“Ne Akeekan Zemppoppa”

“Ne polo wozanan [Yihoowan] ammanetta; ne akeekan zemppoppa.”—LEE. 3:5.

1, 2. (a) Nuna ayba hanotay gakkana danddayii? (b) Unꞌꞌissiyaabay woy kuuyana koshshiyaabay merettiyo wode, woykko paaciyaa eqettiyo wode, nuuni o bolli zemppana koshshii, aybissi?

SINTTIYOa giyo michiyo ootissiyaagee ba paabirkkan ootissiyoobaappe issi issibaa aggiis; yaatidi unddenna oosanchata oosuwaappe kessiis. Sinttiya banakka mata wode kessiyaabadan qoppaasu. A oosuwaappe kiyiyaaba gidiyaakko, ay oottanee? A ba soossi koshshiyaabau miishsha waata demmana danddayay? Paamelo giyo michiyaa Kawotettaa aassiyaageeti keehi koshshiyo moottaa baanau koyaasu; shin a baana koshshii? Sameela giyo yelaga naꞌaa qofissiyaabay haraba. I naatettan deꞌiyo wode pornograafiyaa darotoo beꞌiis. Haꞌꞌi Sameelayyo layttay 20ppe daro; shin i kaseegaadan pornograafiyaa beꞌanau keehi paacettees. I he paaciyaa waatidi xoonana danddayii?

² Unꞌꞌissiyaabay gakkiyo wode, keehippe koshshiya kuushshaa kuuyiyo wode woy paaciyaa eqettiyo wode, neeni ammanettiyoy oonaanee? Nenan ammanettayiyye, woy “ne toohuwaa Xoossan” wottay? (Maz. 55:22) Geeshsha Maxaafay, “GODAA aifee xillotukko xeellees; qassi i ubba wode eta waasuwaa ezggees” yaagees. (Maz. 34:15) Yaatiyo gishshau, nu akeekan zemppiyoogaappe, nu polo wozanan Yihoowan ammanettiyoogee ay keena koshshiyaabee!—Lee. 3:5.

3. (a) Yihoowan ammanettiyoogee ay ay gujjii? (b) Issoti issoti bantta akeekan ammanettanau kajjeelana danddayiyoy aybissee?

³ Polo wozanan Yihoowan ammanettiyoogee nuuni oottiyoobaa a sheniyaadan oottiyoogaa gujjees. Nuuni hegaadan oottiyo waanna ogee, ubbatoo woosan akko shiiqiyoogaanne i kaalettanaadan wozanappe woossiyoogaa. Gidikkonne, polo wozanan Yihoowan ammanettiyoogee darotuyyo metiyaaba. Leemisuwau, Liino giyo michiyaa hagaadan gaasu: “Taani Yihoowan polo wozanan ammanettiyoogaa tamaaranau aggennan baaxetana koshshiis.” Aybissi? A hagaadan gaasu: “Ta aawaara taayyo ayba dabbotinne baawa. Qassi ta aayyiyaa taayyo qoppennaaronne asatettan koshshiyaabaa kunttennaaro. Hegaa gishshau, sohuwaara taayyo koshshiyaabaa kunttiyoogaa tamaaraas.” Liina diccido hanotay a oonanne wozanappe ammanettanau metootanaadan oottiis. Issi urau deꞌiya abbeenne i kase oottido loꞌꞌobaykka ba huuphen ammanettanaadan oottana danddayees. Issi gubaaꞌiyaa cimay ba deꞌuwan beꞌidoban ammanettiyoogan, gubaaꞌiyaara gayttidabaa woosan Xoossaa oychennan barkka polanau doommana danddayees.

4. Ha huuphe yohuwan tobbanabay aybee?

⁴ Yihooway nuuni nu woosaara moggiya ogiyan deꞌanaadaaninne i koyiyoobaa oottanau wozanappe baaxetana mala koyees. Yaatin, nuna qofissiyaabaa a bolli oliyoogaanne nuna gakkiya wolqqaama metuwaa giigissanau nu huuphe baaxetiyoogaa waatidi bessiyaagaadan polana danddayiyoo? Issibaa kuuyana bessiyo wode, ay akeekana koshshii? Nuuni paaciyaa xoonanau baaxetiyo wode woosay keehippe koshshiyoy aybissee? Geeshsha Maxaafan qonccida asatu leemisuwaa wotti denttidi qoppiyoogan, ha oyshatu zaaruwaa beꞌana.

