“Taakko Haa Yiite; Taani Inttena SHemppissana”

1. Maatiyoosa 11:28-30y yootiyoogaadan, Yesuusi gelido qaalay aybee?

YESUUSI I yootiyoobaa siyiya daro asawu maalaalissiya qaalaa geliis. I, “Taakko haa yiite; taani inttena shemppissana” yaagiis. (Maatiyoosa 11:28-30 nabbaba.) Hegee coo haasaya gidenna. Leemisuwawu, wolqqaama harggee sakkiyo maccaaseessi I ay oottidaakko ane qoppa.

2. Yesuusi sahettida issi maccaaseeyyo ay oottidee?

² He maccaaseessi maadoy keehi koshshiis. A paxanawu koyiyo gishshawu daro dottoretukko baasu. A 12 laytta waayettidaba gidikkonne, ooninne O pattibeenna. Higgee yootiyoogaadan A tuna. (Wog. 15:25) Gidoppe attin, waayettiyaageeta Yesuusi pattana danddayiyoogaa A siyido gishshawu Yesuusa koyanawu baasu. A Yesuusa demmido wode, A afalaa macaraa bochchaasu; bochchin I bollaappe goggiya suuttay sohuwaarakka aggi bayiis! SHin Yesuusi oottidobay O pattiyoogaa xalla gidenna. I O oyqqido hanotan O siiqiyoogeenne bonchchiyoogee iyyo akeekettiis. He maccaasiyaa shemppo demmidoogeenne minettidoogee qoncce.—Luq. 8:43-48.

3. Nuuni beꞌana oyshati awugeetee?

³ He maccaasiyaa Yesuusakko biidoogaa akeeka. A akko baanawu keehi baaxetaasu. Ha wodiyankka hegaa mala; nuuni Yesuusakko ‘yaanawu’ baaxetana bessees. Ha wodiyan, Yesuusi baakko ‘yiya’ hargganchchatu sahuwaa maalaalissiya hanotan pattenna. SHin I nuna, “Taakko haa yiite; taani inttena shemppissana” yaagidi haꞌꞌikka shoobbees. Ha huuphe yohuwan, nuuni kaallidi deꞌiya ichchashu oyshatu zaaruwaa beꞌana: Nuuni Yesuusakko ‘yaanawu’ ay oottana koshshii? Yesuusi, “Ta qambbaran waaxettite” giidoogee woygiyoogee? Nuuni Yesuusappe ay tamaarana danddayiyoo? I nuuyyo immido oosoy shemppissiyaagaa gidiyoy aybissee? Qassi nuuni Yesuusa qambbaran waaxettidi muletoo waati shemppo demmana danddayiyoo?

“TAAKKO HAA YIITE”

4-5. Nuuni Yesuusakko ‘yaana’ danddayiyo amarida ogeti awugeetee?

⁴ Nuuni Yesuusi yootidobaanne oottidobaa nuuyyo danddayettida keenan tamaariyoogee akko ‘yiyo’ issi oge. (Luq. 1:1-4) SHin, nuuni Geeshsha Maxaafay Yesuusabaa yootiyoobaa xannaꞌana bessees. Nuuni xammaqettanawunne Kiristtoosa ashkkara gidanawu kuuyiyo wodekka Yesuusakko ‘yoos.’

⁵ Nuuyyo maadoy koshshiyo wode gubaaꞌiyaa cimatukko biyoogee nuuni Yesuusakko ‘yiyo’ hara oge. Yesuusi ba dorssatussi koshshiyaabaa kunttanawu “imota” gidida ha attuma asata goꞌettees. (Efi. 4:7, 8, 11; Yoh. 21:16; 1 PHe. 5:1-3) Nuuni maaduwaa eta oychchanawu baaxetana koshshees. Nuuni cimati nu qofaa akeekidi nuussi koshshiyaabaa eroosona giidi naagana koshshenna. Juuliyaana giyo ishay hagaadan giis: “Taani sahettido gishshawu Beeteeleppe kiyana koshshiis; yaatin ta laggetuppe issoy cimati tana yiidi minttettanaadan taani oychchana mala taayyo yootiis. Oychchanawu taakko yiyoogee koshshenna gaada koyro qoppaas. Gidoppe attin, taani guyyeppe maaduwaa oychchaas; he maadoy taani kase ekkido imota ubbaappe aadhdhees.” Juuliyaana oychchidi minttettida naaꞌꞌu cimatu mala ammanettida cimati nuuni ‘Kiristtoosa wozanaa woy qofaa’ eranaadan maaddana danddayoosona; hegee nuuni A qofaa akeekidi kaallanaadan oottees. (1 Qor. 2:16; 1 PHe. 2:21) Hegee eti nuuyyo immana danddayiyo imota ubbaappe aadhdhiya imota.

