Yihooway Nuna Ashshanau Naagees

“Wodiyaa wurssettan beettanau de7iya atotettaayyo Xoossaa wolqqan ammanuwan naagetti [uttideta].”—1 PHE. 1:4, 5.

WOYGADA ZAARUUTII?

Yihooway nuna tumu goynuwau ehiidoy ayba ogiyaanee?

Yihooway ba zoriyan kaalettanaadan nuuni eeno gaana danddayiyoy ayba ogiyaanee?

Yihooway nuna minttettiyoy ayba ogiyaanee?

1, 2. (a) Nuuni suuretettan deꞌanaadan Xoossay maaddanaagaa ammanettanaadan oottiyaabay aybee? (b) Yihooway nuna huuphiyan huuphiyan ay keena loyttidi erii?

“WURSSETTAA gakkanaashin gencciya urai attana.” (Maa. 24:13) Yesuusi hegaadan giyoogan, Xoossay Seexaanaa alamiyaa bolli pirddiyo wode nuuni attanau, wurssettay gakkanaashin suuretettan deꞌana koshshiyoogaa qonccissiis. SHin hegaa giyoogee nuuni nu eraaninne minotettan gencciyaabadan Yihooway qoppees giyoogaa gidenna. Geeshsha Maxaafay, “Intte wolqqai danddayiyoogaappe aadhdhiya paaciyan intte paacettanau koyenna Xoossai ammanettidaagaa. SHin inttena paacee gakkiyo wode, he paaciyaa i inttena danddayissana. Qassi he paaciyaappe intte kessi ekkiyo ogiyaakka immana” yaagidi ammanttiyaabaa yootees. (1 Qor. 10:13) He qaalatuppe nuuni ay tamaarana danddayiyoo?

² Yihooway nu wolqqay danddayiyoogaappe aadhiya paacee nuna gakkanaadan paqqadenna. Yihooway hegaadan oottana danddayees; ayssi giikko, nuna gakkiya metuwaa, nuuni ay mala asakko, qassi nuuni ay keena genccana danddayiyaakko nubaa ubbabaa erees. Tumuppe Xoossay nuna hegaadan loyttidi erii? Ee, erees. Yihooway nuna huuphiyan huuphiyan loyttidi eriyoogaa Geeshsha Maxaafay qonccissees. I nuuni galla galla oottiyoobaanne nu eeshshaa loyttidi erees. I ubba nu qofaanne nu wozanan deꞌiyaabaakka erees.—Mazamure 139:1-6 nabbaba.

3, 4. (a) Yihooway Daawitayyo qoppidoogee i nuuyyo huuphiyan huuphiyan qoppiyoogaa qonccissiyoy ayba ogiyaanee? (b) Yihooway ha wodiyan maalaaliyaabaa ay oottiiddi deꞌii?

³ Ubbaa Danddayiya Xoossay daro meretatuppe guuxxiya asaa naatuyyo hegaadan qoppii? Mazamuraawee Daawiti he oyshaabaa qoppiis; i Yihoowayyo, “Neeni ne biradhdhetun medhdhido ne salota, sohuwan sohuwan neeni wottido aginaanne xoolintteta taani be7iyo wode, neeni asabaa qoppanau asi aibee?” yaagiis. (Maz. 8:3, 4) Daawiti ha oyshaa oychidoy ba deꞌuwan beꞌidobaappe gidennan aggenna. Yihooway Isseyayyo wurssetta naꞌay Daawiti a “wozanaadan oottiya asa” gidiyoogaa akeekiis, qassi a “dorssaa heemmiyoosaappe” denttidi Israaꞌeela kaalettiyaagaa gidanaadan dooriis. (1 Sam. 13:14; 2 Sam. 7:8) Dorssa henttancha naꞌaa Daawiti ba wozanan wotti dentti qoppiyoobaa, ubbabaa Medhidaagee akeekidoogaa eriyoogan ayyo aybi siyettidaakko qoppa!

⁴ Yihooway ha wodiyan deꞌiya nuuyyookka huuphiyan huuphiyan qoppiyoogee keehippe maalaaliyaaba. I “kawotettatu ubban de7iya [“alꞌꞌo aquwaa, NW”]” tumu goynuwau issippe shiishshiiddi deꞌees; qassi ba ashkkarati suuretettan deꞌanaadan maaddiiddi deꞌees. (Hag. 2:7) Nuuni suuretettan deꞌanaadan Yihooway waatidi maaddiyaakko loyttidi eranau, i asaa tumu goynuwau waatidi ehiyaakko ane koyro beꞌoos.