Unꞌꞌettiyo Wode

5, 6. Asoora kawoy yashissido wode Hizqqiyaasi ay oottidee?

⁵ Yihudaa Kawuwaa Hizqqiyaasa xeelliyaagan Geeshsha Maxaafay hagaadan gees: “GODAA i baxuuxiis; GODAA kaalliyoogaa aggibeenna; GODAI Muusa azazido azazota naagiis.” Ee, “Hizqqiyaasi GODAA Israa7eela Xoossaa ammaniis.” (2 Kaw. 18:5, 6) Asoore Kawuwaa Sanaakireebi, waannatiya ola gadaawaanne bana kalꞌꞌatiya harata cora olanchatuura Yerusalaame kiittido wode, Hizqqiyaasi ay oottidee? Asoore wolqqaama olanchati Yihudan deꞌiya gimbbettida daro katamata omooddidosona; hegaappe simmidi, Sanaakireebi Yerusalaame olanau koyiis. Hizqqiyaasi Yihoowa beeta maqidasiyaa biidi hagaadan woossiyoogaa doommiis: “Abeet GODAU, ne xalaalai Xoossaa gidiyoogaa sa7aa kawotettati ubbai erana mala, ha77i simmi, GODAU, nu Xoossau, neeni nuna a kushiyaappe wotta ekka!”—2 Kaw. 19:14-19.

⁶ Hizqqiyaasi ba woosaara moggiyaabaa oottiis. I woossanau beeta maqidasiyaa baanaappe kasekka, waannatiya gadaawaa cashshau asay aybanne zaarennaadan azaziis. Hizqqiyaasi hananabaa yootiya Isiyaasi bana zoranaadankka koyidi akko asaa kiittiis. (2 Kaw. 18:36; 19:1, 2) Hizqqiyaasi oottana bessiyaabaa oottiis. He wode, i Gibxxeppe woy hara shooro biittaappe maaduwaa koyiyoogan, Yihoowa sheniyaara moggennabaa oottidi he hanotaa giigissanau malibeenna. Hizqqiyaasi ba akeekan zemppiyoogaappe, Yihoowan ammanettiis. Yihoowa kiitanchay Sanaakireeba wotaaddarata 185,000ta wori simmin, Sanaakireebi “denddidi” guyye Nanawe biis.—2 Kaw. 19:35, 36.

7. Haanni woosaappenne Yoonaasa woosaappe minttettiyaabaa ay demmana danddayiyoo?

⁷ Mayne gidiyo gishshau unꞌꞌettido wode, Leewa zare gidida Hilqqaaya machiyaa Haannakka Yihoowan ammanettaasu. (1 Sam. 1:9-11, 18) Hananabaa yootiya Yoonaasi, “Taani ta tuggaa giddon de7aidda GODAA xeegaas; xeegin i tau koyiis. Taani Si7ooliyaa ulo giddon de7aidda waassaas; neenikka ta waasuwaa siyadasa” yaagidi woossi simmin, Xoossay a gita moliyaa uluwaappe kessiis. (Yona. 2:1, 2, 10) Nuna gakkiya hanotay ay keena iita gidikkonne, maaduwau Yihoowakko ‘watiwatana’ danddayiyoogaa eriyoogee ayba minttettiyaabee!—Mazamure 55:1, 16 nabbaba.

8, 9. Hizqqiyaasi, Haannanne Yoonaasi banttana qofissin woossidoban qonccidabay aybee, nuuni hegaappe ay tamaariyoo?

