Deꞌo Oyttaa Baara Beꞌadii?

BIITTAA beꞌiya asati namisettidosona. Eti Beetaliheeme kataman beniigan deꞌiya, taarikiyan erettida sohota beꞌi simmidi, namisettido gishshawu, hegaa heeran deꞌiya qumaa mi beꞌanawu qoppidosona. Etappe issoy shumbburaa, timaatimiyaa, shunkkuruutuwaanne hara ataakilttiyaa walakkidi leeꞌe oyttaara aattiyo falafel giyoobay kaꞌiyo quma keettaa beꞌiis. He malꞌꞌiya qumay eti harasaakka beꞌanawu baana mala etawu wolqqaa immiis.

He asati erana xayikkonne, eti he gallassi miido oyttay eti taarikiyan erettidabaa beꞌidobaappe waannatiyaaba gidennan waayi aggana. Beetaliheeme giyo sunttaa birshshettay “Oyttaa Keettaa” giyoogaa; qassi hegaa heeran shaꞌan qoodettiya layttawu asay oyttaa uukkiis. (Uruto 1:22; 2:14) Ha wodiyan Beetaliheemen keehi erettiya oyttatuppe issoy he leeꞌe oyttaa.

Oyddu shaꞌu laytta gidiya wodiyaappe kase, Beetaliheemeppe tohossa baggan daro haakkennan, Abrahaama machiyaa Saara eti qoppennan eta soo yiida imattata mizanawu “oittaa” uukkaasu. (Doomettaabaa 18:6) Saara goꞌettido ‘liiqo xiillee’ emmer giyo gisttiyaa xiille woy banggaa xiille gidennan aggenna. Saara he oyttaa eesuwan uukkaasu; qassi hegaa a hoꞌꞌo shuchaa bolli uukkennan aggukku.—1 Kawotu Maxaafaa 19:6.

Ha taarikiyaappe akeekiyoogaadan, Abrahaama keettaa asay bantta oyttaa bantta huuphe uukkoosona. Eti zallaane gidiyo gishshawu, Saaranne i ashkkarati a kase deꞌiyo katamaa Uuran uukkiyoogaa mala bashiyan uukkanawu waayi danddayana. A heeran deꞌiya kattaappe liiqo xiilliyaa giigissaasu. Hegee woxan gaaccidi woy udulan caddidi giigissiyo daafurssiya ooso.

Woxay issi ura deꞌuwawu keehi koshshiyaaba gidiyo gishshawu, acoyyo a oyqqana danddayettennaagee, oyddu xeetu layttappe guyyiyan Muuse Higgiyan odettiis. (Zaarettido Wogaa 24:6) Issi keettaa asay woxi baynnan gallassawu banttassi koshshiya oyttaa uukkana danddayenna gishshawu, Xoossaa ayfiyan woxay keehi koshshiyaaba.—“Beni Wode Galla Galla Gaacciyoogaanne Uukkiyoogaa” giya saaxiniyaa xeella.

ASA WOZANAY GAZDDIDI DEꞌANAADAN MAADDIYA OYTTAA

Geeshsha Maxaafan 350 gidiya sohuwan oyttaabay odettiis; qassi Geeshsha Maxaafaa xaafidaageeti darotoo oyttaa qumaa giyo qaalaara issi mala oottidi xaafidosona. Yesuusi Xoossawu haggaaziyaageeti, “Hachchi hachchi koshshiya qumaa [oyttaa] nuuyyo hachchi imma” yaagidi, ammanettidi akko woossana danddayiyoogaa qonccissiis. (Maatiyoosa 6:11) Yesuusi hagan galla galla koshshiyaabaa Xoossay nuussi immanaagaa nuuni ammanettana danddayiyoogaa bessiis.—Mazamure 37:25.

SHin oyttaappe woy qumaappe keehi koshshiyaabay deꞌees. Yesuusi, “Asi Xoossai haasayiyo qaala ubban de7anaappe attin, oitta xalaalan de7enna” yaagiis. (Maatiyoosa 4:4) I yootidobay Israaꞌeela asawu koshshiya ubbabaa Xoossay giigissidi immido wodiyaa qonccissees. Hegee eti Gibxxeppe kiyi simmin gamꞌꞌennan hanidaba. Eti Siinaa bazzuwaa geloosappe issi agina gidiyaagee aadhin, eta qumay wuranawu matiis. He mela bazzuwan namisan hayqqana gi hirggidi eti, nuuni Gibxxe biittan, “Koyido qumaa ubbaa miida” giidi zuuzummidosona.—Kessaabaa 16:1-3.

