Cimatoo ‘Daafuridaageeta’ Minttettuuteetii?

Enjjeelaa azina gelabeenna micho; iyyo layttay 35 heera; qassi a unꞌꞌettausu. A cimati yaanaagaa naagaydda deꞌausu. Eti iyyo ay odanee? A amarida shiiquwaa uttennan aggidoogee tuma; shin he wode a gallassa kumettaa cima asaa maaddaydda peꞌido gishshau daafuraasu. Galla galla o harabay qofissiyoogaa bolli, i aayyiyo sakkiyaabay o keehi hirggissees.

Neeni ha ‘daafurancha’ Enjjeelo oychanau biyaakko, o waata minttettuutee? (Erm. 31:25) SHin, koyruwan, harata oychanau biyo wode minttettanau waata giigettuutee?

NE ISHANTTU HANOTAABAA QOPPA

Nuuni ubbay ayyaanaabaa woy harabaa oottiyo gishshau, issi issitoo daafuroos. Leemisuwau, hananabaa yootiya Daaneeli i akeekana danddayenna ajjuutaa beꞌido wode ‘keehi daafuriis.’ (Dane. 8:27) Hegaappe simmin issitoo, kiitanchaa Gabreeli yiidi a maaddiis. Xoossaa kiitanchay Daaneeli he ajjuutaa akeekanaadan maaddiis; qassi Yihooway a woosaa siyidoogaanne he wodekka ‘Xoossay a keehi dosiyoogaa’ ayyo yootiis. (Dane. 9:21-23) Guyyeppe issitoo, hara kiitanchay loytti qoppidi yootidobay ha daafurida hananabaa yootiyaagaa minttettiis.—Dane. 10:19.

Hegaadankka, neeni daafurida woy hidootaa qanxxida issi Yihoowa Markkaa oychanau baanaappe kase, a hanotaabaa qoppa. A gakkiya metoy aybee? Ha metoy waatidi a hidootaa qanxxissana danddayii? Ayyo deꞌiya loꞌꞌo eeshshay aybee? Gubaaꞌe cima gidoosappe 20 layttappe bolla gidido Richardi issi ishaa oychanau baanaappe kase a loꞌꞌo eeshshaabaa qoppiyoogaa yootiis. I he ishaa hanotaabaakka loytti qoppees. Hegee i he ishaa bessiyaagaadan minttettanau maaddees. Nenaara hara cimay oychanau biyaaba gidikko, intte naaꞌꞌay issippe he ishaabaa haasayiyoogee loꞌꞌo.

NE ISHANTTI PASHKKI GIIDI HAASAYANAADAN OOTTA

Issi uri ba qofaa yootanau yeellatana danddayiyoogaa maayennan aggakka. Leemisuwau, issi ishay bana oychanau yiida cimatuyyo bau siyettiyaabaa yootanau metootana danddayees. Yaatin, i pashkki giidi haasayanaadan neeni ay oottana danddayay? Neeni moocu gaydda minttettiyaabaa wozanappe haasayiyoogee maaddana danddayees. Gubaaꞌe cima gidoosappe 40 layttappe bolla gidido Mikaaꞌeeli ishantta oychanau biidi darotoo, “Issi cimau deꞌiya keehi loꞌꞌo maataappe issoy ishanttu soo biidi eta oychiyoogaanne eta loyttidi eriyoogaa. Yaatiyo gishshau, hachi inttena oychanau yeemottaydda takkaas” yaagees.

Ishaa oychanau baada koyro wozanappe woossana danddayaasa. Kiitettida PHauloosi ba ishanttu ammanuwaabaa, siiquwaabaanne genccaabaa Xoossaakko woossiis. (1 Tas. 1:2, 3) Ne ishau deꞌiya loꞌꞌo eeshshaa xeelliyaagan neessi siyettiyaabaa woosan qonccissiyoogee, neenikka ikka minttettiyaabaa haasayanaadan maaddees. Neeni haasayiyoobay ne ishay woppu gaanaadankka oottana danddayees. Daro wodiyau gubaaꞌe cima gididi oottida Rey, “Nuuni ubbay oottiiddi deꞌiyo loꞌꞌobaa issi issitoo dogoos. Hegaa gishshau, issi uri hegaa hassayissiyo wode, hegee nuna minttettees” yaagiis.