⁸ Hizqqiyaasa, Haanninne Yoonaasa leemisuwaappe, metoy gakkin woossiyo wode dogana koshshennabaa xeelliyaagan nuuni goꞌꞌiya timirttiyaa demmoos. Eti heezzaykka metoy gakkido wode seelettidosona. Gidoppe attin, eta qofissidabay eta hanotaanne eti bantta metuwaappe shemppiyoogaa xalla gidennaagaa eta woosay bessees. Eti keehi xoqqu oottidi xeellidobay Xoossaa sunttaa, ayyo goynniyoogaanne a sheniyaa poliyoogaa. Yihoowa sunttaa asay keehi moorido gishshau, Hizqqiyaasi mishettiis. Haanna keehi amottada yelana naꞌay, Seelon deꞌiya gayttiyo dunkkaaniyan oottanaadan immanau qaalaa gelaasu. Yoonaasi qassi, “Taani shiiqqidobaa ubbaakka gattana” yaagiis.—Yona. 2:9.

⁹ Nuuni metuwaappe kiyanau woossiyo wode, nu koshshay aybakko qoriyoogee eratetta. Metuwaappe kiyiyoogaa xallay nuna qofissiiyye, Yihoowanne a halchuwaa nu wozanan wottiyoo? Nuna metoy gakkiyo wode nu meto xallaa qoppana danddayiyo gishshau, ayyaanaabaa darin qoppennan aggana danddayoos. Nuuni Xoossay maaddanaadan woossiyo wode, Yihoowan, a sunttaa geeshshatettaabaaninne ubbabaa haarana bessiyay a gidiyoogee erettiyoogan nu xeelaa wottana koshshees. Hegaadan oottiyoogee, nuuni qoppidobay polettennan ixxikkokka, loꞌꞌo xeelaa oyqqidi deꞌanaadan maaddana danddayees. Nu woosaa zaaroy, Xoossay maaddin he hanotaa gencciyoogaa gidana danddayees.—Isiyaasa 40:29; Piliphphisiyuusa 4:13 nabbaba.

Issibaa Kuuyiyo Wode

10, 11. Yoosaafixi waatidi oyqqana koshshiyaakko erenna hanotay merettido wode ay oottidee?

¹⁰ Ne deꞌuwan wolqqaama kuushshaa waata kuuyay? Geella issibaa kuuya simmada Yihooway neeni kuuyidobaa anjjanaadan woossay? Mooꞌaabatinne Amoonati a olanau issippe yiido wode, Yihudaa kawuwaa Yoosaafixi oottidobaa qoppa. Yihudaa asay eta eqetti teqqanau danddayenna. Yaatin, Yoosaafixi ay oottidee?

¹¹ Geeshsha Maxaafay, “Yoosaafixi yayyidi, GODAA oichchanau ba qofaa qachchiis” yaagees. I Yihudaa biittan ubban xoomaa awaajjidi, “asai ubbai GODAAPPE maaduwaa” koyanaadan issippe shiishshiis. Yaatidi, Yoosaafixi Yihudaanne Yerusalaame yaaꞌaa giddon eqqidi woossiis. A woosaappe amaridaagee hagaadan gees: “Abeet nu Xoossau, neeni eta bolli pirddikkii? Aissi giikko, nuna olanau yiida ha daro olanchchatuura olettanau nuuyyo wolqqi baawa. Nuuni oottanabaakka erokko; shin nu aifeti nena xeelloosona.” Tumu Xoossay Yoosaafixa woosaa siyidi, eta ashshanau maalaalissiyaabaa oottiis. (2 Odi. 20:3-12, 17) Nuuni kuuyiyo wode, ubba qassi Yihoowaara deꞌiya dabbotaa moorana danddayiyaabaa kuuyiyo wode, nu akeekan zemppiyoogaappe Yihoowan ammanettana koshshennee?

12, 13. Kuuyiyoogaara gayttidaagan Kawuwaa Daawiti leemiso gidiyaabaa ay oottidee?

¹² Kuuyanau metennaba milatiya hanotay merettiyo wode nuuni waatana koshshii? Geella hegaa malabaa kase kuuyi eriyo gishshau, sohuwaara kuuyanau qoppana bessii? Kawuwaa Daawiti oottidobay hegaa xeelliyaagan nuuni aassi qoppanaadan maaddees. Amaaleeqa asati Xiqilaaga katamaa woraajjido wode, Daawita maccaasatanne a naata, qassi a asatu maccaasatanne naatakka omooddidosona. Daawiti, “Taani ha woraajjidaageetu geeduwaa kaallada boo?” yaagidi Yihoowa oychiis. Yihooway, “Ee; eta kaallada ba; eta neeni gakkana; omoodettidaageetakka zarana” yaagidi zaariis. Daawiti Yihooway yootidoogaa azazettidi, “Amaaleeqa asati efiido ubbabaa, . . . wotti ekkiis.”—1 Sam. 30:7-9, 18-20.

