Nuna Metoy Gakkiyo Wode Xoossay Nuussi Qoppii?

I HAGEE HANANAADAN WAATIDI PAQQADII?

Martto: Taani hachi hagaa heeran deꞌiya asau ha trakttiyaa immaydda deꞌays. Huuphe yohoy Tumaa Eranau Koyay? yaagees. Hagee neessa.

Saaro: Hagee haymaanootebee?

Martto: Ee. Koyro sinttan deꞌiya usuppun oyshata beꞌa. Ha oyshatuppe augaa—

Saaro: Akkay gidana. Tanaara haasayaydda ne wodiyaa coo wurssoppa.

Martto: Neeni hegaadan giyoy aybissee?

Saaro: Taani Xoossay deꞌiyoogaa siriyo gishshataassa.

Martto: Ne qofaa qottennan yootido gishshau galatays. Neeni beniisappekka hegaadan qoppay?

Saaro: Taani naatettan woosa keettaa bays. SHin haꞌꞌi biyoogaa aggoosappe takkaas.

Martto: Odishin, ta sunttay Martto.

Saaro: Taani Saaro.

Martto: Saaree, taani ammaniyoobaa neeni ammananaadan wolqqanttana koyikke. SHin issibaa erana koyays. Xoossay deꞌiyoogaa neeni siranaadan oottidabay aybee?

Saaro: Ta aayyiyaa 17 layttappe kase kaamiyan deshettaasu.

Martto: Hegee azzanttiyaaba. A keehi qohettadee?

Saaro: Ee, a he wodeppe doommada qaaxxana danddayukku.

Martto: Nawuꞌꞌasho. Hegee nenakka qohidoogee qoncce.

Saaro: Ee. Taani ‘Xoossay deꞌiyaaba gidikko, hagee hananaadan waati paqqadii? Hagaa mala metoy gakkanaadan Xoossay paqqadiyoy aybissee?’ gaada qoppiyoy hegaassa.

AYBISSI GIIDI OYCHIYOOGEE BALEE?

Martto: Neeni hegaadan qoppiyoogeenne oychiyoogee bala gidenna. Metoy nuna gakkiyo wode, aybissee giidi oychiyoogee wottin deꞌiyaaba. Geeshsha Maxaafan etabay odettido issi issi ammanettida asatikka hegaa mala oyshaa oychidosona!

Saaro: Tumaa gay?

Martto: Ee. Issi leemisuwaa Geeshsha Maxaafaappe nena bessana.

Saaro: Ero.

Martto: Hananabaa yootiya ammanettida Imbbaaqoomi Xoossaa oychidobaa akeeka; hegee Imbbaaqooma shemppo 1, paydo 2⁠nne 3n deꞌees: “Abeet GODAU, neeni tana maaddanaadan taani xeesiyo wode, aude gakkanaashin siyennan ixxuutee? Qassi taani naaqettada neeyyo waassiyo wode, aude gakkanaashin ashshennan ixxuutee? Ha naaquwaa tana aissi bessai?” Ha oyshati ne oyshaara issi mala gidokkonaa?

Saaro: Issi mala.

Martto: Hegaadan oychido gishshau Xoossay Imbbaaqooma hanqqettibeenna; woy au ammanoy paccees gibeenna.

Saaro: Hegee garamiyaaba.

YIHOOWAY TUGGAA IXXEES

Martto: Xoossay nu metuwaa akeekiyoogaanne metoy gakkiyo wode, i nuussi qoppiyoogaa Geeshsha Maxaafay yootees.

Saaro: Hegee woygiyoogee?

Martto: Kessaabaa 3:7n deꞌiya qofaa ane nena bessays. He xiqisiyaa neeni nabbabuutee?

Saaro: Ero. Hagaadan gees: “GODAI qassikka hagaadan yaagiis; ‘Taani Gibxxe biittan ta asai tuggatiyo tuggaa geeshsha be7ada, eti bantta kaabbotuppe waassiyo waasuwaa siyada, taani eta waayiyaa qoppaas.’”

Martto: Galatays. Ha xiqisiyaappe akeekiyoogaadan, ba asay tuggatiyo wode Xoossay hegaa beꞌii?

Saaro: Ee, i beꞌiyaaba milatees.

Martto: I hanettiiddi deꞌiyaabaa coo beꞌidi aggiigenna. He xiqisiyan kaallidi deꞌiya qofaa zaarettada beꞌa. Xoossay, “taani eta waayiyaa qoppaas” yaagiis. Hagee Xoossay asau qoppennaagaa bessiyaabee?

Saaro: CHii, gidenna.

Martto: Nuna metoy gakkiyo wode, i hegaa beꞌiyoogaa xalla gidennan, nuussi qaretteesinne qoppees.

Saaro: Ee, tuma.

Martto: Hegaa nu wozanan wottidi, ba asay waayettido wode Xoossau aybi siyettidaakko yootiya hara leemisuwaa ane beꞌoos. Hegee Isiyaasa 63:9n deꞌees. He xiqisee, “Eta waayee ubban i waayettiis” yaagi doommees. Yaatin, Xoossay ba asay waayettiyo wode waayettees ga qoppay?

Saaro: Ee, xiqisee hegaadan gees.

Martto: Saaree, Xoossay nuussi keehi qoppees; qassi nuuni tuggatiyo wode beꞌana koyenna. Nu waayettiyo wode ikka waayettees.

I DARO WODIYAA TAKKIDOY AYBISSEE?

Martto: Taani baanaappe kase, neeyyo issibaa yootana koyays.

Saaro: Ero, yoota.

Martto: Xoossaa wolqqaa xeelliyaagan Geeshsha Maxaafay yootiyoobaa akeeka. Taani qoppido xiqisee Ermmaasa 10:12. He xiqisiyaa neeni nabbabuutee?

Saaro: Ero. Hagaadan gees: “Ba wolqqan sa7aa medhdhidaagee, ba aadhdhida eran sa7aa essidaagee, ba akeekan salota miccidaagee a.”

Martto: Galatays. Ha xiqisiyaa qofay aybakko ane guuttaa qoppoos. Xoossay saluwaanne saꞌaa, qassi a giddon deꞌiyaabaa medhanau daro wolqqaa goꞌettidoogaa maayikkii?

Saaro: Maayays.

Martto: Xoossau ubbabaa medhiyo wolqqay deꞌiyaba gidikko, i nu metuwaa qaarana danddayees giyoogee bessiyaaba gidennee?

Saaro: Bessiyaaba.

Martto: Ane ne aayeebaa qoppa. Neeni i waayiyaa beꞌiyo wode azzaniyoy aybissee?

Saaro: A ta aayyiyo; ta o siiqiyo gishshataassa.

Martto: O hachi pattanau neeyyo wolqqi deꞌiyaaba gidiyaakko pattikkii?

Saaro: Hegee qoncce.

Martto: Hegee woygiyoogaakko qoppa. Xoossay nu metuwaa beꞌiyoogaa, i nuussi qoppiyoogaanne au zawi baynna wolqqay deꞌiyoogaa Geeshsha Maxaafay yootees. Yaatin, Xoossay nu metuwaa sohuwaara xayssanau kelttiyaa gelennaadan keehi danddayidoogaa akeekadii?

Saaro: Taani hagaadan mule qoppa erikke.

Martto: I nu metuwaa xayssanau hanno gakkanau kelttiyaa gelennan aggido gaasoy deꞌiyaaba milatennee?a

Saaro: Deꞌiyaaba milatees.

Martto: Hegaa xeelliyaagan Geeshsha Maxaafay yootiyoobaa hachi galla tobbana.

Saaro: Ero, saruwan gatto.b