‘Xoossaa Erideta’—Yaatin Haꞌꞌi Ay Oottuuteetii?
‘Xoossaa erideta.’ —GAL. 4:9.
1. Horophillee denddanaappe kase a laaggiya uri xaafettidabaa kaallidi xeelliyoy aybissee?
HOROPHILLIYAA laaggiya uri laagganau giigettiyo wode ubban horophilliyan issi issibaa akeekidi xeellees. I xaafettidabaa kaallidi ubbabaa xeellees. I horophillee denddanaappe kase ubbatoo xaafettidabaa kaallidi loytti xeellana xayikko, horophillee kunddana danddayees. Horophilliyaa daro layttau laaggidaageetikka xaafettida ubbabaa kaallidi xeellana koshshees.
2. Kiristtaaneti akeekan xeellana bessiyaabati aybee?
2 Keehi koshshiyo wodiyan ne ammanoy shuggennaadan, horophilliyaa laaggiya akeekancha uraadan neeni akeekan xeellana bessiyaabati deꞌoosona. Neeni mati xammaqettidaagaa gidin woy daro layttau Xoossau haggaazidaagaa gidin, ne ammanoy minokkonne, qassi neeni Xoossaa Yihoowau aqidaakkonne ubbatoo qoriyoogee keehi koshshiyaaba. Ubbatoo minnada hegaadan qorana xayikko, ayyaanaaban qohettana danddayaasa. Geeshsha Maxaafay, “Bau eqqidobaa milatiyo urai ooninne kunddennaadan, bana naago” yaagidi nuna zorees.—1 Qor. 10:12.
3. Galaatiyan deꞌiya Kiristtaaneti ay oottana koshshidee?
3 Galaatiyan deꞌiya Kiristtaaneti bantta ammanoy ay keena minokko qoridi, ayyaanaaban eti demmido laꞌatettaa nashshana koshshiis. Yesuusi ba huuphiyaa yarshshidi, an ammaniyoogaa oosuwan bessiyaageetussi Xoossaa keehi dumma ogiyan eriyo, giishin Xoossaa naata gidiyo qaaday deꞌanaadan oottiis. (Gal. 4:9) Galaatiyaa Kiristtaaneti Xoossaara hegaa mala boncho dabbotan deꞌanau, eta giddon deꞌiya, Muuse Higgiyaa kaallanaadan minttettiya Ayhudatu timirttiyaa ixxana bessees. Gubaaꞌiyan deꞌiya Ayhuda gidenna, qaxxarettibeenna Kiristtaaneti Muuse Higgiyaa mule naagi erokkona! Ayhudatikka Ayhuda gidennaageetikka ayyaanaaban diccana bessees. Eti asay Muuse Higgiyaa naaganaadan Xoossay koyennaagaa akeekana koshshees.
XOOSSAA ERANAU KOYRO OOTTIYOOBATA
4, 5. PHauloosi Galaatiyaa Kiristtaaneta woygi zoridee, qassi hegee nuna maaddiyoy ayba ogiyaanee?
4 Ay wodenne deꞌiya tumu Kiristtaaneti Geeshsha Maxaafaa tumaa aggidi, aggibayidobau guyye simmennaadan naagettana mala, kiitettida PHauloosi Galaatiyaa Kiristtaaneta zoridobay xaafetti uttiis. Kiitettidaagee Galaatiyan deꞌiyaageetu xalla gidennan, Yihoowau goynniya ubbay ammanettidaageeta gididi deꞌanaadan minttettana mala, Xoossay ba geeshsha ayyaanan a denttettiis.
5 Nuuni ubbay ayyaanaaban aylletettaappe kiyidi Yihoowa Markka waanidi gididaakko hassayana koshshees. Hegaadan oottanau, ha naaꞌꞌu oyshata qoppa: Neeni xammaqettanau giigettanaappe kase ay ay oottidaakko hassayay? Neeni Xoossaa erido, qassi an erettido ogiyaa, yaatiyoogan qassi ayyaanaaban demmido laꞌatettaa hassayay?
6. Nuuni xannaꞌanau deꞌiyo akeekan xeelliyoobati aybee?
6 Nuuni ubbay uddufunbaa oottida. Ayyaanaaban nu hanotaa akeekan xeellanau maaddiya hageeti, “Xammaqettanaunne Ayyaanaaban Ubbatoo Diccanau Maaddiyaabata” giya saaxiniyan deꞌoosona. Ha uddufunbaa ubbatoo hassayiyoogee nuuni alamiyan aggibayidobau guyye simmennaadan naagettana mala minttettees. Horophilliyaa daro layttau laaggida akeekancha uri xaafettidabaa ubbatoo kaalli xeellidi hirggennan laaggiyoogaadan, neenikka ubbatoo ayyaanaaban ne hanotaa akeekan xeelliyoogee ammanettada haggaaziyoogan genccanau maaddees.
