GEESHSHA MAXAAFAA OYSHAA ZAARUWAA
Merinaa deꞌuwaa demmiyoogee danddayettiyaabee?
Nuna hayquwaappe naxa kessanau Xoossay giigissidobay aybee?
Koyro bitanee Addaamee daro xeetu layttaa deꞌiis. SHin i wurssettan ceeggidi hayqqiis. He wodeppe doommidi, asay ceeggennaadan darobaa maliis. Gidikkokka, ooninne hayquwaappe attana danddayenna. Aybissi? Addaamee Xoossaayyo azazettennan ixxidi nagaraa oottido gishshau, ceeggidi hayqqiis. Nuunikka ceeggoos; ayssi giikko, Addaameppe nagaraanne hayquwaa laattida.—Doomettaabaa 5:5; Roome 5:12 nabbaba.
Nuuni merinaa deꞌuwaa demmanaadan issi uri nuna wozana koshshees. (Iyyooba 33:24, 25) Wozoy issi ura naxa kessanau qanxxettiya waagaa; qassi nuuni hayquwaappe naxa kiyana bessees. (Kessaabaa 21:29, 30) Yesuusi nu gishshau hayqqido wode he waagaa qanxxiis.—Yohaannisa 3:16 nabbaba.
Merinaa deꞌuwaa waatidi demmana danddayiyoo?
Harggiyaappenne ceegatettaappe naxa kiyanay ubba asaa gidenna. Addaameegaadan Xoossaayyo azazettenna asay deꞌuwaa demmenna. Eta nagaray atto geetettido asatu xallay merinaa deꞌuwaa demmana.—Isiyaasa 33:24; 35:3-6 nabbaba.
Nu nagaray atto geetettanaadan nuuni oottana koshshiyaabay deꞌees. Nuuni Xoossaa Qaalaa, Geeshsha Maxaafaa xannaꞌidi Xoossaa erana koshshees. Geeshsha Maxaafay nuuni loꞌꞌo deꞌuwaa deꞌiyo ogiyaa, qassi Xoossan nashettiyoonne merinaa deꞌuwaa demmiyo ogiyaa tamaarissees.—Yohaannisa 17:3; Oosuwaa 3:19 nabbaba.