Hirggiyoogaa Agganawu Maaddiyaabaa

GACINO naꞌaagaa keenaa maado koshshiyo uri waayi deꞌana. Nuuni yelettiyo wode, nu aawaynne aayyiyaa koshshiya ubbaban nuna maaddoosona. Hemetaa doommiyo wode, nuuppe keehi aduqqiya wogga asaara gayttoos. Aawaynne aayyiyaa nu matan baynnaakko, nuuni hegeeta yayyana. SHin nuuni nu aayyee woy aawaa kushiyaa oyqqiyo wode yayyokko.

Naatettan nu aawaynne aayyiyaa nuna siiqiyoonne minttettiyo wode, woppu giidi deꞌoos. Aawaynne aayyiyaa nuna siiqiyoogaa akeekiyo wode, aynne hirggokko. Eti nuna nashshiyo wode keehi minettidi diccoos.

Nuuni dicciyo wode, mata laggetikka nuuni woppu gaanaadan maaddoosona. Eti nunaara deꞌiyo wode ufayttoos; qassi timirtte keettan boorasennaadan maaddoosona.

Hegee loꞌꞌo hanotan dicciya naatubaa qonccissiyaaba. SHin issi issi yelagatuyyo mata laggee deꞌenna; qassi keehi daro naata aayetinne aawati maara dichibookkona. Melisa,a “Siiqettiya so asay issibaa issippe oottiyoogaa bessiya pootuwaa beꞌiyo wode, ‘Taanikka yelagatettan deꞌiyo wode, nu soo asay hegaa mala gididaba gideerennee’ gaada qoppays” yaagaasu. Geella neenikka hegaadan qoppana danddayaasa.

HIRGGANAADAN OOTTIYA HANOTAN DICCIYOOGAA

Neeni hirgganaadan oottiya hanotan diccennan waaya aggana. Naatettan nena siiqiyaanne minttettiya ura demmennan aggana danddayaasa. Aawaynne aayyiyaa darotoo ooyettiyoogaanne wurssettan paraman shaahettidoogaa hassayana danddayaasa; qassi hegawu gaasoy nena gididabadan qoppennan aggakka. Ubba ixxi iitidi, ne aaway woy aayyiyaa nena keehi qohiyaabaa haasayennan woy oottennan aggokkona.

Hirgganaadan oottiya hanotan diccida naꞌi waanii? Issoti issoti yelagatettan jallissiyaabaa goꞌettiyoogaa woy daro ushshaa uyiyoogaa doommoosona. Baggati qassi haratuura laggetanawu danobaa oottiyaageetuura zuppetoosona. Hirgganaadan oottiya hanotan diccida yelagati harati banttana dosanaadan koyiyo gishshawu, naatettan banttappe mattuman dummatiya uraara siiqettiyoogaa doommoosona. Hegaa mala laggetettay darotoo gamꞌꞌenna gishshawu, eti kaseegaappe aaruwan hirggoosona.

Hegaa mala hanotan diccida hara yelagati qassi hegaa mala gita metuwaappe halidaba gidikkokka, pattennabadan qoppoosona. Aana hagaadan gaasu: “Ta aayyiyaa taani pattenna asa gidiyoogaa darotoo yootiyo gishshawu, taani hegaa mala asa gididabadan qoppaas. Ta aayyiyaa tana mule galata woy siiqa erukku.”

Nuuni hirgganaadan oottiyay diccido hanotaa xalla gidenna. Aqo laggiyaappe paraman shaahettiyoogee, layttan sugiyoogaa gaasuwan gakkiya metoy, ubba nu meraara gayttidaagan qoppiyoogeekka unꞌꞌettanaadan oottana danddayees. Gaasoy ayba gidikkokka, hegee nuuni ufayttennaadan ootteesinne haratuura deꞌiya dabbotaa moorees. Hirggiyoogaa agganaadan nuna aybi maaddana danddayii?

XOOSSAY NUUSSI QOPPEES

Nuuni maaduwaa demmana danddayiyoogaa akeekana bessees. Xoossay nuna maaddana danddayees; qassi i nuna maaddanawu koyees.

Xoossay hananabaa yootiya Isiyaasa baggaara hagaadan giis: “Taani ne Xoossaa gidiyo gishshau dagammoppa. Taani nena minttana; qassi taani nena maaddana. Taani nena ta xooniya ushachcha kushiyan kaafada oiqqana.” (Isiyaasa 41:10, 13) Leemiso hanotan Xoossay nu kushiyaa oyqqiyoogaa qoppiyoogee keehi minttettiyaaba! Nuuni aynne hirggana bessenna!