XOOSSAN ERETTIDAAGEETI UBBATOO AYYAANAABAN DICCOOSONA
7. Nuuni polana bessiyaabay aybee, qassi aybissi?
7 Horophilliyaa laaggiyaagee kaalli xeellanaadan xaafettidabay i laagganaappe kasetidi ubbatoo polana bessiyaabay deꞌiyoogaa hassayanaadan maaddees. Nuunikka nu hanotaanne nuuni xammaqettoosappe doommidi oottiyoobaa ubbatoo qorana danddayoos. PHauloosi Ximootiyoosau, “Taani nena tamaarissido tumu qaalaa leemiso ootta oiqqada, Kiristtoos Yesuusan nuuyyo de7iya ammanuwaaninne siiquwan de7a” yaagidi xaafiis. (2 Xim. 1:13) He ‘tumu qaalay’ Xoossaa Qaalan deꞌees. (1 Xim. 6:3) Misilee issibay ay malakko akeekanaadan maaddana danddayiyoogaadan, ‘tumu qaalaykka’ Yihooway nuuppe koyiyoobaa ubbaa nuuni akeekanaadaaninne polanaadan maaddees. Yaatiyo gishshau, tumaara ay keena maayettidi deꞌiyaakko akeekanau, nuuni xammaqettanaappe kase oottidobata ane beꞌoos.
8, 9. (a) Nuuni eraaninne ammanuwan ubbatoo diccana koshshiyoy aybissee? (b) Ayyaanaaban dicciyoogee maaddiyoynne ubbatoo hegaadan diccana koshshiyoy aybissakko leemisuwan yoota.
8 Nuuni akeekan xeellana bessiya koyroogee eraa demmiyoogaa. Hegaappe simmin, ammaniyoogaa doommoos. SHin he naaꞌꞌubankka nuuni ubbatoo diccana koshshees. (2 Tas. 1:3) Nuuni xammaqetti simmidi, Xoossaara dabbotaa ubbatoo minttana koshshees.
Mittay ubbatoo diccees. Kiristtaanetikka diccana koshshees
9 Nu ayyaanaabaa dichaa mittaa dichaara geeddarssana danddayoos. Mittay axxaa gakkanaassi woy keehi haahosaa gakkanaassi xaphuwaa yeddikko, diccidi keehi daayana danddayees. Leemisuwau, Liibaanoosan deꞌiya issi issi keehi gita zigay 37 meetiriyaa aduqqana danddayees; he mittay mino xaphuwaa axxaa gakkanaassi yeddees; qassi a anuwaa yuushoy 12 meetire. (Sii. 5:15) Eesuwan dicciya licoy kiyiyoogaa aggi simminkka, he mittay dicciyoogaa aggenna; shin hegee keehi erettenna. Layttan layttan, mittaa anoy orddees, xaphoy axxaa gakkanaassi geleesinne daayees; yaanin, mittay minnees. Issi Kiristtaaniyaa ayyaanaabaa dichaykka hegaa mala. Geeshsha Maxaafaa xannaꞌiyoogaa doommidi ayyaanaaban eesuwan diccidi, xammaqettana danddayoos. Gubaaꞌiyan deꞌiyaageeti nuuni dicciyoogaa beꞌidi ufayttoosona. Nuuni aqinye gidana woy hara maataa gubaaꞌiyan ekkanakka danddayoos. Hegaappe simmin deꞌiya wodiyan, nuuni ayyaanaaban dicciyoogee kaseegaadan qoncci beettennan aggana danddayees. Gidikkokka, nuuni “Kiristtoosa polo dichchaa keenaa diccidi, gastta asa gidana” gakkanaassi, ammanuwan minnananne eraa gujjana koshshees. (Efi. 4:13) Yaatiyoogan, puutee diccidi mino mitta gidiyoogaadan, nuunikka ayyaanaaban kayma Kiristtaane gidoos.
10. Kaymida Kiristtaanetikka ayyaanaaban diccana koshshiyoy aybissee?
10 SHin, nuuni dicciyoogaa aggana koshshenna. Nuuni eraa gujjana koshshees, qassi ammanuwankka minnana koshshees. Yaatiyoogan, nuuni Xoossaa Qaalan xaphuwaa yeddidi minnidaageeta gidoos. (Lee. 12:3) Hegaadan oottiya daro ishatinne michoti gubaaꞌiyan deꞌoosona. Leemisuwau, 30ppe dariya layttau gubaaꞌe cima gididi oottida ishay haꞌꞌikka i ayyaanaaban dicciiddi deꞌiyoogaa yootiis. I hagaadan giis: “Geeshsha Maxaafaa kaseegaappe loytta akeekaysinne nashshays. Ubbatoo Geeshsha Maxaafaa maaraanne higgiyaa dumma dumma ogiyan waata oosuwan peeshshanaakko akeekays. Haggaazuwaakka kaseegaappe aaruwan nashshays.”
