Ayyaanaabaa Qoppiya Asa Giyoogee Woygiyoogee?

1, 2. (a) Ayyaanaabaa qoppiyoogaa daroti waati xeelliyoonaa? (b) Ayyaanaabaa qoppiyoogaa xeelliyaagan nuuni beꞌana waannatiya oyshati awugeetee?

KANAADAN deꞌiya issi michchiyaa, “Ayyaanaabaa qoppiya ura gidiyoogee taani ufayttanaadan oottiis; qassi galla galla gakkiya metuwan genccanaadan tana maaddiis” yaagaasu. Brazilen deꞌiya ishay, “Nuuni ayyaanaabaa qoppanawu baaxetidoogee nu aqo deꞌuwan 23 layttaa ufayttidi deꞌanaadan maaddiis” yaagiis. Qassi Pilippinssen deꞌiya ishay, “Ayyaanaabaa qoppiya asa gidiyoogee tawu woppaa immiis; qassi dumma dumma ishanttuura maayettada deꞌanaadan maaddiis” yaagiis.

² Hegaa mala qofay ayyaanaabaa qoppiyoogaa loꞌꞌo hanotan qonccissees. Hegaa gishshawu, ‘Ayyaanaabaa qoppiyoogan waana diccananne qommoora odettida goꞌꞌaa waata loytta demmana danddayiyaanaa?’ giidi nuna oychana danddayoos. SHin he oyshaa zaaranaappe kase, ayyaanaabaa qoppiya asaabaa Geeshsha Maxaafay ay yootiyaakko loytti akeekana koshshees. Ha huuphe yohuwan, nuuni heezzu waannatiya oyshata beꞌana. (1) Ayyaanaabaa qoppiya ura giyoogee woygiyoogee? (2) Ayyaanaaban diccanawu nuna maaddiya leemisoti awugeetee? (3) Nuuyyo “Kiristtoosa wozanai” deꞌanaadan baaxetiyoogee ayyaanaabaa qoppiya asa gidanawu waati maaddii?

AYYAANAABAA QOPPIYOOGEE WOYGIYOOGEE?

3. Geeshsha Maxaafay asatettaabaa qoppiya ura ayyaanaabaa qoppiya urappe waatidi dummayii?

³ Kiitettida PHawuloosi ‘geeshsha ayyaanay deꞌiyo asa,’ woykko ayyaanaabaa qoppiya asa ‘geeshsha ayyaanay baynna asappe,’ woykko asatettaabaa qoppiya asappe dummayiyaabaa qonccissiis. (1 Qoronttoosa 2:14-16 nabbaba.) He naaꞌꞌaa dummatettay aybee? Asatettaabaa qoppiya uri, ‘Xoossaa ayyaanaa yohoy ayyo eeyyatetta gidiyo gishshawu, hegaa eranawu danddayennaagaa’ I yootiis. SHin ayyaanaabaa qoppiya uri “ubbabaa qorees”; qassi awu “Kiristtoosa wozanai” deꞌees. PHawuloosi nuuni ayyaanaabaa qoppiya asa gidanaadan zoriis. Asatettaabaa qoppiya asi ayyaanaabaa qoppiya asappe hara ayba ogetun dummatii?

4, 5. Asatettaabaa qoppiya uraa eeshshay aybee?

⁴ Asatettaabaa qoppiya uraa xeelaa ane koyro beꞌoos. Alamiyaa asay qoppiyo waannabay asatettaabaa. PHawuloosi he qofaa ‘Xoossaayyo azazettenna asaa haꞌꞌi haariya ayyaanaa’ yaagiis. (Efi. 2:2) He ayyaanay asay daro asaa kaallidi issi malabaa qoppanaadan denttettees. Hegaa gishshawu, etappe daroti banttassi likke milatidabaa oottoosona, qassi Xoossay kessido maaraa kaallanawu baaxetokkona. Asatettaabaa qoppiya asi bonchchettanawunne duretanawu keehi koyees, woy qassi ba maata giidi qoppiyoobay naagettanaadan koyees.

