Xoossaarakka Ta Aayeerakka Saruwan Deꞌays

TA AAYYIYAA tana hagaadan oychaasu: “Neeni ne mayzzatussi ayssi goynnikkii? Neeni deꞌuwan deꞌanaadan oottiday eta gidiyoogaa akeekikkii? Eta galatikkii? Beniisappe deꞌiya meeziyaa waata aggabayay? Nu mayzzata bonchennan aggiyoogee nu goynoy eeyyatetta giyoogaa.” Hegaappe simmin ta aayyiyaa yeekka bayaasu.

Ta aayyiyaa hegaadan haasaya erukku. Qassi a taani xannaꞌanaadan paqqadaasu; gidoppe attin, a xannaꞌanawu koyennaagaa hiillan yootanawu qoppada hegaadan oottaasu. Taani iyyo ubbatoo azazettiyo gishshawu, he wode i kaaletuwaa kaallennan agganawu metootaas. SHin Yihoowa ufayssanawu he wode a yootiyoobaa siyabeykke. I taayyo wolqqaa immennaakko taani hegaadan oottana danddayikke.

KIRISTTAANE GIDIYOOGAA

Jaappaanen deꞌiya daro asaagaadan nuunikka Budistte. SHin Yihoowa Markkatuura naaꞌꞌu agina xallaa xannaꞌa simmada, Geeshsha Maxaafay tuma gidiyoogaa akeekaas. Saluwan taayyo Aaway deꞌiyoogaa akeekada, a loytta eranawu amottaas. Taani tamaariyoobaa ta aayeera ufayttidi tobboos. Kawotettaa Addaraashan Wogga galla shiiqiyoogaa doommaas. Taani tumaa loytta erada, Budistte wogaa hegaappe simmin kaallennaagaa ta aayeessi yootaas. I qofay sohuwaara laamettiis. A, “Nu mayzzata siiqenna uri son deꞌiyoogee kawushshiyaaba” yaagasu. Taani Geeshsha Maxaafaa xannaꞌiyoogaanne shiiquwaa shiiqiyoogaa agganaadan yootaasu. Ta aayyiyaa hagaadan gaana gaada taani mule qoppa erikke! A laamettaasu.

Taani ta aawaassinne ta aayeessi azazettanaadan Yihooway koyiyoogaa Efisoona shemppo 6ppe akeekaas. Ta aawaykka ta aayyeera exatiis. Taani eti yootiyoobaa siyikko, etikka taani yootiyoobaa siyana, qassi nu son sarotettay deꞌana yaagada koyro qoppaas. Hegaa bollikka, naaꞌꞌantto xekka timirtte keettaa geliyo paacee matido gishshawu, taani hegawu giigettanawu koshshiis. Yaatiyo gishshawu, taani heezzu aginawu shiiquwaa uttennaagaa ta aawaassinne ta aayeessi yootaas; shin he wodee wurin zaarettada shiiqanawu Yihoowayyo qaalaa gelaas.

Taani likke gidennabaa kuuyidoogee naaꞌꞌuban qoncciis. Koyruwan, ta qofay heezzu agina giddon laamettenna gaada qoppaas. SHin, taani sohuwaara ayyaanaaban keehi namisettada, Yihoowappe haakkiyoogaa doommaas. Naaꞌꞌanttuwan, ta aawaynne ta aayyiyaa ta qofaa maayiyoogee atto shin, tumu goynuwaa taani muleera agganaadan keehi wolqqanttidosona.

MAADUWAANNE EQETTIYOOGAA

So asay eqettiyo darotuura Kawotettaa Addaraashan gayttaas. Yihooway tana minttettanaagaa eti tawu yootidosona. (Maa. 10:34-37) Nu so asay attanaadan maaddana danddayiyay tana gidiyoogaa taani akeekanaadan eti maaddidosona. Hegaa gishshawu, Yihoowan waata ammanettanaakko akeekanawu koyada mintta woossiyoogaa doommaas.

So asay tana daro ogiyan eqettees. Ta aayyiyaa woossiyoogaaninne darobaa yootiyoogan taani agganaadan oottanawu malaasu. Taani darotoo coꞌꞌu gays. Taani zaaranawu haasayiyo wode, nuuni naꞌaykka taagee likke giyo gishshawu darotoo hanqqettoos. Taani ta aayeeyyo siyettiyaabaanne a ammaniyoobaa bonchidaba gidiyaakko, a woppu geennan waaya aggana. Ta aawaynne ta aayyiyaa taani sooppe kiyenna mala ubbatoo oosuwaa darissoosona. Issi issitoo taani soo gelennaadan kariyaa gorddoosona woy qumaa taassi ashshokkona.