XOOSSAARA DEꞌIYA DABBOTAA MINTTA
11. Nuuni wodiyaappe wodiyan Yihoowa loytti erana danddayiyoy ayba ogiyaanee?
11 Nuuni ayyaanaaban dicciyoogee Yihoowa nu Dabbonne nu Aawa oottidi, kaseegaappe aaruwan akko shiiqiyoogaa gujjees. I nuna nashshiyoogaa nuuni eranaadan koyees. Siiqiya aaway woy aayyiyaa qoommiyo wode guutta naꞌau siyettiyoogaadan woy qassi ammanttiyaanne tumancha laggiyaara deꞌiyo wode nuuyyo siyettiyoogaadan i nuna siiqiyoogaanne naagiyoogaa nuuni eranaadan koyees. Neeni akeekiyoogaadan, Yihoowaara hegaa mala dabbotaa sohuwaara medhana danddayettenna. Yihoowa eriyoogeenne a siiqiyoogee wode ekkiyaaba. Hegaa gishshau, Yihoowa loytta eranau, galla galla a Qaalaa nabbabanau wodiyaa bazza. Wochiyo Keelaanne Beegottite! maxeeteta ubbaa, qassi Geeshsha Maxaafaa qofay deꞌiyo hara xuufeta nabbaba.
12. Nuuni Yihoowan erettanau ay oottana koshshii?
12 Xoossaa dabboti wozanappe woossiyoogaaninne loꞌꞌo laggeta dooriyoogan ayyaanaaban diccoosona. (Milkkiyaasa 3:16 nabbaba.) Yihooway “eta woosaa ezggees.” (1 PHe. 3:12) Nuuni maaduwaa koyidi woossiyo wode, Yihooway siiqiya aawaadan loytti ezggees. Hegaa gishshau, nuuni ‘ubba wode Xoossaa woossana’ bessees. (Roo. 12:12) Xoossay maaddana xayikko, nuuni kaymida Kiristtaane gididi deꞌana danddayokko. Alamee keehi unꞌꞌettiyo gishshau, nurkka hegaa xoonanau woy eqettanau danddayokko. Nuuni woosan genccana xayikko, Xoossay nuuyyo ubbatoo immanau koyiyoonne immana danddayiyo wolqqaa demmokko. Neeni ammanettida laggiyaara haasayiyoogaadan Yihoowakko woossay? Neeni kaseegaappe loꞌꞌo ogiyan woossana danddayay?—Erm. 16:19.
13. Ayyaanaaban diccanau, nu mala Kiristtaanetuura shiiqana koshshiyoy aybissee?
13 Yihooway ‘banan ammanettiyaageetun’ ufayttees; hegaa gishshau, Xoossaa eri simmidikka, a eriya haratuura ubbatoo shiiqanau koyoos. (Naho. 1:7) Hidootaa qanxxanaadan oottiyaabay kumido ha alamiyan, minttettiya nu ishanttuuranne michonttuura wodiyaa aattiyoogee eratetta. Yaatiyoogee goꞌꞌiyoy aybiinee? ‘Siiqettanaadaaninne loꞌꞌo oosuwaa oottanaadan’ nena minttettiyaageeta gubaaꞌiyan demmaasa. (Ibr. 10:24, 25) Gubaaꞌiyan deꞌiyaageetuura wodiyaa aattana xayikko, PHauloosa zoriyaa oosuwan peeshshana danddayokko. Hegaa gishshau, gubaaꞌe shiiquwaa ubbatoo shiiqa; qassi shiiquwan ne qofaa yoota.
