Yihooway Nena Laꞌa Kessees

1-2. (a) Ishatamantta Layttay aybee? (“Ishatamantta Layttay Aybee?” giyo saaxiniyaa xeella.) (b) Yesuusi Luqaasa 4:16-18n, woygidee?

ISSI ISSI biittatun issi kawoy woy kawiyaa haarido Ishatamantto Layttaa Baalaa bonchchoosona. Asay ha baalaa issi gallassawu, issi saaminttawu, woy ubba qassi hegaappe daro wodiyawu bonchchana danddayees; shin he baalay wurssettan polettees; hegaappe simmin asay he baalaa sohuwaara dogees.

² Israaꞌeelati ishatamantta ishatamantta layttan issi layttawu bonchchido baalaappe keehi aadhdhiya Ishatamantto Layttaa Baalaabaa nuuni pilggana. He beni wode baalay Israaꞌeelati laꞌa kiyaanaadan oottiis. Nuuni hagaabaa tamaarana koshshiyoy aybissee? Yihooway nuussi giigissido ufayssiyaabaa nuuni hassayanaadan oottiyo gishshataassa. Hegee merinaa laꞌatettaa nuuyyo demissana, qassi nuuni ha wodiyan hegaappe goꞌettiiddi deꞌoos. Yesuusi he ufayssiya laꞌatettaabaa yootiis.—Luqaasa 4:16-19 nabbaba.

3. Wogaabaa 25:8-12y yootiyoogaadan, Ishatamantto Layttaa Baalay Israaꞌeelata waati goꞌꞌidee?

³ Xoossay ba asawu daro layttappe kase giigissido Ishatamantto Layttaa Baalaabaa koyro akeekikko, Yesuusi laꞌatettaabaa yootidoogaa akeekanawu metootokko. Yihooway Israaꞌeelatuyyo hagaadan giis: “Ishatamantto laittaa dummayidi, he biittan de7iya ubbaassi birshshettaa [woy laꞌatettaa] awaajjite. Hegee intteyyo Ishatamantto Laittaa Baalaa. He wodiyan intte ubbaikka intte gadiyaunne intte yarau yarau simmite.” (Wogaabaa 25:8-12 nabbaba.) Hagaappe kasetiya huuphe yohuwan, saaminttan saaminttan bonchchiyo Sambbataappe Israaꞌeelati waani goꞌettidaakko xannaꞌida. SHin, Israaꞌeelati Ishatamantto Layttaa Baalaappe waani goꞌettidonaa? Issi Israaꞌeela asawu acoy deꞌees gaada qoppa; qassi hegaappe denddidaagan acuwaa qanxxanawu ba gadiyaa wolqqan bayzzana koshshiis. Ishatamantto Layttaa Baalaa wode, he gadee ayyo simmees. Hegaa gishshawu, he bitanee ‘ba gadiyawu simmees;’ qassi wodeppe A naati he gadiyaa laattana. Woy he bitaniyaassi daro acoy deꞌiyo gishshawu, I he acuwaa qanxxanawu bana bayzzana woy ba naatuppe issoy aylle gidanaadan oottana danddayees. Ishatamantto Layttaa Baalaa wode, he ayllee ‘ba yarawu simmees.’ Hegaa gishshawu, hidooti xayin merinawu aylle gidiya asi mule baawa! Ha giigissoy Yihooway ba asayyo tumuppe qoppiyoogaa bessees!

4-5. Israaꞌeelati bonchchiyo Ishatamantto Layttaa Baalaabaa tamaariyoogee nuna maaddees giyoy aybissee?

⁴ Ishatamantto Layttaa Baalawu hara goꞌꞌay aybee? Yihooway, “Intte giddon issi asinne hiyyeesenna. Aissi giikko, intte laattanaadan GODAI intte Xoossai inttessi aqo oottidi immiyo biittan GODAI inttena anjjana” yaagiis. (Zaarettido Wogaa 15:4, 5) Hegee ha wodiyan haniiddi deꞌiyaabaappe keehi dumma! Nuuni darotoo dureti yaa duretishin, qassi hiyyeesati yaa hiyyeesishin beꞌoos.

