SHEMPPUWAA ISSUWA

Xoossaa Xeelliyaagan Tumay Aybee?

Xoossay tumuppe neessi qoppii?

Xoossay ayba mala Xoossee? Ayyo sunttay deꞌii?

Xoossaakko shiiqanaagee danddayettiyaabee?

1, 2. Darotoo oyshshaa oychchiyoogee loꞌꞌo gididoy aybissee?

NAATI oyshaa oychchiyo ogiyaa akeeka eray? Daro naati doonaa pogosaara oyshaa doommoosona. Eranau koyiyoogaappe denddidaagan bantta ayfiyaa borxxu ootti nena xeelliiddi: Away qammi awa bii? Xoolintteti aybippe merettidonaa? Kafuwaa yettaa tamaarissiday oonee? yaagiyaageeta milatiya oyshata oychchoosona. Neeni zaaranau hanettidaagaa keenaa baaxetana danddayaasa; shin zaaranaagee ubbatoo metennaba gidenna. Ubba neeni a mali baawa giido zaaroykka, aybissi? yaagiya hara oyshsaa kaalettana danddayees.

² Oysha oychchiyaageeti naatu xalla gidokkona. Nuuni dicci dicci biiddikka, aggennan oychchoos. Nu hegaadan oottiyoy, haakkana bessiyo iitabaappe haakkanaassa, woykko eraa koshshaa alanaassa. SHin daro asay oyshata, ubba qassi keehi koshshiya oyshata oychchiyoogaa aggiigiyaaba milatees. Haray attikko, zaaruwaa koyiyoogaa aggiigees.

3. Daroti keehi koshshiya oyshatuyyo zaaruwaa koyiyoogaa aggiichchidoy aybissee?

³ Ha maxaafaa koohuwaa bolli deꞌiya oyshaa, kochchooruwan deꞌiya oyshata woykko ha shemppuuwaa doomettan deꞌiya oyshata ane qoppa. Hageeti neeni oychchana danddayiyo keehi koshshiya oyshatuppe amaridaageeta. Gidikkonne, daro asay ha oyshatuyyo zaaruwaa koyiyoogaa aggiichchiis. Aybissi? Geeshsha Maxaafay he oyshatu zaaruwaa oyqqidee? Amarida asati Geeshsha Maxaafaa zaaruwaa akeekanau wayssiyaabadan qoppoosona. Harati oyshaa oychchiyoogaa yeellayiyaabadan qoppoosona. Amarida asati qassi hegaa mala oyshaa zaarana danddayiyay haymaanootiyaa kaalettiyaageetanne tamaarissiyaageeta giidi qofaa qachchoosona. Ne qofayshin, aybee?

4, 5. Deꞌuwan nuuni oychchana danddayiyo keehi koshshiya oyshatuppe amaridaageeti awugeetee? He oyshatu zaaruwaa eranau ayssi koshshidee?

⁴ SHin neeni deꞌuwan keehi koshshiya oyshatuyyo zaaruwaa demmanau koyennan aggakka. Neeni issitoo issitoo: ‘Deꞌuwau halchchettidabi aybee? Deꞌo giyoogee hagaa xalleeyye? Xoossay tumuppe ay mala Xoossee?’ gaada oychchanaagau siree baawa. Hegaa mala oyshaa oychchiyoogee loꞌꞌoba; qassi aliyaanne ammanttiya zaaruwaa demmana gakkanaashin aggana koshshenna. Erettida asttamaaree Yesuus Kiristtoosi: “Woossite; intte ekkana. Koyite; intte demmana. Kare yiidi xeesite; intteyyo karee dooyettana” yaagiis.—Maatiyoosa 7:7.

⁵ Keehi koshshiya oyshatuyyo zaaruwaa demmanau ‘koyiyaaba’ gidikko, he koshshay keehi daro woyto demissiyaaba gidiyoogaa beꞌana danddayaasaa. (Leemiso 2:1-5) Hara asati neessi ay giidi odidaba gidikkonne, zaaroy deꞌees; hegaa qassi Geeshsha Maxaafan demmana danddayaasaa. Zaaroti akeekanau wayssiyaageeta gidokkona. Hegaappe ubba hidootay deꞌanaadaaninne ufayssaa demanaadan oottoosona. Qassi ha wodiyankka neeni ufayttada deꞌanaadan maaddana danddayoosona. Koyro ane, daro asau deexo gidida issi oyshaa beꞌoos.