NUNA BAAKKO EHIYAY XOOSSAA

5. Yihooway asaa ba Naꞌaakko ehiyoy ayba ogiyaanee? Leemisuwan yoota.

⁵ Yesuusi, “Tana kiittida ta Aawai taakko ehiido asappe attin, taakko yaanau danddayiya asi baawa” yaagiis. (Yoh. 6:44) Kiristtoosi erissiyo ashkkara gidanaadan nuuyyo Xoossaa maadoy koshshiyoogaa he qofay bessees. Yihooway dorssa mala asaa ba Naꞌaakko ehiyoy ayba ogiyaanee? Mishiraachuwaa sabbakiyoogaanne geeshsha ayyaanaa baggaara ehees. Leemisuwau, PHauloosinne misoonaawe gididi aara sabbakiyaageeti Piliphisiyuusan deꞌiyo wode, Lidiyo giyo maccaaseera gayttidi iyyo mishiraachuwaa yootidosona. Geeshsha Maxaafay, “PHauloosi yootiyoogaakka a siyana mala Xoossai i wozanaa dooyiis” yaagees. Ee, eti yootiyoobaa a akeekanaadan Xoossay ba ayyaanaa immiis, hegaappe denddidaagan anne i soo asay xammaqettidosona.—Oos. 16:13-15.

6. Xoossay nuna ubbaa tumu goynuwau ehiidoy ayba ogiyaanee?

⁶ Hegaa malabay hanidoy Lidee xallaassee? Mule gidenna. Neeni ne huuphiyaa geppida Kiristtaane gidikko, nenakka Xoossay tumu goynuwau ehiis. Saluwan deꞌiya nu Aaway Lidee wozanan loꞌꞌobaa beꞌidoogaadan, ne wozanankka loꞌꞌobaa beꞌiis. Neeni mishiraachuwaa ezgga siyiyo wode, siyidobaa akeekanaadan Yihooway geeshsha ayyaanan nena maaddiis. (1 Qor. 2:11, 12) Neeni tamaaridobaa oosuwan peeshshanau baaxetido wode, a sheniyaa polanau neeni baaxetiyo baaxiyaa anjjiis. Neeni ne huuphiyaa ayyo geppido wode a wozanay ufayttiis. Neeni deꞌuwaa ogiyan hemettiyoogaa doommoosappe hachi gakkanaashin, he ogiyan hemettiyo wode ubban Yihooway nenaara deꞌees.

7. Nuuni ammanettidi deꞌanaadan Xoossay maaddanaagaa aybin eriyoo?

⁷ Yihooway nuuni ayyo oottiyoogaa doommanaadan maaddido gishshau, suuretettan deꞌanaadankka i nuna maaddanaagaa ammanettana danddayoos. Nuuni tumaa siyidi laamettidoy nu huuphen gidennaagaadan, tuman minni eqqiyoykka nu huuphen gidennaagaa i erees. PHeexiroosi tiyettida Kiristtaaneti “wodiyaa wurssettan beettanau de7iya atotettaayyo Xoossaa wolqqan ammanuwan naagetti” uttidoogaa yootiis. (1 PHe. 1:4, 5) He xiqisiyaa baaso siraatay ubba Kiristtaanetuyyo hanees, qassi hegee ha wodiyan nuuni ubbay erana koshshiyaaba. Aybissi? Ammanettidi deꞌanaadan nuuyyo ubbau Xoossaa maadoy koshshiyo gishshataassa.

MOOROBAA OOTTENNAADAN XOOSSAY NUNA NAAGANA DANDDAYEES

8. Nuuni gita nagaraa oottennaadan naagettana koshshiyoy aybissee?

⁸ Deꞌuwan gakkiya metoynne nuuni polo gidennaagee ayyaanaaban tunchuliyoogaa aggidi, akeekennan gita nagaraa oottanaadan denttettana danddayees. (Galaatiyaa 6:1 nabbaba.) Daawita deꞌuwan gakkidabay hegaa qonccissees.

9, 10. Daawiti gita nagaraa oottennaadan Yihooway waatidi teqqidee, qassi I ha wodiyan nuussi oottiyoobay aybee?

