‘Saluwaappe Garssan Deꞌiyaabi Aybinne Inttena Teqqana Bessenna!’

PAARISE kataman, keehi erettida Pleyel konserttiyaa addaraashaa penggen, 1931n issi gallassi, 23u biittaappe biida asay shamꞌꞌi shamꞌꞌees. Boolima maayuwaa maayida asay addaraashaappe sinttan wogga takisetuppe wodhin, waanna addaraashaa sohuwaara kumiis. Konserttiyaa yettaa siyanaassa gidennan, nuuni sabbakiyo oosuwaa he wode kaalettiya Ishaa Razerforda haasayaa siyanawu 3,000 gidiya asay yaa biis. A haasayaa Paransaaye, Jarmanenne Poolandde qaalatun wokkaalidosona. Ishaa Razerforda wolqqaama cenggurssay addaraashay kooshimmanaadan oottiis.

Paarise gita shiiqoy Paransaaye biittan Kawotettaabaa sabbakiyoogaara gayttidaagan gitabay hanido shiiqo. Ishaa Razerfordi dumma dumma biittaappe shiiqidaageeti, ubba qassi yelaga Kiristtaaneti Paransaayen aqinye (aqinyeti beni kolporttere geetettoosona) gididi haggaazanaadan minttettiis. Inggilizeppe biida Joon Kuk giyo yelagay, “Yelagatoo, saluwaappe garssan deꞌiyaabi aybinne aqinye gididi oottennaadan inttena teqqana bessenna!” giya he minttettiya zoriyaa mule dogibeenna.a

Guyyeppe misoonaawe gidida Joon Kuka gujjin, hara daroti Maqidooniyaa bitaniyaagaadan shoobbido he shoobiyaa eeno giidosona. (Oos. 16:9, 10) Paransaayen 1930n deꞌiya 27 aqinyetu qooday issi layttan keehi gujjidi, 1931n 104 gidiis. He wode deꞌiya aqinyetuppe dariya baggay Paransaaye qaalaa haasayenna gishshawu, qaalay metiyoogaa, hiyyeesatettaanne eriyo asaappe shaahettidi deꞌiyoogaa eti waati meezetanee?

QAALAY METISHIN GENCCIYOOGAA

Kare biittaappe yaa biida aqinyeti markkattiyo karddiyaa eta gishshaa Kawotettaabaa yootanaadan goꞌettoosona. Paransaayen xalan mishiraachuwaa yootida Jarmanettuwaa haasayiya ishay hagaadan giis: “Nu Xoossay wolqqaama gidiyoogaa eroos. Nuuni haggaaziyo wode keehi yayyiyaaba gidikko, hegee asa yayyiyo gishshataassa gidennan, ‘Voulez-vous lire cette carte, sꞌil vous plaît? [Hayyanintta ha karddiyaa nabbabuuteetii?]’ giya qantta qofaa dogennaadan yayyiyo gishshataassa. Nu oosoy keehi koshshiyoogaa ammanoos.”

Aqinyeti pooqe keettan sabbakiyo wode, naagiyaageeti eta darotoo yedettoosona. Issi galla, Paransaaye qaalaa amaridabaa eriya naaꞌꞌu Inggilize biittaa michoti pooqiyaa naagiya keehi hanqqettida bitaniyaara gayttin, eti koyiyoy oonakko eta oychiis. He bitaniyaa hanqquwaa zarbbissanawu malaydda, michotuppe issinna issi penggiyaa bolli guutta birata bollan xaafettidabaa beꞌaasu. An xaafettidaagee, “Tournez le bouton [Dawaliyaa dawala]” yaagees. Hegee keettaawaa sunttaa gaada qoppada a moocu gaydda, “Nuuni Madam ‘Tournez le boutono’ oychanawu yiida” yaagaasu. Naaciyoogee mishettidi haggaaziya ha aqinyeta keehi maaddiis!

