I Nuna “Daro Ufaissees”

Yihooway tumuppe nuussi qoppii, woy ha saꞌan asaa naatu bolli gakkiya tuggan i qarettennee? Geeshsha Maxaafay nuna minttettiya ogiyan ha oyshaa zaarees. Xoossay tumuppe asaa naatuyyo qoppees, qassi nuuni ufayssiya deꞌo deꞌanaadan koyees. I asaa naati, etappe daroti galatennaageeta gidikkokka, ubba gallassi ba daro kehatettan goꞌettanaadan oottiis. Kiitettida PHauloosi giidobaa akeekite.—Oosuwaa 14:16, 17 nabbaba.

PHauloosi Lisxxiran deꞌiya, Xoossaayyo goynnenna asatuyyo hagaadan giis: “[Xoossay] beni asaa zare ubbaa bantta ogiyaa baana mala yeddi bayiis. Intteyyo iraa saluwaappe bukissees; kattaakka i wodiyan immees; qassi qumaa immidi, inttena daro ufaissees; yaatidi intteyyo lo77⁠obaa oottiiddi, ubba wodekka bau markka xayibeenna.” PHauloosi giidobaa eti akeekidoy ayba ogiyaanee?

Lisxxira asay PHauloosi yootidobaa metootennan akeekana danddayees. Eti goshshaa gooyiyaageeta, qassi araddanne daro haattay deꞌiyo heeran deꞌiyaageeta. SHin, PHauloosi iraa bukissiyaageenne kattaakka wodiyan immiyaagee Xoossaa gidiyoogaa eta akeekissiis. Yaatiyo gishshau, eti Xoossaa kehatettan goꞌettidi ubba wode daro kattaa shiishshoosona, qassi malꞌꞌo qumaa demmoosona.

PHauloosi Lisxxira asau yootidobaappe nuuni Xoossaa Yihoowabaa keehi koshshiya darobaa tamaaroos.

Yihooway nuuyyo koyidobaa dooriyo maataa immiis. Yihooway ubba biittaa asay “bantta ogiyaa baana mala” paqqadidoogaa hassaya. Geeshsha Maxaafaa birshshiyaageetuyyo giigida issi xuufee ha qofay “banttana ufayssiya ogiyan baanaadan” woy “eti loꞌꞌo giidi qoppiyoobaa oottanaadan” giyoogaa gidana danddayiyoogaa yootees. Yihooway bayyo goynnanaadan oonanne wolqqanttenna. I nuuyyo koyidobaa dooriyo, hegeekka nuuni koyiyo ogiyaa baanau dooriyo maattaa immiis.—Zaarettido Wogaa 30:19.

Yihooway nuuni a eranaadan koyees. PHauloosi i “bau markka” gidiyaabaa xayibeennaagaa yootiis. Qommoora yootido xuufee, ha qofaa “i ay mala Xoossakko asaayyo loyttidi qonccissiis” giidi birshshana danddayettiyoogaa yootees. Xoossay medhidobay a kehatettaa, aadhida eratettaa, wolqqaanne siiquwaa gujjin “beettenna a” eeshshaabaa loytti markkattees. (Roome 1:20) Yihooway babaa darobaa Geeshsha Maxaafan qonccissiis. (2 Ximootiyoosa 3:16, 17) Hegee Xoossay nuuni a eranaadan koyiyoogaa bessiyaaba gidennee?

Yihooway nuuni ufayttanaadan koyees. PHauloosi i ‘qumaa immidi qassi loꞌꞌobaa oottidi’ nuna ufayssiyoogaa yootiis. Yihoowa erenna nagaranchatikka bantta koyiyo qumaa miidi, bantta deꞌuwan amarida keenaa ufayttana danddayoosona. Gidoppe attin, Xoossay nuuni merinau ufayttanaadan koyees. Nuuni hegaa demmana danddayiyoy abaa tamaaridi oosuwan peeshshiyoogaa xallaana.—Mazamure 144:15; Maatiyoosa 5:3.

Nuuni ubbay Yihoowa kehatettan ubba gallassi goꞌettoos. ‘Qumaa immidinne loꞌꞌobaa oottidi’ nena ufayssiya Xoossaa waatada galatana danddayiyaakko aybissi gujjada erikkii?