⁹ Kawuwaa Saaꞌooli woranau yedettiyo wode, Daawiti haluwaa kiyennan aggiyoogan ba huuphiyaa naagiyoogaa bessiis. (1 Sam. 24:2-7) SHin, hegaappe simmin takkennan Daawiti ba huuphiyaa naagibeennaagaa bessiyaabaa oottiis. I baassinne ba asaassi miyoobaynne uyiyoobay koshshido gishshau, Israaꞌeela asa gidida Naabaali hegaa au immanaadan bonchuwan oychiis. Naabaali cayidi zaarin, Daawiti saro asa woriyoogee Xoossaa sinttan suuttan oyshissiyaabaa gidiyoogaa akeekennan, Naabaala son deꞌiya attuma asaa woridi haluwaa kiyanau yiillotidi denddiis. SHin Naabaala machiyaa Abigaala bessiya wodiyan kelttiyaa gelada Daawiti he gita nagaraa oottennaadan ashshaasu. He iitabaappe ashshanau Yihooway Abigaalo goꞌettidoogaa Daawiti eridi iyyo, “Nena tanaara gaittanau hachchi kiittida GODAI, Israa7eela Xoossai galatetto. Neeni lo77o qoppido gishshaunne taani asa suuttaa gussennaadaani ta kushiyan halo kessennaadan teqqido gishshau, anjjetta” yaagiis.—1 Sam. 25:9-13, 21, 22, 32, 33.

¹⁰ Nuuni ha taarikiyaappe ay tamaarana danddayiyoo? Daawiti gita nagaraa oottennaadan teqqanau Yihooway Abigaalo goꞌettiis. Ha wodiyan nuussikka hegaa malabaa oottees. Nuuni moorobaa oottana haniyo wode ubban nuna teqqanau Xoossay issi ura kiittana giidi qoppana koshshenna. Qassi Xoossay issi issi hanotatun ay oottanaakko woy ba halchuwaa polanau ay paqqadanaakko geeshshidi erokko. (Era. 11:5) Gidikkokka, Yihooway nu hanotaa ubba wode eriyoogaanne nuuni ayyo ammanettidaageeta gididi deꞌanaadan maaddanaagaa ammanettana danddayoos. I, “Taani nena erissananne neeni baanau bessiya ogiyaa nena tamaarissana; taani nena zorananne naagana” yaagidi qaalaa geliis. (Maz. 32:8) Yihooway nuna zoriyoy ayba ogiyaanee? Nuuni he zoriyan waatidi goꞌettana danddayiyoo? Ha wodiyan Yihooway ba asaa kaalettiyoogaa nuuni ammanettana danddayiyoy aybissee? Ajjuutaa maxaafay ha oyshata waatidi zaariyaakko akeeka.

ZOREE NUNA NAAGEES

11. Gubaaꞌe giddon aybi hanettiiddi deꞌiyaakko Yihooway ay keena loyttidi erii?

¹¹ Ajjuutaa shemppo 2⁠ninne 3n xaafettidaagaadan, bonchuwan xoqqu xoqqu giida Yesuus Kiristtoosi Qeeri Isiyan deꞌiya laappun gubaaꞌetun hanettiyaabaa beꞌiis. Kiristtoosi he gubaaꞌetun deꞌiya daro asay oottiyoobaa xalla gidennan hanettiya ubbabaa beꞌiyoogaa he ajjuutay qonccissees. Amarida hanotatun issi issi asaabaa yootiis; qassi he gubaaꞌeta ubbaa bessiyaaban galatiis woy zoriis. Hegee ay qonccissii? He ajjuutan odettida laappun gubaaꞌeti 1914ppe simmin deꞌiya ayyaanan tiyettida Kiristtaanetu leemiso; qassi laappun gubaaꞌetuyyo imettida zoriyaa baaso siraatay ha wodiyan kumetta saꞌan deꞌiya Xoossaa asaa gubaaꞌetu ubbau hanees. Yaatiyo gishshau, Yihooway ba Naꞌaa baggaara ba asaa kaalettiiddi deꞌees. Nuuni he kaaletuwan goꞌettana danddayiyoy ayba ogiyaanee?