HIYYEESATETTAYNNE SHAAHETTIDI DEꞌIYOOGEE ETA TEQQIBEENNA

Paransaayen daro asaa 1930 heeran deꞌoy metees; kare biittaappe biida aqinyetu hanotaykka hegaa mala. Inggilizettuwaa haasayiya Mona Bzihosko giyo michiyaa bananne banaara haggaaziya aqinyiyo gakkidabaa hagaadan gaasu: “Nuuni deꞌiyoosay beni wodiyaagaa mala, qassi keehi wayssiya issibay balgguwan keettaa hoꞌettiyoogaa. Nuuni deꞌiyo kifilee darotoo keehi sasiyo gishshawu, maallado meecettanaappe kase joogiyaa haattan deꞌiya shaachchaa menttana koshshees.” He wode aqinyeti hanotay injjetenna gishshawu hidootaa qanxxidonaa? Mule hidootaa qanxxibookkona! Etappe issoy, “Nuussi ayba aqoynne baawa, shin aybinne pacci erenna” yaagidoogee, etawu siyettidabaa qanttan qonccissees.—Maa. 6:33.

He xala aqinyeti eriyo asaappe shaahettidi deꞌiyoogaakka meezetana koshshiis. Paransaaye biittan 1930 heeran Kawotettaabaa aassiyaageetu qooday 700ppe darenna, qassi etappe daroti he biittan ubbasan laalettidi deꞌoosona. Eriyo asaappe shaahettida aqinyeti ufayttidi deꞌanaadan maaddidabay aybee? Banaara haggaaziya aqinyeera hegaa mala metuwan genccida Mona hagaadan gaasu: “Nuuni eriyo asaappe shaahettidi deꞌiyoogaa meezetanawu nu dirijjitiyaa xuufiyaa ubbatoo issippe xannaꞌoos. He wode zaarettidi oychiyoogee woy Geeshsha Maxaafaa xannaꞌissiyoogee erettenna; hegaa gishshawu, nuna gakkidabaa yootanawunne issoy issuwaa minttettanawu nu soo asawunne hara aqinyetussi omarssan dabddaabbiyaa xaafoos.”—1 Tas. 5:11.

Metiyaabay deꞌishinkka, bantta goꞌꞌaa aggibayiya ha aqinyeti ubbatoo loꞌꞌobaa qoppoosona. Eti macara biiruwawu xaafido dabddaabbiyaappe hegaa akeekana danddayettees; hegeetuppe amaridaagee he aqinyeti Paransaayen daro laytti haggaazi simmidi xaafidoba. Ba azinaara 1931ppe 1935 gakkanaashin, Paransaaye biittan gaxaappe gaxaa gakkanaashin yuuyida Ani Krajino giyo tiyettida michiyaa he wodebaa hassayada hagaadan gaasu: “Nuuni keehi ufayssiya loꞌꞌo deꞌo deꞌida! Nuuni naaꞌꞌay aqinyenne ulottiya lagge. Kiitettida PHawuloosi giidoogaadan, ‘Taani puutiyaa tokkaas; Aphiloosi haattaa ushshiis; shin Xoossai puutiyaa dichchees.’ Daro layttaappe kase maaddida nuna hegee keehi ufayssiyaaba.”—1 Qor. 3:6.

Gencciyoogaaninne mishettiyoogan leemiso gidiya beni aqinyeti oottidobay kaseegaappe aaruwan haggaazanawu koyiyaageeti qoppana koshshiyaaba. Ha wodiyan, 14,000 gidiya kumetta wode aqinyeti Paransaayen deꞌoosona. Etappe daroti kare biittaa qaalaa goꞌettiya citan woy gubaaꞌiyan haggaazoosona.b Eti banttappe kasetiyaageetuugaadan, saluwaappe garssan deꞌiyaabi aybinne banttana teqqanaadan koyokkona!​—Paransaaye biittan xaafettida nu taarikiyaappe.