‘Yihoowa Koyiyaageetussi Loꞌꞌobi Aybinne Paccenna’

1. Daawita ayba metoy gakkidee?

DAAWITI issi uri A woranawu koyido gishshawu baqatiis. Israaꞌeela kawoy Saaꞌooli A woranawu murttiis. Daawitawu qumay koshshido wode, Nooba katamaa biidi ichchashu oytta xalaalaa oychchiis. (1 Sam. 21:1, 3) Guyyeppe inne A asay gonggoluwan qosettidosona. (1 Sam. 22:1) Daawiti ay mala hanotan deꞌii?

2. Saaꞌooli oottido keehi iitabay aybee? (1 Sameela 23:16, 17)

² Daawiti daro olan xoonidoogaa gaasuwan daro asay A dosido gishshawunne sabbido gishshawu Saaꞌooli Daawita bolli keehi qanaatiis. Qassi Saaꞌooli Yihoowawu azazettibeenna gishshawu Yihooway A koyibeennaagaanne Daawiti sinttappe kawo gidanaadan Yihooway dooridoogaa Saaꞌooli erees. (1 Sameela 23:16, 17 nabbaba.) SHin Saaꞌooli he wodekka Israaꞌeela kawo, qassi awu daro olanchchatinne A bagga gidiya daroti deꞌiyo gishshawu Daawiti ba shemppuwawu baqatiis. Xoossay Daawita kawo oottennaadan Saaꞌooli diggana danddayiyaabadan qoppidee? (Isi. 55:11) Geeshsha Maxaafay hegaabaa yootennaba gidikkonne, nuuni issibaa ammanettana danddayoos: Saaꞌooli keehi iitabaa oottiis. Xoossaa eqettiyaageeti ubbatoo xoonettoosona!

3. Daawita metiyaabay gakkikkonne A xeelay aybee?

³ Daawiti bana ziqqi oottiya asa. I Israaꞌeela kawo gidanawu koyibeenna. Yihooway I kawo gidanaadan dooriis. (1 Sam. 16:1, 12, 13) Saaꞌooli Daawita keehi ixxees. SHin Daawiti bana gakkida metuwaa gaasuwan Yihoowa amassalibeenna. Qassi Daawiti baayyo guutta qumay deꞌiyo wodenne I gonggoluwan qosettana koshshido wode amassalibeenna. Ha huuphe yohuwawu denddo gidida xiqisiyaa gujjin ufayssiya sabaa mazamuriyaa I xaafidoy he gonggoluwan qosettido wode gidennan waayi aggana: ‘Yihoowa koyiyaageetussi loꞌꞌobi aybinne paccenna.’—Maz. 34:10.

4. Nuuni beꞌana oyshati awugeetee, qassi he oyshati keehi koshshiyoy aybissee?

⁴ Ha wodiyan Yihoowa ashkkaratuppe daroti gidiya qumaa woy deꞌuwaassi koshshiya harabaa issi issitoo demmokkona.b Ubba qassi mata wodeppe ha simmin ubbasaa gakkida harggiya wodiyan hegaadan haniis. Qassi ‘gita waayee’ mati mati biyo wode hanotay yaa iitana. (Maa. 24:21) He hanotaa qoppiiddi ane oyddu oyshata zaaroos: Daawitawu ‘loꞌꞌobi aybinne paccibeennay’ ayba ogiyaanee? Nuuni nuussi deꞌiyaabay gidana giyoogaa tamaarana koshshiyoy aybissee? Yihooway nuussi koshshiyaabaa kunttanaagaa nuuni ammanettiyoy aybissee? Qassi sinttappe gakkanabawu nuuni haꞌꞌi waani giigettana danddayiyoo?

“TAAYYO AIBINNE PACCENNA”

5-6. Daawiti Xoossaa ashkkaratuyyo “lo77obi aibinne paccenna” giido wode woyganawu koyidaakko akeekanaadan Mazamure 23:1-6y nuna waati maaddii?

