Hagaappe Sinttanau Daafabay Deꞌenna!

ISSI uri, “Mata wode daafabay xayana” yaagidi yootiyaakko neeyyo aybi siyettanee? Neeni geella, “Aymottayiyye? Daafabay ubbatto deꞌiyaaba” gaana danddayaassa. Woy ‘I oona naacii?’ gaada qoppana danddayaasa.

Meretay daafabaa gattiyoogee attennaba milatikkokka, ha hanotay tumuppe laamettanaagaa hidootanaadan oottiyaabay deꞌees. Gidikkokka, he laamiyaa asaa naati baaxetidi ehookkona. Asaa naati meretan hanettiyaabaa teqqiyoogee woy laammiyoogee atto shin, hegee waanidi, qassi aybissi haniyaakko loytti erana danddayokkona. Aadhida eratettaaninne akeekan erettida, beni Israaꞌeela Kawuwaa Solomoni hagaadan giidi xaafiis: “Saloppe garssa baggan oosettida oosuwaa asi pilggidi eranau danddayennaagaa eraas. Asi ai keenaa daafuridi pilggi xeellikkonne, a birshshettaa eranau danddayenna. Qassi aadhdhida eranchcha asi, ‘Taani hagaa erais’ giikkonne, i eranau danddayenna.”—Era. 8:17.

Asaa naati meretay gattiyo daafabaa teqqana danddayennaba gidikko, yaatin teqqana danddayiyay oonee? Geeshsha Maxaafay he laamiyaa ehaanay nuna Medhidaagaa gidiyoogaa yootees. Haattay yuuyi yuuyi ba sohuwaa simmiyoogaa mala, saꞌaanne a yuushuwan deꞌiyaabaa giddon deꞌiya gaytotettaa giigissidaagee Xoossaa. (Era. 1:7) Qassi asaa naatuugaappe dumma ogiyan, Xoossay ba koyiyoogaadan goꞌettana danddayiyo, zawi baynna wolqqay au deꞌees. Hananabaa yootiya Ermmaasi, “Ubbaa Haariya GODAU, neeni salotanne sa7aa ne gita wolqqaaninne ne yeddido kushiyan medhdhadasa! Neessi danddayettennabi mulekka baawa” yaagidi, hegau naqaasha gidiyaabaa yootiis. (Erm. 32:17) Xoossay saꞌaanne an deꞌiyaabaa medhido gishshau, asaa naati saꞌan sarotettaaninne woppan deꞌana mala, ubbabaa waati giigissana danddayiyaakko erees.—Maz. 37:11; 115:16.

Yaatin Xoossay koshshiya laamiyaa waatidi ehaanee? Ha wodiyan haniiddi deꞌiya yashshiyaabati ‘wodiyaa wurssettaayyo’ ‘malaata.’ Yesuusi, “Intte hegee haniyoogaa be7iyo wode, Xoossaa kawotettai gakkana matattidoogaa [erite]” yaagiis. (Maa. 24:3; Luq. 21:31) Xoossay saluwan essido a Kawotettay saꞌan gita laamiyaa ehaana; mereta wolqqatakka ubba azazana. Xoossaa Yihoowayyo hegaadan oottiyo wolqqay deꞌiyaaba gidikkokka, he oosuwaa ba naꞌau immanau dooriis. Hananabaa yootiya Daaneeli Yesuusa xeelliyaagan, “Asai ubbai, kawotettati ubbainne dumma dumma qaalan haasayiya zareti ubbai ayyo haarettana mala, maatai, bonchchoinne kawotettai ayyo imettiis” yaagiis.—Dane. 7:14.

Xoossaa Naꞌaa Yesuus Kiristtoosi, saꞌay deꞌanau ufayssiya soho gidana mala, koshshiya ubbabaa laammanaadan ayyo wolqqay imettiis. Yesuusi naaꞌꞌu shaꞌu layttappe kase saꞌan deꞌido wode, mereta wolqqata azazana danddayiyoogau xeera beso gidiyaaba oottiis. Issi wode Yesuusinne i erissiyo ashkkarati Galiila Abbaa wolwoluwan pinnishin “wolqqaama gotee denddin, beetai wolwoluwaa shocin, haattai kumana gakkanaassi wolwoluwaa giddo gelees.” Yesuusi erissiyo ashkkarati bantta shemppuwau keehippe yayyidi, Yesuusi ashshanaadan oychidosona. Yesuusi ay oottidee? I “gotiyaa, ‘Co77u ga’ giidi abbaakka, ‘Woppu ga’ giis; goteekka co77u gin, ubbabaikka woppu giis.” I erissiyo ashkkarati maalaalettidi, “Hagee laa harai atto, goteenne abbai azazettiyoogee oonee?” yaagidosona.—Mar. 4:37-41.