Ta aayyiyaa harati bana maaddanaadan oychaasu. A ta asttamaariyaa oychin, i oossinne exatibeenna. Ta aayyiyaa ba ooso keettaa halaqay haymaanoote ubbay hada giidi tana ammanttana mala akko efaasu. A son daro dabbotussi dawalada bana maaddana mala yeekkaydda woossaasu. Hegee tana yiilloyikkonne, shiiquwaa biidosan cimati ta aayyiyaa erennan daro asawu markkattidoogaa taani qoppanaadan zoridosona.

Hegaappe simmin yuniversttiyaa gelanaadan tana paacee gakkiis. Ta aayyiyaanne ta aaway ta deꞌoy koyroppekka doommidi injjetanaadan oottiyaaba giidi eti qoppidoogaadan maaddanawu halchidosona. Taani loꞌꞌo oosuwaa oyqqanaadan eti qoppidosona. Nuuni woppu giidi haasayanawu metootiyo gishshawu, ta halchidobaa yootanawu ta aawaassinne ta aayeesi daro dabddaabbiyaa xaafaas. Ta aaway hanqqettidi yashissanawu hagaadan giis: “Neeni oosuwaa demmana gaada qoppikko, wontto demma woy qassi ha keettaappe kiya.” Hegaa xeelliyaagan taani Yihoowakko woossaas. Kaalliya gallassi taani haggaazishin, naaꞌꞌu michoti taani eta naati tamaariyoobaa xannaꞌissanaadan dumma dumma saatiyan oychidosona. Ta aaway he hanotan ufayttibeenna gishshawu, tanaara haasayiyoogaa muleera aggiis; i tawu somꞌꞌuwaa tukkees. Ta aayyiyaa taani Yihoowa Markka gidanaappe makkalancha naꞌa gidanaadan koyawusu.

Ta aawaynne ta aayyiyaa koyiyoobaa taani hegaa keena eqettanaadan Yihooway koyiishsha gaada issi issitoo qoppaas. SHin taani kaseegaappe aaruwan woossiyoogeenne Yihoowa siiquwaabaa yootiya xiqiseta wotta denttada qoppiyoogee ta aawaynne aayyiyaa eqettiyoogaa bessiyaagaadan xeellanaadan, qassi eti tana siiqiyo gishshawu hegaadan oottiyoogaa akeekanaadan maaddiis. Yihooway taani maara qoppanaadaaninne baana koshshiya ogiyaa akeekanaadan maaddiis. Qassi loytta haggaazido gishshawu, haggaazuwan kaseegaappe aaruwan ufayttaas. Ee, aqinye gidanawu halchaas.

AQINYE GIDADA HAGGAAZIYOOGAA

Issi issi michoti taani aqinye gidanawu koyiyoogaa eridi, ta aawaynne aayyiyaa woppu gaana gakkanaashin naaganaadan zoridosona. Taani aadhida eraa demmanawu woossaas, pilggaas, ta koshshaa qoraasinne kayma ishanttuuranne michonttuura zorettaas. Taani koyiyoy Yihoowa ufayssanaassa gidiyoogaa kuuyaas. Qassi taani aqinye gidennan takkiyoogee ta aawaanne aayee qofay laamettanaadan oottenna.

Naaꞌꞌantto xekka timirttiyaa wurssiyo laytti aqinye gidada haggaaziyoogaa doommaas. Aqinye gidada guutta wodiyaa haggaaza simmada, aassiyaageeti keehi koshshiyoosaa baada haggaazanawu halchaas. SHin ta aayyiyaanne aaway taani sooppe kiyanaadan koyibookkona. Yaatiyo gishshawu, tawu layttay 20 gakkanaashin takkaas. Hegaappe simmin, ta aayyiyaa hirggennaadan, nu dabboti deꞌiyo tohossa Jaappaane baada haggaazanaadan maddabana mala macara biiruwaa oychaas.

