“Ta deꞌoy waaniiddi deꞌiyaakko minttada qoppiyoogaa doommaas”

KASE DEꞌUWAA:

Taani Niwu Sawuz Welssen deꞌiya, Wariyalde giyo guutta kataman diccaas. Wariyalden deꞌiya asay dumma dummabaa oottees; dorssaanne mehiyaa haarees, qassi goshshaa goyees. He katamay geeshshanne danoy darennaagaa.

Nu soo naatu tamma giddon taani bayra gidiyo gishshau, tau layttay 13 gidido wode so asaa maaddanau oottiyoogaa doommaas. Taani darin tamaarabeenna gishshau goshshaa goyays. Tau layttay 15 gidido wode mehiyaa haariyaagaanne paraa loohissiyaagaa gidaas.

Goshshancha gidiyoogan loꞌꞌobaanne iitabaa tamaaraas. He oosuwaa oottiyoogaaninne heeran keehi ufayttaas. Omarssan karen uttada tamaa eettaydda, woraappe carkkiya carkkuwaa shemppaydda aginaanne xoolinttiyan kumida saluwaa xeellays. He wode ha loꞌꞌiya ubbabaa medhida uri deꞌana bessees gaada qoppidoogaa hassayays. Hara baggaara, goshshancha gidiyoogan issi issi qohiyaabaakka tamaaraas. Darotoo asay cayiyoogaa siyays, qassi sijaaraa metootennan demmana danddayays. Takkennan taanikka cayiyoogaanne sijaaraa uyiyoogaa doommaas.

Taayyo layttay 18 gidiyo wode Sidini kataman deꞌanau baas. Taani wotaaddara gidanau koyaas shin, tamaarabeenna gishshau gidana danddayabeykke. Ooso demmada issi layttaa Sidinen takkaas. Taani Yihoowa Markkatuura koyro gayttidoy he wode. Eti shiiquwau shoobbin baada, eti tamaarissiyoobay tuma gidiyoogaa sohuwaara akeekaas.

Gidikkokka, hegaappe simmin takkennan guyye gaxariyaa simmanau qofaa qachaas. Kunssilandde giyoosan Gundiwinde katamaa baas. Yan oosuwaa demmaas; qassi machaas; shin azzanittiyaabay ushshaa uyiyoogaa doommaas.

Nuuni naaꞌꞌu attuma naata yelida. Naati yeletti simmin, ta deꞌoy waaniiddi deꞌiyaakko minttada qoppiyoogaa doommaas. Sidinen Yihoowa Markkatu shiiquwan siyidobaa hassayada, issibaa oottanau qofaa qachaas.

Awusttiraaliyan deꞌiya Yihoowa Markkatu macara biiruwaa adrashay deꞌiyo issi takkida Wochiyo Keelaa demmaas. Tana maaddanaadan etau dabddaabbiyaa kiittaas. Hegaa gishshau, issi kehanne siiqiya Yihoowa Markkay tana oychanau yiis. Sohuwaara tana Geeshsha Maxaafaa xannaꞌissiyoogaa doommiis.

TAANI LAAMETTANAADAN GEESHSHA MAXAAFAY MAADDIIS:

Geeshsha Maxaafaa xannaꞌiyo wode, taani ta deꞌuwaa keehippe laammana koshshiyoogaa akeekaas. Taani hegaadan qoppanaadan oottida issi xiqisee 2 Qoronttoosa 7:1. He xiqisee ‘nu ashuwaa tunissiya ubbabaappe nu huuphiyaa geeshshanaadan’ zorees.

Sijaaraa uyiyoogaanne ushshaa likkiyaappe aattada uyiyoogaa agganau qofaa qachaas. Ha amalee daro layttau tanaara deꞌidaba gidiyo gishshau, hegaa aggiyoogee keehi metiyaaba. Gidikkokka, Xoossaa ufayssiya ogiyan deꞌanau murttaas. Roome 12:2n, “Xoossai intte qofaa muumeera dummayidi, inttena laammoppe attin, ha sa7aa asaa milatoppite” yaagiya zoriyaa oosuwan peeshshidoogee tana keehippe maaddiis. Ta eeshshaa laammanau ta qofaa laammana bessiyoogaa akeekaas; ta oottiyoobaa Xoossay xeelliyoogaadan qohiyaaba oottada xeellana koshshiyoogaakka akeekaas. Xoossay maaddin sijaaraa uyiyoogaanne ushshaa likkiyaappe aattada uyiyoogaa aggaas.

SHin cayiyoogaa agganau keehippe metootaas. Geeshsha Maxaafay Efisoona 4:29n, “Intte doonaappe . . . iita qaalai mulekka kiyoppo” yaagidi zoriyoogaa erays. Gidikkokka, iita qaalaa haasayiyoogaa sohuwaara aggana danddayabeykke. Isiyaasa 40:26n deꞌiya qofaa yereriyoogee tana keehippe maaddiis. Xoolinttiyan kumida saluwaa xeelliyaagan he xiqisee hagaadan gees: “Intte aifiyaa xoqqu oottidi, saluwaa xeellite; he xoolintteta medhdhidai oonee? I eta olanchchaadan kaalettees; eta qoodaakka erees. I eta ubbaakka eta sunttan sunttan xeesees. A anggaa gitatettaappenne a wolqqaa minotettaappe denddidaagan, etappe issoinne xayenna.” Taani beꞌada ufayttiyo, saluwaaninne saꞌan deꞌiya ubbabaa medhanau Xoossau wolqqay deꞌiyaaba gidikko, a ufayssiyaabaa oottanau ta deꞌuwaa laammanaadan i tau wolqqaa immana danddayiyoogaa qoppaas. Daro woosaaninne baaxiyan cayiyoogaa loddan loddan aggaas.

TAANI GOꞌETTIDO HANOTAA:

Taani mehiyaa haariyaagaa gidiyoogaadan, ta oottiyo heeran deꞌiya asay guutta gidiyo gishshau darotoo asaara haasaya erikke. Gidikkokka, Yihoowa Markkatu shiiquwan demmiyo loohissuwan ta qofaa haratussi waatada qonccissana danddayiyaakko tamaaraas. He loohissoy taani Xoossaa Kawotettaa mishiraachuwaa haratussi yootanaadan maaddidoogee taani demmido goꞌꞌaappe issuwaa.—Maatiyoosa 6:9, 10; 24:14.

Amarida layttaappe doommada galchchaa cima gidada oottaydda deꞌays. Ta mala Kiristtaaneta maaddanau taani oottana danddayiyo ubbabaa gita maatadan xeellays.

Taani darin tamaarabeennaba gidikkokka, Yihooway tamaarissido gishshau a keehippe galatays. (Isiyaasa 54:13) Leemiso 10:22n, “GODAA anjjoi dure kessees” yaagiyaagaa kumetta wozanaappe maayays.