Aqo Deꞌuwaa —Hegaa Doomettaanne Halchuwaa

1, 2. (a) Aqo deꞌoy waani doommidee? (b) Koyro bitaneenne maccaasiyaa aqo deꞌuwaabaa ay akeekana danddayiyoonaa? (Doomettan deꞌiya misiliyaa xeella.)

AQO oyqqiyoogee meeze gididaba. Hegaa doomettaanne halchuwaa pilggiyoogee aqo deꞌuwaa bessiyaagaadan xeellanaadaaninne Xoossay koyro qoppido anjjuwaa hegaappe demmanaadan nuna maaddana danddayees. Xoossay koyro bitaniyaa, Addaama medhi simmidi, sunttaa sunttanaadan mehiyaa doꞌaa akko ehiis. SHin “Addaamessi injjetiyaabinne a maaddiyaabi beettibeenna.” Hegaa gishshawu, Xoossay bitaniyaa xiskkuwaa kayrissidi a gaylliyaa meqettaappe issuwaa ekkidi macca asa kessiis, yaatidi o bitaniyaakko ehiis. (Doomettaabaa 2:20-24 nabbaba.) Yaatiyo gishshawu, aqo deꞌuwaa doomissidaagee Xoossaa.

² “Issi asi ba aawaanne ba aayyiyo aggi bayidi, ba machcheera issippe de7ees; eti naa77ai issi asa gidoosona” giidaagee Yihoowa gidiyoogaa Yesuusi yootiis. (Maa. 19:4, 5) Addaame gaylliyaa meqettaappe issuwaa ekkidi Xoossay koyro maccaasiyo medhido gishshawu, eti issuwaa gidiyoogaa akeekennan aggokkona. Azinaynne machiyaa paraman shaahettanaadan woy issi uri dawuttaa ekkanaadan Yihooway mule koyenna.

AQO DEꞌOY YIHOOWA HALCHUWAAPPE ISSUWAA

3. Aqo deꞌuwaa halchoy aybee?

³ Addaamee i guyyeppe Hewaano giidi sunttido loꞌꞌiya ba machen ufayttiis. A ayyo injjetiyaaronne maaddiyaaro. Addaameenne Hewaana issippe azinanne macho gididi ufayttana. (Doo. 2:18) Aqo deꞌuwaa halchoy yelettidi saꞌaa kumiyoogaa. (Doo. 1:28) Attuma naatinne macca naati bantta aawaanne aayyiyo siiqikkonne, wurssettan eta aggidi aqo oyqqidi bantta son deꞌoosona. Asay saꞌaa kumana; qassi kumetta saꞌay gannate gidanaadan oottana.

4. Koyro aqo deꞌoy waanidee?

⁴ Addaameenne Hewaana Yihoowayyo azazettennan ixxido gishshawu, koyro aqo deꞌoy moorettiis. “Beni shooshshai” Seexaanaa Dabloosi “lo77uwaanne iitaa erissiya mittaa teeraappe” miyoogee aybi loꞌꞌokkonne aybi iitakko kuuyanaadan maaddiya dumma eraa demissees gaada Hewaana ammananaadan oottidi o cimmiis. A hegaabaa ba azinaa oychabeennaagee i iyyo huuphe gidiyo maataa bonchennaagaa bessees. Addaamee Xoossawu azazettiyoogaa aggidi Hewaana ayyo immido mittaa teeraappe miis.—Ajj. 12:9; Doo. 2:9, 16, 17; 3:1-6.

5. Addaameenne Hewaana Yihooway oychin zaaridobaappe nuuni ay tamaarana danddayiyoo?

⁵ Xoossay Addaama oychido wode, Addaamee, “Tanaara de7anaadan neeni immido maccaasiyaa he mittaa teeraappe tau immin maas” yaagidi ba machen gaasoyiis. Hewaana bana shooshshay cimmiis gaada gaasoyaasu. (Doo. 3:12, 13) Hegee tuma gidenna pattenna gaaso! Koyro azinaynne machiyaa Yihoowawu azazettibeenna gishshawu, i he makkalanchatu bolli pirddiis. Hegee nuuni naagettana koshshiyoogaa bessiyaaba. Aqo deꞌoy giiga gidanaadan, azinaykka machiyaakka bessiyaabaa oottananne Yihoowawu azazettana bessees.