⁵ Daawiti Yihoowa ashkkaratuyyo “lo77obi aibinne paccenna” giido wode woyganawu koyidee? Daawiti Mazamure 23 xaafido wode hegaa mala qofaa goꞌettiis. Yaatiyo gishshawu I gaana koyidobaa nuuni akeekanaadan he mazamure nuna maaddana danddayees. (Mazamure 23:1-6 nabbaba.) Daawiti he mazamuriyaa hagaadan giidi doommiis: “GODAI ta henttanchchaa; taayyo aibinne paccenna.” Daawiti he mazamuriyan kaalliya paydotun keehi koshshiyaabata, hegeekka I Yihoowa ba Henttanchchaadan xeellido gishshawu Yihooway awu immido loꞌꞌobata yootiis. Yihooway A “xillotettaa ogiyan” kaalettees, qassi loꞌꞌo wodetuuninne iita wodetun I Daawita ubbatoo maaddees. Daawiti Yihoowa “aaca qooruwan” deꞌikkonne bana metoy gakkanaagaa I erees. I “haiquwaa milatiya xumaa giddoora” biido gishshawunne ayyo morkketi deꞌiyo gishshawu, I issi issitoo hidootaa qanxxennan waayi aggana. SHin Yihooway A Henttanchchaa gidiyo gishshawu ‘iitabawu yayyibeenna.’

⁶ Yaatiyo gishshawu hagee Daawitawu ‘loꞌꞌobi aybinne paccibeennay’ ayba ogiyaanee giya oyshawu zaaro. I Yihoowaara dabbotido dabbotaa naagidi deꞌanawu koshshiya ubbabay awu deꞌees. A ufayssay assi deꞌiyaabaara gayttidaba gidenna. Daawiti Yihooway immidoban ufayttidi deꞌiis. Yihooway A anjjidoogaanne naagidoogaa I xoqqu ootti xeelliis.

7. Luqaasa 21:20-24y yootiyoogaadan, koyro xeetu layttan Yihudan deꞌiya Kiristtaaneta gakkida metoy aybee?

⁷ Nuuni aquwaa bessiyaagaadan xeelliyoogee keehippe koshshiyaaba gidiyoogaa Daawiti yootidobaappe akeekana danddayoos. Nuussi deꞌiya aqoy ayba gidikkonne, nuuni ufayttana danddayoos; shin nuuni nu deꞌuwan hegaa xoqqu ootti xeellana bessenna. Koyro xeetu layttan Yihudan deꞌiya Kiristtaaneti he tumaa akeekidosona. (Luqaasa 21:20-24 nabbaba.) Yerusalaame katamay ‘wotaaddaran direttana’ wode yaanaagaa Yesuusi etawu yootiis. Hegee haniyo wode eti ‘deriyaakko baqatana’ koshshiis. Eti he katamappe kiyikko bantta shemppuwa ashshana, shin eti darobaa aggi baana. Amarida layttappe kase, Wochchiyo Keelay hegaabaa hagaadan giis: “Eti gadiyaanne keettaa aggi biidosona, ubba qassi bantta son deꞌiyaabaa shiishshanawu guyye simmibookkona. Eti Yihooway banttana naaganaagaanne maaddanaagaa ammanettidosona, qassi eti koshshees giidi qoppiyo aybippenne aaruwan A goynuwaa kaseyidosona.”

