Beni Israaꞌeelati Olaa Olettidosona—Nuuni Olettana Bessennay Aybissee?

NAAZE wotaaddaratu halaqay Naaꞌꞌantto Alamiyaa Olaa wode ba cenggurssaa xoqqu oottidi amarida Yihoowa Markkata hagaadan giis: “Intteppe ooninne Paransaayeera woy Inggilizeera olettanawu ixxis giikko hayqqana.” Naaze wotaaddarati eta matan deꞌikkokka, nu ishanttuppe ooninne Yihoowa higgiyaa kanttibeenna. Yaatanawu keehi xala gidana koshshiis. Hagee Yihoowa Markkati olaa waati xeelliyaakko bessiya loꞌꞌo leemiso. Nuuni ha alamiyaa olaa olettokko. Asay nuna woranawu yashissikkonne, nuuni ha alamiyaa olan ooyyoonne exatokko.

1. XOOSSAA ASA UBBAY ISSI DERE

Beni wode, Yihooway ba asa gidanaadan issi deriyaa, hegeekka Israaꞌeela deriyaa dooriis. I Israaꞌeelata, “kawotetta ubbaa giddon intte taayyo buzo” yaagiis. (Kes. 19:5) Xoossay eti issi heeran deꞌanaadankka oottiis. Israaꞌeelati hara deretuura olettanaadan Xoossay azazido wode, eti banttaagaadan Yihoowawu goynniyaageetuura olettibookkona, woy eta woribookkona.a

Ha wodiyan, Yihoowawu goynniyaageeti “zare ubbaappe, qommo ubbaappe, yara ubbaappenne dumma dumma biitta qaala ubbaappe” yiidosona. (Ajj. 7:9) Xoossaa asati olaa olettikko, eti banttaagaadan Yihoowawu goynniyaageetuura olettananne ubba qassi eta worana danddayoosona.

2. ISRAAꞌEELATI OLAA OLETTANAADAN YIHOOWAY AZAZIIS

Beni wode, Yihooway Israaꞌeelati olaa awude qassi aybissi olettana koshshiyaakko kuuyiis. Leemisuwau, eeqawu goynniya, shori baynnabaa oottiyaanne bantta naata yarshshiya Kanaaneta xayssanawu Israaꞌeelati etaara olettanaadan Xoossay azaziis. Israaꞌeelati etaagaadan iitabaa oottennaadan, hegaa mala iitabaa oottiya asata Hidootaa Biittaappe xayssanaadan Yihooway eta azaziis. (Wog. 18:24, 25) Israaꞌeelati Hidootaa Biittaa geli simmin, eti banttana huqqunniya morkketuura olettanaadan Xoossay issi issitoo eta azaziis. (2 Sam. 5:17-25) SHin eti bantta sheniyan olaa olettanaadan Yihooway mule paqqadibeenna. Hegaadan eti olettido wode darotoo eta iitabay gakkiis.—Qoo. 14:41-45; 2 Odi. 35:20-24.

Ha wodiyan, asay olaa olettanaadan Yihooway azazibeenna. Asay olettiyoy Xoossay koyiyo gishshataassa gidennan, banttawu koyiyo gishshataassa. Eti daro biittaa oyqqanawu, daro miishshaa demmanawu woy polotikaa qofaa aassanawu olettoosona. SHin bantta haymaanootiyaa naaganawu woy Xoossaa morkketa woranawu, Xoossaa sunttan olettays giyaageetubaa shin? Sinttappe olettana olan Yihooway bawu goynniyaageeta ashshananne ba morkketa xayssana; he olay Armmageedoona olaa. (Ajj. 16:14, 16) He olaa olettanay Xoossawu goynniya saꞌan deꞌiya asata gidennan, ayyaana mereta gidida Xoossaa olanchchata.—Ajj. 19:11-15.

3. YIHOOWA AMMANIDAAGEETA ISRAAꞌEELATI WORIBOOKKONA

Beni wode, Israaꞌeela olanchchati Xoossaa ammanidaageeta darotoo woribookkona, shin hayqqanaadan Yihooway pirddidoogeetu xallaa woridosona. Ane naaꞌꞌu leemisota beꞌa. Yarkko katamaa xayssanaadan Yihooway Israaꞌeelata azazidaba gidikkonne, eti Raꞌaabi ammanuwaa gishshawu onne I soo asaa ashshidosona. (Yaas. 2:9-16; 6:16, 17) Qassi guyyeppe, Gabaaꞌoonati Xoossawu yayyido gishshawu eta katamay bashshaappe attiis.—Yaas. 9:3-9, 17-19.