“TA QAMBBARAN WAAXETTITE”

6. Yesuusi, “Ta qambbaran waaxettite” yaagidi yootido wode, woygana koyidee?

⁶ Yesuusi, “Ta qambbaran waaxettite” yaagidoy, “Taayyo maatay deꞌiyoogaa akeekite” gaanaassa gidennan waayi aggana. I “Tanaara issi qambbaran waaxettidi nuuni Yihoowayyo issippe oottana” gaanawu koyennan waayi aggana. Naaꞌꞌu hanotankka qambbaray nuuni oottana koshshiyaabaa bessees.

7. Maatiyoosa 28:18-20y yootiyoogaadan, nuuni oottanaadan imettida oosoy aybee, qassi nuuni ay ammanettana danddayiyoo?

⁷ Nuuni nuna Yihoowawu sheedhdhiyo wodenne xammaqettiyo wode Yesuusa shoobiyaa ekkoos. Yesuusi ubba asay baakko yaanaadan shoobbido gishshawu Xoossaayyo oottanawu koyiya oonanne I ekkennan ixxenna. (Yoh. 6:37, 38) Yihooway Yesuusi oottanaadan odido oosuwaa oottiyo maatay Kiristtoosa kaalliya ubbawu imettiis. Nuuni he oosuwaa oottana mala maaddanawu Yesuusi muletoo nunaara deꞌiyoogaa nuuni ammanettana danddayoos.—Maatiyoosa 28:18-20 nabbaba.

“TAAPPE TAMAARITE”

8-9. Bana ziqqi oottiya asay Yesuusakko shiiqiyoy aybissee, qassi nuuni nuna oychchana koshshiya oyshati awugeetee?

⁸ Bana ziqqi oottiya asay Yesuusakko shiiqees. (Maa. 19:13, 14; Luq. 7:37, 38) Aybissi? Yesuusa giddooninne Parisaawetu giddon deꞌiya dummatettaabaa ane qoppa. Haymaanootiyaa kaalettiya he Parisaaweti siiqennaageetanne otorettiyaageeta. (Maa. 12:9-14) Yesuusi siiqiyaagaanne bana ziqqi oottiyaagaa. Parisaaweti keehi erettiyoogaanne hayttatiyoogaa dosoosona. Hegaadan haniyoogee loꞌꞌo gidennaagaa Yesuusi yootiis. Ba erissiyo ashkkarati banttana ziqqi oottanaadaaninne haratuyyo haggaazanaadan I tamaarissiis. (Maa. 23:2, 6-11) Asay Parisaawetussi azazettana xayikko banttana aybi gakkanee giidi yayyiyo gishshawu, Parisaaweti wolqqan eta haaroosona. (Yoh. 9:13, 22) Yesuusi issibaa siiquwan oottiyoogaaninne keha qaalaa haasayiyoogan harata shemppissiis.

⁹ Neeni ha timirtteta Yesuusappe tamaaradii? Nena hagaadan oychcha: ‘Taani ashkke gidiyoogaadaaninne tana ziqqi oottiyaagaa gidiyoogaadan harati tana xeelliyoonaa? Taani haratuyyo haggaazanawu laafa ooso oottanawu eeno giyaanaa? Taani haratussi kehiyaanaa?’