8. Koyro xeetu layttan Yihudan deꞌiya Kiristtaaneta gakkidabaappe keehi koshshiyaabaa ay tamaarana danddayiyoo?

⁸ Koyro xeetu layttan Yihudan deꞌiya Kiristtaaneta gakkidabaappe keehi koshshiyaabaa ay tamaarana danddayiyoo? Qommoora odettida Wochchiyo Keelay hagaadan giis: “Nuuni aquwaa xeelliyo ogiyaara gayettidaagan sinttaappe nuna paacciyaabay gakkana danddayees; Nuussi keehi koshshiyay aqooyye, Xoossaa bagga gididaageeti demmana atotettee? Wurssettay gakkiyo wode nuuni metiyaabata gencciyoogeenne issi issibata aggi bayiyoogee koshshana danddayees. Yihudaappe baqatida Kiristtaanetudan koshshiyaabaa aybanne oottanawu nuuni eeno gaana bessees.”c

9. PHawuloosi Ibraawe Kiristtaaneta zorido zoree nena waati minttettii?

⁹ He Kiristtaaneti banttawu deꞌiya ubbabaa aggi bayiyoogeenne deꞌuwaa wotti yeggi doommiyoogee etawu ay keena deexxiyaabaakko qoppana danddayay? Banttawu koshshiyaabaa Yihooway kunttanaagaa eti ammanettana koshshiis. SHin eta maaddana danddayiya issibay deꞌees. Roomati Yerusalaame katamaa dooddanaappe ichchashu laytta kasetidi kiitettida PHawuloosi Ibraawe Kiristtaaneta maaddiya zoriya zoriis: “Miishsha siiqoppe inttena naagite; intteyyo de7iyaagee intteyyo gido. Aissi giikko, Xoossai ba huuphen, ‘Taani nena mulekka yeggikke woikko aggikke’ yaagiis. Hegaa gishshau, nuuni xalidi, ‘Godai tana maaddiyaagaa; taani yayyikke. Asi tana ai oottii?’ yaagoos.” (Ibr. 13:5, 6) Roomati woraajjanaappe kase PHawuloosa zoriyaa oosuwan peeshshidaageetuyyo ooratta heeran sima deꞌuwaa meezetanaagee metennaba gidiyoogee qoncce. Etawu koshshiyaabaa Yihooway kunttanaagaa eti ammanettidosona. Yihooway nuussi koshshiyaabaa kunttanaagaa nuunikka ammanettana danddayiyoogaa PHawuloosi yootidobay qonccissees.

“HEGEE NUUYYO GIDANA”

10. PHawuloosi tamaaridobay aybee?

¹⁰ PHawuloosi Ximootiyoosakka hegaa mala zoriyaa zoriis, qassi he zoree nuussikka hanees. I hagaadan giis: “SHin miyoobainne maayiyoobai de7ikko, hegee nuuyyo gidana.” (1 Xim. 6:8) Hegaa giyoogee nuuni malꞌꞌiya qumaa maana, loꞌꞌiya keettan deꞌana woy issi issitoo ooratta maayuwaa shammana koshshenna giyoogee? PHawuloosi yootana koyidobay hegaa gidenna. Nuussi deꞌiyaabay ayba gidikkonne, hegee gidana giidi nuuni deꞌana koshshiyoogaa PHawuloosi yootiis. (Pili. 4:12) PHawuloosi tamaaridobay hegaa. Nuussi deꞌiya aquwaappe keehi alꞌꞌobay nuuni Xoossaara dabbotido dabbotaa.—Imb. 3:17, 18.