Yesuusi guyyeppe saluwaa bin, hegaappe dariya wolqqaynne maatay ayyo imettiis. I Xoossaa Kawotettaa Kawo gidiyoogaadan, saꞌaa bolli asay sarotettaaninne woppan deꞌanaadan koshshiya ubbabaa laammanau au aawatettaynne giday deꞌees.

SHin nuuni qommoora beꞌidoogaadan, metuwaappenne daafabaappe daroy asi ehiyooba, giishin bantta xallaa siiqiyaanne yaaretiya asati bessennabaa oottiyoogee ehiidoba woykko yaa iitanaadan oottidoba. Hegaa malabaa oottiyoogaa aggennanne laamettenna asata he Kawotettay waatanee? Geeshsha Maxaafay Goday Yesuusi “ba wolqqaama kiitanchchatuura tamaa lacuwaa giddon saluwaappe yiyo wode, . . . Xoossai bana erennaageetanne nu Godaa Yesuus Kiristtoosa wonggeliyaa mishiraachchuwaayyo azazettennaageeta” qaxxayanaagaa yootees. Ee, Yesuusi ‘saꞌaa xayssiyaageeta xayssana.’—2 Tas. 1:7, 8; Ajj. 11:18.

Hegaappe simmin, ‘kawotu Kawoy,’ Yesuus Kiristtoosi saꞌaa wolqqata ubbaa azazana. (Ajj. 19:16) I he Kawotettau haarettiyaageeta hegaappe simmin ayba bashshaynne gakkennaadan oottana. Boniyaa balgguwaa malaban carkkuwaa hanotay laamettiyoogee, asaa naata goꞌꞌiyaaba gidanaadan oottanau i ba wolqqaa goꞌettana. Yihooway ba asau daro wodiyaappe kase, “Taani intteyyo iraa wodiyan bukissana; biittaikka kattaa darissidi mokkana; dembbaa mittatikka aifiyaa aifana” yaagidi qaalaa gelidobay polettana. (Wog. 26:4) Asay bashshay xayssana giidi hirggennan keettaa keexxana. Eti “keettata keexxidi, etan de7ana; woiniyaa turatakka tokkidi, eta aifiyaa maana.”—Isi. 65:21.

Neeni Ay Oottana Bessii?

Neeni hara daro asaagaadan, ubbabaa xayssiya daafabay baynna alamiyan deꞌanau amottiyoogee erettidaba. Yaatin neeni yan deꞌanau ay oottana koshshii? ‘Xoossaa erennaageetinne mishiraachuwaayyo azazettennaageeti’ sinttappe yaana, daafabay baynna alamiyan deꞌenna gishshau, issi uri ha wodiyan Xoossaabaa tamaarananne i saꞌaa haaranaadan essido Kawotettau exatana bessiyoogee qoncce. Xoossay nuuni a eranaadaaninne i ba Naꞌaa baggaara essido Kawotettaa mishiraachuwau azazettanaadan koyees.

Hegaadan oottiyoogaa tamaariyo keehippe loꞌꞌo ogee Geeshsha Maxaafaa akeekan xannaꞌiyoogaa. Kawotettaa haaruwan woppu giida heeran deꞌanau gidaa kunttanaadan maaddiya kaaletoy Geeshsha Maxaafan deꞌees. Geeshsha Maxaafay tamaarissiyoobaa eranau nena maaddanaadan Yihoowa Markkata aybissi oychikkii? Neeni oychikko eti nena maaddana. Neeni Xoossaa eranaunne mishiraachuwau azazettanau baaxetiyaaba gidikko, Leemiso 1:33y, “Taani odiyoogaa siyiyaageeti ubbai woppu giidi, saro de7ana; metuwaa hirggaappekka shemppana” yaagidi yootiyo hidootay neeyyo polettanaagee erettidaagaa.