6. Doomettaabaa 3:15n deꞌiya qofaa qonccissa.

⁶ Seexaanay Edenen oottidobay deꞌishinkka, Geeshsha Maxaafan odettida koyro hiraagan Yihooway asaayyo hidootay deꞌiyoogaa yootiis. (Doomettaabaa 3:15 nabbaba.) Koyro makkalida ayyaana meretaa ‘maccaasee zerettay’ xayssana. Yaatiyoogan, Yihooway saluwan ayyo oottiya keehi daro ayyaana meretati geeshshati aara dumma dabbotan deꞌiyoogaa asay guuttaa akeekanaadan oottiis. Ayyaana meretati Yihoowayyo macho mala. I Dabloosa xayssanawu he ayyaana meretatuppe issuwaa kiittana. He zerettay koyro azinaappenne macheeppe halidabaa azazettiya asay demmanaadan oottana. Azazettiya asay Yihooway koyro halchidoogaadan saꞌan merinawu deꞌana.—Yoh. 3:16.

7. (a) Addaameenne Hewaana makkaloosappe doommidi aqo deꞌoy waanidee? (b) Azinatinne machoti ay oottanaadan Geeshsha Maxaafay yootii?

⁷ Addaameenne Hewaana makkalidoogee eta aqo deꞌuwaanne hara ubba aqo deꞌuwaa hegaappe simmin qohiis. Leemisuwawu, Hewaananne i zare gidida maccaasay shahaariyo wodenne yeliyo wode keehi waayettana. Maccaasay bantta azinaa azinaa laamotana; shin attumaageeti bantta machota wolqqan haarana; nuuni hegaa ha wodiyan daro aqo deꞌuwan beꞌoos. (Doo. 3:16) Geeshsha Maxaafay azinati siiquwan haarana koshshiyoogaa yootees. Qassi, machoti azinatuyyo haarettana koshshees. (Efi. 5:33) Xoossawu yayyiya aqo laggeti hashetidi oottiyo gishshawu, ooshshi darenna woy mule ooyettokkona.

AQO DEꞌUWAA—ADDAAME WODIYAAPPE BASHSHAA HAATTAA GAKKANAASHIN

8. Addaame wodiyaappe Bashshaa Haattaa gakkanaassi aqo deꞌuwaa hanotay ay malee?

⁸ Addaameenne Hewaana hayqqanaappe kase, eti attuma naatanne macca naata yelidosona. (Doo. 5:4) Eta bayra naꞌay Qaayeeli ba dabbotuppe issinno ekkiis. Naaꞌꞌu machota ekkidoogee Geeshsha Maxaafan odettido koyro bitanee Qaayeela zariyaa Laameeka. (Doo. 4:17, 19) Addaameppe Nohe wode Bashshaa Haattaa gakkanaashin deꞌida yeletan Yihoowayyo goynniyoogan erettiyaageeti keehi guutta. Aabeeli, Heenooki, Noheenne a soo asay hegeetuppe amaridaageeta. Nohe wode, “‘Xoossaa naata’ geetettiya meretati ha asaa macca naati puulanchcha gidiyoogaa be7idosona; be7idi etappe bantta dooridoogeeta” machidoogaa Geeshsha Maxaafay yootees. Kiitanchati ashuwaa maayidi bessenna hanotan maccaasaa hegaadan machin, Nefiliime geetettiya wolqqaama iita naati yelettidosona. Hegaa bollikka, ‘he wode saꞌaa bollan deꞌiya asaa iitatettay dariis; qassi eti wozanan qoppiyoobay ubbay ubba wodekka iita xalaala gidiis.’—Doo. 6:1-5.

