Meretay Daafabaa Gattiyo Wode Gencciyoogaa
Meretay gattiyo daafabay dari dari biyoogaanne gattiyo qohoy gujjiyoogaa beꞌiyo wode, issi uri genccanau ay oottana danddayii? Oottana danddayiyo goꞌꞌiyaabata ane beꞌoos.
Iitabaappe baqata. Geeshsha Maxaafay, “Cincca asi iitaa be7idi, qosetti aattees; shin akeeki paccido asi metuwan gelidi qohettees” yaagees. (Lee. 22:3) Hagee daafabaara gayttidaagan maaddiya, aadhida eratetta zore. Biitta garssa suuloy (volkkeeno) xuuqqanaagee, wolqqaama diꞌoy diꞌꞌanaagee woy gotee denddanaagee kasetidi odettiyo wode, he heeraappe baqatidi harasaa biyoogee eratetta. Deꞌoy keettaappe woy hara aquwaappe aaruwan alꞌꞌo.
Issi issi asay wolqqaama qohoy gakkenna heeraa dooridi deꞌana danddayees. Aawatettay deꞌiyo issi uri hagaadan giis: “Daafabay asay corattidi deꞌiyo heeraa qohees. Qohuwaappe dariya baggay gakkiyo heeray kumetta saꞌan keehi guutta; qassi sinttappe wolqqaama bashshaappe dariya baggay gakkanay he sohotuuna.” Leemisuwau, abbaa doonan deꞌiya, garatiya heeran woykko darotoo biittay qaaxxiyo heeran hegaa malabay gakkana danddayees. Neeni hegaa mala heeran deꞌennan aggana woy hegaa mala heeraappe harasaa baada deꞌana danddayikko, daafabay nena darin qohennan aggana danddayees.
Kasetada halcha. Neeni naagettiyaaba gidikkokka, meretay gattiyo daafabay ne bolli qoppennan gakkana danddayees. Neeni kasetada halchiyaaba gidikko, hegaa malabay gakkiyo wode qohettennan attanau danddayaasa. Hegee qommoora odettida, Leemiso 22:3 zoriyaarakka moggiyaaba. Qoppennabay gakkiyo wode sohuwaara ekkada biyo keehippe koshshiyaabaa giigissa wottadii? Akkamuwan koyro maaduwau koshshiyaabata, uyiyo haattaa, moorettenna qumaanne xaafetti uttida keehi koshshiyaabata oyqqiyoogee loꞌꞌo gidiyoogaa, 1-2-3 of Dizaster Ejukeeshin giyo xuufee yootees. Gakkana danddayiya daafabaa ubbaanne he ubba hanotan ay oottana danddayiyaakko so asaara tobbiyoogeekka eratetta.
Xoossaara dabbotaa minttada deꞌa. Hegee ayba hanotankka maaddiyaaba. Geeshsha Maxaafay, Xoossay ‘nu waaye ubban nuna minttettiya, maarotettaa Aawaanne minttetto ubbaa Xoossaa’ gidiyoogaa yootees. Hara xiqisee qassi i ‘kayyottidaageeta minttettiya Xoossaa’ gidiyoogaa yootees.—2 Qor. 1:3, 4; 7:6.
Ee, Xoossay banan ammanettiyaageetu bolli gakkiyaabaa loyttidi erees. I siiqiya Xoossaa, qassi dumma dumma ogiyan minttettees. (1 Yoh. 4:8)Maalaaliyaabau gidennan a ayyaanau Xoossaa woossiyoogee, aybiininne maaddana danddayees. Daafabay gakkidoogeeti minttettiyaanne woppissiya xiqiseta hassayanaadan geeshsha ayyaanay maaddana danddayees. Xoossau ammanettidi oottiyaageeti beni Israaꞌeela kawuwaa Daawitaagaadan, “Neeni ta GODAI tanaara de7iyo gishshau, taani haiquwaa milatiya xumaa giddoora biikkokka, iitabau yayyikke. Ne gatimainne ne guufee tana minttettoosona” yaagana danddayoosona.—Maz. 23:4.
Kiristtaaneti issoy issuwaa maaddoosona. Koyro xeetu layttan Agaaboosa giyo Kiristtaanee, “sa7a ubban gita namisai denddanaagaa . . . hananabaa yootiis; hegee hanidoogee Qalaudeyoosa kawotettaa wodiyaana.” He namisay Yihudan deꞌiya, Yesuusi erissiyo ashkkaratuppe darota keehippe qohiis. Harasan deꞌiya erissiyo ashkkarati bantta mala Kiristtaaneti keehippe metootidoogaa siyido wode ay oottidonaa? He taarikee, “Kaalliyaageeti huuphiyan huuphiyan bantta wolqqaa keenaa miishshaa peeridi, Yihudan de7iya bantta ishanttussi maaduwaa yeddanau qofaa qachchidosona” yaagees. (Oos. 11:28, 29) Etassi koshshiyaabaa siiquwan kunttidosona.
Ha wodiyan wolqqaama bashshay gakkiyo wode Xoossaa ashkkarati hegaa malabaa oottoosona. Yihoowa Markkati bantta mala Kiristtaaneta maaddiyoogan keehippe erettoosona. Leemisuwau, Usuppune 27, 2010n, CHiile biittan biittay qaaxxido wode, Yihoowa Markkati qohettidaageeta sohuwaara maaddidosona. Sunaami giyo beetay i keettaa xayssido, Karla hagaadan gaasu: “Wonttetta gallassi [nu mala Kiristtaaneti] nuna maaddanau harasaappe yiidoogaa beꞌidoogee minttettiis. Bantta dosan oottiya he ishanttu kehatettan nuna minttettidaagee Yihoowa gidiyoogee erettidaba. Tana siiqiyaanne naagiya uri deꞌiyoogaa eraas.” Yihoowa Markka gidenna i aayee aaway, Yihoowa Markkati maaddido ogiyaa xomoosidi, “Hagee taani ta woosa keettan daro layttau beꞌidoobaappe keehi dummatiyaaba” yaagiis. I beꞌidobay Yihoowa Markkati bana Geeshsha Maxaafaa xannaꞌissanaadan oychana mala denttettiis.
Xoossaa siiqiya asatuura nuuyyo deꞌiya issippetettay, daafabay gakkiyo wode keehippe maaddana danddayees.
[Sinttaa 6n deꞌiya misiliyaa qonccissuwaa]
Qoppennabay gakkiyo wode sohuwaara ekkada biyo keehippe koshshiyaabaa giigissa wottadii?
[Sinttaa 7n deꞌiya misiliyaa qonccissuwaa]
Maalaaliyaabau gidennan a ayyaanau Xoossaa woossiyoogee, aybiininne maaddana danddayees
[Sinttaa 7n deꞌiya misiliyaa qonccissuwaa]
Kiristtaaneti daafabay gakkiyo wode, issoy issuwaa maaddoosona
[Sinttaa 7n deꞌiya misiliyaa qonccissuwaa]
“Tana siiqiyaanne naagiya uri deꞌiyoogaa eraas”