Yihooway Loꞌꞌo Gidiyoogaa Waata ‘Xeella Beꞌuutee?’

1-2. Mazamure 34:8y yootiyoogaadan, Yihooway loꞌꞌo gidiyoogaa eranawu nuuni waatana koshshii?

NEENI kase ma erenna qumaa maanaadan issi uri nena shoobbiis gaada qoppa. Hegaa beꞌiyoogan, singgiyoogan, aybaappe kaꞌꞌiyaakko shaakkiyoogan woy he qumaa dosiya harata oychchiyoogan hegaabaa erana danddayaasa. Gidoppe attin, neeni hegaa dosiyoogaa aggiyoogaa eriyo issi ogee he qumaa ma beꞌiyoogaa xallaana.

² Nuuni Geeshsha Maxaafaanne nu xuufeta nabbabiyoogan, banttawu Yihooway oottido loꞌꞌobaa xeelliyaagan harati haasayiyoobaa siyiyoogan Yihooway loꞌꞌo gidiyoogaa erana danddayoos. Nuuni Yihoowa loꞌꞌotettaa ‘xeelli beꞌiyo’ wode I keehi loꞌꞌo gidiyoogaa loytti akeekana. (Mazamure 34:8 nabbaba.) Nuuni yaatana danddayiyo issi hanotaa ane beꞌa. Nuuni aqinye gididi Yihoowawu haggaazanawu koyana danddayoos; shin qoppidobaa polanawu nu deꞌuwaa sima oottana koshshees. Nuuni Kawotettaabaa kaseyikko, nuussi koshshiyaabaa Yihooway kunttanaagaa Yesuusi qaalaa gelidoogaa darotoo nabbabennan waayi aggana; gidikkonne Yihooway hegaa nuussi oottishin mule beꞌi erokko. (Maa. 6:33) SHin, Yesuusi qaalaa gelidobaa nuuni ammaniyo gishshawu, daro miishshaa kessennan agganawu, oosuwaa oottiyo hanotaa laammanawunne mishiraachchuwaa yootanawu nuussi danddayettida ubbabaa oottanawu baaxetoos. Nuuni yaatiyo wode, Yihooway nuussi koshshiyaabaa kunttiyoogaa akeekoos. Yihooway nuussi loꞌꞌo gidiyoogaa ‘xeelli beꞌoos.’

3. Mazamure 16:1, 2 maaran, Yihoowa loꞌꞌotettaappe goꞌettiyay oonee?

³ Yihooway A erennaageeta gujjin, “ubbau keha” woy loꞌꞌo. (Maz. 145:9; Maa. 5:45) Yihooway A siiqiyaageetussinne banttawu danddayettida ubban ayyo oottiyaageetussi loꞌꞌo gidida darobaa oottees. (Mazamure 16:1, 2 nabbaba.) Yihooway nuuyyo oottido loꞌꞌobatuppe amaridaageeta ane tobboos.

4. Yihooway akko shiiqiyaageetussi ba loꞌꞌotettaa waati bessii?

⁴ Nuuni Yihoowappe tamaariyoobaa oosuwan peeshshiyo wode ubban, hegee nuna ay keena maaddiyaakko akeekoos. Leemisuwawu, nuuni abaa loytti tamaarido wodenne A siiqiyoogaa doommido wode, Yihoowa ufayssennabaa qoppiyoogaanne oottiyoogaa agganaadan I nuna maaddiis. (Qol. 1:21) Nuuni nuna Yihoowawu sheedhdhidi xammaqettido wode, nuussi geeshsha kahay deꞌanaadaaninne assi mata dabbo gidanaadan oottiyoogan nuuyyo loꞌꞌo gidida darobaa I immiis.—1 PHe. 3:21.

5. Haggaaziyo wode Yihoowa loꞌꞌotettaa waati akeekiyoo?

⁵ Nuuni haggaaziyo wode Yihoowa loꞌꞌotettaa ubbatoo akeekoos. Neeni yayyiya asee? Yihoowa asaappe dariya baggay yayyees. Neeni Yihoowa Markka gidanaappe kase, ne erenna asa so baada Geeshsha Maxaafaabaa yootanawu mule waaya qoppa erana. SHin, hegee neeni ha wodiyan ubbatoo oottiyooba. Ubba qassi sabbakiyo oosuwan ufayttanaadan Yihooway nena maaddees! Yihooway nena hara ogetunkka maaddees. Haggaazuwan eqettiya uri gayttiyo wode woppu gaanaadan I nena maaddees. Neeni yootiyoobaa issi uri siyanawu koyiyo wode, haniya xiqisiyaa hassayada goꞌettanaadankka I nena maaddees. Asay neeni yootiyoobaa siyanawu koyenna wodekka aggennan sabbakanaadan I neessi minotettaa immees.—Erm. 20:7-9.