XOOSSAY QARETI BAYNNA QOPPENNAAGEEYYE?

6. Daro asay asaa naata gakkiya tuggaara gayttidaagan Xoossay nuussi qoppenna yaagidi qoppiyoy aybissee?

⁶ Daro asay ha oyshaa zaaroy ee yaagiyaagaa giidi qoppees. Eti: ‘Xoossay qoppiyaaba gidiyaakko, alamee haꞌꞌiigaappe dumma hanotan deꞌenneeshin?’ yaagidi qoppoosona. Nuuni nu yuushuwan deꞌiyaabaa xeelliyo wode, alamee olan, ixuwaaninne barchchiyan kumidoogaa beꞌoos. Qassi nuuni nu huuphen sahettoos, tuggatoosinne nu siiqiyoogeeta hayqoy nuuppe shaakkiichchees. Yaatiyo gishshau daroti, ‘Xoossay nuussinne nuna metiyaabau qoppiyaaba gidiyaakko, ha hanotati gakkennaadan oottana danddayenneeyye?’ yaagoosona.

7. (a) Haymaanootiyaa kaalettiyaageeti daro asay Xoossaa meqetti baynnabadan qoppanaadan waatidi oottidonaa? (b) Nuna tuggaa bessana danddayiya paacetubaa Geeshsha Maxaafay tumuppe ay tamaarissii?

⁷ Hegaappekka iitidi, haymaanootiyaa asttamaareti baggaade asay Xoossaa meqetti baynnabadan qoppana mala oottoosona. Waatidi? Iitabay asaa bolli gakkiyo wode, hegee Xoossaa shene yaagoosona. Hegaadan giyoogan, hegaa mala asttamaareti asaa gakkiya iitabata Xoossaa bolli wottoosona. Xoossaa xeelliyaagan tumay hegee? Tumuppe Geeshsha Maxaafay tamaarissiyoy aybee? Yaaqooba 1:13y, “Ooninne paacettido wode, ‘Tana Xoossai paaccees’ gooppo. Ayssi giikko, Xoossai iitan paacettanau danddayenna; qassi i ba huuphen oonanne paaccenna” yaagees. Yaatiyo gishshau, neeni ne yuushuwan deꞌiya alamiyan beꞌiyo iitabau pulttoy mulekka Xoossaa gidenna. (Iyyooba 34:10-12) Iitabay polettishin i coꞌꞌu gi xeelliyoogee tuma. SHin issibi polettishin coꞌꞌu gi xeelliyoogaanne polettanaadan oottiyoogaa giddon gita dummatettay deꞌees.

8, 9. (a) Iitatettaa coꞌꞌu gi xeelliyoogaanne deꞌanaadan oottiyoogaa giddon deꞌiya dummatettaa waatada leemisuwan yootana danddayay? (b) Asay iita ogiyaa kaallishin coꞌꞌu gi xeellidoogan, Xoossaa mooranchchadan xeellana bessennay aybissee?

⁸ Ane leemisuwau, son asa gamma gakkida naꞌi deꞌiyo, eranchcha gidida siiqiya aawaba qoppa. Naꞌay makkalidi sooppe kiyanau qofaa qachchiyaaba gidikko, a aaway wolqqan a teqqenna. Naꞌay iita deꞌo ogiyaa kaallidi metuwan geliis. He naꞌay metuwan gelanaadan oottiday a aawayiyye? CHii; gidenna. (Luqaasa 15:11-13) Hegaadankka, asay iita ogiyaa kaallanau doorido wode Xoossay eta teqqibeenna; shin eta metoy gakkanaadan oottiday Xoossaa gidenna. Hegaa gishshau, asaa naatu metuwaa ubbaayyo oyshettiyay Xoossaa yaagana bessennaagee qoncce.

