Nabbabiyaageetu Oyshaa

Yihoowa Markkati kiitettida PHawuloosa boꞌꞌadan misiliyan qonccissiyoy aybissee?

PHawuloosa qottaabaa ha wodiyan ooninne geeshshidi yootana danddayennaagee qoncce. Nu xuufetun kiyiya misilee PHawuloosa qonccissanawu giigissido misileppe attin, arkkiyolojiyan beettida ammanettiya naqaashi deꞌiyoobaa gidenna.

SHin, PHawuloosa qottaabaa yootiya amarida naqaashay deꞌees. Leemisuwawu, Laappune 1, 1902n kiyida Xiyoone Wochchiyo Keelay hagaadan gees: “PHawuloosa qottaabaa: . . . ‘Akts of Pool end Tekila’ . . . giyo 150 M.L., heeran xaafettida PHawuloosabaa yootiya xuufiyan daro wodeppe doommidi asay ammaniyo keehi loꞌꞌo qofay deꞌees. Hegan abay hagaadan qoncciis: ‘I qantta, boꞌꞌa, shirkka, dibbaara deꞌiyaagaa, naaꞌꞌu deemoy issippe gayttidoogaa; qassi a siiree adussa.’”

Zi Oksford Dikshineri of zi Kirischiyan CHerch (1997n attamettidaagaa) giyo maxaafay he beni xuufiyaa xeelliyaagan hagaadan giis: “‘Akts of Pool end Tekila’ giyo maxaafan odettida taarikiyaara gayttida issi issibay tuma gidenna gaana danddayokko.” Akts of Pool end Tekila giyo maxaafay xaafettoosappe amarida xeetu layttappe guyyiyankka, asay hegaa xoqqu ootti xeellees; he maxaafay Giriikettuwan kushiyan xaafettidaagee ha wodiyan 80 gidiyaagee deꞌiyoogeenne hara qaalankka birshshettidoogee hegawu naqaasha. Hegaa gishshawu, nu xuufetun kiyiya misileti PHawuloosa meray ay malakko yootiya beni xaafettida issi issi xuufiyaara maayoosona.

SHin, PHawuloosa qottaappe aaruwan keehi koshshiyaabay deꞌiyoogaa hassaya. PHawuloosi haggaaziyo wodekka issoti issoti “xeelliyo wode i daafuranchcha; a haasayaikka pattenna” giidi A boridosona. (2 Qor. 10:10) SHin maalaaliya ogiyan Kiristtoosi awu qonccin I Kiristtaane gididoogaa nuuni dogana bessenna. PHawuloosi ‘Ayhuda gidenna asaa sinttan, [Yesuusa] sunttaa erissanawu [Kiristtoosi] doorido miishsha’ gididi oottidobaakka nuuni qoppana danddayoos. (Oos. 9:3-5, 15; 22:6-8) Qassi Yihoowa ayyaanay denttettin PHawuloosi xaafido Geeshsha Maxaafaa kifiletuppe nuuni keehi goꞌettana danddayiyoogaa qoppa.

PHawuloosi Kiristtaane gidanaappe kase ba oottidoban ceeqettibeenna; qassi ba meraabaanne qottaabaa yootibeenna. (Oos. 26:4, 5; Pili. 3:4-6) I, “Yesuusi kiittido ubbaappe taani laafa; . . . Yesuusi kiittidoogaa geetettada xeesettanaukka bessikke” yaagiis. (1 Qor. 15:9) I guyyeppe hagaadan giis: “Taani geeshshatu ubbaa giddon laafiyaagaa gidikkokka, Aihuda gidenna asau zawai bainna Kiristtoosa duretettaa wonggeliyaa mishiraachchuwaa yootiyo ha qaadaa Xoossai taayyo immiis.” (Efi. 3:8) PHawuloosi sabbakidobay A meray ay malakko qoppiyoogaappe aaruwan keehippe koshshiyaaba gidiyoogee qoncce.