6. Yihooway loohissiyoogee A loꞌꞌotettaa waati bessii?

⁶ Nuuni haggaazanaadan loohissiyoogankka Yihooway ba loꞌꞌotettaa nuussi bessees. (Yoh. 6:45) Asawu sabbakiyo wode yootiyoobaanne haggaazuwan nuuni he qofaa waati goꞌettana danddayiyaakko saaminttawu gidduwan shiiqiyo shiiquwan tamaaroos. Oorattabaa maliyoogee koyro yashshana danddayees; shin nuuni meezetiyo wode he qofay keehi loꞌꞌo gidiyoogaa akeekana danddayoos. Qassi nuuni kase mule sabbaki erenna ogetun sabbakanaadan gubaaꞌe shiiqotuninne gita shiiqotun tamaaroos. Hageekka nuuni yayyanaadan oottana danddayees, shin nuuni tamaaridoogaadan oottiyo wode Yihooway nuna anjjana. Nu hanotay ayba gidikkonne, nuuni Yihoowan ammanettiyo wodenne nuussi deꞌiya keehi loꞌꞌobaa ayyo immanawu ooratta ogiyaa maliyo wode Yihooway nuussi immana loꞌꞌobatuppe amaridaageeta ane beꞌoos. Yaatidi nuuni nu haggaazuwaa aassana danddayiyo ogeta tamaarana.

YIHOOWAY AN AMMANETTIYAAGEETA ANJJEES

7. Nuuni haggaazuwaa aassanawu minni oottiyo wode ayba anjjo demmanee?

⁷ Kaseegaappe aaruwan Yihoowakko shiiqoos. Ba keettaayeera Kolombbiyaa biittan haggaaziya Samuꞌelb giyo cimaa hanotaa beꞌa. He azinaynne machchiyaa bantta gubaaꞌiyan ufayttidi haggaaziyaaba gidikkonne, eti aassiyaageeti keehi koshshiyo gubaaꞌiyaa maaddiyoogan bantta haggaazuwaa aassanawu koyidosona. Halchchidobaa oottanawu, eti keehi dosiyo amaridabaa aggana koshshiis. Samuꞌeli hagaadan giis: “Maatiyoosa 6:33 oosuwan peeshshiyoogan nuussi koshshennabaa shammiyoogaa aggida. SHin, nu keettaa aggidi biyoogee nuussi keehi deexxidaba. Hegee nuuni koyiyoogaadan keexettiis; qassi hegawu miishshaa qanxxokko.” Eti ooratta gubaaꞌiyaa biidi kaseegaappe keehi guutta miishshan deꞌana koshshiis. Samuꞌeli hagaadan giis: “Oottiyooban Yihooway nuna waati kaalettiyaakkonne nu woosaa waati zaariyaakko akeekida. Yihooway nunan ufayttiyoogaanne kaseegaappe aaruwan nuna siiqiyoogaa akeekida.” Neeni ne haggaazuwaa amarida ogetun aassana danddayay? Yaatikko, ne kaseppe aaruwan Yihoowakko shiiqanaagaanne neessi koshshiyaabaa I kunttanaagaa ammanettana danddayaasa.—Maz. 18:25.

8. Ivaaninne Vikitooriya yootidobaappe neeni ay tamaaray?

⁸ Nu haggaazuwan ufayttoos. Kirggistaane biittan aqinye gididi haggaaziya Ivaananne Vikitooriyo giyo azinaynne machchiyaa yootidobaa akeeka. Keexuwaa oosuwaa gujjin, eti ay oosonne bantta dosan oottanawu bantta deꞌuwaa sima oottidosona. Ivaani hagaadan giis: “Nuussi imettida ooso ubbaa nuuyyo danddayettida keenan minni oottida. Oottiiddi peꞌiyoogee daafurssikkonne, nuuni Yihoowawu minni oottiyoogaa eriyo gishshawu, ufayttida. Nuuni daro laggeta demmido gishshawunne ufayssiya darobaa oottido gishshawu ufayttida.”—Mar. 10:29, 30.

