Ta deꞌuwan aybinne paccibeennabadan qoppaas

KASE DEꞌUWAA:

Poolandden Jarmane zawaa matan deꞌiya issi qeeri kataman yelettaas. Hegee goshshaynne woray dariyo heera gidiyo gishshawu, woppa duussaa deꞌaas. Ta aawaynne aayyiyaa tana siiqiyo gishshawu, taani loꞌꞌo deꞌuwaa deꞌanaadan, gooba tamaare gidanaadan, qassi oosuwan hayttatanaadan minttettidosona.

Ta eeshshay moorettiyoogaa doommidoy Vroswaf yuniversttiyan higgiyaa tamaaranawu biido wodiyaana. So asaappe haakkada deꞌiyo gishshawu, iita naatuura laggetaas. Ta kasekka kuwaasiyaa kaassaa dosays; shin he naatuura laggetidoogee kuwaasiyaa kaassaa pala siiqanaadan oottiis. Taani dosiyo kaassanchati Warssoppe yoosona; eti Qeeraanne Woggaa kaaꞌanawu biyo ubbasaa bays. Yaa biyo wode daro ushshaa uyays, jallissiyaabaa goꞌettays, qassi issi issitoo hinkko citaa dosiyaageetuura warettays. Tana geelladan polisee oyqqikko higgiyaara gayttida oosuwaa oottennaadan digganaagaa erikkokka, galla galla unꞌꞌissiyaabaappe hegee woppissiyaabadan qoppaas.

Taaninne ta laggeti qammi ushsha keetti biidi duriyoogaa dosoos. Hegaappe simmiiddi, ogiyan asaara warettoos. Tana darotoo poliseti oyqqiyaaba gidikkokka, higgiyaara gayttidaagan ta bolli metoy gakkennaadan ubbatoo hiillan kessa ekkays; qassi issi issitoo miishshaa immada attays. Ta deꞌuwan aybinne paccibeennabadan qoppaas. SHin ta haniyoobay likke gidennaagaa ta wozanay erees. Ta kahay tana walassennaadan ubbatoo Woggaa gallassi woosa keetti bays.

TAANI LAAMETTANAADAN GEESHSHA MAXAAFAY MAADDIIS:

Naaꞌꞌu Yihoowa Markkati 2004n ta soo yin, taani etaara Geeshsha Maxaafaa xannaꞌanawu eeno gaas. Tumu Kiristtaanetuppe koyettiyaabaa era simmin, ta kahay tana walassiyoogaa doommiis. Daro ushshaa uyiyoogaa, jaallissiyaabaa goꞌettiyoogaa, qassi Geeshsha Maxaafaa maaraa kaallenna asatuura laggetiyoogaa aggana bessiyoogaa eraas. Hanqquwaa eexxa kiyiyoogaanne makkaliyoogaa aggana koshshiyoogaakka akeekaas. Ta laamettana koshshiyoogaa erikkokka, iitabaa oottiyoogaa aggabeykke.

Issi gallassi qammi, hosppun asaara warettido wode, taani laamettana koshshiyoogaa akeekaas. Eti tana onggidi bubbuxidosona, qassi ta huuphiyaa keehi qakkidosona. Taani he wode hayqqana hanays ga qoppada, “Yihoowa, ne Qaalaadan deꞌabeenna gishshawu, tawu atto ga. Ta shemppoy attikko, Yihoowa Markkatuura Geeshsha Maxaafaa xannaꞌada laamettana” gaada woossaas. Taani hayqqennan attidoogee garamissiyaaba. Taani giidoogaadankka Geeshsha Maxaafaa xannaꞌaas.

Hegaappe simmin, 2006n Inggilize baas. Taani yaa biidoy Poolandde simmada higgiyaara gayttidabaa gujjada tamaaranawu koshshiya miishshaa demmanaassa. Yihoowa Markkatuura Geeshsha Maxaafaa xannaꞌaydda deꞌishin, issi xiqisee tana keehi denttettiis. Kiitettida PHawuloosi, “Taani ta Godaa Kiristtoos Yesuusa eriyoogee ubbabaappe keehi aadhdhiyo gishshau, ubbabaa tana mulekka go77ennabaadan qoodaas; taani a gishshau ubbabaa yegga bayaas. Kiristtoosa demmanaunne aara de7anau ubbabaa wora olidobaadan qoodais” yaagiis. (Piliphphisiyuusa 3:8) Kiitettida PHawuloosikka taagaadan kase higgiyaa tamaarida, qassi keehi makkalancha asa. (Oosuwaa 8:3) Gidikkokka, i Xoossaayyo oottiyoogeenne Yesuusa milatanawu baaxetiyoogee ubbabaappe keehi aadhiya deꞌo oge gidiyoogaa guyyeppe akeekiis. Taani PHawuloosabaa wotta denttada qoppiyo wode, oosuwan hayttatiyoogeenne makkalancha gidiyoogee tumu ufayssaa demissennaagaa akeekaas. PHawuloosi laamettikko, taakka laamettana danddayiyoogaa akeekaas. Hegaa gishshawu, higgiyaara gayttidabaa gujjada tamaaranawu koyiyoogaa aggada, Inggilizen deꞌanawu qofaa qachaas.

Yihoowabaa gujjada erido payduwan, kaseegaappe aaruwan akko shiiqaas. Laamettanawu wozanappe koyiyaageetuyyo i atto giyoogaa erada keehi ufayttaas. (Oosuwaa 2:38) Qassi 1 Yohaannisa 4:16n deꞌiya, “Xoossai siiqo” yaagiya qofaa wotta dentta qoppada, Xoossay makkalabaa ixxiyoy aybissakko akeekaas.

Tana keehi ufayssida harabay qassi Yihoowa Markkatu eeshshaa. Kandduwaara gayttidaagan Geeshsha Maxaafay yootiyo maaraa eti mintti kaalliyoogaa akeekaas. Taanikka ishatuura issippetettan ufayssan deꞌiya etappe issuwaa gidanawu koyaas. Taani baaxetada, qassi ta deꞌuwan issi issibaa giigissada 2008n xammaqettada Yihoowa Markka gidaas.

TAANI GOꞌETTIDO HANOTAA:

Geeshsha Maxaafay taani hayttatanawu koyiyoogaa, makkaliyoogaa, jallissiyaabaa goꞌettiyoogaa, daro ushshaa uyiyoogaanne kuwaasiyaa kaassaa pala siiqiyoogaa aggada, Geeshsha Maxaafaabaa asaa tamaarissiya, Xoossaa ashkkara gidanaadan maaddiis. Taani haꞌꞌikka kuwaasiyaa kaassaa beꞌiyoogaa dosays; shin hegaa kaseegaadan siiqennan agganawu qofaa qachaas.

Taagaadan Yihoowayyo goynniya, Estero giyo loꞌꞌiya machiyo ekkada ha wodiyan ufayssan deꞌays. Nuuni haꞌꞌi Inggilizen huuphessa baggan deꞌiya, Poolandde qaalaa haasayiya asaa Geeshsha Maxaafaa tamaarissiyoogan ufayttoos. Taani ta deꞌuwan ufayssaa haꞌꞌi demmaas. Ta kahay tana qumꞌꞌennan ufayssiya deꞌo deꞌays.