Ha wodiyan, olettiyaageeti ammaniya asaakka woroosona. Qassi issi issitoo, olaa gaasuwan aynne mooribeenna asay hayqqees.

4. ISRAAꞌEELATI XOOSSAY OLAWU KESSIDO HIGGIYAA KAALLIDOSONA

Beni wode, Yihooway I kessido maaraadan Israaꞌeela wotaaddarati olaa olettanaadan yootiis. Leemisuwawu, morkke kataman deꞌiyaageeti ‘saruwan kushiyaa immanaadan’ oychchana mala Xoossay issi issitoo Israaꞌeelatuyyo odiis. (Zaa. 20:10) Hegaa bollikka, Israaꞌeela wotaaddarati bantta bollaanne bantta heeraa geeshshatettaa naaganaadan, qassi Xoossay kessido kandduwaa maaraa kaallanaadan Yihooway yootiis. (Zaa. 23:9-14) Hara biittaa olanchchati eti omooddido kataman deꞌiya maccaasaara wolqqan zinꞌꞌoosona, shin Israaꞌeelati hegaadan oottanaadan Yihooway paqqadibeenna. Eti issi katamaa oyqqi simmidi, he katamaappe omooddido maccaasiyo issi aginay aadhdhennan machchanaadan Yihooway paqqadenna.—Zaa. 21:10-13.

Ha wodiyan, daro biittati amarida higgiyaa maaraadan olettanawu maayettidosona. Eti hegaadan oottiyoy aynne mooribeenna asaa naaganaassa gidikkonne, kawotettati darotoo he higgeta kanttoosona.

5. XOOSSAY BA DERIYAA GISHSHAWU OLETTIIS

Beni wode, Yihooway Israaꞌeelatussi olettiis; qassi darotoo eti xoonanaadan maalaalissiyaabaa oottiis. Leemisuwawu, Israaꞌeelati Yarkko katamaa xoonanaadan Yihooway waati maaddidee? Yihooway yootidoogaadan Israaꞌeela “asai ba qaalaa xoqqu oottidi waassiis; waassin sohuwaara katamaa dirssaa gimbbee kunddi bayiis,” hegee eti katamaa aynne metootennan oyqqanaadan maaddiis. (Yaas. 6:20) Qassi, eti Amooretuura olettido wode eta waati xoonidonaa? “GODAI wolqqaama shachchaa saluwaappe eta bollan bukissiis. Bukissin Israa7eela asai bisuwan worido asaappe, shachchai worido asai qoodan dariis.”—Yaas. 10:6-11.

TUMU KIRISTTAANETI HARATUURA SAROTETTAN DEꞌANAWU BAAXETOOSONA

Nuuni qommoora beꞌidoogaadan, ha wodiyan nu hanotay beni Israaꞌeelatuugaappe keehi dummatees. SHin nuuni olettenna gaasoti hegeetu xalla gidokkona. Hara gaasotikka deꞌoosona. Leemisuwawu, wurssetta gallassatun deꞌiya Xoossaa asay “mulekka olaa timirttiyaa” tamaarennaagaa Xoossay kasetidi yootiis; yaatiyo gishshawu eti olettokkona. (Isi. 2:2-4) Hegaa bollikka, erissiyo ashkkarati ‘saꞌaa bagga gidennaagaa’ Kiristtoosi yootiis; eti ha alamiyaa olan ooyyoonne exatibookkona.—Yoh. 15:19.

Kiristtoosi bana kaalliyaageeti harabaakka oottanaadan minttidi yootiis. Eti uluwan lancciyaa oyqqennaadan, hanqqettennaadaaninne olettennaadan I yootiis. (Maa. 5:21, 22) I bana kaalliyaageeti ‘sigettiyaageetanne’ bantta morkketa siiqiyaageeta gidanaadankka yootiis.—Maa. 5:9, 44.

Nuuni hegaadan waati oottana danddayiyoo? Nuuni olaa olettennan aggana danddayoos. SHin, gubaaꞌiyan deꞌiya issi ura nu morkkedan qoppi eriyoo? Hegaa mala qofaa ubbaa xayssanawu wozanappe baaxetiyaageeta gidoos.—Yaaq. 4:1, 11.

Nuuni olaa olettokko, shin issoy issuwaara sarotettaaninne siiquwan deꞌanawu minnidi baaxetoos. (Yoh. 13:34, 35) Yihooway ola ubbaa mule xayssiyo gallassaa yeemuwan naagiiddi, ha alamiyaaban ooyyoonne exatennan deꞌanawu murttidaageeta gidoos.—Maz. 46:9.