Ha Wodiyan Yihoowa Kaaletuwan Goꞌetta

LOꞌꞌO DOORUWAA POOLANDDEN

“TAANI xammaqettiyo wode tawu layttay 15; qassi usuppun aginappe simmin kaafiya aqinye gidada haggaaziyoogaa doommaas. Issi layttappe guyyiyan, kumetta wode aqinye gidanawu oychaas. Naaꞌꞌantto xekka timirttiyaa wurssiyo wode, aassiyaageeti keehi koshshiyoosan haggaazanawu oychaas. Ta yelettido biittaanne taani iira deꞌiyo Yihoowa Markka gidenna ta aayee aayyiyo aggada baanawu koyaas. Ta deꞌiyoonne yelettido kataman maddabettidoogaa woradaa xomoosiyaagee yootido wode keehi azzanaas! Taayyo siyettidabaa i erennaadan oottanawu malaas. Saꞌaa xeellaydda, i tawu yootidobaa qoppanawu aggada baas. Taani ta haggaazo laggeeyyo hagaadan gaas: ‘Taani Yoonaasadan haniyaaba tawu milatees. SHin wurssettan Yoonaasi Nanawe biis. Hegaa gishshawu, taanikka maddabettidosan haggaazana.’

“Ta yelettido kataman aqinye gidada haggaazishin haꞌꞌi tawu oyddu laytta gidiis; qassi taayyo imettida kaaletuwaa kaallidoogee loꞌꞌoba gidiyoogaa akeekaas. Tana metida waannabay ta iita qofaa. Haꞌꞌi keehi ufayttays. Issi aginan, 24 asaa Geeshsha Maxaafaa xannaꞌissaas. Qassi Yihooway maaddin, kase tana eqettiya ta aayee aayyiyo Geeshsha Maxaafaa xannaꞌissiyoogaa doommaas.”

FIIJE BIITTAN BEETTIDA LOꞌꞌOBAA

Fiije biittan deꞌiya issi Geeshsha Maxaafaa tamaariyaa gita shiiquwaa biyoogaappenne ba dabbo uri yelettido gallassaa bonchiyo sohuwaa ba azinaara biyoogaappe issuwaa doorana koshshiis. I azinay a gita shiiquwaa baana danddayiyoogaa yootiis. A shiiquwaappe simmin akko baana danddayiyoogaa awu yootaasu. SHin a shiiquwaappe soo simmada ayyaanaaban qohana danddayiyaabaappe haakkiyoogee loꞌꞌo gaada qoppido gishshawu, beennan aggaasu.

Guyyeppe, i o oychikko a “Yihoowa Markkatu shiiquwaa” wurssada etakko yaanaagaa i azinay ba dabbotuyyo yootin, eti, “A yuukku; Yihoowa Markkati yeleta gallassaa bonchokkona!” yaagidosona.a

Hegaa gishshawu, i azinay ba machiyaa ba ammaniyoobaaranne ba kahaara maayettiyaabaa oottido gishshawu iban keehi ufayttiis. Ammanettidoogee a guyyeppe ba azinaassinne haratuyyo markkattanaadan maaddiis. Hegee ay demissidee? I azinay Geeshsha Maxaafaa xannaꞌiyoogaanne iira gubaaꞌe shiiquwaa biyoogaa doommiis.