. Eti Xoossaa sinttan geeshsha gididi deꞌidosona; qassi Xoossay etau dendduwaa hidootaa immiis. (Isi. 25:8; Dane. 12:13) Gidoppe attin, geeshsha Xoossaa, Yihooway nagarancha gidida asaa naata hegaa mala maalaalissiya ogiyan anjjanau baaso gidiyaabay aybee? Geeshsha Maxaafay hagaadan gees: “Yesuusa suuttan asai a ammanidi, ba nagaraa maarotettaa demmanau, Xoossai a immiis; Xoossai hegaa ba xillotettaa bessanau oottiis; i beni wodiyan asaa nagaraa danddayidi, karidi aggiigiis; shin ha wodiyan ba xillotettaa bessanau asaa nagaraa aggenna; Xoossai hegaa oottiyoogan i ba huuphen xillo gidiy[oo]gaanne Yesuusa ammaniya ubbaa xillissiyoogaa bessees.”—Roo. 3:25, 26.

¹⁷ Yihooway Yesuusa hayquwaappe denttidi, i saꞌaa yaanaappe kase ayyo deꞌiya maataappe keehi aadhiya maataa immiyoogan woytiis. Yesuusi ha wodiyan hayqqenna, bonchettida ayyaana mereta gididi dees. (Ibr. 1:3) Qeese Ubbatu Halaqanne Kawo gidiyoogaadan, Godaa Yesuus Kiristtoosi bana kaalliyaageeti Xoossaa xillotettaa loytti qonccissanaadan ubbatoo maaddees. Saluwan deꞌiya nu Aawaa Yihooway, hegaa poliyaanne ba Naꞌaa leemisuwaa kaallidi ammanettidi baayyo oottiya ubbaa Woytiyaagaa gidiyo gishshau keehippe galatoos!—Mazamure 34:3; Ibraawe 11:6 nabbaba.

18. Kaalliya huuphe yohuwan ay xannaꞌanee?

¹⁸ Aabeela wodiyaappe doommidi deꞌida ammanettida asati bantta ammanuwaa oosuwan bessido gishshaunne qaalaa gelido Zerettan ammanettido gishshau, Yihoowaara mata dabbotaa medhidosona. Ba Naꞌay kumetta hanotan ammanettanaagaanne a hayqoy “sa7aa nagaraa” polo gidida ogiyan kammanaagaa Yihooway erees. (Yoh. 1:29) Yesuusa hayqoy ha wodiyan deꞌiya asaakka maaddees. (Roo. 3:26) Yaatiyo gishshau, Kiristtoosa wozoy neeyyo ayba anjjuwaa demissana danddayii? Hegaabaa kaalliya huuphe yohuwan beꞌana.

[Tohossa qofata]

Woygada Zaaruutii?

• Xoossaa xillotettaa xeelliyaagan ayba mootoy denddidee?

• Yesuusa xinqqatee ay malaatii?

• Yesuusi hayqqidoogan aybi polettidee?

[Sinttaa 13n deꞌiya misiliyaa]

Yesuusa xinqqatee ay malaatiyaakko eray?