Nabbabiyaageetu Oyshaa
Hara asa “woriyoobaa” oottennaadan yootiya azazoy Wogaabaa 19:16n deꞌees. Ha azazoy yootiyoobay aybee, qassi hagaappe nuuni ay tamaarana danddayiyoo?
Yihooway Israaꞌeelati geeshsha asa gidanaadan yootiis. Eti geeshsha gidanaadan maaddanawu, I etayyo hagaadan giis: “Ne asaa giddon iita zigirssaa ekkada yuuyoppa. Ne shooruwaa woriyoobaa aibanne oottoppa. Taani GODAA.”—Wog. 19:2, 16.
“Woriyoobaa” giya qaalay koyro Ibraawetto xuufiyaa qofaa loytti qonccissees, shin hegee woygiyoogee? Ayhudatu maxaafay Wogaabaa maxaafaa xeelliyaagan hagaadan gees: “He xiqisiyan ha qofay . . . akeekanawu metees; ayssi giikko, Ibraawetto qofay yootiyoobay eranawu metiyo gishshataassa; hegee sittan ‘A matan woy A miyyiyan eqqoppa’ giyoogaa.”
Amarida eranchchati ha qaalay paydo 15ra gayttees giidi qoppoosona; xiqisee hagaadan gees: “Pirddaa pirddaidda geellayoppa; hiyyeesaa a hiyyeesatettaa gishshau maaddada pirddoppa; duriyaakka a duretettaa gishshau yayyada aggoppa. SHin ne shooruwaayyo tumatettan pirdda.” (Wog. 19:15) Hegaa gishshawu, issi ura “woriyoobaa” oottennaadan yootiya paydo 16n deꞌiya azazoy pirddaara, zalꞌꞌiyaara woy so asaara gayttida allaalletun Xoossaa asay banaara oottiyaagaa qohennaadaaninne ba goꞌꞌaassi giidi yohuwaa geellayennaadan yootiyaaba gidana danddayees. Nuuni hegaa malabaa oottana koshshennaagee qoncce, shin paydo 16n deꞌiya ha qofaa loytti akeekanawu maaddiya hara loꞌꞌo ogee deꞌees.
Paydo 16 doomettan deꞌiya qofaa beꞌa. Xoossay ba asay zigirssaa ekkidi yuuyennaadan azaziis. Issi uri harata iitaban denttidi haasayiyo wode metoy merettanaadan oottana danddayiyoogee tuma. SHin, issi uri hara uraa zigiriyoogee hegaappekka yaa iitaba. (Lee. 10:19; Era. 10:12-14; 1 Xim. 5:11-15; Yaaq. 3:6) Zigiriya asi hara uraa sunttaa mooranawu eriiddi ubbatoo worddobaa yootees. Wordduwan markkattiyoogee issi uri hayqqanaadan oottana danddayiyaaba gidikkonne, zigiriya uri yaatana danddayees. Zigirssanchcha asati Naabuta xeelliyaagan worddobaa markkattidoogaanne hegaa gaasuwan A shuchchan caddidi woridoogaa hassaya. (1 Kaw. 21:8-13) Ee, Wogaabaa 19:16 naaꞌꞌantto shaahuwan qonccidaagaadan, zigiriya asi hara uraa woriyoobaa oottana danddayees.
Qassi, issi asi hara ura ixxiyo gishshawu A zigirana danddayees. Koyro Yohaannisa 3:15y hagaadan gees: “Ba ishaa ixxiya ooninne shemppo woridaagaa; qassi shemppo woridaagan merinaa de7oi bainnaagaa intte ereeta.” Hegaa bollikka, Xoossay “ne shooruwaa woriyoobaa aibanne oottoppa” gii simmidi, I hagaadan giis: “Ne ishaa ne wozanan ixxoppa.”—Wog. 19:17.
Hegaa gishshawu, Wogaabaa 19:16n deꞌiya meeze gidenna azazoy yootiyoobay Kiristtaaneta mintti zorees. Nuuni iita qofa ubbaa eqettana koshsheesinne hara uraa mule zigirana koshshenna. Nuuni issi ura dosenna gishshawu woy A qanaatido gishshawu he ura zigiriyoogan A “woriyoobaa” oottikko, hegee nuuni A ixxiyoogaa bessiyaaba gidana danddayees. Kiristtaaneti oonanne ixxiyoogaappe keehi naagettana koshshees.—Maa. 12:36, 37.