⁵ Asatettaabaa qoppiya ura bessiya harabay aybee? ‘Asatettaa ooso’ gidida aybanne oottiyaageeti he asatun qoodettoosona. (Gal. 5:19-21) PHawuloosi Qoronttoosa gubaaꞌiyawu xaafido koyro dabddaabbee asatettaabaa qoppiyaageetu daro eeshshaa qonccissees. SHaahotettaa medhdhiyoogee, exatiyoogee, ooyettiyoogee, pirdda keettan mootettiyoogee, huuphe gididaageetu maataa bonchchennaageenne likkiyaappe aattidi miyoogeenne uyiyoogee hegeetuppe amaridaageeta. Asatettaabaa qoppiya uri paacee gakkiyo wode, shugo gidiyo gishshawu xoonettees. (Lee. 7:21, 22) Yihuday issoti issoti ubba “Geeshsha Ayyaanai bainnaageeta” woykko ayyaanaabaa mule qoppennaageeta gidanaagaa yootiis.—Yih. 18, 19.

6. Ayyaanaabaa qoppiya ura bessiyaabi aybee?

⁶ Yaatin ayyaanaabaa qoppiya ura giyoogee woygiyoogee? Ayyaanaabaa qoppiya uri asatettaabaa qoppiya urappe dummatiyoy Xoossaakko shiiqiyoogaana. Ayyaanaabaa qoppiya asay ‘Xoossaa milatanawu’ baaxetees. (Efi. 5:1) Hegaa giyoogee eti hanotata Yihoowaagaadan xeellanawunne qoppanawu baaxetoosona giyoogaa. Xoossay etawu beettiyoogaa keena qoncce. Eti bantta deꞌo ubban Yihoowa maaraa kaallanawu baaxetiyoogan asatettaabaa qoppiyaagetuppe dummatoosona. (Maz. 119:33; 143:10) Ayyaanaabaa qoppiya uri asatettaa oosuwaa qoppiyoogaappe, ‘geeshsha ayyaanaa ayfiyaa’ ayfanawu baaxetees. (Gal. 5:22, 23) Ayyaanaabaa qoppiyoogee aybakko qonccissanawu ha leemisuwaa qoppa: Gooba zalꞌꞌanchchaa zalꞌꞌe xallaa qoppiya ura gaana danddayettees. Hegaadankka, ayyaanaabaa nashshiya uri ayyaanaabaa qoppiya ura geetettees.

7. Ayyaanaabaa qoppiya asaabaa Geeshsha Maxaafay ay yootii?

⁷ Geeshsha Maxaafay ayyaanaabaa qoppiya ura nashshees. Maatiyoosa 5:3y, “Bantta ayyaanan hiyyeesa gididoogaa eriyaageeti anjjettidaageeta; aissi giikko, saluwaa kawotettai etassa” yaagees. Roome 8:6y, “Asatettaabaa qoppiyoogee haiquwaa ehees; shin Geeshsha Ayyaanaabaa qoppiyoogee de7uwaanne sarotettaa ehees” yaagidi, ayyaanaabaa qoppiyoogaa goꞌꞌaa yootees. Nuuni ayyaanaabaa mintti qoppiyoogan ha wodiyan nu wozanankka Xoossaarakka sarotettaa, sinttappe qassi merinaa deꞌuwaa demmana.

8. Nuuni ayyaanaabaa qoppanawunne hegaa naagidi deꞌanawu baaxetana koshshiyoy aybissee?

⁸ SHin, nuuni keehi qohiya alamiyan deꞌoos. Nuuni asatettaabaa qoppiyoogee kumido alamiyan deꞌiyo gishshawu, ayyaanaabaa qoppanawunne he qofaa naagidi deꞌanawu wozanappe baaxetana koshshees. Nuuni ayyaanaabaa nu wozanan qoppana xayikko, alamee asatettaa qofay nu wozanan kumanaadan oottees. Hegaadan hanennaadan teqqanawu nuna maaddiyaabi aybee? Nuuni waanidi ayyaanaaban diccana danddayiyoo?

LEEMISO GIDIYA ASATUPPE TAMAARA

9. (a) Ayyaanaaban diccanaadan nuna maaddana danddayiyaabay aybee? (b) Ayyaanaaban nuussi loꞌꞌo leemiso gidiya ay asatubaa beꞌanee?