Unꞌꞌettidaba gidikkokka, Xoossay bantta kushiyaa oyqqidoogaa akeekida awu goynniya asatu taarikiyaa Geeshsha Maxaafay yootees. Sameela aayyiyaa Haanna naꞌa yelana danddayabeenna gishshawu unꞌꞌettaasu. A mayne gidiyo gishshawu darotoo karettaasu. Hegaappe denddidaagan, a qumaa meettaa ixxaasunne darotoo yeekkaasu. (1 Sameela 1:6, 8) SHin a ba wozanaabaa Xoossawu yoota simmada unꞌꞌettabeykku.—1 Sameela 1:18.

Mazamuraawee Daawitikka issi issitoo hirggiis. Daro layttawu, Kawuwaa Saaꞌooli a woranawu maliis. Daawiti darotoo hayqqiichi attiis; qassi issi issitoo metuwan muuhettidabadan qoppiis. (Mazamure 55:3-5; 69:1) Gidikkokka i, “Abeet GODAU, ne xalaalai tana saruwan naaga wottiyo gishshau, taani zin77ada sarotettan xiskkais” yaagiis.—Mazamure 4:8.

Haannanne Daawiti banttana unꞌꞌissidabaa Yihoowan wottidosona; yaatin, i eta woppissiis. (Mazamure 55:22) Nuuni waatidi hegaadan oottana danddayiyoo?

WOPPU GAANAWU MAADDIYA HEEZZUBAA

1. Ne Aawadan Yihoowa ammanetta.

Geeshsha Maxaafaa nabbabiiddi wotti denttidi qoppiyaagaa

Yesuusi nuuni a Aawaa, “issi Xoossaa” eranaadan minttettiis. (Yohaannisa 17:3) Kiitettida PHawuloosi, “Xoossai nuuppe ooyyoonne haaho gidenna” yaagiis. (Oosuwaa 17:27) Yaaqoobi qassi, “Xoossaakko shiiqite; ikka inttekko shiiqana” yaagidi xaafiis.—Yaaqooba 4:8.

Unꞌꞌettiyoogaa agganawu maaddiya waannabay nuna siiqiyaanne nuuyyo qoppiya Aaway saluwan deꞌiyoogaa eriyoogaa. Hegaadan ammanettanawu wode koshshana danddayees; shin daroti hegee tumuppe maaddiyaaba gidiyoogaa akeekidosona. Karolina, “Yihoowa ta Aawadan xeelliyoogaa doommido wode, ta wozanaabaa awu yootiyoogaa doommaas. Hegee tana keehi woppissiis!” yaagaasu.

Rachela hagaadan gaasu: “Ta aawaynne aayyiyaa tana aggibayin tarkka attido wode, Yihooway taani woppu gaanaadan maaddiis. Taani a haasayissays; qassi tana metiyaabaa maaddanaadan oychays. Yaatin i tana maaddiis.b

2. Ayyaanaaban so asa gidiyaageetuura laggeta.

Yesuusi ba erissiyo ashkkarati issoy issuwaa ishadaaninne michodan xeellanaadan tamaarissiis. I, “Intte ubbai ishantta” yaagiis. (Maatiyoosa 23:8) I ba erissiyo ashkkarati issoy haraa siiqanaadaaninne ayyaanaaban so asa mala gidanaadan koyiis.—Maatiyoosa 12:48-50; Yohaannisa 13:35.

Yihoowa Markkatu gubaaꞌiyan deꞌiyaageeti issoy issuwaara siiqettiyo gishshawunne issoy issuwaa minttettiyo gishshawu, eti so asa mala. (Ibraawe 10:24, 25) Unꞌꞌettida daroti gubaaꞌe shiiqoti eti woppu gaanaadan maaddiyoogaa akeekidosona.

Eeva hagaadan gaasu: “Tana hirggissiyaabaa akeekiya loꞌꞌo laggiyaa nu gubaaꞌiyan deꞌawusu. A ta yootiyoobaa ezggaasu, taayyo nabbabaasu, qassi tanaara woossaasu. A taani boorasennaadan oottaasu. Tawu siyettiyaabaa yootanaadaaninne ta metuwaa tarkka tookkennaadan a maaddaasu. A tana hegaadan maaddido gishshawu, kaseegaadan hirggikke.” Rachela qassi gujjada, “Taani gubaaꞌiyan ‘aayonne aawa’ demmaas. Eti tana siiqoosonanne taani hirggennaadan maaddoosona” yaagaasu.

3. Harata siiqa, qassi etawu keha.

Harata siiqiyoogeenne etawu kehiyoogee etaara mino laggetettaa medhanawu maaddees. Yesuusi, “Ekkiyaagaappe immiyaagee anjjettidaagaa” yaagiis. (Oosuwaa 20:35) Nuuni harata keehi siiqiyo wode etikka nuna keehi siiqanaagaa akeekana. Yesuusi ba erissiyo ashkkarati ‘immikko etawu imettanaagaa’ yootiis.—Luqaasa 6:38.