¹³ Amaaleeqati woraajjoosappe amarida wodee aadhi simmin, Pilisxxeemati Israaꞌeelata olanau yiidosona. Daawiti kaseegaadankka Yihoowa oychidi, qoncce zaaruwaa demmiis. Xoossay, “Ee ola. Taani eta neeyyo aatta immana” yaagiis. (2 Sam. 5:18, 19) Hegaappe simmin takkennan, Pilisxxeemati Daawitaara olettanau zaarettidi yiidosona. He wode i waatidee? I, ‘Hagaa mala naaꞌꞌubaa hagaappe kase beꞌaas. Taani he wodeegaadan Xoossaa morkketa olanau bays’ giidi qoppideeyye, woy Yihoowa kaaletuwaa koyidee? Daawiti ba deꞌuwan kase beꞌidoban zemppibeenna. I he wodekka Yihoowa woossiis. I hegaadan oottidoogan ay keena ufayttideeshsha! He wode ayyo odettida azazoy kaseegaappe dumma. (2 Sam. 5:22, 23) Meeze gidida hanotay woy metoy nuna gakkiyo wode, nu deꞌuwan kase beꞌidoba xallan zemppennaadan naagettana bessees.—Ermmaasa 10:23 nabbaba.

14. Yaasunne Israaꞌeela cimati Gabaaꞌoonatuura gayttidaagan oottidobaappe nuuni ay tamaarana danddayiyoo?

¹⁴ Kaymida gubaaꞌiyaa cimata gujjin, nuuni ubbay polo gidenna gishshau, kuushshaa kuuyiyo wode kaaletuwau Yihoowa oychennan aggenna mala naagettana koshshees. Cincca Gabaaꞌoonati haaho dereppe yiidaba milatidi, ceega maayuwaa maayidi, wotti sikkido caamma wottidi yiido wode, Yaasunne he wode deꞌiya Israaꞌeela cimati oottidobaa qoppa. Yaasunne he cimati Yihoowa oychennan, Gabaaꞌoonatuura sarotettaa maachaa maacettidosona. Eti maacettido maachaa Yihooway guyyeppe maayidaba gidikkonne, a kaaletuwaa koyennan ixxido ha hanotay nu goꞌꞌau Geeshsha Maxaafan xaafettanaadan oottiis.—Yaas. 9:3-6, 14, 15.

Paaciyaa Xoonanau Baaxetiyo Wode

15. Paaciyaa xoonanau woosay keehippe koshshiyoy aybissakko qonccissa.

¹⁵ Nu bolla giddon ‘nagaraa ootissiya higgee’ deꞌiyo gishshau, nuuni nagaraa oottanaadan denttettiya koshshaa xoonanau keehi baaxetana bessees. (Roo. 7:21-25) He baaxee nuuni xoonana danddayiyooba. Waatidi? Paaciyaa xoonanau woosay keehippe koshshiyoogaa Yesuusi bana kaalliyaageetussi yootiis. (Luqaasa 22:40 nabbaba.) Nuuni Xoossaa woossinkka iita amoy woy qofay waayissiyaaba gidikko, he paaciyaa xoonanau aadhida eratettaa immanaadan aggennan ‘Xoossaa woossana’ bessees. Xoossay “borennan ubbau kehatettan” immanaagaa Yaaqoobi xaafiis. (Yaaq. 1:5) I gujjidikka hagaadan giis: “Intteppe [ayyaanaaban] sahettiya urai ooninne de7ikko, woosa keettaa cimata baakko xeeso; eti Godaa sunttan zaitiyaa a tiyidi, ayyo Xoossaa woossona. Ammanuwan Xoossaa woossido woosai hargganchchaa pattana.”—Yaaq. 5:14, 15.

16, 17. Paaciyaa xoonanau maaduwaa koyiyo wode, woossanau bessiya wodee awudee?