He sohuwan taani xannaꞌissido daroti xammaqettishin beꞌiyoogan daro anjjettaas. Guyyeppe, taani kaseegaappe loytta haggaazanawu qoppada Inggilizetto qaalaa tamaaraas. Naaꞌꞌu dumma aqinye ishati nu gubaaꞌiyan deꞌoosona. Eti mishettidi haggaaziyoogaa, qassi harata waati maaddiyaakko akeekaas. Hegaa gishshawu, dumma aqinye gidanawu halchaas. He wode, ta aayyiyaa naaꞌꞌutoo keehi sahettaasu. A sahettido wode, o xeellanawu naaꞌꞌutoo soo simmaas. Hegan garamettada, a ba xeelaa guuttaa laammaasu.

DARO ANJJUWAA

Laappun layttappe guyyiyan, qommoora denttido aqinyetuppe issoy, Atisushi taayyo dabddaabbiyaa kiittiis. I tana ekkanawu koyiyoogaa yootiis; qassi ta hanotaanne ta qofaa eranawu koyiis. Taani Atisusha gelanawu mule qaaqqata erikke, qassi awukka hegaa mala qaaqqay deꞌees gaada qoppabeykke. Aginappe guyyiyan, nuuni issoy issuwaa loytti eranaadan taani koyiyoogaa yootaas. Nuuni naaꞌꞌaykka kumetta wodiyaa haggaazanawunne ayba oosokka oottanawu koyiyo gishshawu, daro baggan nuussi deꞌiya qofay issi mala gidiyoogaa akeekida. Guyyeppe, taani a gelaas. Ta aayyiyaa, ta aawaynne ta dabboti daroti nu bullachaa yiido gishshawu keehi ufayttaas!

Daro takkennan, nuuni kumetta wode aqinye gididi haggaazishin, Atisushi woradaa xomoosiya ishatu gishshaa haggaazanaadan sunttettiis. Sohuwaara hara anjjuwaa demmida. Nuuni dumma aqinye gididi sunttettida, guyyeppe qassi woradaa oosuwan maddabettida. Nuuni woradan deꞌiya gubaaꞌeta ubbaa issitoo xomoosi simmin, macara biiruwaappe nuuyyo silkkee dawalettiis. ‘Neppale biittan woradaa oosuwan inttena maddabiyaakko eeno guuteetii?’ giidi nuna oychidosona.

Taani hegaa keena haahosaa biyo wode ta aawaassinne ta aayeessi aybi siyettanaakko qoppaas. Hegaa gishshawu etawu dawalaas. Ta aaway, “Neeni baana sohoy keehi loꞌꞌo” yaagidi zaariis. Issi saaminttappe kase a laggetuppe issoy Neppalebaa qonccissiya maxaafaa awu immiis, ubba qassi ta aaway Neppale biittay biidi beꞌanawu keehi loꞌꞌo soho giidi qoppi uttiis.

Neppalen deꞌiya siiqiya asatu giddon ufayttidi haggaaziiddi, haraban anjjettida. Neppaleppe daroban keehi dummatikkonne a matan deꞌiya Bangladeshe biittaa gubaaꞌetikka nu woradan gujettidosona. Haggaazuwan keehi darobaa beꞌida. Ichashu layttappe guyyiyan, zaarettidi Jaappaanen maddabettidi, haꞌꞌi yan woradaa oosuwaa ufayttidi oottoos.

Jaappaanen, Neppaleeninne Bangladeshen haggaaziyoogan, Yihoowaabaa taani darobaa tamaaraas! He ubba biittaa wogaynne meezee dumma dumma. Qassi he biittatu ubban deꞌiya asa ubbay dumma dumma. Yihooway asawu qoppiyoogaa, eta nashshiyoogaa, maaddiyoogaanne eta anjjiyoogaa taani beꞌaas.

Yihooway taani a eranaadan, ayyo oottanaadaaninne loꞌꞌo Kiristtaane azinaa demmanaadan oottidi tana anjjiis. Taani loꞌꞌobaa kuuyanaadan Xoossay tana kaalettiis, qassi haꞌꞌi aaranne nu so asaara siiquwan deꞌays. Taaninne ta aayyiyaa zaarettada loꞌꞌo lagge gidido gishshawu, Yihoowa galatays. Xoossaarakka ta aayeerakka saruwan deꞌiyo gishshawu, taani Yihoowa keehi galatays.