⁵ Kiristtaaneti Muuse Higgiyaa kaallokkona. Hegaa giyoogee aylleta laꞌa kessiyo, acuwaa aggiyo, qassi asay bantta soo simmanaadan oottiyo Ishatamantto Layttaa Baalaa higgiyaa nuuni kaallokko giyoogaa. (Roo. 7:4; 10:4; Efi. 2:15) Gidoppe attin, nuuni Ishatamantto Layttaa Baalaabaa tamaariyoogee nuna keehi maaddees. Aybissi? Yihooway Israaꞌeelatussi giigissidobaa hassayanaadan oottiya laꞌatettaa nu demmana danddayiyo gishshataassa.

YESUUSI LAꞌATETTAA AWAAJJIIS

6. Asay aybippe laꞌa kiyana koshshii?

⁶ Keehi iita aylletetta gidida, nagaraa aylletettaappe gidiyo gishshawu nu ubbay laꞌa kiyana koshshees. Nuuni nagaranchcha gidiyo gishshawu, cimoos, sahettoosinne hayqqoos. Daroti banttana heregan beꞌiyo wode woy sahettido gishshawu issi dottoriyaakko biyo wode hegee tuma gidiyoogaa akeekoosona. Qassi nuuni nagara oottiyo wode hidootaa qanxxoos. Kiitettida PHawuloosi, “Higgee ta bollaa giddon de7iya nagaraa ootissiya higgiyan tana qashissees” giidi yootiis. I gujjidi, “Taani aiba ufaissi bainna asee! Tana haiquwau efiya ha asatettaappe ashshanai oonee?” yaagiis.—Roo. 7:23, 24.

7. Isiyaasi laꞌa kiyiyoogaabaa kasetidi woygidee?

⁷ Xoossay nuna ashshanawu woy nagaraappe laꞌa kessanawu ogiyaa giigissidoogee ufayssiyaaba. He laꞌatettaa demmanaadan oottiyay Yesuusa. Hananabaa yootiya Isiyaasi, Yesuusi saꞌaa yaanaappe 700⁠ppe dariya layttaappe kase, sinttappe demmana keehi gita laꞌatettaabaa yootiis. He gita laꞌatettay Israaꞌeelati Ishatamantto Layttan demmiyo laꞌatettaappe keehi aadhdhiyaabaa demissana. I hagaadan giis: “Ubbaa Haariya GODAA Ayyaanai ta bollan de7ees; aissi giikko, qohettidaageetussi lo77o mishiraachchuwaa yootana mala, GODAI tana tiyiis. I tana wozanai meqqidoogeetussi koolettiyoogaanne omoodettidaageetussi omooduwaappe [laꞌa] kiyiyoogaa awaajjana . . . mala kiittiis.” (Isi. 61:1) Ha hiraagay O bolli polettii?

8. Laꞌatettaabaa yootiya Isiyaasa hiraagay O bolli polettii?

⁸ Laꞌatettaabaa yootiya he keehi koshshiya hiraagay Yesuusi haggaazuwaa doommi simmin polettiyoogaa doommiis. Yesuusi I diccido Naazireete kataman deꞌiya Ayhuda woosa keettaa gelidi, Ayhudati yan shiiqidosan Isiyaasan deꞌiya hiraagaa nabbabiis. Yesuusi he hiraagay ba bolli polettidoogaa yootiis: “Godaa Ayyaanai ta bollan de7ees. Qashettidaageetussi birshshettiyoogaa, qooqetussi xeelliyoogaa yootana mala, qassi qohettidaageeta qohuwaappe kessana mala, dosettida Godaa laittaa yootana mala, tana kiittiis.” (Luq. 4:16-19) Yesuusi he hiraagaa waati polidee?

