Nabbabiyaageetu Oyshaa

Mazamure 145:2n Daawiti “meri merinau” Xoossaa sunttaa sabbanaagaa yootiis. Hegaa giyoogee I mule hayqqenna giyoogee?

CHii. He xiqisiyan Daawiti tuma gididabaa xaafiis.

He xiqisiyan Daawiti, ‘ne sunttaa meri merinawu galatana’ yaagiis. (Maz. 145:1, 2) Qassi hara xiqisiyan Daawiti hagaadan giis: “Abeet Godau ta Xoossau, taani nena ta kumetta wozanaappe galatana. Ne sunttaa merinau bonchchana.”—Maz. 86:12.

Daawiti hegaa xaafiyo wode I mule hayqqennabadan qoppibeenna. Asay nagaranchcha gidiyo gishshawu hayqqanaagaa Yihooway yootidoogaa Daawiti erees; qassi Daawiti ikka nagaranchcha gidiyoogaa erees. (Doo. 3:3, 17-19; Maz. 51:4, 5) Abrahaama, Yisaaqanne Yaaqooba mala ammanettida asati hayqqidoogaakka Daawiti erees. Qassi Daawiti ikka hayqqanaagaa erees. (Maz. 37:25; 39:4) SHin Daawiti Mazamure 145:2n yootidobay I merinawu, hegeekka paxa deꞌido wode ubban Xoossaa sabbanawu keehi koyiyoogaanne yaatanawu murttidoogaa qonccissees.—2 Sam. 7:12.

Mazamure 18, 51nne 52 huuphessan deꞌiya qofaappe akeekiyoogaadan, Daawiti issi issitoo bana gakkidabaa yootiis. Mazamure 23n Yihooway kaalettiyaagaa, minttettiyaagaanne naagiya henttanchchaa gidiyoogaa Daawiti yootiis. Daawitikka hegaa mala henttanchcha. I ba “de7uwaa laitta ubban” Xoossawu oottanawu koyiis.—Maz. 23:6.

Daawiti xaafido ubbabaa I xaafanaadan kaalettiday Yihoowa gidiyoogaa hassaya. I guyyeppe hananabaa xeelliyaagan hiraagaa xaafiis. Leemisuwau, Mazamure 110n Daawiti ba Goday saluwan ‘Xoossaa ushachchan uttidonne’ gita maataa ekkido wodiyaabaa yootiis. Ay oottanawu? I Xoossaa morkketa xayssana, qassi saꞌan deꞌiya “kawotettaa bolli i pirddana.” Daawiti Masiyaa Yesuusawu mayzza aawa, qassi Masee saluwan uttidi haarananne “merinau qeese” gidana. (Maz. 110:1-6) Yesuusi Mazamure 110n deꞌiya hiraagay abaa yootiyoogaanne hegee sinttappe polettanaagaa yootiis.—Maa. 22:41-45.

Daawiti ba wodiyaabaanne sinttappe hayquwaappe denddidi merinawu Yihoowa sabbana wodiyaabaa xaafanaadan Yihooway A denttettiis. Hegaa gishshawu, Mazamure 37:10, 11, 29y xaafettido wodiyan polettiis, qassi sinttappekka polettana. He xiqiseti beni Israaꞌeela biittan polettidosona, qassi Xoossay qaalaa gelidobaa poliyo wode sinttappekka polettana.—Ha maxeetiyan “Neeni Tanaara Gannatiyan Deꞌana” giya huuphe yohuwan, mentto 8 xeella.

Daawiti Mazamure 145:2ninne hegaa mala hara xiqisetun yootidobay, I hayqqana gakkanawu Yihoowa bonchchana koyidoogaa bessees. Qassi Daawita Yihooway hayquwaappe denttiyo wode, I merinawu A sabbanaagaa ha xiqisetuppe akeekoos.