Nabbabiyaageetu Oyshaa

Geeshsha Maxaafay issibay tuma gidiyoogaa qonccissanawu baa giishin naaꞌꞌu markkati koshshiyoogaa yootees. (Qoo. 35:30; Zaa. 17:6; 19:15; Maa. 18:16; 1 Xim. 5:19) SHin Muuse higgiyan, issi uri asawu giigida geelaꞌiyo “asi bainna sohuwan” wolqqan oyqqidi iira zinꞌꞌiyaaba gidikko, qassi A waassikko, A wodiraa laammabeykku, shin I nagaranchcha. Wolqqan iira zinꞌꞌidoogaa harati markkattennan, I mooranchcha gidin A geeshsha gidiyoy aybissee?

Zaarettido Wogaa 22:25-27n deꞌiya qofay, koyro he uri mooranchcha gidoogaa bessenna, gaasoykka ha qofay A mooranchcha kessiyoogee erettidaba. Ha higgee maccaasiyaa mooranchcha gidennaagaa yootees. Ane yuushuwan deꞌiyaabaa akeekoos.

Zaarettido Wogaa 22:23, 24n issi uri “katamaa giddon” asawu giigida maccaaseera wodiraa laammidoogaabaa yootees. Azinawu giigida maccaasiyaa aqo oyqqidabadan xeelettiyo gishshawu, iira wodiraa laammiya asi mooranchcha. Maccaasiyaa shin? “Na7iyaa kataman de7aidda, . . . waassabeikku.” A waassiyaakko, harati siyidi O ashshana danddayoosona. SHin, A waassabeykku. Akka wodiraa laammido gishshawu, naaꞌꞌaykka mooranchchadan pirddettoosona.—Zaa. 22:23, 24.

Muuse Higgee kaallidi deꞌiya dumma hanotaa yootees: “Issi asi asau giigida geela7iyo asi bainna sohuwan wolqqan oiqqidi, iira zin77ikko, a xallai haiqqo. Na7iyo ainne oottoppite; o woranau bessiya nagara oottabeikku. Hagee issi asi coo ba shooruwaa bolli denddidi, woriya asa pirddaa mala pirdda. Aissi giikko, i o asi bainna sohuwan demmidi oiqqin, he geela7o na7iyaa waassaasu; shin o ashshiya asi de7ibeenna.”—Zaa. 22:25-27.

He allaalliyan daannati maccaasiyaa yootiyoobaa ammanoosona. Ayba ogiyan? Hegee A “waassaasu; shin o ashshiya asi de7ibeenna” geetettidi qofettees. Yaatiyo gishshawu A shaaramuxabeykku. SHin, bitanee wolqqan wodiraa laammida mooranchcha; qassi shaaramuxiis, gaasoykka I asawu giigida maccaasiyo ‘wolqqan oiqqidi, iira zinꞌꞌiis.’

Hegaappe denddidaagan, ha higgee xeelaa wottidoy maccaasiyaa mooranchcha gidennaagaana, bitanee wolqqan wodiraa laammida mooranchchanne shaaramuxa gididoogaa he qofay qonccissees. Daannati he “yohuwaa minttidi qoranaagaa’ ammanettana danddayoos; qassi Xoossay darotoo zaari zaaridi yootido maaraara maayettiya ogiyan qonccebaa kuuyoosona.—Zaa. 13:14; 17:4; Kes. 20:14.