⁹ Asay iita ogiyaa kaallishin Xoossay coꞌꞌu gi xeelliyo loꞌꞌo gaasoy deꞌees. I nuna Medhdhida wolqqaamaanne eranchchaa gidiyo gishshau, issibaa oottiyo gaasuwaa nuussi yootana koshshenna. Gidikkonne, nuna siiqiyo gishshau hegaadan oottiis. SHemppuwaa 11n he gaasotubaa, darobaa tamaarana deꞌaasa. SHin nuna gakkiya metotun Xoossay oyshettennaagaa ammanetta. Hegaappe ubba, metoti giiganaagau bixee baynna hidootaa immiis!—Isiyaasa 33:2.

10. Iitatettay ehiidobaa ubbaa Xoossay xayssanaagaa amanettana danddayiyoy aybissee?

¹⁰ Harabay qassi, Xoossay Geeshsha. (Isiyaasa 6:3) Hegee, i xillo yaagiyoogaa. A bolli ayba iitatettinne baawa. Yaatiyo gishshau, an muleera ammanettana danddayoos. Moorobaa oottiya asaa naata hegaadan ammanana danddayokko. Aawatetti deꞌiyo, ubba a mala ammanettiyaagee baawa giido urikka, iita asati medhdhiyo metuwaa giigissana danddayenna. SHin Xoossay aybanne oottana danddayees. I iitatettay asaa bolli ehiidobaa ubbaa xayssana danddayees; qassi xayssana. Xoossay hegaa oottiyo wode, iitatettaa merinau xayssiyo ogiyan oottees!—Mazamure 37:9-11.

NUNA GAKKIYA PIRDDA PACAN XOOSSAAYYO AYBI SIYETTII?

11. (a) Pirddi paccido hanotan Xoossaassi aybi siyettii? (b) Nena tuggay gakkiyoogan Xoossaayyo aybi siyettii?

¹¹ Hegee gakkanaashin, alamiyan hanettiiddi deꞌiyaabaunne nena gakkiiddi deꞌiyaabau Xoossaayyo aybi siyettii? Geeshsha Maxaafay, Xoossay “xillobaa dosees” yaagidi tamaarissees. (Mazamure 37:28) Hegaa gishshau, suure gididabaynne bala gididabay a keehippe qofissees. I pirddi paccido aybabanne ixxees. Geeshsha Maxaafay, beni wode alamiyan iitabay kumido gishshau, ‘Xoossay ba wozanan keehippe seelettidoogaa’ yootees. (Doomettaabaa 6:5, 6) Xoossay laamettibeenna. (Milkkiyaasa 3:6) I haꞌꞌikka kumetta alamiyan deꞌiya tuggaa ixxees. Qassi, Xoossay asay tuggatishin beꞌiyoogaakka ixxees. Geeshsha Maxaafay: ‘I intteyyo qoppees’ yaagees.—1 PHeexiroosa 5:7.

12, 13. (a) Nuussi siiquwaa milatiya loꞌꞌo eeshshati deꞌiyoy aybissee? Siiqoy alamiyaassi deꞌiya nu xeelaa waatidi bochchii? (b) Xoossay alamiyan deꞌiya metuwaa xeelliyaagan issibaa oottanaagee attennaagaa neeni ammanettana danddayiyoy aybissee?

¹² Asay tuggatiyoogaa Xoossay beꞌanau koyennaagaa waanidi ammanettana danddayiyoo? Hegaa ammanttiya harabaa ane beꞌa. Geeshsha Maxaafay, asay Xoossaa leemisuwan merettidoogaa tamaarissees. (Doomettaabaa 1:26) Yaatiyo gishshau, nuussi loꞌꞌo eeshshati deꞌiyoy, Xoossaassi loꞌꞌo eeshshati deꞌiyo gishshataassa. Leemisuwau, issi geeshsha asi tuggatiyoogaa beꞌada mishettay? Hegaa mala pirdda pacay nena qofissiyaabaa gidikko, Xoossaa neegaappe aaruwaa qofissiyoogaa ammanetta.