⁹ Issi naꞌi bana yelidaageetubaa loytti akeekidi eta loꞌꞌo leemisuwaa kaalliyoogan wozannaamana danddayees. Hegaadankka, nuuni ayyaanaaban mino asatubaa akeekidi eta milatiyoogan ayyaanaaban diccana danddayoos. SHin, asatettaabaa qoppiya asata milatennaadan nuuni naagettana bessees. (1 Qor. 3:1-4) Geeshsha Maxaafay he naaꞌꞌu qommo asatubaakka yootees. SHin nuuni ayyaanaabaa qoppiya asa gidanawu halchchido gishshawu, nuuni eta milatana danddayiyo loꞌꞌo leemiso gidiya amaridaageetubaa ane pilggoos. Nuuni Yaaqoobi, Mayraamanne Yesuusi nuussi leemiso gidiyoobaa beꞌana.

10. Yaaqoobi ayyaanaabaa qoppiya asa gidiyoogaa waati bessidee?

¹⁰ Ane koyro Yaaqoobabaa beꞌoos. Ha wodiyan nuuppe darotuugaadan Yaaqooba deꞌoy metiis. A worana koyiya, asatettaabaa qoppiya A ishaa Eesawa I danddayana koshshiis. Hegaa bollikka, A bolloy A darotoo cimmiis. SHin Yaaqoobi asatettaabaa qoppiya asaa giddon deꞌiiddi ayyaanaabaa qoppiis. I Yihooway Abrahaamayyo gelido qaalaa ammaniis; qassi Yihoowa halchchoy eta baggaara polettiyo ba keetta asawu koshshiyaabaa kunttiis. (Doo. 28:10-15) Yaaqoobi haasayidobaynne oottidobay Xoossay kessido maaraanne A sheniyaa I akeekiyoogaa bessees. Leemisuwawu, Yaaqoobi Eesawa yayyido wode Xoossaa hagaadan giis: “Taani nena woossais; . . . tana ashsha; . . . neeni tana, ‘Taani neeyyo tumu lo77obaa oottana; taani ne zerettaanne . . . abbaa shafiyaa keena oottana’ giidoogaa qoppa.” (Doo. 32:6-12) I baayyoonne ba aawatuyyo Yihooway qaalaa gelidobaa ammanidoogeenne Xoossaa sheniyaaraanne A halchchuwaara maayiyaabaa oottanawu koyidoogee qoncce.

11. Mayraama ayyaanaabaa qoppiya asa gidiyoogaa bessiyaabay aybee?

¹¹ Ane haꞌꞌi Mayraama leemiso gididobaa beꞌoos. Yihooway Mayraama Yesuusa aayo gidanaadan dooridoy A ayyaanaabaa qoppiya asa gidiyo gishshataassa. Hegaa aybin eriyoo? A ba dabbota Zakkaariyaasanne Elssaabeexo oychchanawu eta soo biido wode Xoossaa sabbido ufayssiyaabay A ayyaanaabaa qoppiya asa gidiyoogaa qonccissees. (Luqaasa 1:46-55 nabbaba.) Mayraama haasayidobay A Xoossaa Qaalaa wozanappe siiqiyoogaanne Ibraawetto Geeshsha Maxaafaa loytta eriyoogaa bessees. (Doo. 30:13; 1 Sam. 2:1-10; Mil. 3:12) Yooseefi Mayraamo ekki simmin, Yesuusi Yelettana gakkanaashin I ba machcheera gayttibeennaagaakka hassaya. Hegee ay bessii? Eta keehi qofissidabay Yihoowa sheniyaappe attin, bantta koshshaa poliyoogaa gidenna. (Maa. 1:25) Guyyeppe, Mayraama Yesuusa deꞌuwan hanidabaa loytta akeekaasunne I aadhdhida eratettan haasayidobaa hassayaasu. Qassi A “ha ubba yohuwaa ba wozanan wottausu.” (Luq. 2:51) A Masiyaara gayttidaagan Xoossaa shenee aybakko eranawu koyidoogee qoncce. Mayraami leemisoy Xoossaa sheniyaa nu deꞌuwan waati sinttayana danddayiyaakko qoppanaadan nuna maaddees.