12. Yihooway nuna kaalettanaadan ayba ogiyan eeno gaana danddayiyoo?

¹² Nuuni Yihooway siiquwan immiyo kaaletuwan goꞌettana danddayiyo issi ogee buzo xinaatiyaa xannaꞌiyoogaa. Ammanettida wozannaama ashkkaray giigissiyo xuufetu baggaara Yihooway nuuyyo daro zoriyaa immees. (Maa. 24:45) Gidoppe attin, he zoriyan goꞌettanau nuuni wodiyaa bazzidi xannaꞌananne tamaaridobaa oosuwan peeshshana koshshees. Nuuni “kunddennaadan” Yihooway naagiyo issi ogee buzo xinaatiyaa. (Yih. 24) Nu xuufiyan kiyida, neeyyo xaafettidaba milatiya issibaa xannaꞌa eray? He zoriyaa Yihoowappe yiidabadan ekka. Nu laggee nu hashiyaa oyqqidi issibaa nuna akeekissiyoogaadan, nuuni giigissana koshshiyo eeshshaa akeekissanau Yihooway ba ayyaanaa goꞌettana danddayees. Ayyaanaa kaaletuwaa kaalliyo wode, nuna Yihooway kaalettanaadan eeno goos. (Mazamure 139:23, 24 nabbaba.) Hegaara gayttidaagan, nu xinaatiyaa meeziyaa qorana koshshees.

13. Nu xinaatiyaa meeziyaa qoriyoogee eratetta gididoy aybissee?

¹³ Allaxxiyoogan daro wodiyaa aattiyoogee, nuuni buzo xinaatiyau wode xayanaadan oottana danddayees. Issi ishay hegaa malabay hanana danddayiyoogaa odiis. Hegaadan haniyoy aybissee? I hagaadan giis: “Allaxxiyoobay ha wodiyan awudeegaappenne aaruwan dariisinne hirayso. Televizhiiniyan, komppiyuteriyaaninne silkkiyan allaxxiyoobay deꞌees. Nuuni hegan doodettida.” Nuuni naagettana xayikko, ciimma buzo xinaatiyau koshshiya wodee guuxxi guuxxi biidi wurssettan muleera xayana danddayees. (Efi. 5:15-17) Nuuni ubbay kaallidi deꞌiyaagaadan nuna oychana koshshees: ‘Taani Xoossaa Qaalaa ciimma yohuwaa ay keena wodiyaa takka takkada xannaꞌiyaanaa? Haasayay woy kifilee deꞌiyo wode xallan xannaꞌiyaanaa?” Hegaadaana gidikko, Yihooway nuna naagidi ashshanau giigissido ayyaanaabaa eraa demmanau, so asaa goynuwau woy buzo xinaatiyau bazzido omarssaa loytti goꞌettiyoogee koshshana danddayees.—Lee. 2:1-5.

MINTTETTOY NUUNI GENCCANAADAN MAADDEES

14. Yihooway nuuyyo siyettiyaabaa qoppiyoogaa Geeshsha Maxaafay waatidi bessii?

¹⁴ Daawita a deꞌuwan unꞌꞌissiya darobay gakkiis. (1 Sam. 30:3-6) Ayyaanay denttettin i xaafidobay Yihooway ayyo siyettiyaabaa eriyoogaa qonccissees. (Mazamure 34:18; 56:8 nabbaba.) Xoossay nuuyyo siyettiyaabaakka erees. Nu ‘wozanay meꞌꞌiyo’ wode woy nuuni ‘ayyaanan liiqiyo’ wode i nuukko shiiqees. Hegee, “Ta metuwaa neeni be7ido gishshaunne ta tuggaa neeni erido gishshau, taani aggenna ne siiquwan ufaittananne ufaissau poocu gaana” giidi yexxida Daawita minttettidoogaadan nunakka minttettees. (Maz. 31:7) SHin Yihooway nu unꞌꞌuwaa akeekiyoogaa xalla gidennan harabaakka oottees. I nuna minttettidi, genccanaadan maaddees. I hegaadan oottiyo issi ogee gubaaꞌe shiiquwaa.