¹³ Asaayyo deꞌiya keehi loꞌꞌobatuppe issoy siiquwaa bessana danddayiyoogaa. Hegeekka Xoossaa siiquwaa zaaridi qonccissiyoogaa. Geeshsha Maxaafay, “Xoossai siiqo” gidiyoogaa tamaarissees. (1 Yohaannisa 4:8) Nuuni siiqiyoy Xoossay siiqiyo gishshataassa. Siiqoy nena alamiyan neeni beꞌiyo tuggaanne pirddaa pacaa xayssanaadan denttettanee? Neeyyo wolqqay deꞌiyaakko, hegaadan oottuutii? Neeni oottanaagee erettidaba! Hegaadankka, Xoossay tuggaanne pirddaa pacaa xayssanaagaa ammanettana danddayaasa. Ha maxaafau kochchooruwan qonccida hidootati aymo woykko hanennaba gidokkona. Xoossay qaalaa gelidobati polettanaagee erettidaba! Gidikkonne, neeni he hidootatun ammanettanau, he qaalaa gelida Xoossaabaa loyttada erana bessees.

XOOSSAY, NEENI A ERANA MALA KOYEES

14. Xoossaa sunttay oonee? An ayssi goꞌettana koshshii?

¹⁴ Issi uri nena erana mala neeni koyikko, waatana danddayay? Ne sunttaa assi yootikkii? Xoossaassi sunttay deꞌii? Daro haymaanooteti a sunttay “Xoossaa” woy “Godaa” yaagoosona; shin hegeeti ayyo buzo suntta gidokkona. Hegeeti “kawuwaa,” “pirezddanttiyaa” giyoogaadan bonchcho sunttata. Geeshsha Maxaafay, Xoossaassi daro bonchcho sunttati deꞌiyoogaa tamaarissees. “Xoossaa” nne “Godaa” giyo xeessati hegeetuura qoodettiyaageeta. Gidoppe attin, Geeshsha Maxaafay Xoossaayyo Yihoowa geetettiya buzo sunttaykka deꞌiyoogaa yootees. Mazamure 83:18y: “Ne xalaalai GODAA [“Yihoowa,” NW] gidiyoogaa, neeni Ubbaappe Xoqqiya Xoossai sa7aa ubbaa haariyoogaa eti erona” yaagees. Ne qaalan birshshettida Geeshsha Maxaafan he sunttay xayikko, hegee waanidi hanidaakko eranau ha maxaafan sinttaa 195-7n deꞌiya Gujo Timirttiyaa beꞌana danddayaasa. Xoossaa sunttay beni wode kushiyan xaafettida Geeshsha Maxaafaa xuufetun daro shaꞌutoo xaafettidoogee tumattiis. Yaatiyo gishshau, Yihooway neeni a sunttaa eranaadaaninne an goꞌettaanaadan koyees. Yaanikko, i bana neessi erissanau Geeshsha Maxaafaa goꞌettiiddi deꞌees gaana danddayettees.

15. Yihoowa geetettiya sunttaa birshshettay aybee?

¹⁵ Xoossay bana loytti qonccissiya birshshettay deꞌiyo sunttaa baassi kessiis. Yihoowa geetettiya a sunttaa birshshettay, Xoossay qaalaa gelido aybabaanne gido, woykko ba qofan halchchido ayba halchchonne polana danddayiyoogaa bessees.a Xoossaa sunttay keehippe dumma suntta. He sunttay a xallaassi bessees. Yihooway daro ogiyan dumma. Hegee waanidi hanidee?

16, 17. Kaallidi deꞌiya bonchcho sunttatuppe, giishin: (a) “Ubbaappe Wolqqaamaa”, (b)“Merinaa Kawuwaa”, (c) “Medhdhidaagaa” giyaagaappe Yihoowaabaa ay tamaarana danddayiyoo?

¹⁶ Mazamure 83:18y Yihoowa xeelliyaagan: ‘Ne xalaalay . . . Ubbaappe Xooqqiyaagaa’ yaagees. Hegaadankka, “Ubbaappe Wolqqaama” geetettiday Yihoowa xalaala. Ajjuutaa 15:3y: “Godau, Ubbaappe Wolqqaama Xoossau ne oosoi gitanne garamissiyaagaa. Asa zare ubbaa Kawuwau, ne ogee xillonne tuma” yaagees. “Ubbaappe Wolqqaama” giya bonchcho sunttay, ooppenne wolqqaamay Yihoowa xalaala gidiyoogaa nuna tamaarissees. A wolqqaara geeddarissiyoobi baawa; aybippenne aadhdhiyaagaa. Yihooway, 1 Ximootiyoosa 1:17n, ‘merinaa Kawuwaakka’ geetettiis. ‘Merinaa Kawuwaa’ giya bonchcho sunttay qassi, Yihooway hara ogiyan dumma gidiyoogaa akeekissees. Ubba wode deꞌiday a xalaala. Mazamure 90:2y: “Merinaappe merinaa gakkanaayyookka neeni Xoossaa” yaagees. Hegee au hoola gaanaadan oottiya qofa gidennee?

