Nabbabiyaageetu Oyshaa

Aqo oyqqida Kiristtaaneti Luuppe (IUD) giyoobaa Geeshsha Maxaafaa qofaara maayiya ogiyan yeluwaa teqqiyoobadan xeellana danddayiyoonaa?

Azinanne macho gidida ubba Kiristtaaneti he yohuwaara gayttidabaanne Geeshsha Maxaafaa maaraa loytti pilggana danddayoosona. Yaatidi, eti Xoossaa sinttan loꞌꞌo kahay deꞌiyoogeeta gidanawu maaddiyaabaa kuuyana bessees.

Yihooway Addaamanne Hewaano, qassi guyyeppe Nohanne a so asaa, “Yelettite; corattite” yaagiis. (Doo. 1:28; 9:1) Kiristtaaneti hegaa azazettanaadan Geeshsha Maxaafay yootenna. Hegaa gishshawu, koyiyoogaa keena woy koyido wodiyan naata yelanawu azinaynne machiyaa yeluwaa teqqiyoobaa goꞌettana koshshiyaakkonne koshshennaakko kuuyana bessees. Eti ay qoppana koshshii?

Kiristtaaneti yeluwaa teqqanawu goꞌettiyoobaa ubbaa Geeshsha Maxaafaa maaraadan yiggi xeellana bessees. Eti yeluwaa teqqanawu shahaaraa kesissennay hegaa gishshataassa. Eriiddi shahaaraa kesissiyoogee Geeshsha Maxaafay deꞌuwaa bonchiyoogaa xeelliyaagan yootiyoobaara maayenna. Guuttaa takkidi yelettana naꞌa Kiristtaaneti woranawu koyokkona. (Kes. 20:13; 21:22, 23; Maz. 139:16; Erm. 1:5) Luuppiyaa goꞌettiyoogaabaa shin?

Ha allaalliyaa Uddufune 15, 1979 Wochiyo Keelay (sinttaa 30-31, Inggilizettuwaa) qonccissiis. He wode darosan deꞌiya luuppee shahaarennaadan teqqanawu yelo keettan wottiyo pilasttikeppe oosettiyaaba. He huuphe yohoy he luuppeti oottiyoobaa asay wurssi erennaagaa yootees. Daro saynttistteti attuma zerettay maccaasaa phuuphulliyaa gakkin shahaaray attennaadan diggiyaabay yelo keettan merettanaadan luuppee oottiyoogaa yootoosona. SHahaaray attana xayikko, naꞌi merettenna.

SHin issi issitoo shahaaray attidoogaa bessiyaabi deꞌees. He attida shahaaray yelo keettaappe kareera diccana woy qassi yelo keettaakko baana danddayees. He atettay yelo keettaa biyo wode, yan deꞌiya luuppee i maara diccennaadan diggees. Dicciya deꞌuwaa mogoliyoogee shahaaraa kesissiyoogaara issi mala. He huuphe yohoy gujjidi hagaadan giis: “Luuppiyaa goꞌettiyoogee qofissido Kiristtaanee hegaa mala qofaa Geeshsha Maxaafay deꞌuwaa geeshshatettaabaa yootiyoogaara yiggi xeellana bessees.”—Maz. 36:9.

SHin ha huuphe yohoy 1979n kiyi simmin, akkamuwaaninne saynisiyan laamettida darobay deꞌees.

Haꞌꞌi hara naaꞌꞌu qommo luuppeti deꞌoosona. Issi qommuwan koppere giyoobay deꞌees, hegee amarida layttappe kase darosan deꞌees. Hegaa bollikka, hormonee appe kiyiyo hara qommoy qassi amarida layttappe guyyiyan merettiis. Ha naaꞌꞌu qommoti oottiyoobaa xeelliyaagan asay akeekidobay aybee?

Kopperiyaa: Qommoora beꞌidoogaadan, luuppee attuma zerettay yelo keettaa kanttidi phuuphulliyaakko gakkennaadan oottiyaaba milatees. Hegaa bollikka, luuppiyaa giddoppe kiyiya kopperee attuma zerettaa woriya marzze gidennan aggenna.a Qassi, kopperee an deꞌiyo luuppee yelo keettawu giddo baggan issi issibaa laammiyaabadan asay qoppees.

Hormoniyaa: Yeluwaa teqqiya kininetun deꞌiyaagaa mala hormonee etan deꞌiyo dumma dumma luuppeti deꞌoosona. He luuppetuppe kiyiya hormonee yelo keettaa gakkees. He luuppee issi issi maccaasatun phuuphullee ba wodiyaa naagidi kiyennaadan teqqees. PHuuphullee kiyennaba gidikko, shahaaraykka attana danddayenna. Hegaappekka harabay, he luuppetun deꞌiya hormonee yelo keettawu giddo baggaa leeꞌissees.b Qassi hegee yelo keettaa doonan deꞌiya holggo malabay orddanaadan oottiyo gishshawu, attuma zerettay yelo keettaa gakkennaadan teqqees.

Qommoora beꞌidoogaadan, naaꞌꞌu qommo luuppetikka yelo keettawu giddo baggaa laammennan waayi aggana. Gidoppe attin, phuuphullee ba wodiyaa naagidi kiyin shahaaray attikko shin? He atettay yelo keettaa gelana danddayees, shin yelo keettawu giddo baggay leeꞌe gido gishshawu, shahaaraa tookkana danddayenna. SHahaaray attosaara hegaadan hayqqees. SHin saynttisteti hegee daro hani erennaagaa yootoosona; qassi yeluwaa teqqiyo kininiyaa goꞌettishinkka issi issitoo hegaadan hanana danddayees.

Yaatiyo gishshawu, koppereekka hormoneekka deꞌiyo luuppeti shahaaray attennaadan oottiyoogaa ammanettidi yootana danddayiya uri baa. Gidoppe attin, qommoora qonccida darobaa gaasuwan, hegaa mala luuppeta goꞌettin shahaaray darin atti erennaagaa saynisiyaa naqaashay bessees.

Luuppiyaa goꞌettanawu qoppiya Kiristtaane azinaynne machiyaa hegaabaa dottoriyaara haasayana danddayoosona. He dottoree heeran deꞌiya luuppetu qommuwaa, qassi hegeeti machiyo waati maaddana woy qohana danddayiyaakko etawu yootana danddayees. He azinaynne machiyaa, dottoreekka gidin hara ooninne eti oottanabaa kuuyanaadan naagana woy eeno gaana bessenna. (Roo. 14:12; Gal. 6:4, 5) Hegee eti banttawu kuuyana bessiyaaba. Eti Xoossaa ufayssiyaabaanne a sinttan banttawu loꞌꞌo kahay deꞌanaadan maaddiyaabaa issippe kuuyana bessees.—1 Ximootiyoosa 1:18, 19; 2 Ximootiyoosa 1:3⁠ra gatta xeella.