10. Yesuusaara issippe oottiyaageetussi hanotay ay malee?

¹⁰ Yesuusi banaara oottiyaageeti ufayttidi oottanaadan hanotaa injjeyiis; qassi harata loohissiyoogan I ufayttees. (Luq. 10:1, 19-21) I ba erissiyo ashkkarati oyshaa oychchanaadan minttettiis; qassi I eta qofaa siyanawu koyiis. (Maa. 16:13-16) Iita carkkuwaa hanotaappe naagiyo ataakilttiyaadan, erissiyo ashkkarati diccidosona. Eti Yesuusi tamaarissidobaa loytti siyidosona; qassi loꞌꞌo oosuwaa oottiyoogan ayfidosona.

11. Nuuni nuna oychchana koshshiya oyshati awugeetee?

¹¹ Neeyyo aawatettaa maati deꞌii? Deꞌikko, nena hagaadan oychcha: ‘Taani ooso sohuwan woy son harata waata oyqqiyaanaa? Taani sarotettay deꞌanaadan oottiyaanaa? Harati oyshaa oychchanaadan taani minttettiyaanaa? Eta qofaa siyanawu taani eeno giyaanaa?’ Banttana oychchiyaageetu bolli hanqqettiyaanne banttaagaappe dumma qofaa yootiyaageetu bolli yedetaa gattiya Parisaawetu mala gidanawu nuuni mule koyokko.—Mar. 3:1-6; Yoh. 9:29-34.

“INTTE SHEMPPO DEMMANA”

12-14. Nuuni oottanaadan Yesuusi immido oosoy shemppissiyaaba gidiyoy aybissee?

¹² Yesuusi nuuyyo immido oosuwaa oottiyoogee nuna shemppissiyoy aybissee? Daro gaasoti deꞌoosona; shin amaridaagaa ane beꞌoos.

¹³ Nuuyyo ooppenne aadhdhiya xomoosiyaagee deꞌees. Ubbaappe Aadhdhiya, Xomoosiya Yihooway ba ashkkarata galatenna meqettaa iita goda gidenna. Nuuni oottiyo oosuwaa I xoqqu ootti xeellees. (Ibr. 6:10) I nuuyyo immido oosuwaa nuuni oottanawu koshshiya wolqqaa I nuussi immees. (2 Qor. 4:7; Gal. 6:5) Nu Kawoy Yesuusi harata wottiyoobi baynna ogiyan oyqqiyoogan nuuyyo loꞌꞌo leemiso. (Yoh. 13:15) Qassi nuna heemmiya cimati “dorssaa heemmiya gitaa,” Yesuusa leemisuwaa kaallanawu baaxetoosona. (Ibr. 13:20; 1 PHe. 5:2) Eti keha, minttettiyaageeta, qassi nuna tamaarissiyaageetanne naagiyaageeta gidanawu baaxetoosona.

¹⁴ Nuuyyo keehi loꞌꞌo laggeti deꞌoosona. Siiqiya laggetinne ufayssiya oosoy deꞌiyo nuuppe hara ooninne baawa. Ane hagaa qoppa: Nuuni keehi loꞌꞌo eeshshay deꞌiyo ishanttuuranne michchonttuura oottoos; shin eti haratuppe aadhdhiyaabadan qoppokkona. Etayyo eray deꞌikkonne, eti hegan ceeqettokkona; qassi eti harati banttappe aadhdhiyaabadan qoppoosona. Eti nuna banttanaara issippe oottiyaageetu xalladan gidennan, bantta laggedankka xeelloosona. Eti nuna keehi siiqiyo gishshawu bantta shemppuwaa nu gishshawu aattidi immanawu eeno goosona!

15. Nuuni oottiyo oosuwaa xeelliyaagan nuuyyo aybi siyettana koshshii?

¹⁵ Nuuyyo keehi loꞌꞌo oosoy deꞌees. Nuuni asaa Yihoowabaa tumaa tamaarissoosinne Seexaanay yootiyo worddoy qoncciya kiyanaadan oottoos. (Yoh. 8:44) Seexaanay asay hidootaa qanxxanaadan oottiya wordduwaa worddotiyoogan eti unꞌꞌettanaadan oottees. Leemisuwawu, Yihooway nu nagaraa atto geennanne nuna siiqenna giidi nuuni qoppanaadan I koyees. Hegee wolqqaama toohonne hanttaara worddo! Nuuni Kiristtoosakko ‘yiyo’ wode, nu nagaray atto geetettees. Yihooway nuna ubbaa wozanappe siiqees. (Roo. 8:32, 38, 39) Asay Yihoowan ammanettiyoogaa tamaaranaadan maaddiyoogeenne eta deꞌoy kaseegaappe giigiyoogaa beꞌiyoogee keehi ufayssiyaaba!

