Geeshsha Maxaafaa Xannaꞌana Koshshiyoy Aybissee?

Hegaa mala oyshaa nena oycha eray? Yaatikko, haratikka neegaadan oychoosona. Deꞌuwaa xeelliyaagan denttiyo keehi koshshiya oyshati kumetta saꞌan deꞌiya asaa qofissoosona. He oyshatu zaaruwaa demmana danddayay?

Miilooniyan qoodettiya asay, “Ee danddayays!” giidi zaarees. Aybissi? Eti bantta oysha ubbawu Geeshsha Maxaafaappe zaaruwaa demmido gishshataassa. Geeshsha Maxaafay yootiyoobaa eranawu koyay? Yaatikko, Yihoowa Markkati miishsha qanxxissennan Geeshsha Maxaafaa xannaꞌissiyoogan goꞌettanawu koyana danddayaasa.a

Geeshsha Maxaafaabaa pilggiyoogaa xeelliyaagan issi issi asay hagaadan giyoogee qoncce: “Tawu wodee baawa.” “Akeekanawu keehi wayssiyaaba.” “Taani issibaa mintta oyqqanawu yayyays.” SHin haratu qofay hegaappe dumma. Eti Geeshsha Maxaafaappe tamaaranawu koyoosona. Ane amarida leemisota beꞌa.

• “Taani Kaatolikenne Protesttantte woosa keettaa, Sike beeta maqidasiyaanne Budistte gadaamiyaa baas; qassi yuniversttiyan haymaanootiyaa timirttiyaa tamaaraas. Gidikkokka, ayyaanaaban taani oychiyo daro oyshawu zaaruwaa demmabeykke. Guyyeppe issi Yihoowa Markkiyaa ta soo yaasu. A Geeshsha Maxaafaappe zaaridoban taani garamettada, Geeshsha Maxaafaa xannaꞌanawu eeno gaas.”—Giilo, Inggilize.

• “Taani deꞌuwaabaa darobaa oychays; shin ta woosa keettaa pastteree zaaridobaa taani kallabeykke. Gidikkonne, issi Yihoowa Markkay Geeshsha Maxaafaappe ta oyshaa zaariis. Taani gujjada eranawu koyiyaakkonne i oychin, ufayttada eeno gaas.”—Koffa, Beeniine.

• “Taani hayqqidaageetubaa eranawu keehi koyaas. Taani hayqqidaageeti paxa deꞌiyaageeta qohana danddayoosona gaada qoppays; shin Geeshsha Maxaafay woygiyaakko eranawu koyaas. Hegaa gishshawu, Yihoowa Markka gidida ta laggiyaara Geeshsha Maxaafaa xannaꞌiyoogaa doommaas.”—ZHoza, Brazile.

• “Taani Geeshsha Maxaafaa nabbabanawu malaas, shin akeekana danddayabeykke. Hegaappe simmin, Yihoowa Markkati ta soo yiidi Geeshsha Maxaafaa hiraagata amaridaageeta tawu loytti qonccissidosona. Taani tamaarana danddayiyo harabi deꞌiyaakkonne eranawu koyaas.”—Denizo, Mekisiiko.

• “Xoossay tawu tumuppe qoppiishsha gaada qoppays. Hegaa gishshawu, Geeshsha Maxaafay yootiyo Xoossaa woossanawu qoppaas. Kaalliya gallassi Yihoowa Markkati ta soo yin, Geeshsha Maxaafaa xannaꞌanawu eeno gaas.”—Anjo, Neppal.

Ha asatubay Yesuusi, “Bantta ayyaanan hiyyeesa gididoogaa eriyaageeti anjjettidaageeta” yaagidi yootidoogaa nuuni hassayanaadan oottees. (Maatiyoosa 5:3) Ee, ayyaanaabaa koyiyoogee asawu meretan deꞌiyaaba. He koshshaa kunttana danddayiyay Xoossaa xalla, qassi i ba Qaalaa Geeshsha Maxaafaa baggaara hegaadan oottees.

Hegaa gishshawu, Geeshsha Maxaafaa xannaꞌanawu waatana koshshii? Hegee nena waati goꞌꞌana danddayii? Ha oyshatu zaaruwaa kaalliya huuphe yohuwan beꞌana.