14. Nuuni ubbatoo nagaraappe simmananne laamettana koshshiyoy aybissee?
14 Nuuni Kiristtaane gidanau nagaraappe simmida; qassi laamettida. SHin, nuuni ubbatoo nagaraappe simmana koshshees. Nuuni polo asa gidenna gishshau, xaaxetti uttidi dukkanau naagiya shooshshaadan, nagaray nu giddon geemmi uttiis. (Roo. 3:9, 10; 6:12-14) Nu balaa sheneho giyoogaappe, ubbatoo naagettiyaageeta gidoos. Nuuni nagaraa xoonanaunne laamettanau wozanappe baaxetiyo wode, Yihooway nubaa danddayiyoogee ufayssiyaaba. (Pili. 2:12; 2 PHe. 3:9) Ne goꞌꞌa xallau ne wodiyaanne ne wolqqaa wurssiyoogaappe, hegaa Yihoowau haggaazanau goꞌetta. Issi michiyaa hagaadan gaasu: “Taani tumaa tamaaraydda diccidaba gidikkonne, Yihoowabaa darotuugaappe dummatiyaabaa qoppaydda diccaas. I keehi yashshiyaagaa gidiyo gishshau, taani a mule ufayssana danddayennabadan qoppaas.” A Yihoowaara dabbotidabadan qoppabeykku; qassi darotoo nagaraa oottaasu. A hagaadan gaasu: “Taani nagaraa oottidoy Yihoowa siiqenna gishshataassa gidennan, a loytta erabeenna gishshataassa. SHin, darotoo wozanappe woossa simmada, laamettiyoogaa doommaas.” A gujjadakka hagaadan gaasu: “Yihooway taani oottanau koshshiyaabaa bessiyoogan, taani kayan kayan metuwaa loddan xoonanaadan maaddidi, guutta naꞌaadan tana kaalettidoogaa akeekaas.”
15. Yesuusinne a Aaway xeelliyoobay aybee?
15 Mishiraachuwaa “ubba asau yootite.” PHeexiroosinne kiitettida harati maalaaliyaabay oosettin qasho keettaappe kiyi simmin, Xoossaa kiitanchay etau hegaadan giis. (Oos. 5:19-21) Nuuni akeekan xeellana koshshiya harabay saaminttan saaminttan haggaaziyoogaa. Yesuusinne a Aaway nu ammanuwaakka nu haggaazuwaakka akeekoosona. (Ajj. 2:19) Nuuni haggaazuwaa nu deꞌuwan xoqqu oottidi xeelloos.
16. Nu huuphiyaa Yihoowau geppidoogaa wotti denttidi qoppiyoogee loꞌꞌo gididoy aybissee?
16 Ne huuphiyaa Yihoowau geppidoogaa wotta denttada qoppa. Nuussi deꞌiya aybippenne keehi alꞌꞌobay Yihoowa dabbo gidiyoogaa. I baageeta erees. (Isiyaasa 44:5 nabbaba.) Yihoowaara neessi deꞌiya dabbotay ay malakko qora; qassi he dabbotaa minttanau woossa. Hegaara gayttidaagan, neeni xammaqettido gallassaa hassaya. Yaatiyoogee, neeni xammaqettidoogee ne deꞌuwan neeni kuuyido aybippenne aadhiyaabau leemiso gidiyoogaa hassayanaadan maaddees.
GENCCIYOOGAN YIHOOWAKKO SHIIQADA DEꞌA
17. Nuuni Yihoowa dabbo gididi deꞌanau genccana koshshiyoy aybissee?
17 PHauloosi Galaatiyaa Kiristtaanetussi xaafido dabddaabbiyan gencciyoogee koshshiyoogaa yootiis. (Gal. 6:9) Hegee ha wodiyan deꞌiya Kiristtaanetussikka keehi koshshiyaaba. Nena paacee gakkana; shin Yihooway nena maaddana. Geeshsha ayyaanaa demmanau ubbatoo woossa. Yihooway ne azzanuwaa ufayssan, qassi ne tuggaa sarotettan laammiyo wode, neeni woppu gaana. (Maa. 7:7-11) Ane hagaa qoppa: Yihooway kafuwau qoppikko, a siiqiyaanne ne huuphiyaa ayyo geppida neessi hegaappe keehi aattidi qoppennee? (Maa. 10:29-31) Unꞌꞌettanaadan oottiya aybinne nena gakkikko, mule guyye gooppa; mule hidootaa qanxxoppa. Yihoowan erettido gishshau, keehi maalaalissiya anjjuwaa demmida!
18. ‘Xoossaa eradasa’; yaatin, haꞌꞌi ay oottanau koyay?
18 Yaatiyo gishshau, neeni mata wode Xoossaa erada xammaqettidaba gidikko, yaatin haꞌꞌi ay oottuutee? Ayyaanaaban kayma gidada, Yihoowa ubbatoo loytta era. Neeni daro layttappe kase xammaqettidaba gidikko, yaatin haꞌꞌi ay oottuutee? Yihoowa loyttada eriyoogaa aggoppa; qassi ubbatoo ayyaanaaban dicca. Neeni, ‘Yihoowa loyttada erays, qassi aara dabbotaa yaa minttana koshshenna’ gaada qoppenna mala naagetta. Hegaadan qoppiyoogaappe, nuna siiqiya Aawanne Dabbo gidida Xoossaa Yihoowaara dabbotaa ubbatoo minttanau, nuuni ubbay ha huuphe yohuwan beꞌidobata issi issitoo zaarettana koshshees.—2 Qoronttoosa 13:5, 6 nabbaba.