YESUUSA QAMBBARAN WAAXETTIDI MULETOO SHEMPPO DEMMITE

16. Nuuni tookkanaadan Yesuusi shoobbido toohoy nu tookkana bessiya hara toohotuppe waani dummatii?

¹⁶ Nuuni tookkanaadan Yesuusi shoobbido toohoy nu tookkana bessiya hara toohotuppe dummatees. Leemisuwawu, daroti oosuwaappe simmiyo wode daafuriyoogaa xalla gidennan, ufayttokkona. SHin, Yihoowayyoonne Kiristtoosayyo haggaaziyoogan daro wodiyaa aatti simmidi, nuuni keehi ufayttoos. Ooso gallassi omarssan nuuni daafurana danddayoos; qassi he galla omarssi nuuni gubaaꞌiyaa shiiquwaa shiiqanawu nuna giddennan waayi aggana. SHin, he shiiquwaappe soo simmiyo wode, nuuni shemppo demmoosinne minettoos. Nuuni sabbakiyo wodenne Geeshsha Maxaafaa buzo xannaꞌiyo wodekka, hanotay hegaa mala. Nuuni yaatanawu baaxetikko, shemppo demmoosinne minettoos.

17. Nuuni nu hanotaa xeelliyaagan ay erana bessii, qassi nuuni naagettana koshshiyaabay aybee?

¹⁷ Nuussi ubbaayyo amarida wolqqa xallay deꞌiyoogaa nuuni erana bessees. Yaatiyo gishshawu, nuuni oottanawu baaxetiyoobaa xeelliyaagan akeekanchcha gidana bessees. Leemisuwawu, miishshaa shiishshanawu baaxetiyoogan nu wolqqaa coo xayssana danddayoos. “Merinaa de7uwaa laattanau taani ai oottoo?” yaagidi bana oychchida dure yelagawu Yesuusi yootidobaa akeeka. He yelagay Higgiyawu azazettiiddi deꞌiis. Marqqoosa Wonggelee ‘Yesuusi bitaniyaa dosidoogaa’ yootiyo gishshawu, he bitanee loꞌꞌo asa gidennan waayi aggana. Yesuusi biittaa haariya he yelagaa shoobbiis. Yesuusi, “Baada neeyyo de7iyaabaa ubbaa baizzada, . . . yaada tana kaalla” yaagiis. Bitanee Yesuusa kaallana koyiis. SHin, I ba aquwaa aggi bayanawu koyibeenna. (Mar. 10:17-22) Hegaa gaasuwan, ba qambbaran waaxettanaadan Yesuusi shoobbidoogaa I ixxiis; qassi “miishshaassi” ubbatoo haarettidi deꞌiis. (Maa. 6:24) Nena gidiyaakko waatuutee?

18. Nuuni issi issitoo waatana koshshii, qassi aybissi?

¹⁸ Issi issitoo, nuuni nu deꞌuwan kaseyiyoobaa qoppiyoogee loꞌꞌo. Aybissi? Nu wolqqaa maara goꞌettiyoogaa erana koshshiyo gishshataassa. Markka giyo yelagay hagaadan giis: “Taani sima deꞌo deꞌiyaabadan, daro layttawu qoppaydda takkaas. Taani aqinye, shin miishshaabaanne injje deꞌo deꞌiyoogaabaa ubbatoo qoppays. Ta deꞌoy metiyaaba gididoy aybissakko akeekanawu taani baaxetaas. Taani ta koyiyoobaa kaseyiyoogaanne Yihoowayyo immiyo wodeenne wolqqay taappe palahidaagaa gidiyoogaa guyyeppe akeekaas.” Markki ba qofaanne ba deꞌuwaa hanotaa laammido gishshawu, I kaseegaappe aaruwan Yihoowayyo haggaazana danddayiis. Markki hagaadan giis: “Taani issi issitoo miishshaabawu hirggays; shin Yihoowaynne Yesuusi maaddin, Yihoowayyo haggaaziyoogan xeelaa wottaas.”