11. Nuuni nuussi deꞌiyaabay gidana giidi deꞌiyoogaa xeelliyaagan Muusee Israaꞌeelatussi yootidobaappe ay tamaariyoo?

¹¹ Nuussi koshshiyaabaa xeelliyaagan nuuni qoppiyoobaynne Yihooway qoppiyoobay dummatana danddayees. Israaꞌeelati bazzuwan 40 layttawu takki simmin Muusee etawu yootidobaa qoppa: “GODAI intte Xoossai intte oottidobaa ubbaa anjjiis; intte ha gooba bazzuwan hemettiyo wode, inttena naagiis. Ha oitamu laitta ubban GODAI intte Xoossai inttenaara de7iis. Aibanne intteyyo pacissibeenna.” (Zaa. 2:7) He 40 layttatun, Israaꞌeelati maanaadan Yihooway mannaa immiis. Yihooway eta maayoy wurennaadan oottiis. Yaatiyo gishshawu, eti Gibxxeppe kiyo wode maayido maayuwaa he wodekka goꞌettoosona. (Zaa. 8:3, 4) Amaridaageeti hegee guuttaba giidi qoppennan waayi aggana, shin Israaꞌeelatussi koshshiya ubbabay deꞌiyoogaa Muusee eta hassayissiis. Nuuni nuussi deꞌiyaabay gidana giidi deꞌiyo wode Yihooway ufayttana. I nuussi immido guuttabaa gishshawukka nuuni A galatanaadaaninne hegaa immidaagee A gidiyoogaa nuuni akeekanaadan I koyees.

YIHOOWAY NEESSI KOSHSHIYAABAA KUNTTANAAGAA AMMANETTA

12. Daawiti banan gidennaan, Yihoowan ammanettiyoogaa bessiyaabay aybee?

¹² Yihooway A siiqiyaageetuyyo ammanettiyoogaanne koshshiyaabaa kunttiyoogaa Daawiti erees. Daawiti 34ta Mazamuriyaa xaafido wode, hirggissiya hanotan deꞌiyaaba gidikkonne, “GODAA kiitanchchai” ba “yuushuwan” deꞌiyoogaa eriyo gishshawu I Yihoowan ba ammanuwaa minttiis. (Maz. 34:7) Daawiti Yihoowa kiitanchchaa olaa dembban morkkiya ubbatoo wochchiya wotaaddaraara geeddarssennan waayi aggana. Daawiti gooba wotaaddara, qassi I kawo gidanaagaa Yihooway yootiis, shin Daawiti morkkiya xoonanawu yambbarshshaa yambbariyo woy bisuwaa goꞌettiyo meeziyan ammanettibeenna. (1 Sam. 16:13; 24:12) Yihoowa yayyiyaageeta ‘A kiitanchchay ashshiyoogaa’ eriyo gishshawu Daawiti Xoossan ammanettiis. Nuuni ha wodiyan maalaalissiya ogiyan naaguwaa demmana giidi qoppennaagee qoncce. SHin nuuni Yihoowan ammanettiya ooninne merinawu xayennaagaa eroos.

13. Maagooga Googi qohuwaa gattiyo wode nuuni naagiyaabi baynnaba milatiyoy aybissee, shin nuuni yayyana koshshennay aybissee? (Koyro sinttan deꞌiya misiliyaa xeella.)

¹³ Mata wode, Yihooway nuna naagana danddayiyoogaa xeelliyaagan nuuni an ammanettiyoogee paacettana. Maagooga Googi, hegeekka issippe denddiya kawotettati Xoossaa asaa qohiyo wode, eti nuna worana danddayoosona giidi nuuni qoppana danddayoos. Yihooway nuna ashshana danddayiyoogaanne ashshanaagaa nuuni ammanettana koshshees. Kawotettatu xeelan nuuni naagiyaabi baynna dorssa mala. (Hiz. 38:10-12) Nuuyyo ola miishshati baa, qassi olettanawu loohibookko. He kawotettati nuna metoottennan xoonana giidi qoppana. Yihoowa kiitanchchati nuna naaganawu giigetti uttidoogaa eti erokkona. SHin nuussi ammanoy deꞌiyo gishshawu nuuni hegaa eroos. He kawotettati Xoossaa ammanokkona. Saluwaa olanchchati nu gishshawu olettiyo wode eti keehi dagammana!—Ajj. 19:11, 14, 15.