LAꞌA KIYIDA KOYRO ASATA

9. Yesuusa wode daro asay aybippe laꞌa kiyanawu koyidee?

⁹ Yesuusa wode, Isiyaasi kasetidi yootidonne Yesuusi nabbabido laꞌatettaa asay demmiyoogaa doommis. Yesuusi, “Hachchi nabbabettin, intte siyiyo wode, ha Xoossaa maxaafai giidoogee polettiis” giidi yootido gishshawu nuuni hegaa ammanana danddayoos. (Luq. 4:21) Yesuusi nabbabidobaa siyida daroti Rooma kawotettaa haaruwaappe laꞌa kiyana giidi hidootiyaageeta gidennan waayi aggana. Eti, “Nuuni ‘Israa7eelata ashshanaagee a’ yaagidi ufaissan naagoos” giida, naaꞌꞌu asatuugaadan qoppennan waayi aggana. (Luq. 24:13, 14, 21) SHin, huqqunniya Rooma haaruwaa eqettanaadan Yesuusi bana kaalliyaageetussi yootibeennaagaa eroos. SHin, I etayyo, “Qeesaaraagaa Qeesaarassi” immanaadan yootiis. (Maa. 22:21) Yaatin, he wode Yesuusi asaa waatidi laꞌa kessidee?

10. Yesuusi asaa aybippe laꞌa kessidee?

¹⁰ Xoossaa Naꞌay asay naaꞌꞌu ogetun laꞌa kiyaanaadan maaddanawu yiis. Koyroogee, Yesuusi haymaanootiyaa kaalettiyaageeti tamaarissiyo worddo timirttiyaappe asay laꞌa kiyanaadan maaddiis. He wode deꞌiya daro Ayhudati asa wogawunne worddo ammanuwawu aylle gididosona. (Maa. 5:31-37; 15:1-11) Ayyaanaaban kaalettoos giyaageeti bantta huuphen qooqe mala. Eti Masiyaanne I pooꞌissido ayyaanaabaa pooꞌuwaa ixxiyoogan xumaaninne nagaran deꞌidosona. (Yoh. 9:1, 14-16, 35-41) Yesuusi tumaa tamaarissidoogaaninne loꞌꞌo leemiso gididoogan, ashkke asati worddo timirttiyaappe waani laꞌa kiyana danddayiyaakko bessiis.—Mar. 1:22; 2:23–3:5.

11. Yesuusi laꞌa kessido naaꞌꞌantto ogee aybee?

¹¹ Yesuusi laꞌa kessido naaꞌꞌantto ogee, asay laattido nagaraa aylletettaappe laꞌa kiyanaadan I oottidoogaa. Yesuusa yarshshuwaa baggaara, wozuwan ammaniyaanne hegaadan deꞌiya asatu nagaraa Xoossay atto gees. (Ibr. 10:12-18) Yesuusi, “Na7ai inttena ailletettaappe kessikko, intte ailletettaappe intte tumu kiyana” yaagiis. (Yoh. 8:36) He laꞌatettay Israaꞌeelati Ishatamantto Layttaa Baalaa wode demmiyo laꞌatettaappe keehi aadhdhees! Leemisuwawu, issi uri Ishatamantto Layttaa Baalaa wode aylletettaappe kiyi simmidi zaarettidi aylle gidananne wurssettan hayqqana danddayees. SHin, Yesuusi merinawu laꞌa kessees.

12. Yesuusi awaajjido laꞌatettaappe goꞌettida koyroogeeti oonee?

¹² PHenxxaqosxxe gallassi 33 M.Ln, kiitettidaageetanne hara ammanettida attuma asatanne macca asata Yihooway geeshsha ayyaanan tiyiis. eti sinttappe hayquwaappe denddidi saluwan Yesuusaara haaranaadan I eta ba naatudan ootti ekkiis. (Roo. 8:2, 15-17) Hageeti Yesuusi Naazireete kataman deꞌiya Ayhuda woosa keettan awaajjido laꞌatettaappe goꞌettida koyroogeeta. He attuma asatinne macca asati Ayhuda haymaanootiyaa kaalettiya asati tamaarissiyo worddo timirttiyawunne Geeshsha Maxaafan baynna eta wogawu hegaappe simmin aylle gidibookkona. Qassi eti hayquwaa kaalettiya nagaraappe laꞌa kiyidabadan Xoossay xeelliis. Yihooway laꞌatettaa zaaretti ehaanawu giigissidobay I Kiristtoosa kaalliyaageeti tiyoosappe doommidi Yesuusa SHaꞌu Layttaa Haaruwaa wurssettan polettana. Ha wodiyaappenne Yesuusa SHaꞌu Layttaa Haaruwaa wurssettaappe gidduwan hanana loꞌꞌobay aybee?