GEESHSHA MAXAAFAAPPE MINTTETTIYAABAA YOOTA

Neenikka issi xiqise gidikkonne, Geeshsha Maxaafaappe yootiyoogan PHauloosaagaadan ‘ayyaanaa imuwaa’ immana danddayaasa. (Roo. 1:11) Leemisuwau, unꞌꞌettida issi ishay “cuwan kaqqido” gunddida ogoruwaara bana geeddarssida mazamuraawiyaagaadan aynne pattennabadan qoppana danddayees. (Maz. 119:83, 176) He xiqisiyaa qofaa qanttan yoota simmada, ne ishay Xoossaa azazuwaa ‘dogibeennaagaa’ neeni ammanettiyoogaa yootana danddayaasa.

Hegaadankka, bayida shilinggiyaa leemisoy gubaaꞌiyaa yeenna michiyo woykko ayyaanaaban shuggida michiyo denttettennee? (Luq. 15:8-10) Bayida shilinggee qooriyan wottiyo alꞌꞌo alleequwan shuuyettida daro shilinggetuppe issuwaa gidana danddayees. Intte he leemisuwaa tobbiyoogee, a gubaaꞌiyan deꞌiya alꞌꞌo michotuppe issinno gidiyoogaa akeekanaadan maaddana danddayees. Hegaa tobbi simmin, a Yihoowayyo dorssa mara mala gidiyo gishshau i iyyo ay keena qoppiyaakko yootana danddayaasa.

Darotoo, ishantti Geeshsha Maxaafaappe nabbabidobaa yootiyoogaa dosoosona. Yaatiyo gishshau, ne kanche haasayoppa. Issi xiqisiyaa issippe nabbabi simmin, neeni appe doorido issi qaalan woy issi qofan i ba qofaa yootanaadan oychana danddayaasa. Leemisuwau, 2 Qoronttoosa 4:16 nabbabi simmidi issi cimay, “Yihooway nena ooraxxissiyoogaa ne deꞌuwan beꞌadii?” yaagidi oychana danddayees. Yaatiyoogee, issoy issuwaa wozanappe ‘minttettanau’ maaddana danddayees.—Roo. 1:12.

A gakkidabaa malay gakkido, Geeshsha Maxaafan abay odettido uraabaa tobbiyoogankka ne ishaa minttettana danddayaasa. Keehi azzanida uri, issi issitoo unꞌꞌettidaba gidikkonne Yihooway eta xoqqu oottidi xeellido Haanniigaadaaninne Eppafiroditoosaagaadan qoppana danddayees. (1 Sam. 1:9-11, 20; Pili. 2:25-30) Geeshsha Maxaafan etabay odettido loꞌꞌo leemiso gidiya hara darotubaakka tobbana danddayaasa.

MAADDIYOOGAA AGGOPPA

Ishanttanne michontta baada oycha simmadakka, aggennan maaddiyoogan neeni etau wozanappe qoppiyoogaa bessana danddayaasa. (Oos. 15:36) Haasayaa wurssiyo wode, issippe haggaazanau wodiyaa keeriyoogee loꞌꞌo gidiyoogaa akeekana danddayaasa. Daro wodiyau gubaaꞌe cima gididi oottida Bernardi mata wode biidi oychido ishaara woy micheera haranttuwaa gayttiyo wode, i kase zoridobaa xeelliyaagan, “Kaseegaappe giigidee?” yaagidi akeekan oychees. Hegaadan qoppiyoogan, neeni he ishaa maaddanau oottana danddayiyo harabay deꞌiyaakkonne akeekana danddayaasa.

Awudeegaappenne aaruwan, ishanttinne michontti neeni etau qoppiyoogaadan, eta hanotaa akeekiyoogaadaaninne eta siiqiyoogaadan xeellana koshshees. (1 Tas. 5:11) Yaaniyo gishshau, ishanttanne michontta baada oychanaappe kase ne ishaa hanotaa qoppa. Hegaa xeelliyaagan woossa. Haniya xiqiseta doora. Yaatikko, “daafuranchchata” minttettana danddayiya suure qaalaa demmaasa.