SINTTAPPE GAKKANABAWU HAꞌꞌI GIIGETTA

14. Sinttappe gakkanabawu nuuni haꞌꞌi giigettanawu ay oottana danddayiyoo?

¹⁴ Sinttappe gakkanabawu nuuni haꞌꞌi giigettanawu ay oottana danddayiyoo? Nuuyyo deꞌiyaabay issi galla xayana danddayoogaa akeekiyo gishshawu, nuuni aquwaa bessiyaagaadan xeellana koshshees. Qassi nuuni nuussi deꞌiyaabay gidana giidi deꞌiyaageetanne nuuni Yihoowaara dabbotidoogan keehi ufayttiyaageeta gidana koshshees. Nuuni nu Xoossaa loytti erikko, Maagooga Googi qohuwaa gattiyo wode I nuna naagana danddayiyoogaa mintti ammanoos.

15. Daawiti bana Yihooway maaddanaagaa qoppanaadan oottiya, yelagatettan A gakkidabay aybee?

¹⁵ Daawita maaddida harabaanne nuuni paaciyawu giigettanaadan nuna maaddana danddayiyaabaa qoppa. Daawiti hagaadan giis: “GODAI keha gidiyoogaa xeelli be7ite. Akko baqatiya asi anjjettidaagaa.” (Maz. 34:8) He qofay Daawiti Yihoowa maaduwaa ammanettana danddayidoy aybissakko eriyoogaa qonccissees. Daawiti ubbatoo Yihoowan ammanettiis, qassi A Xoossay ubbatoo A maaddiis. Daawiti yelagatettan, wogga wolqqaama asa gidida Pilisxxeemiyaa Gooliyaadaara olettiis; qassi he gooba olanchchawu hagaadan giis: “Hachchi GODAI nena ta kushiyan aatti immana.” (1 Sam. 17:46) Guyyeppe, Daawiti Saaꞌoolawu haggaaziyo wode Saaꞌooli A woranawu darotoo maliis. SHin ‘Yihooway Daawitaara deꞌees.’ (1 Sam. 18:12) Daawiti Yihoowa maaduwaa kase demmido gishshawu, bana gakkiya metuwan Yihooway maaddanaagaa erees.

16. Yihoowa loꞌꞌotettaa nuuni ‘xeelli beꞌana’ danddayiyo ogeti awugeetee?

¹⁶ Nuuni ha wodiyan Yihoowa kaaletuwan mintti ammanettikko I nuna sinttappe ashshana danddayiyoogaa loytti ammanettana. Nuuni gita shiiqota shiiqanawu nuna ootissiyaagaa piqaadiyaa oychchiyoogee, woy gubaaꞌe shiiqota ubbaa shiiqanawunne kaseegaappe aaruwan haggaazanawu nu oosuwaa prograamiyaa laammanaadan nuna ootissiyaagaa oychchiyoogee koshshana danddayees. Yaatanawu nuuni ammanoy deꞌiyoogeetanne Yihoowan ammanettiyaageeta gidana koshshees. Nuna ootissiyaagee nuuyyo paqqadibeennabadaaninne nuuni nu oosuwaappe yedetettidabadan qoppa. Yihooway nuna mule yeggennaagaa woy aggennaagaanne I nuussi koshshiyaabaa ubbatoo kunttiyoogaa ammanettiyoo? (Ibr. 13:5) Ubba wode haggaaziya darotuyyo keehi maadoy koshshido wode, Yihooway eta waati maaddidaakko eti yootana danddayoosona. Yihooway ammanettiyaagaa.

17. Layttaa xiqise 2022gee aybee, qassi hegee bessiyaaba gididoy aybissee?

¹⁷ Yihooway nunaara deꞌiyo gishshawu sinttanaabaa nuuni yayyiyo gaasoy baa. Nuuni nu deꞌuwan A Kawotettaabaa kaseyikko, Xoossay nuna mule aggenna. Sinttappe yaana metiya gallassatussi nuuni haꞌꞌi giigettananne Yihooway nuna mule aggennaagaa ammanettana koshshiyoogaa nuna hassayissanawu, Bolla Gididi Heemmiyaagee Mazamure 34:10y, 2022 layttaa xiqise gidanaadan dooriis: ‘Yihoowa koyiyaageetussi loꞌꞌobi aybinne paccenna.’