19. Suure xeelay deꞌiyoogeeta gidiyoogee keehi koshshiyoy aybissee?

¹⁹ Nuuni kaallidi deꞌiya heezzubata oottikko, Yesuusa qambbaran waaxettidi ubbatoo shemppo demmana. Koyruwan, nu xeelay ubbatoo suure gido. Nuuni Yihoowa oosuwaa oottiyo gishshawu, hegee A ogiyan oosettana bessees. Nuuni oosanchchata, qassi oosuwaa Goday Yihoowa. (Luq. 17:10) Nuuni A oosuwaa nu ogiyan oottanawu baaxetikko, nuuyyo hanotay keehi deexxanaadan oottoos. Wolqqaama booraykka gidin, aggennan wora goochchikko, qassi qambbaraappe kiyanawu baaxetikko, qohettananne keehi daafurana danddayees. SHin, nuuni Yihoowa oosuwaa I koyiyo ogiyan oottikko, nu oottana danddayokko giidi qoppiyoobaa oottananne xoonana danddayokko giidi qoppiyo metota xoonana danddayoos. A shenee polettennaadan ooninne diggana danddayennaagaa hassaya!—Roo. 8:31; 1 Yoh. 4:4..

20. Yesuusa qambbaran waaxettiyoogaa xeelliyaagan nu qofay ayba gidana koshshii?

²⁰ Naaꞌꞌanattuwan, suurebaa qoppada ootta. Nuuni nuna siiqiya Aawaa Yihooway bonchchettanaadan halchchoos. Yesuusa wode deꞌida, yaaretiyoogan woy bantta xallaa siiqiyoogan banttassi goꞌꞌaa demmanawu koyida asay ufayttiyoogaa sohuwaara aggiisinne Yesuusa qambbaraa yeggi bayiis. (Yoh. 6:25-27, 51, 60, 66; Pili. 3:18, 19) SHin, bantta goꞌꞌaa aggibayidi Xoossaanne shooruwaa siiqiyoogee denttettidoogeeti saꞌan deꞌido wode ubban, Kiristtoosaara saluwan oottanawu hidootiiddi, he qambbaraa ufayttidi tookkidosona. Etaagaadan, nuuni suurebaa qoppidi Yesuusa qambbaraa tookkidi deꞌiyoogan ufayttana.

21. Maatiyoosa 6:31-33y yootiyoogaadan, Yihooway waatanaagaa naagana danddayiyoo?

²¹ Heezzanttuwan, bessiyaabaa naaga. Nuuni nu goꞌꞌaa aggi bayidi deꞌananne minnidi oottana koshshees. Yedetay nuna gakkanaagaa Yesuusi yootiis. Gidoppe attin, nuna gakkiya ay metuwaakka nuuni genccanaadan Yihooway minotettaa nuussi immana giidi naagana danddayoos. Nuuni loytti gencciyo wode, kaseegaappe aaruwan minnana. (Yaaq. 1:2-4) Nuuni Yihooway nuussi koshshiyaabaa immanaagaa, Yesuusi nuna heemmanaagaanne nu ishanttinne michchontti nuna minttettanaagaakka naagana danddayoos. (Maatiyoosa 6:31-33 nabbaba; Yoh. 10:14, 15; 1 Tas. 5:11) Nuuni ayba metonne genccanawu koshshiya ubbabay nuussi deꞌees!

22. Nuuni aybaa gishshawu galatana danddayiyoo?

²² Yesuusi pattido maccaasiyaa I pattido gallassi shemppo demmaasu. SHin A Kiristtoosa ashkkara gidada ammanettada deꞌikko, merinawu shemppo demmana danddayawusu. A waataasu gaada neeni qoppay? A Yesuusi erissiyo ashkkara gidikko, saluwan Yesuusaara demmana woytuwaa qoppa! A Kiristtoosa kaallanawu aggido ubbabay bessiyaaba. Hegaa gishshawu, nuuni merinawu deꞌanawu hidootiyoy saluwaana gidin saꞌaana gidin, Yesuusi “taakko haa yiite” giido shoobiyaa ekkidoogan keehi galatiyaageeta gidana danddayoos.