9. Yihooway Nohe wode iita asaa waatidee, qassi he wode hanidabaappe nuuni ay tamaarana koshshii?

⁹ Yihooway Nohe wode Bashshaa Haattan iita asaa xayssiis. Asay he wode, aqo oyqqiyoogaa gujjin, ubba galla oottiyoobawu bichaariyo gishshawu, “xillotettaabaa yootida” Nohee bashshay matattidoogaa odin asay wozanan wottibeenna. (2 PHe. 2:5) Yesuusi he wodiyaa hanotaa ha wodiyan nuuni beꞌanabaara geeddarssiis. (Maatiyoosa 24:37-39 nabbaba.) Ha iita alamee xayanaappe kase, ubba asawu markka gidana mala kumetta saꞌan odettiiddi deꞌiya Xoossaa Kawotettaa mishiraachuwaa ha wodiyan daro asay siyenna. Aqo oyqqiyoogaanne naata dichiyoogaa mala so asaa allaallee Yihoowa gallassay eesoyiyaaba gidiyoogaa nuuni doganaadan oottenna mala akeekancha gidana koshshees.

AQO DEꞌUWAA—BASHSHAA HAATTAAPPE YESUUSA WODE GAKKANAASHIN

10. (a) Daro wogatun, meeze gidida shori baynnabay aybee? (b) Abrahaaminne Saara bantta aqo deꞌuwan waanidi loꞌꞌo leemiso gididonaa?

¹⁰ Noheenne a heezzu naati dawuttana xayikkonne, he wode asay dawuttaa ekkees. Daro wogatun, shori baynnabaa haniyoogee meeze gididaba; ubba qassi hegee haymaanoote meeziyaara walahettiis. Abraaminne (Abrahaami) a machiyaa Saaraya (Saara) Xoossawu azazettidi Kanaane biitti deꞌanawu biido wode, aqo deꞌuwaa xaasayidi xeelliyoogaa bessiya meezee he biittan kumiis. Yaatiyo gishshawu, Yihooway Sadoomanne Gamoora katamati xayanaagaa yootiis; ayssi giikko, he katamaa asay shori baynna keehi iitabaa oottees. Abrahaami ba soo asaa maara ayssiis; qassi Saara ba azinawu haarettiyoogan loꞌꞌo leemiso gidawusu. (1 PHeexiroosa 3:3-6 nabbaba.) Abrahaami ba naꞌay Yisaaqi Yihoowawu goynniya machiyo ekkanaadan oottiis. Israaꞌeelatu 12 zariyawu a naati mayzza aawa gidido Yisaaqa naꞌaa Yaaqoobakka hegaadan tumu goynuwaabay qofissiis.

11. Muuse Higgee Israaꞌeelati naagettanaadan waati maaddidee?

¹¹ Guyyeppe, Yaaqooba (Israaꞌeela) zerettaara Yihooway maachaa maacettiis. Azinatinne machoti ayyo goynniyo goynuwan naagettanaadan maaddiya Muuse Higgiyaa i etawu immiis. Leemisuwawu, dawuttiyoogaa gujjin, aqo oyqqiyoogaara gayttidaagan wogay deꞌees; qassi eeqawu goynniyaageeta ekkennaadan woy gelennaadan higgee Israaꞌeelata diggees. (Zaarettido Wogaa 7:3, 4 nabbaba.) Aqo deꞌuwan wolqqaama metoy merettiyo wode, cimati darotoo maaddoosona. Ammanettenna, qanaatiyaanne siriya ura gidennaadankka higgee diggees. Machiyo yeddana danddayettikkokka, hegawu maaray deꞌees. Issi uri “issi iitabaa” woy pokkobaa gaasuwan ba machiyo yeddana danddayees. (Zaa. 24:1) ‘Iitabay’ woy pokkobay aybakko qonccibeenna, shin hegee guuttaba giidi qoppana bessenna.—Wog. 19:18.

NE AQO LAGGIYAA MULE KADDOPPA

12, 13. (a) Milkkiyaasa wode issoti issoti bantta maccaasata waatidonaa? (b) Ha wodiyan, xammaqettida uri hara uraa aqo laggiyaa laggettikko, hegee ay kaalettanee?