15. Asaafa gakkidabaappe ay tamaarana danddayiyoo?

¹⁵ Mazamuraawiyaa Asaafa gakkidabay nuuni shiiquwaa shiiqiyoogee goꞌꞌiyo issi ogiyaa akeekanaadan maaddees. Asaafi pirddaa pacaabaa aggennan qoppidoogee Xoossaayyo oottiyoogaa goꞌꞌaa siranaadan oottiis. Asaafi hidootaa qanxxiis. I, ‘Yiillotaasinne ta wozanan mishettaas’ giidi baayyo siyettidabaa yootiis. Hegaappe denddidaagan, Yihoowayyo oottiyoogaa aggi haliis. Asaafi ba qofaa laammanaadan maaddiday aybee? I “Xoossaa geeshsha sohuwaa” gelidoogaa yootiis. Yan Yihoowayyo goynniyaageetuura gayttidoogee Asaafi ba qofaa laammanaadan maaddiis. Iitatuyyo injjetiyoy guutta wodiyaassa gidiyoogaanne Yihooway hanotata giigissiyoogee attennaagaa Asaafi akeekiis. (Maz. 73:2, 13-22) Nunakka hegaa malabay gakkana danddayees. Seexaanaa alamiyan deꞌiya pirdda pacay nuuni unꞌꞌettanaadaaninne hidootaa qanxxanaadan oottana danddayees. Nu ishatuura issippe shiiqiyoogee nuna minttettees; qassi Yihoowayyo oottiyoogan zaarettidi ufayttanaadan maaddees.

16. Nuuni Haanni leemisuwan goꞌettana danddayiyoy ayba ogiyaanee?

¹⁶ Gidoppe attin, gubaaꞌiyan hanida issibay neeni shiiquwaa shiiqanau metootanaadan oottikko shin? Geella gubaaꞌiyan oottiyo issi oosoy neeppe attido gishshau yeellatana woy issi ishaara woy micheera maayettennan aggana danddayaasa. Hegaadaana gidikko, Haanni leemisoy nena maaddana danddayees. (1 Sameela 1:4-8 nabbaba.) I dawuttiyaa Piniina darotoo o keehippe yiilloyausu. Eta soo asay Yihoowayyo yarshshanau layttan layttan Seelo biyo wode he hanotay Haannissi keehi deexxees. Haanna keehippe azzaniyo gishshau, ‘yeekkausu, qassi qumaa meennan ixxausu.’ Gidikkokka, Haanna Yihoowayyo goynniyo sohuwaa biyoogaa aggabeykku. Yihooway a ammanettidaaro gidiyoogaa xoqqu ootti xeelliis, qassi o anjjiis.—1 Sam. 1:11, 20.

17, 18. (a) Gubaaꞌe shiiqotun nuuni minttettuwaa demmiyoy ayba ogetuunee? (b) Nuuni atotettaa demmanaadan maaddanau Yihooway nuna siiqiyoogeenne nuussi qoppiyoogee neeyyo aybi siyettanaadan oottii?

¹⁷ Ha wodiyan deꞌiya Kiristtaaneti Haanni leemisuwaa kaallana bessees. Nuuni aggennan shiiquwaa shiiqana koshshees. Nuuni ubbay nu deꞌuwan beꞌidoogaadan, shiiquwaappe nuuyyo koshshiya minttettuwaa demmoos. (Ibr. 10:24, 25) SHiiqotun nu mala Kiristtaaneti bessiyo siiqoy nuna minttettees. Haasayan woy issi uri yootiyo qofan siyidobay nu wozanaa denttettana danddayees. SHiiquwaappe kase woy shiiquwaappe simmin haasayiyo wode nu mala Kiristtaanee nuuni yootiyoobaa ezggana woy nuna minttettiyaabaa yootana danddayees. (Lee. 15:23; 17:17) SHiiquwan mazamuriyaa xoqqu oottidi yexxiyoogee nuna minttettees. SHiiquwan demmiyo minttettoy nuuyyo keehippe koshshiyoy nuuni ‘hirggiyo wode.’ Yihooway nuna ‘woppu oottiyoynne’ nuuni murttidoogaadan ammanettidi deꞌanaadan maaddiyoy shiiquwaana.—Maz. 94:18, 19.

¹⁸ Yihooway nuna siiqiyoogeenne nuussi qoppiyoogee, “Ta ushachcha kushiyaa neeni oiqqadasa. Ne zoriyan tana kaalettaasa” yaagidi yexxida mazamuraawiyaa Asaafaagaadan nuuyyo siyettanaadan oottees. (Maz. 73:23, 24) Nuuni atotettaa demmanaadan Yihooway nuna naagiyo gishshau a keehippe galatoos!

[Sinttaa 29n deꞌiya misiliyaa qonccissuwaa]

Nenakka Yihooway baakko ehiis

[Sinttaa 30n deꞌiya misiliyaa qonccissuwaa]

Xoossaa zoriyaa oosuwan peeshshiyoogan nuuni naagettida

[Sinttaa 31n deꞌiya misiliyaa qonccissuwaa]

Nuuni demmiyo minttettoy genccanaadan maaddiis