Gibxxe biittaa oyttay malꞌꞌiyoogee erettidaba. Muuse wode Gibxxen oyttaa uukkiyoogan erettida asati he biittaa asawu dumma dumma oyttaanne daabbuwaa uukkoosona. SHin Yihooway ba asawu oyttaa immennan agganawu koyibeenna. I, “Taani intteyyo saluwaappe oittaa bukissana” yaagiis. Saluwaappe bukkida xaaza milatiya ‘burcce poquwaa’ mala gidida he oyttay maallado beettiis. Israaꞌeela asay hegaa koyro beꞌido wode, “Hagee aibee?” yaagidi oychiis. Muusee etawu, “Intteyyo maanau GODAI immido oittai hagaa” yaagidi zaariis. Eti hegaa “mannaa”a yaagidosona, qassi he oyttay eti 40 layttawu gazddidi deꞌanaadan maaddiis.—Kessaabaa 16:4, 13-15, 31.

Maalaalissiya hanotan etawu imettida mannay Israaꞌeelata koyro garamissennan aggenna. Hegee “eessaara uukkido lichchakkodan mal77ees”; qassi ubba asawu gidiyaagaa keenay imettees. (Kessaabaa 16:18) SHin eti guuttaa gamꞌꞌidi, kase Gibxxen miyo qumaa amottiyoogaa doommidosona. Eti, ‘Nu ayfee ha mannaappe attin, harabaa aynne beꞌenna’ yaagidi zuuzummidosona. (Qoodaabaa 11:6) Guyyeppe eti yiillotidi, “Ha iita qumai nuna sheneyiis” yaagidosona. (Qoodaabaa 21:5) ‘Saluwaa qumay’ wurssettan eti ixxiyoobanne shenetiyooba gidiis.—Mazamure 105:40.

DEꞌO OYTTAA

Hara darobaadan, asay oyttaakka xaasayi xeellana danddayees. SHin Geeshsha Maxaafay toochana bessenna keehi dumma oyttaabaa yootees. Yesuusi Israaꞌeelati galata xayidi shenetido mannaara geeddarssido he oyttay merinaa anjjuwaa demissana danddayees.

Yesuusi i yootiyoobaa ezggiyaageetussi hagaadan giis: “Taani de7o oitta. Intte aawati bazzon mannaa miidosona; shin haiqqidosona. Asi appe miidi haiqqenna oittai saluwaappe yiyaagee hagaa. Saluwaappe wodhdhida de7o oittai tana; ooninne ha oittaappe miikko, merinau de7ana; qassi ha sa7ai de7ana mala, taani immana oittai ta ashuwaa.”—Yohaannisa 6:48-51.

Yesuusi yootido ‘oyttaanne’ “ashuwaa” leemisuwaa ezggiya daroti hegaa akeekibookkona. Gidoppe attin, he leemisoy keehi qoncce leemiso. Mannay Israaꞌeelati 40 layttawu bazzuwan gazddidi deꞌanaadan maaddidoogaadan, oyttay Ayhudati galla galla gazddidi deꞌanaadan maaddiis. Mannay Xoossay immidoba gidikkonne, merinaa deꞌuwaa demissibeenna. SHin, Yesuusa yarshshoy an ammaniya ubbawu he woytuwaa demissees. I tumukka ‘deꞌo oytta.’

Neeni namisettiyo wode maanawu oytta koyiyoogee attenna. Qassi, ‘hachissi koshshiya qumaa [oyttaa] immido’ gishshawu Xoossaa galatana danddayaasa. (Maatiyoosa 6:11) Nuuni Xoossay malꞌꞌiyaabaa immiyoogaa nashshikkonne, ‘deꞌo oyttay,’ hegeekka Yesuus Kiristtoosi keehippe koshshiyoogaa mule dogana bessenna.

Muuse wode deꞌida galatenna Israaꞌeelatuugaappe dumma hanotan, nuuni ha alꞌꞌo oyttaa xaasayidi xeellennaagaa waatidi bessana danddayiyoo? Yesuusi, “Intte tana siiqiyaabaa gidikko, ta azazuwaa naagana” yaagiis. (Yohaannisa 14:15) Nuuni Yesuusa azazuwaa naagikko, merinawu ufayttiiddi oyttaa maana danddayoos.—Zaarettido Wogaa 12:7.