¹² Hananaba yootiya Milkkiyaasa wode, pattiyaaban pattennaban gaasoyidi bantta machota yeddiyoogan daro Ayhudati eta kaddidosona. Yaatiyoogan, he attuma asati yelaga maccaasaa woy eeqawu goynniya maccaasaa ekkanawu yelagatettan ekkido machota yeddidosona. Yesuusi saꞌan deꞌiyo wodekka Ayhudati “issiban gaasottidi” yeddiyoogan bantta maccaasata kaddidosona. (Maa. 19:3) Xoossaa Yihooway hegaadan yeddiyoogaa ixxees.—Milkkiyaasa 2:13-16 nabbaba.

¹³ Ha wodiyan, Yihoowa asay aqo laggiyawu ammanettees; shin ammanettennaagaa bessiyaabay yeddi yeddidi hanees. Gidoppe attin, aqo oyqqida xammaqettida uri hara uraa aqo laggiyaa laggettidi ba aqo laggiyaappe paraman shaahettidi, he ura ekkiis giidi qoppoos. He uri ba nagaraappe simmennan ixxikko, gubaaꞌee geeshsha gidanaadan i bohettees. (1 Qor. 5:11-13) I woy a gubaaꞌiyaa yame gidanaappe kase, ba “nagaraappe simmidoogaa erissiyaabaa” oottana koshshees. (Luq. 3:8; 2 Qor. 2:5-10) He uri gubaaꞌiyaa simmanaashin hagaa keena wodee aadhana bessees giyoobi baawa. Nagaraa oottida uri tumuppe ba nagaraappe simmidoogaa bessanawunne zaarettidi gubaaꞌiyaa yame gidanawu issi woy naaꞌꞌu layttaa koshshana danddayees. He uri zaarettidi gubaaꞌiyaa yame gidikkonne, “Xoossaa pirddaa araataa sinttan” babaa yootana bessees.—Roo. 14:10-12; Inggilizetto Wochiyo Keelaa, Hidaare 15, 1979, sinttaa 31-32 xeella.

KIRISTTAANETU AQO DEꞌUWAA

14. Muuse Higgee aybin maaddidee?

¹⁴ Muuse Higgee Israaꞌeelata 1,500ppe dariya layttawu maaddiis. He higgee Xoossaa asay so asaara gayttidaagaaninne haraban geeshsha maaraa kaallanaadan maaddiis; qassi Masee yaana gakkanaashin eta naagiis. (Gal. 3:23, 24) Yesuusi hayqqin he Higgee attiis; yaatin Xoossay ooratta maachaa maacettiis. (Ibr. 8:6) SHin, Muuse Higgiyan digettibeenna issi issibay Kiristtaanetussi digettiis.

15. (a) Kiristtaane gubaaꞌiyan aqo deꞌuwawu kaalliyo maaray aybee? (b) Issi Kiristtaanee paraman shaahettanawu koyiyo wode ay qoppana koshshii?

¹⁵ Amarida Parisaaweti oychido oyshaa Yesuusi zaariiddi machiyo yeddanawu Muuse Higgiyan digettibeennaagee ‘koyro hegaa mala gidennaagaa’ yootiis. (Maa. 19:6-8) Hegaa yootiyoogan, aqo deꞌuwaa xeelliyaagan Xoossay Edenen kessido maaray Kiristtaane gubaaꞌiyankka haniyaaba gidiyoogaa Yesuusi qonccissiis. (1 Xim. 3:2, 12) Aqo laggeti “issi asa” gidiyo gishshawu, eti Xoossaa siiqiyoogeenne issoy issuwaara siiqettiyoogee eta issippetettaa minttin, shaahettennan deꞌana koshshees. Aqo laggee wodiraa laammennan appe paraman shaahettida uri haranttuwaa gelana woy ekkana danddayenna. (Maa. 19:9) Hananabaa yootiya Hooseꞌi ba machee Goomeriyyo atto giidoogaadan, wodiraa laammidi ba nagaraappe simmida uraa aqo laggee atto gaana danddayees. Hegaadan, Yihooway ayyaanaaban wodiraa laammida Israaꞌeelati bantta nagaraappe simmin eta maariis. (Hoo. 3:1-5) Issi uri ba machiyaa woy ba azinay wodiraa laammidoogaa eriiddi iira woy aara zinꞌꞌikko, hegee atto giidoogaa bessees; qassi Geeshsha Maxaafaa maaran paraman shaahettana danddayenna.