12. (a) Yesuusi ayba ogiyan ba Aawaa milatidee? (b) Nuuni Yesuusa leemisuwaa waati kaallana danddayiyoo? (Doomettan deꞌiya misiliyaa xeella.)

¹² SHin, ayyaanaabaa qoppiyoogan, ha saꞌan deꞌida asaa ubbaappe aadhdhiya leemisoy oonee? Hegee Yesuusa gidiyoogee qoncce. I ba deꞌuwaaninne haggaazuwan ba Aawaa Yihoowa milatana koyiyoogaa ubbatoo bessiis. I Yihoowaagaadan qoppiisinne oottiis; qassi Xoossaa sheniyaadaaninne A maaraadan deꞌiis. (Yoh. 8:29; 14:9; 15:10) Leemisuwawu, hananabaa yootiya Isiyaasi Yihoowa qaretaabaa woygidaakko akeeka; qassi Wonggeliyaa xaafidaageetuppe issoy Marqqoosi, Yesuusa qofaabaa yootidobaara hegaa geeddarssa. (Isiyaasa 63:9; Marqqoosa 6:34 nabbaba.) Nuunikka maadoy koshshiyo asaara gayttiyo wode Yesuusaagaadan ubbatoo qarettiyoo? Hegaa bollikka, Yesuusi saꞌan deꞌido wode ubban mishiraachuwaa tamaarissiisinne yootiis. (Luq. 4:43) A hanotaynne I oottidobay ubbay I ayyaanaabaa qoppiyoogaa bessees.

13, 14. (a) Ayyaanaabaa qoppiya, ha wodiyan deꞌiya asatuppe nuuni ay tamaarana danddayiyoo? (b) Leemisuwaa yoota.

¹³ Ayyaanaabaa qoppiyoogan leemiso gidiya, Geeshsha Maxaafan odettidaageetuppe hara daroti ha wodiyan deꞌoosona; eti Kiristtoosaagaa mala eeshshaa loytti bessoosona. Neeni eti mishettidi haggaaziyoogaa, imattaa mokkiyoogaa, qarettiyoogaa woy eta loꞌꞌo eeshshata harata akeekennan aggakka. Eti nagaranchcha gidikkokka, loꞌꞌo eeshshaa bessanawunne Yihooway koyiyoobaa oottanawu minnidi baaxetoosona. Brazilen deꞌiya Rachelo giyo michchiyaa hagaadan gaasu: “Taani alamiyaa asaagaadan maayiyoogaa dosays. Hegaa gishshawu, kiphataa maayuwaa maayikke. SHin taani tumaa eridoogee ayyaanaabaa qoppiya asa gidanawu baaxetanaadan denttettiis. Laamettanawu waayettaas, shin taani haꞌꞌi ta deꞌuwan keehi ufayttays.”

¹⁴ Pilipinsen deꞌiya Relino hegaappe dumma metoy gakkiis. A deꞌuwan sintta xeera gidanawu xoqqa timirttiyaa tamaariyoogaanne loꞌꞌo oosuwaa oyqqiyoogaa xallaa qoppaasu. A hagaadan gaasu: “Ayyaanaaban taani halchchidobaa aggaagaas. SHin ta oosuwaappe aaruwan keehi koshshiyaabay ta deꞌuwan paccidoogaa akeekaas. Hegaappe denddidaagan, Yihoowawu loytta haggaazanawu zaarettada qoppaas.” He wodeppe haa simmin, Relina Yihooway qaalaa gelido, Maatiyoosa 6:33, 34n deꞌiyaagaa ammaniyoogan loꞌꞌo leemiso gidaasu. A, “Yihooway tawu koshshiyaabaa kunttanaagaa geeshshada erays!” yaagaasu. Intte gubaaꞌiyan deꞌiya hegaa mala asa neeni erennan aggakka. Yesuusa kaalliya ammanettida he asata milatanawu nuuni koyiyoogee erettidaagaa.—1 Qor. 11:1; 2 Tas. 3:7.