¹⁷ Yihooway, Medhdhidaagee a xalaala gidiyoogankka dumma. Ajjuutaa 4:11: “Nu Godau Xoossau, neeni bonchchuwaa, sabaanne wolqqaa ekkanau bessaasa. Aissi giikko, ubbabaa neeni medhdhadasa; qassi ubbabaikka neeni koyidoogaadan haniisinne de7⁠iis” yaagees. Neeni qoppana danddayiyo ubbabi—saluwan deꞌiya ayfiyan beettenna ayyaana meretatuppe doommidi, qammi saluwan kumiya xoolintteti, mitti ayfiyo ayfeti, abbaaninne shaafan wadhdhiya moleti—ubbabi deꞌidoy, Medhdhidaagee Yihoowa gidiyo gishshataassa!

YIHOOWAKKO SHIIQANA DANDDAYAY?

18. Issi issi asay Xoossaakko mule shiiqana danddayennabadan qoppiyoy aybissee? SHin Geeshsha Maxaafay ay tamaarissii?

¹⁸ Yihoowassi deꞌiya maalaalissiya eeshshatubaa nabbabidi, issi issi asay guuttaa yayyees. Xoossay banttappe keehi xoqqa gidiyo gishshau, eti akko mule shiiqana danaddayennabadaaninne ubba hegaa mala xoqqa Xoossay eta ebeli godoonne geennabadan qoppoosona. SHin ha qofay likkee? Geeshsha Maxaafay hegaappe keehi dummatiyaabaa tamaarissees. I Yihoowa xeelliyaagan: “Xoossai nuuppe ooyyoonne haaho gidenna” yaagees. (Oosuwaa 17:27) Geeshsha Maxaafay ubba nuna, “Xoossaakko shiiqite; ikka inttekko shiiqana” yaagidi minttettees.—Yaaqooba 4:8.

19. (a) Nuuni Xoossaakko shiiqiyoogaa waatidi doommana danddayiyoo? Qassi ayba goꞌꞌaa demmiyoo? (b) Xoossaa eeshshatuppe neeni keehi dosiyoogeeti awugeetee?

¹⁹ Neeni waanada Xoossaakko shiiqana danddayay? Koyro, haꞌꞌi neeni oottaydda deꞌiyoobaa oottiyoogaa, giishin Xoossaabaa tamaariyoogaa aggoppa. Yesuusi: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7⁠o” yaagiis. (Yohaannisa 17:3) Ee, Geeshsha Maxaafay Yihoowabaanne Yesuusabaa tamaariyoogee ‘merinaa deꞌuwau’ kaalettiyoogaa tamaarissees! Nuuni beꞌidi aadhdhidoogaadan, “Xoossai siiqo.” (1 Yohaannisa 4:16) Yihoowayyo keehi loꞌꞌonne a dosanaadan oottiya hara daro eeshshatikka deꞌoosona. Leemisuwau Geeshsha Maxaafay, Yihooway “qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa” yaagees. (Kessaabaa 34:6) I “kehanne atto giyaagaa.” (Mazamure 86:5) Xoossay gencciyaagaa. (2 PHeexiroosa 3:9) Geeshsha Maxaafaa neeni daro nabbabaydda biyo wode, Yihooway baassi hageetinne hara a dosanaadan oottiya daro eeshshati deꞌiyoogaa waatidi bessidaakko beꞌaasa.

20-22. (a) Nuuni Xoossaa beꞌana danddayennaagee akko shiiqennaadan teqqii? Qonccissa. (b) Issi issi asati neessi qoppidi ne ay oottanaadan minttettana danddayiyoonaa? SHin neeni ay oottana bessii?