9. Issi michcheeyyo hanotay metiyaaba gidikkonne A haggaazuwaa aassanawu ay oottadee? Hegee ay demissidee?

⁹ Metiyaabay nuna gakkiyo wodekka Yihoowawu haggaaziyoogan ufayttoos. Leemisuwawu, Arggo Afirkkan, Meero giyo cima amꞌꞌiyaa dottore gidada oottaasu. A xurataa kiyada aqinye gidada haggaaziyoogaa doommaasu. Hemettanawu metootanaadan oottiya wolqqaama harggee Meero sakkiyo gishshawu, sooppe soo baada issi saateppe daro haggaazana danddayukku. SHin xuufiyaa wottiyo gaariyaa goꞌettada haggaazuwan A daro wodiyaa attaasu. A zaaretta oychchiyoonne Geeshsha Maxaafaa xannaꞌissiyo daro asay deꞌees; hegeetuppe amaridaageetuura silkkiyan gayttawusu. Meera Yihoowawu loytta oottanawu koyidoy aybissee? A hagaadan gaasu: “Taani Yihoowanne Kiristtoos Yesuusa wozanappe siiqays. Qassi taayyo danddayettidaagaa keena Yihoowawu haggaazanaadan maaddana mala ubbatoo A woossays.”—Maa. 22:36, 37.

10. Isiyaasa 54:13y yootiyoogaadan, issibaa oottanawu baaxetiyaageeti Yihoowappe demmiyoobay aybee?

¹⁰ Yihooway nuna dumma dummabaa loohissees. Moorishen aqinye gididi haggaaziya Keeni hegee tuma gidiyoogaa akeekiis. I tumaa erido wode yuniversttiyan tamaariyoogaa aggidi xammaqettiis, yaatidi ubba wode aqinye gidiis. I, “‘Hekko, tana kiitta’ giida hananabaa yootiya Isiyaasaagaadan deꞌanawu baaxetays” yaagiis. (Isi. 6:8) Keexxiyo oosuwaa Keeni daro sohuwan oottiis; qassi nu xuufeta bantta doonan birshshiya issi citaa maaddanawu birshshiyo oosuwaa etaara oottiis. Keeni, “Tawu immettida oosuwaa oottanawu koshshiya hiillay deꞌanaadan loohaas” yaagiis. SHin I tamaaridoy oosuwaa oottiyo hiillaa xalla gidenna. I gujjidi hagaadan giis: “Ta oottana danddayennabaa, qassi taani Yihoowawu loꞌꞌo ashkkara gidanaadan taassi deꞌana bessiya eeshshata xeelliyaagankka tamaaraas.” (Isiyaasa 54:13 nabbaba.) Yihooway nena dumma dumma ogiyan loohissanaadan neenikka issi issibaa laammana danddayaasa.

11. Tohossa Kooriyan deꞌiya michchontti haggaazanawu ay oottidonaa, qassi ayba ayfe demmidonaa? (Koyro sinttan deꞌiya misiliyaa xeella.)

¹¹ Yihoowa Markka gididi daro layttawu takkidaageetikka ooratta ogiyan haggaazanawu maliyo wode loohana koshshees. Korona harggiyaa wode, Tohossa Kooriyan deꞌiya cimati hagaadan giidosona: “Sahettiyo gishshawu haggaazana danddayikke giidi kase qoppiya amaridaageeti haꞌꞌi biiduwan gayttidi haggaazoosona. Layttay 80ppe dariyo heezzu michchontti haggaazanawu komppiyuteriyaa waati goꞌettanaakko tamaaridi ubba galla haggaazoosona gaana danddayettees.” (Maz. 92:14, 15) Ne haggaazuwaa aassanawunne kaseegaappe aaruwan Yihoowa loꞌꞌotettaa xeella beꞌanawu koyay? Ne halchchidobaa oottanawu maaddiya amaridabata beꞌa.

WAATANAWU BAAXETANA DANDDAYAY?

12. Yihooway an ammanettiyaageetuyyo waatanawu qaalaa gelidee?

¹² Yihoowan ammanetta. Yihooway nuuni an ammanettiyo wodenne nuussi deꞌiya keehi loꞌꞌobaa ayyo immiyo wode loꞌꞌo gidida darobaa nuuyyo oottanawu qaalaa geliis. (Mil. 3:10) Kolombbiyaa biittan deꞌiya Fabiꞌola Yihooway gelido qaalaa polidoogaa ba deꞌuwan beꞌaasu. A xammaqetta simmada sohuwaara ubba wode aqinye gidada haggaazanawu koyaasu. Heezzu naati deꞌiyo ba soo asawu koshshiyaabaa kunttanawu oottiyoogan A ba azinaa maaddana koshshiis. Yaatiyo gishshawu, A xurataa kiyiyo wodee gakkin, Yihooway maaddana mala minttada woossaasu. Hagaadan gaasu: “Darotoo asay ba xurataa ekkanaappe kase daro wodiyaa naagana koshshees, shin taani issi aginappe simmin ekkiyoogaa doommaas. Hegee keehi maalaalissiyaaba!” Naaꞌꞌu aginappe guyyiyan A aqinye gidada haggaaziyoogaa doommaasu. Iyyo layttay haꞌꞌi 70nne giyoogaa gidiis; A 20 layttappe daruwaa aqinye gidada haggaazaasu. A he wodiyan hosppun asay xammaqettanaadan maaddaasu. A hagaadan gaasu: “Issi issitoo taani daafuriyaaba gidikkonne, ubbatoo aqinye gidida haggaazanaadan Yihooway tana ubba galla maaddees.”