Nuuni harata siiqiyoogeenne haratikka nuna siiqiyoogee nuna woppu oottees. Geeshsha Maxaafay yootiyoogaadan, “siiqoi mulekka xayenna.” (1 Qoronttoosa 13:8) Mariya hagaadan gaasu: “Taani tabaa qoppiyo loꞌꞌo gidenna issi issi qofay tuma gidennaagaa erays. Harata maaddiyoogaaninne tabaa qoppennan aggiyoogan hegaa mala iitabaa qoppiyoogaa aggays. Taani haratuyyo issibaa oottiyo wode ufayttays.”

Guufetiyoobaa oyqqida cima bitaniyaa issi yelagay maaddees

UBBA ASAY WOPPU GIYO WODIYAA

Qommoora qonccida heezzubay, sohuwaara nuuni ubba wode woppu gaanaadan oottiyaaba gidenna. SHin hegeeti nuna keehi maaddana danddayoosona. Karolina hagaadan gaasu: “Taani haꞌꞌikka issi issitoo unꞌꞌettays. SHin kaseegaadan tana pattennabadan xeellikke. Xoossay tawu qoppiyoogaa erays; qassi taani woppu gaanaadan oottiya mata laggeti daroti deꞌoosona.” Rachelakka hegaadan qoppawusu. A hagaadan gaasu: “Issi issitoo taani keehi azzanays. SHin taani loꞌꞌobaa qoppanaadan maaddiya, zoriyaa oychana danddayiyo ishanttinne michontti deꞌoosona. Ubbaappe aaruwan, taani ubba galla haasayissiyo Aaway saluwan deꞌees. Hegee tana keehi maaddees.”

Matan yaana ooratta alamiyan nuuni ubbay woppu giidi deꞌanaagaa Geeshsha Maxaafay yootees

Nuuni hirgganaadan oottiyaabay merinawu xayana wodee yaana. Matan yaana ooratta alamiyan nuuni ubbay woppu giidi deꞌanaagaa Geeshsha Maxaafay yootees. Xoossaa Qaalay, “Asi ubbi ba woiniyaa turaa kuwaaninne balasiyaa kuwan woppu giidi uttana; ai asinne eta yashissenna” yaagees. (Mikiyaasa 4:4) He wode nuna ooninne hirggissenna woy qohenna. Nuuni haꞌꞌi keehi unꞌꞌettanaadan oottiyaabaykka he wode ‘hassayettenna.’ (Isiyaasa 65:17, 25) Xoossaynne a Naꞌay Kiristtoos Yesuusi tumu “xillotettaa” essana. Hegaa ayfee “merinau woppatettanne ammanettidi de7iyoobaa gidana.”—Isiyaasa 32:17.

a Ubba asatu sunttay laamettiis.

b Xoossaakko shiiqanawu koyiyaageeta Yihoowa Markkati Geeshsha Maxaafaa miishsha qanxxissennan xannaꞌissoosona.

Hirggiyoogaa Bessiya Hanotata

“Ta aaway ubbatoo mattottidi cabbuwaa kessiyo wode laametti aggees. I ba oyqqidobaa woranaappe kase, ba achaa kessidi yashissiya wanggireello mala gidees. Taani qassi yayyada appe qosettanawu maliya dorssa maree mala gidays. Taani naatettan darotoo hegaadan yayyaydda deꞌaas.”—Karolina ba naatettaabaa yootidobaa.

“Oonakka ammanana danddayennabadan tawu siyettiis. Taani deriyaa huuphiyan ogee bayin asi maaddanaadan waassin, ta waasuwaa siyida uri baynnabadaaninne tana maaddiya ura demmabeennabadan qoppaas.”—Eevo, mata wode paraman shaahettidaaro.

“Ta aaway darotoo ba cenggurssaa xoqqissidi, ‘Neeni iita naꞌa. Nena ooninne siiqenna!’ yaagees. Daro layttawu, taani iita asa gidennaagaanne harati tana tumuppe dosiyoogaa tana ammanttanawu malaas. Taani ubba gallassi asi bana qaachanaadan ba goynaa qaattikkokka ooninne a qaachibeenna kana mara mala gidaas.”—Marka, ba aaway karido naꞌaa.

“Taani issi loꞌꞌiya maccaasa beꞌiyo wode, asi ba son wottanawu dosiyo ciishsha mala gaada qoppays. SHin taani ooninne dosenna sharafa mala.”—Mariyo, bana pattennabadan xeelliyoogaa agganawu baaxetiyaaro.

“Taassi layttay biron 12 gidiyo wode, ta aayyiyaanne aaway ta naaꞌꞌu kaalo michontta ta bolli aggidi hara biitti biidosona. Taani keehi boorasaas. Taani tana maaddiyaanne ta oottiyo loꞌꞌobawu tana nashshiya ura koyaas. SHin taani gita woran ogee bayido asa mala gidaas. Taani ubbatoo hegaadan deꞌikkokka, he woraappe kiyiyo purddiyaa koyaas. Taani woppu gaadanne ufayttada deꞌanawu koyaas.”—Rachelo, oosuwawu hara biitti biidaageetu naꞌiyo.