¹⁶ Paaciyaa xoonanau woosay keehippe koshshiyaaba gidikkonne, bessiya wodiyan woossana koshshiyoogaa nuuni akeekana bessees. Leemiso 7:6-23n odettida issi yelaga naꞌaabaa qoppa. Saꞌay qammanau lankkilankkiyo wode, shaaramuxa maccaasiyaa deꞌiyoosaa eriiddi yaa biis. Ba liiqo inxxarssan sheleeshshada a cimmin cimettidi, shuhau biya booraadan i geeduwaa kaallidi biis. He yelagay he sohuwaa aybissi biidee? I iita amuwaara baaxetiiddi deꞌiya, wozanaa kunttibeenna, “keehi eeyya” gidiyo gishshataassa gidennan aggenna. (Lee. 7:7) Woosay a keehi maaddanay awudeeshin? Paacee gakkiyo wode awudenne hegaa xoonanau woossiyoogee maaddana danddayiyoogee qoncce. SHin, i woossana bessiyo keehi loꞌꞌo wodee, i heeri baanau koyro qoppiyo wode gidanau koshsheesishin.

¹⁷ Ha wodiyan, issi uri pornograafiyaa beꞌennaadan keehi baaxetana danddayees. SHin, i asho gaytotettaa bessiya misilee woykko biidoy deꞌiyoogaa eriiddi, Intternneetiyan hegaa beꞌees giidi qoppoos. A hanotay Leemiso shemppo 7n odettida yelagaa hanotaara issi mala gidennee? Hegee daafan yeggiyaabay kumido ogiyan biyoogaa doommiyoogaa mala. Issi uri pornograafiyaa beꞌanaadan paacciyaabaa xoonanau, Interneettiyan hegaa bessiyaagaa dooyanaappe kase Yihooway maaddanaadan woossana koshshees.

18, 19. (a) Paaciyaa eqettiyoogee metiyaaba gidana danddayiyoy aybissee, shin he metiya hanotaa waatada xoonana danddayay? (b) Neeni waatanau murttadii?

¹⁸ Paaciyaa xooniyoogee woy iita meeziyaa aggiyoogee deexxiyaaba. PHauloosi, “Nu asatettai amottiyoobaa Geeshsha Ayyaanai ixxees; qassi Geeshsha Ayyaanai amottiyoobaa nu asatettai ixxees” yaagidi xaafiis. Hegaa gishshau, ‘nuuni dosiyoobaa oottokko.’ (Gal. 5:17) Ha paaciyaa xoonanau, iita qofaa qoppiyoogaa doommiyo wode woy paacee gakkiyo wode, nuuni minttidi woossanaunne hegaara moggiyaabaa oottanau koshshees. Nuna “gakkiya paacee, asa ubbaa gakkiya paace malappe attin, ainne dummatenna”; qassi Yihoowa maaduwan ayyo ammanettidi deꞌana danddayoos.—1 Qor. 10:13.

¹⁹ Metoy gakkiyo wode woy kuuyana koshshiya wolqqaamabay merettiyo wode, woykko paaciyaa eqettiyo wode keehi goꞌꞌiya maalaalissiya imotaa, giishin akko woossiyo alꞌꞌo maataa Yihooway nuussi immiis. Woosaa baggaara nuuni an ammanettiyoogaa bessoos. Nuna kaalettiyaanne minttettiya geeshsha ayyaanaa immanaadankka Xoossaa ubbatoo woossana koshshees. (Luq. 11:9-13) Nu akeekan zemppiyaageeta gidennan, ubbatoo Yihoowan ammanettiyaageeta gidoos.

[Tohossa qofaa]

Hassayay?

• Yihoowan ammanettiyoogaara gayttidaagan Hizqqiyaasa, Haanninne Yoonaasa hanotaappe ay tamaaradii?

• Daawitanne Yaasu leemisoy, issibaa kuuyiyo wode akeekay koshshiyoogaa waati qonccissii?

• Paaciyaa eqettanau woossana koshshiyo keehi loꞌꞌo wodee awudee?

[Sinttaa 13n deꞌiya misiliyaa qonccissuwaa]

Paaciyaa eqettanau, woosay keehi maaddiyoy awudee?