13-14. Nuuni Yihoowan ammanettidi baaxetanaadan maaddiya leemisoti awugeetee?

¹³ Yihoowan ammanettidaageetu taarikiyaappe tamaara. Yihoowawu minnidi haggaazida darotubaa Geeshsha Maxaafay yootees. Eti Yihoowan ammanettiyoogaa bessiyaabaa ootti simmin, Yihooway eta anjjidoogaa bessiya daro taarikee deꞌees. Leemisuwawu, Abrahaami “au biyaakkonne erennan” ba sooppe kiyi simmin, Yihooway A anjjiis. (Ibr. 11:8) Qassi Yaaqoobi kiitanchchaara baaxeti simmin Yihooway A anjjiis. (Doo. 32:24-30) Israaꞌeela deree Hidootaa Biittaa gelanawu mati uttido wode, qeeseti Yorddaanoosa SHaafaa haattaa gaxaa yedhdhi simmin asay pinniis.—Yaas. 3:14-16.

¹⁴ Yihoowan ammanetti baaxetida ha wodiyan deꞌiya Yihoowa Markkatu taarikiyaappekka tamaarana danddayaasa. Leemisuwawu, Payten giyo ishaynne A keettaayyiyaa Diyaana, Yihoowawu oottanawu bantta haggaazuwaa aassida, “Bantta Dosan Eeno Giidosona”c giya kaalli kaalli kiyiya huuphe yohuwan odettida ishanttubaanne michchonttubaa nabbabiyoogan ufayttoosona. Payteni hagaadan giis: “Nuuni eta deꞌuwan hanidabaa nabbabiyo wode, malꞌꞌiya qumaa miya ura beꞌiyaabadan qoppoos. Nuuni daro wodiyawu beꞌidi ‘Yihooway keha gidiyoogaa xeelli beꞌanawu’ keehippe koyida.” Guyyeppe, Payteninne Diyaana maadoy keehi koshshiyoosan haggaazanawu biidosona. Ha huuphe yohota nabbaba eray? Haahosan Deꞌiya Heeratun Sabbakiyoogaa—Awusttiraaliyan (Amaarattuwaa) qassi, Haahosan Deꞌiya Heeratun Sabbakiyoogaa—Ayerlanden (Ingilezettuwaa) giya jw.org saytiyan deꞌiya biidota beꞌadii? Neeni ne haggaazuwaa aassana danddayiyo ogeta koyanaadan ha biidoti maaddana danddayoosona.

15. Yihoowawu loytti oottanaadan minttettiyaageetuura laggetiyoogee nuna waati maaddii?

¹⁵ Yihoowawu loytta oottanaadan minttettiyaageetuura laggeta. Nuuni mule mi erenna qumaa haratuura miyo wode meezetanawu metootokko. Hegaadan, bantta deꞌuwan Yihoowa kaseyiyaageetuura nuuni wodiyaa aattikko, Xoossawu haggaaziyo haggaazuwaa aassiyo ogiyaa loytti koyana danddayoos. Kentanne Veroniki hanotay hegaa bessees. Kenti hagaadan giis: “Nu laggetinne nu soo asay nuuni dumma dumma ogiyan haggaazanaadan minttettidosona. Kawotettaabaa sinttayiyaageetuura laggetidoogee oorattabaa malanawu xalanaadan nuna maaddidoogaa akeekida.” Kentinne Veronika dumma aqinye gididi Serbiyan ha wodiyan haggaazoosona.

16. Luqaasa 12:16-21n Yesuusi yootido leemisuwan qonccidaagaadan, nuuni nu goꞌꞌaa aggibayanawu eeno gaana koshshiyoy aybissee?