²⁰ Xoossay ayyaana gidiyo gishshau, neeni a beꞌana danddayennaagee tuma. (Yohaannisa 1:18; 4:24; 1 Ximootiyoosa 1:17) Gidikkonne, Geeshsha Maxaafan xaafettidabatuppe abaa tamaarada, issi ura eriyoogaadan a erana danddayaasa. Mazamuriyaa yexxiyaagee giidoogaadan, neeni ‘GODAA loꞌꞌotettaa beꞌana’ danddayaasa. (Mazamure 27:4; Roome 1:20) Neeni Yihoowabaa gujja gujja tamaariyo wode, i neeyyo kaseegaappe qoncciiddi baananne neeni a siiqiyoonne akko shiiqiyo daro gaasuwaa eraydda baana.

²¹ Geeshsha Maxaafay nuuni Yihoowa nu Aawaadan xeellana mala tamaarissiyoy aybissakko neeni takkaydda akeekana. (Maatiyoosa 6:9) I nuuyyo deꞌuwaa immidoogaa xalla gidennan, siiqiya ay aawaynne ba naatussi koyiyoogaadan, nuuni nu deꞌuwan aybippenne aaruwan ufayttanaadan koyees. (Mazamure 36:9) Geeshsha Maxaafay asaa naati Yihoowaara dabbotana danddayiyoogaakka tamaarissees. (Yaaqooba 2:23) Neeni ubbabaa Medhdhida Xoossaa dabbo gidana danddayiyoogaa qoppa!

²² Neeni Geeshsha Maxaafaappe darobaa tamaaraydda biyo wode, issi issi asati neessi qoppidi ne xannaꞌenna mala minttettana danddayoosona. Eti neeni ne ammanuwaa laammiyoobadan hirggana danddayoosona. SHin ooninne neeni medhdhiyo, awudenne demmenna dabbotaa duuttana mala oottiyooba siyoppa.

23, 24. (a) Neeni tamaaraydda deꞌiyoobata xeelliyaagan aggennan oychchana bessiyoy aybissee? (b) Kaalliya shemppuwan beꞌana allaallee aybee?

²³ Neeni koyro heeran akeekanau metootanabati deꞌanaagee qoncce. Maaduwaa oychchanau amarida keenan ne huuphiyaa kawushshiyoogaa koshshana danddayees; gidikkonne yeellatada oychchennan aggoppa. Yesuusi, issi uri guutta naꞌadan ba huuphiyaa kawushshiyoogee loꞌꞌo gidiyoogaa yootiis. (Maatiyoosa 18:2-4) Qassi, nuuni eriyoogaadan naati keehi daro oyshaa oychchoosona. Neeni oychchiyoobau zaaruwaa demmana mala Xoossay koyees. Xoossaabaa eranau yeemottida amarida asati, Geeshsha Maxaafan sabettidosona. Eti tamaariiddi deꞌiyoobay tumakkonne shaakkanau, Geeshsha Maxaafaappe akeekan pilggidosona.—Oosuwaa 17:11.

²⁴ Yihoowabaa tamaariyo aybippenne aadhdhida ogee Geeshsha Maxaafaa pilggiyoogaa. I hara ayba maxaafappenne dumma. Ayba ogiyan dummee? Kaalliya shemppuwan he allaalliyaa beꞌana.

[Tohossa qofaa]

GEESHSHA MAXAAFAY TAMAARISSIYOOBAA

▪ Xoossay neessi ne huuphen qoppees. —1 PHeexiroosa 5:7.

▪ Xoossaayyo buzo sunttay Yihoowa.

—Mazamure 83:18 NW.

▪ Yihooway akko shiiqana mala nena shoobbees.—Yaaqooba 4:8.

▪ Yihooway siiqiyaagaa, qarettiyaagaanne maariyaagaa.—Kessaabaa 34:6; 1 Yohaannisa 4:8, 16.

[Sinttaa 12n diya misiliyaa]

Issi uri nena eranaadan koyikko, ne sunttaa yootikkii? Xoossay ba sunttaa nuussi Geeshsha Maxaafan qonccissiis

[Sinttaa 13n diya misiliyaa]

Geeshsha Maxaafay ubbabaa Medhdhida siiqiyaagee Yihoowa gidiyoogaa tamaarissees

[Sinttaa 14n diya misiliyaa]

Issi loꞌꞌo aaway ba naatussi bessiyo siiqoy, saluwan deꞌiya nu gita aaway nuna siiqiyo siiquwaa leemiso