3 Xoossay Mule Haluwaa Kiyennan Aggenna Hegee Tumee?
Geella neeni siyidobaa: “Xoossay asi oottiyo nagaraa ubbaa qoodidi, he nagaraa gishshau he uraa siꞌooliyaa taman merinau qaxxayees.”
“Xoossay nagaranchata meretay gattiyo daafan qaxxayees.”
Geeshsha Maxaafay tamaarissiyoobaa: Yihooway, “ooninne ba nagaraappe simmanaadan [koyiyoogaappe] attin, ooninne xayana mala” koyennaagaa, 2 PHeexiroosa 3:9y yootees. Yihooway xeela wottiyoy nu balaana gidennan, nuuni oottiyo loꞌꞌobaananne nu loꞌꞌo eeshshaana. “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees.”—2 Odi. 16:9.
Siꞌooliyaa tamay Geeshsha Maxaafay tamaarissiyoobaa gidenna; asi merinau barchetees giyo qofay, ubba Xoossay keehippe ixxiyooba. Xoossay iitabaa oottiya asaa qaxxayiyo, keehi wolqqaama qixaatee hayquwaa. (Erm. 7:31; Roo. 6:7) Asa asappe shaakkennan xayssiya, meretay gattiyo daafay, Xoossay oottiyooba gidennan, oonanne qohana danddayiya qoppennan gakkiyaaba.—Era. 9:11.
Tumaa eriyoogee nena maaddiyo ogiyaa: Xoossay ‘atto gaanau’ giigi uttidaagaa, qassi qaxxayanau eesotennaagaa gidiyoogaa akeekiyo wode, kaseegaappe aaruwan akko shiiqana danddayoos. (Maz. 86:5) Moorancha gididabadan nuuyyo siyettennaadan giidi woy qaxxayettennaadan yayyidi, Xoossaayyo oottana koshshenna. Hegaappe, loꞌꞌo qofan, giishin Yihoowa siiqiyoogan nu ammanuwaa minttana danddayoos. Hegaa mala siiqoy a ufayssanau nuuni danddayiyo ubbabaa oottanaadan nuuyyo wolqqaa immees.—Maa. 22:36-38; 1 Yoh. 5:3.
Xoossay ubba asay loꞌꞌobaa oottanaadan koyiyaaba gidikkokka, daroti hegaadan mule oottennaagaa erees. I iitabaa oottanau murttidaageeta mule qaxxayennaba gidikko, higgiyaa kessidi oosuwan peeshshenna kawoppe aynne dummatenna; hegee pirdda pacaynne tuggay merinau deꞌanaadan oottees. (Era. 8:11) Xoossay iitatettaa merinau coꞌꞌu gi xeellennaagaa eriyoogee, nuuni sinttanaa wodiyaa hidootan naaganaadan oottees. Xoossay koyro halchidoogaadan “ashkketi” saꞌan merinau deꞌana mala, iitabaa oottiyoogaa aggennaageeta xayssanau qaalaa geliis.—Maz. 37:10, 11, 29.a
[Tohossa qofaa]
a Xoossay waatidi saꞌaa gannate oottiyaakko loyttada eranau, Tumuppe Geeshsha Maxaafay Tamaarissiyoy Aybee? giya maxaafaa shemppo 3nne 8 xeella.
[Sinttaa 6n deꞌiya misiliyaa qonccissuwaa]
Xoossay nuuni qixaatiyaa yayyidi au goynnanaadan koyanee?
[Sinttaa 6n deꞌiya misiliyaa qonccissuwaa]
Engravings by Doré