Worqqaappe Keehi Aadhiyaabaa Koya
Mulumuqqe worqqaa demma eray? Hegaa demmida asati keehi guutta. Gidoppe attin, miilooniyan qoodettiya asay hegaappe keehi aadhiyaabaa demmiis. Hegee “worqqan . . . shamettenna” Xoossaa aadhida eratettaa.—Iyy. 28:12, 15.
WOZANAPPE Geeshsha Maxaafaa xannaꞌiyaageeti issi issiban worqqaa koyiya asaa mala. He asati laggetiyaabi baynna he aadhida eratettaa demmanawu minnidi oottananne Geeshsha Maxaafaa ubbatoo loytti pilggana koshshees. Geeshsha Maxaafaa xannaꞌiya nuuni, asay worqqaa koyiyo heezzu ogeta akeekiyoogan ay tamaarana danddayiyoo?
MULUMUQQE WORQQAA DEMMAASA!
SHaafaa doonan hemettaydda awan phaphalqqi giya mulumuqqe shucha milatiya guuttabaa beꞌaasa giidi qoppoos. Hokkada beꞌiyo wode mulumuqqe worqqaa demmido gishshawu ufayttaasa. Hegee kibriitiyaa xeeraappe guuxxees, qassi almaaziyaa giyo alꞌꞌo shuchaa demmanawu hegaa keenaa wayssenna. Hegaa mala haraykka deꞌiyaakkonne gaada yuushsha aattada koyaasa.
Hegaadankka, guutta wodeppe kase, issi dogettenna gallassi issi Yihoowa Markkay ne soo biidi Geeshsha Maxaafan deꞌiya hidootaabaa neeyyo yootennan waayi aggana. Neeni ayyaanaaban mulumuqqe worqqa malabaa koyro demmido wodiyaa loytta hassayennan aggakka. Hegee hanidoy neeni Xoossaa sunttay Yihoowa gidiyoogaa Geeshsha Maxaafan koyro beꞌido wode gidennan waayi aggana. (Maz. 83:18, NW) Woy qassi neeni Yihoowa dabbo gidana danddayiyoogaa tamaarido wode gidennan aggenna. (Yaaq. 2:23) Neeni worqqaappe aadhiyaabaa demmidoogaa sohuwaara eradasa! Qassi ayyaanaaban mulumuqqe worqqa mala harabaa demmanawu keehi koyennan aggakka.
HARABAAKKA DEMMAASA!
Suuppa worqqay darotoo shaafaaninne zanggaaran dagattees. Hegaadan dagattido sohuwaappe, worqqaa koyiya mino oosanchati daro tammu shaꞌu Amarkkaa dolaare kessiya worqqaa demmana danddayoosona.
Neeni issi Yihoowa Markkaara Geeshsha Maxaafaa xannaꞌiyoogaa doommiyo wode, biittaappe kessido guufe worqqaa harqqiya uraagaadan neeyyo siyettennan waayi aggana. Geeshsha Maxaafaa xiqiseta darota wotta dentta qoppidoogee ne eraa gujjennan aggenna; hegee neeni ayyaanaaban minnanaadan oottiis. Neeni he alꞌꞌo Geeshsha Maxaafaa tumaa wotta dentta qoppaydda, Yihoowakko waanada shiiqanaakkonne merinaa deꞌuwaa naagaydda waanada a siiquwan deꞌanaakko tamaaradasa.—Yaaq. 4:8; Yih. 20, 21.
Worqqaa demmanawu minnidi koyiya uraadan, Geeshsha Maxaafaa tumaa alꞌꞌuwaa tamaaranawu minnada oottay?
Worqqaa koyiya uri biitta giddoppe alꞌꞌo worqqaa demmanawu koyiyoogaadan, neenikka ayyaanaaban alꞌꞌo aquwaa demmanawu minnada koyennan aggakka. Geeshsha Maxaafan deꞌiya waannatiya tumaa tamaara simmada, nena Yihoowawu geppanawunne xammaqettanawu oottana bessiyaabaa oottennan aggakka.—Maa. 28:19, 20.
KOYIYOOGAA AGGOPPA!
Worqqaa koyiya uri shuchaa gomppaappe guutta worqqaa demmana danddayees. Hegaa mala issi issi shuchan a menttidi kessana danddayiyo daro worqqay deꞌana danddayees. He shuchaa giddon worqqay sohuwaara waayi beettana. Ayssi giikko, keehi loꞌꞌo giyo tammu shaꞌu kilograame deexxiya hegaa mala shuchaappe 10 giraame worqqa xallay beettiyo gishshataassa! Gidikkokka, worqqaa koyiya uri hegaa bookki kessees.
Issi uri “Kiristtoosa timirttiyaa biron doommiyaagaa” tamaari simmidikka minnidi xannaꞌna koshshees. (Ibr. 6:1, 2) Neeni Geeshsha Maxaafaappe ooratta qofaanne goꞌettana danddayiyoobaa tamaaranawu minnada xannaꞌana bessees. Hegaa gishshawu, neeni daro layttawu xannaꞌidaba gidikkokka, ne Geeshsha Maxaafaa xinaatee ubbatoo goꞌꞌiyaaba gidanaadan ay oottana danddayay?
Tamaaranawu ubbatoo yeemotta. Aahuwan odettida ubbabaa loytta akeeka. Neeni minnada baaxetiyoogaa aggana xayikko, Geeshsha Maxaafaappe Xoossaa aadhida eratettaynne kaaletoy deꞌiyo alꞌꞌo buquraa demmana. (Roo. 11:33) Geeshsha Maxaafaa loyttada eranawu ne qaalan giigida pilgganawu maaddiya xuufiyaa loytta goꞌetta. Neessi koshshiya kaaletuwaanne Geeshsha Maxaafay tamaarissiyoobaa xeelliyaagan neeni oychiyoobaa zaaruwaa demmanawu danddayan koya. Harati keehi maaddiyaaba gidiyoogaa akeekido xiqisetinne huuphe yohoti awugeetakko oycha. Neeni Xoossaa Qaalaa xannaꞌaydda akeekido ufayssiya qofaa haratussi yoota.
Ne halchoy era gujjana xallaassa gidennaagee tuma. Kiitettida PHawuloosi ‘eray otorssiyoogaa’ yootiis. (1 Qor. 8:1) Yaatiyo gishshawu, ubbatoo ne huuphiyaa kawushshanawunne ammanuwan minnanawu baaxeta. Neeni so asaa goynuwaa ubbatoo goynniyoogeenne nerkka Geeshsha Maxaafaa aggennan xannaꞌiyoogee Yihoowa maaraadan deꞌanawu nena maaddana, qassi harata maaddanaadan denttettana. Ubbabaappekka aaruwan, neeni worqqaappe keehi aadhiyaabaa demmido gishshawu ufayttana.—Lee. 3:13, 14.