16. Aqo oyqqennan deꞌiyoogaa xeelliyaagan Yesuusi woygidee?

¹⁶ Tumu Kiristtaaneti aqo laggee wodiraa laammennan deꞌishin paraman shaahettennaagaa odi simmidi, ekkennan woy gelennan deꞌiyo ‘imotay imettidoogeetubaa’ Yesuusi yootiis. I gujjidikka, ‘Hegaa ekkanawu danddayiya uri ekko’ yaagiis. (Maa. 19:10-12, NW) Daroti eta qofay shaahettennan Yihoowawu haggaazanawu aqo oyqqennan deꞌoosona. Eti yaatido gishshawu, eta galatoos.

17. Issi Kiristtaanee aqo oyqqanawu woy oyqqennan agganawu kuuyanaadan aybi maaddana danddayii?

¹⁷ Issi uri aqo oyqqennan deꞌanawu danddayikko, aqo oyqqennan deꞌiyoogee woy oyqqiyoogee i ba wozanan kuuyiyooba. Kiitettida PHawuloosi aqo oyqqennan deꞌiyoogaa nashshikkonne, i, “SHaaramuxa gaaso gishshau, attumaasaassi huuphiyan huuphiyan machchiyaa de7u. Qassi maccaasaassi huuphiyan huuphiyan azinai de7o” yaagiis. PHawuloosi gujjidi, “Amuwan xuugettiyoogaappe ekkiyoogeenne geliyoogee lo77o gidiyo gishshau, eti banttana naaganau danddayana xayikko, ekkonanne gelona” yaagiis. Ekkiyoogee woy geliyoogee issi uri ba attumatettaa woy maccatettaa sohiyoogan amuwaa alennaadaaninne shaaramuxennaadan naagettanawu maaddana danddayees. Qassi ekkibeennaageeti woy gelibeennaageeti aqo oyqqanawu gakkidaakkonne qoppana koshshees. Issi uri aqo oyqqennan deꞌiyoogan ‘bana naaganawu ayyo danddayettennabadan’ qoppikko, awu panttatettaa layttay aadhin, i macho ekkikko hegee ‘nagara gidennaagaa’ PHawuloosi yootiis. (1 Qor. 7:2, 9, 36; 1 Xim. 4:1-3) SHin, issi uri yelagatettan keehi amottiyo gishshawu, ekkanawu woy gelanawu eesotana koshshenna. I woy a aqo deꞌuwan aawatettaa ekkanawu waayi gakkana.

18, 19. (a) Aqo oyqqanawu koyiya Kiristtaaneti waatana koshshii? (b) Kaalliya huuphe yohuwan ay beꞌanee?

¹⁸ Aqo oyqqiya Kiristtaaneti Yihoowayyo banttana geppidaageetanne wozanappe a siiqiyaageeta gidana koshshees. Eti bantta aqo deꞌuwan issippetettan deꞌanawu koyiyoogaa bessanawu issoy issuwaara keehi siiqettana koshshees. Eti, “Godaa ammaniya asaa” ekkanaadan woy gelanaadan Xoossay zorido zoriyaa kaallido gishshawu anjjettana. (1 Qor. 7:39) Eti ubbatoo Geeshsha Maxaafaa zoriyaa azazettikko, eta aqo deꞌoy giiga gidana.

¹⁹ Daro attuma asawunne macca asawu aqo deꞌoy giiga gidennaadan oottiya eeshshay deꞌiyo ha “wurssetta gallassi” deꞌiya Kiristtaaneti paaciyaa xoonanaadan maaddiya Geeshsha Maxaafaa qofaa kaalliya huuphe yohoy qonccissees. (2 Xim. 3:1-5) Nuuni merinaa deꞌuwaa ogiyan a asaara aggennan hemettiyo wode nu aqo deꞌoy giiganne ufayssiyaagaa gidana mala, Yihooway ba Qaalan nuussi koshshiyaabaa immiis.—Maa. 7:13, 14.