¹⁶ Yihoowawu oottanawu ne goꞌꞌaa aggabaya. Yihoowa ufayssanawu giidi nuna ufayssiya ubbabaa aggana koshshenna. (Era. 5:19, 20) Gidoppe attin, nuuni dosiyo amaridabaa agganawu koyibeennaagaa gaasuwan Yihoowawu loytti haggaazana xayikko, baayyo loꞌꞌo gidida darobay deꞌanaadan minni oottiyaaba gidikkonne Xoossaabaa qoppibeenna leemisuwan Yesuusi odido bitaniyaagaa mala balabaa oottana danddayoos. (Luqaasa 12:16-21 nabbaba.) Paransaayen deꞌiya Kirstiyan giyo ishay hagaadan giis: “Yihoowayyoonne ta soo asawu ta wodiyaanne wolqqaa loytta goꞌettabeykke.” Inne A keettaayyiyaa aqinye gidanawu kuuyidosona. Gidikkonne, he halchchidobaa polanawu, eti bantta oosuwaa aggibayidosona. Eti banttawu koshshiyaabaa kunttanawu geeshshiyo oosuwaa oottiyoogaa doommidosona, yaatidi eti guutta miishshan ufayttidi deꞌiyoogaa meezetidosona. Eti amaridabaa aggidi aqinye gidido gishshawu ufayttidonaa? Kirstiyani hagaadan giis, “Nuuni haꞌꞌi loꞌꞌo haggaazuwaa haggaaziyoogan, Geeshsha Maxaafaa nu xannaꞌissiyoogeetinne zaarettidi oychchiyoogeeti Yihoowabaa tamaariyoogaa beꞌiyoogan ufayttoos.”

17. Haggaazuwan nuuni oorattabaa malennaadan nuna metana danddayiyaabay aybee?

¹⁷ Ooratta ogiyan haggaazanawu eeno ga. (Oos. 17:16, 17; 20:20, 21) Amarkkaa biittan aqinye gidada haggaaziya SHirlo giyo michchiyaa korona harggiyaa wode haggaaziyo ogiyaa laammana koshshiis. Silkkiyan markkattanawu A koyro mammottaasu. SHin, SHirla woradaa xomoosiyaagee gubaaꞌiyaa xomoosiyo wode looha simmada, aggennan silkkiyan markkattiyoogaa doommaasu. A hagaadan gaasu: “Silkkiyan markkattiyoogee doommiyo wode keehi yashshiyaaba gidikkonne, haꞌꞌi taani hegan daro ufayttays. Qassi nuuni sooppe soo biidi sabbakiyo wode demmiyoogaappe daro asaa demmoos!”

18. Nu haggaazuwaa aassennaadan issibay paace gidikko, nuna aybi maaddanee?

¹⁸ Halchchada hegaa oottanawu mala. Nuna metoy gakkiyo wode, maaduwaa demmanawu woossoos, qassi he metuwaa xeelliyaagan waatanaakko akeekan qoppoos. (Lee. 3:21) Awurooppan Romeni giyo qaalan kaalettiyo citan ubba wode aqinye gidada haggaaziya Sooniya hagaadan gaasu: “Taani halchchidobaa woraqatan xaafiyoogaa dosays, yaatada hegaa qoncce sohuwan wottays. Dumma dumma ginaa efiya naaꞌꞌu ogetu misilee ta xaraphpheezan deꞌees. Taani kuuyana koshshiyaabay merettiyo wode, he naaꞌꞌu ogeta xeellays, yaatada ta kuuyiyoobay halchchidobaa oottanaadan maaddiyaakkonne woy agganaadan oottiyaakko yuushsha qoppays.” Sooniya ba metuwaa xeelliyaagan loꞌꞌobaa qoppanawu malawusu. A hagaadan gaasu: “Ta deꞌuwan laamettiya aybanne, ta halchchidobaa gakkennaadan teqqiya godadan woy hegaa gakkanawu maaddiya zarphphedan xeellanawu woy agganawu kuuyays.”

19. Yihooway nuuyyo immido loꞌꞌobaa gishshawu A galatiyoogaa waati bessana danddayiyoo?

¹⁹ Yihooway nuna daro ogetun anjjees. Nu oottiyo ubbaban I sabettanaadan oottiyoogan nuussi I immidobawu keehi galatiyoogaa bessana danddayoos. (Ibr. 13:16) Nuuni Yihoowayyo haggaazanawu darobaa oottana danddayoos. Yaatikko, Yihooway nuna loyttidi anjjana. ‘Yihooway keha gidiyoogaa xeelli beꞌiyo’ ogeta ubba gallassi koyiyaageeta gidoos. Yaatiyoogan, “Ta qumai tana kiittidaagee koyiyoobaa oottanaagaanne a oosuwaa polanaagaa” giida, Yesuusa mala gidoos.—Yoh. 4:34.