MIILOONIYAN QOODETTIYA HARATU LAꞌATETTAA

13-14. Tiyettida Kiristtanetuppe harati, Yesuusi awaajjido laꞌatettaa demmanaageeti oonee?

¹³ Ha wodiyan, zare ubbaappe shiiqida miilooniyan qoodettiya ashkke asati ‘hara dorssata.’ (Yoh. 10:16) Xoossay eti Yesuusaara saluwan haaranaadan dooribeenna. SHin, eti Geeshsha Maxaafay yootiyoogaadan saꞌan merinawu deꞌanawu hidootoosona. Ne hidootaykka hegee?

¹⁴ Tiyettidaageeti demmiyo loꞌꞌobata neeni haꞌꞌikka demmaydda deꞌaasa. Gukkida Yesuusa suuttan ammaniyoogan ne nagaray atto geetettanaadan oychchana danddayaasa. Yaatiyoogan, neeni Xoossan nashettaasa, qassi hegee neeyyo sarotettaa demissees. (Efi. 1:7; Ajj. 7:14, 15) Worddo timirttiyaappe neeni laꞌa kiyido gishshawu demmido anjjotakka qoppa. Yesuusi, “Intte tumatettaakka erana; qassi tumatettai inttena ailletettaappe kessana” yaagiis. (Yoh. 8:32) Ha laꞌatettaa demmidoogan nuuni keehi ufayttoos!

15. Nuuni sinttappe naagiyo laꞌatettaynne anjjoy aybee?

¹⁵ Hagaappe aadhdhiya laꞌatettay yaanaagaa neeni naagana danddayaasa. Mata wode, Yesuusi worddo haymaanootiyaanne iita haaruwaa xayssana. Xoossay baassi haggaaziya “zawai bainna daro asaa” naagana, qassi hegaappe simmin I gannate gidana saꞌan eti anjjota demmanaadan oottana. (Ajj. 7:9, 14) Daro asay hayquwaappe denddana, qassi Addaameppe laattido nagaray ehiyo ubbabaappe laꞌa kiyana.—Oos. 24:15.

16. Asay sinttappe demmana ufayssiya laꞌatettay aybee?

¹⁶ SHaꞌu Layttaa Haaruwaa wode, Yesuusinne aara haariyaageeti asay asatettaaninne ayyaanaaban payya gidanaadan oottana. He wodee Israaꞌeelati bonchchiyo Ishatamantto Layttaa Baalaa wode demmido laꞌatettaa mala gidana. Hegaa giyoogee Yihoowawu ammanettidi haggaaziya ubba asay wottiyoobi baynnaageeta gidana, qassi hegaappe simmin nagari deꞌenna giyoogaa.

17. Isiyaasa 65:21-23y Xoossaa asay waananaagaa yootii? (Koyro sinttan deꞌiya misiliyaa xeella.)

¹⁷ Sinttappe saꞌan deꞌoy ay mala gidanaakko Isiyaasa 65:21-23y yootees. (nabbaba.) Nuuni azallanne aybanne oottenna asa gidokko. SHin, he wode Xoossaa asay goꞌꞌiyaanne ufayssiya oosuwaa oottanaagaa Geeshsha Maxaafay yootees. SHaꞌu Layttaa Haaruwaa wode, “Mereta ubbai ba huuphen bashshaa ailletettaappe . . . kiyana; qassi he meretati Xoossaa naati ailletettaappe kiyido bonchcho kessaa” kiyanaagaa ammanettana danddayoos.—Roo. 8:21.

18. Nuuni sinttappe ufayssiya wodee yaana giidi ammaniyoy aybissee?

¹⁸ Yihooway Israaꞌeelati oottanaadaaninne shemppanaadan oottidoogaadan, matida Kirsttoosa SHaꞌu Layttaa Haaruwaa wode, I ba asawu hegaara issi malabaa oottana. Nuuni Xoossawu goynniyo wodee deꞌanaagee qoncce. Xoossawu goynniyoogee ha wodiyan ufayttanawu keehi koshshiyaaba, qassi hegawu nuuni ooratta alamiyan wodiyaa demmana. Kirsttoosa SHaꞌu Layttaa Haaruwaa wode ammanettida asa ubbay ufayttana; ayssi giikko, nu ubbawu ufayssiya oosoy deꞌananne nuuni ubbay Xoossawu haggaazana.