NEEYYO “KIRISTTOOSA WOZANAI” DEꞌANAADAN BAAXETA

15, 16. (a) Kiristtoosa milatanawu nuuni ay oottana koshshii? (b) “Kiristtoosa wozanai” nuussi deꞌanaadan waatana danddayiyoo?

¹⁵ Nuuni Kiristtoosa waati milatana danddayiyoo? Geeshsha Maxaafay 1 Qoronttoosa 2:16n, nuussi “Kiristtoosa wozanai” deꞌanaadan yootees. Roome 15:5y nuuni ‘Kiristtoos Yesuusaagaa mala qofaa’ qoppanaadan minttettees. Hegaa gishshawu, Kiristtoosaa milatanawu nuuni A qofaanne A eeshshaa ubbaa erana bessees. Yaatidi, nuuni A kottiyaa kaallana koshshees. Yesuusi Xoossaara dabbotido ba dabbotaa ubbatoo qoppiis. Hegaa gishshawu, nuuni Yesuusa milatiyoogee Yihoowa loytti milatanaadan oottees. Hegaappe denddidaagan, Yesuusaagaadan qoppiyoogaa tamaariyoogee keehi maaddiyoogaa akeekoos.

¹⁶ Nuuni waatidi hegaa tamaarana danddayiyoo? Yesuusa kaalliyaageeti I oottido malaatata beꞌidosona; I tamaarissiyoobaa siyidosona; qassi I ubba qommo asaa waati oyqqidaakkonne Xoossaa maaraa waati kaallidaakko beꞌidosona. Eti, “I oottido ubbabaassi nuuni markka” yaagidosona. (Oos. 10:39) SHin nuuni A beꞌana danddayokko. Gidoppe attin, Yesuusa eeshshaa loytti akeekanaadan maaddiyaabaa Yihooway Wonggeletun nuussi siiquwan xaafissi wottiis. Geeshsha Maxaafan Maatiyoosa, Marqqoosa, Luqaasanne Yohaannisa maxaafata nabbabiyoogaaninne wotti dentti qoppiyoogan Yesuusaagaadan qoppana danddayoos. Yaatiyoogan nuuni, ‘A nuuyyo leemiso oottidi kaallananne’ Kiristtoosa “qofaa ola miishshadan oiqqidi” nuuyyo minnana danddayoos.—1 PHe. 2:21; 4:1.

17. Kiristtoosaagaadan qoppiyoogee nuna waati maaddii?

¹⁷ Kiristtoosaagaadan qoppiyoogaa tamaariyoogee nuna waati maaddii? Qumaa miyoogee bollaa minttiyoogaadan Kiristtoosaagaadan qoppiyoogee nuuni ayyaanaaban minnanaadan oottees. Yaatiyoogan, ayba hanotankka Kiristtoosi oottiyoobaa loddan loddan akeekoos. Hegee qassi nu kahay geeshsha gidanaadaaninne Xoossay nuna nashshanaadan oottiyaabaa kuuyanaadan maaddees. He goꞌꞌay nuuni Godaa Yesuus Kiristtoosa maayanaadan oottiyaaba gidiyoogee tuma.—Roo. 13:14.

18. Ayyaanaabaa qoppiya asa gidiyoogaabaa xannaꞌidobaappe ay tamaaradii?

¹⁸ Ayyaanaabaa qoppiya asa gidiyoogee woygiyoogaakko beꞌida. Qassi ayyaanaabaa qoppiyoogan nuussi loꞌꞌo leemiso gidiya asatuppe tamaarana danddayiyoogaakka beꞌida. Wurssettan, “Kiristtoosa wozanai” nuussi deꞌiyoogee ayyaanaaban diccanaadan waati maaddiyaakko tamaarida. SHin ayyaanaabaa qoppiyoogaara gayttidaagan nuuni xannaꞌana koshshiyo hara amaridabay deꞌees. Leemisuwawu, nuuni ayyaanaaban ay keena minokkonne waati shaakki erana danddayiyoo? Ayyaanaaban minnanawu harabaa ay oottana danddayiyoo? Ayyaanaabaa qoppiyoogee nu deꞌuwan nuna galla galla waatidi maaddanee? Kaalliya huuphe yohoy he oyshata zaaranawu maaddees.