Nuuni Merinawu Deꞌana Danddayoos

1. Yihooway nuussi merinaa deꞌuwaa immanawu qaalaa gelidoogaa wotti dentti qoppiyoogee nuna waati maaddii?

YIHOOWAY baassi azazettiyaageetuyyo “merinaa de7uwaa” immanawu qaalaa geliis. (Roo. 6:23) Yihooway nuussi immanabaa wotti dentti qoppiyoogee nuuni A wozanappe siiqanaadan maaddees. Ane hagaa qoppite: Saluwan deꞌiya nu Aaway nuna keehi siiqiyo gishshawu appe mule shaahettokko.

2. Merinaa deꞌuwaa hidootay nuna waati maaddii?

² Xoossay nuussi merinaa deꞌuwaa immanawu qaalaa gelidoogee ha wodiyan gakkiya metuwaa genccanaadan nuna maaddees. Nu morkketi nuna woranawu yashissikkokka, nuuni Yihoowawu haggaaziyoogaa mule aggokko. Aybissi? Issi gaasoy nuuni Yihoowawu ammanettidi hayqqikko, I nuna hayquwaappe denttanaagaanne nuuni zaarettidi hayqqennaagaa eriyo gishshataassa. (Yoh. 5:28, 29; 1 Qor. 15:55-58; Ibr. 2:15) Nuuni merinawu deꞌana danddayiyoogaa ammanettiyoy aybissee? Kaallidi deꞌiya gaasota beꞌite.

YIHOOWAY MERINAWU DEꞌEES

3. Yihooway nuussi merinaa deꞌuwaa immanaagaa nuuni ammanettiyoy aybissee? (Mazamure 102:12, 24, 27)

³ Yihooway deꞌuwawu Pulttonne merinawu deꞌiyaagaa gidiyo gishshawu, nuuni merinawu deꞌanaadan oottana danddayiyoogaa eroos. (Maz. 36:9) Yihooway ubbatoo deꞌiyaagaanne ubbatoo deꞌanaagaa qonccissiya amarida Geeshsha Maxaafaa xiqiseta beꞌite. Mazamure 90:2y Yihooway “merinaappe merinaa” gakkanawu deꞌiyoogaa yootees. Mazamure 102ykka hegaara issi malabaa yootees. (Mazamure 102: 12, 24, 27 nabbaba.) Qassi hananabaa yootiya Imbbaaqoomi saluwan deꞌiya nu Aawaabaa hagaadan giis: “Abeet GODAU, ta Xoossau, ta Geeshshau, neeni merinaappe doommada de7iya Xoossaa gidikkii? [“Neeni hayqqakka”, NW].”—Imb. 1:12.

4. Nuuni Yihooway ubbatoo deꞌees giya qofaa akeekana xayikko hirggana koshshii? Qonccissa.

⁴ Yihooway “merinaa Xoossaa” giya qofaa neeni akeekanawu metootadii? (Isi. 40:28) Hara daro asaykka hegaa akeekanawu metootees. Eelihu Xoossaabaa hagaadan giis: “A laittaa coratettaikka qoodin gakettenna.” (Iyy. 36:26) Issibaa nuuni akeekibeenna gishsha xallawu hegee worddo giyoogaa gidenna. Leemisuwawu, pooꞌoy waani pooꞌiyaakko nuuni loytti akeekibeennaagee pooꞌoy baawa giyoogee? Hegaadan giyoogaa gidenna! Hegaadankka nuuni Yihooway ubbatoo deꞌees, qassi ubbatoo deꞌana giya qofaa loytti akeekennan aggana danddayoos. SHin hegaa giyoogee Xoossay merinawu deꞌenna giyoogaa gidenna. Medhidaagee deꞌiyoogee nuuni akeekana woy akeekennan aggana danddayiyoobaara gayttidaba gidenna. (Roo. 11:33-36) Qassi awa ayfiyaanne xoolintteta gujjin saluwaaninne saꞌan deꞌiyaabati merettanaappe kase I deꞌees. Yihooway ‘ba wolqqan saꞌaa medhdhidoogaa’ nuussi yootiis. I ‘salota miccanaappe’ kasekka deꞌees. (Erm. 51:15; Oos. 17:24) Nuuni merinawu deꞌanaagaa ammanettiyo hara gaasoy aybee?

YIHOOWAY NUUNI MERINAWU DEꞌANAADAN MEDHDHIIS

5. Addaameppenne Hewaanippe halida hidootay aybee?

⁵ Asappe attin, saꞌan merettida paxa deꞌiyaabati ubbay wurssettan hayqqanaadan oottidi Yihooway medhdhiis. I asawu mule hayqqennan deꞌiyo dumma hidootaa immiis. SHin Yihooway Addaama hagaadan azaziis: “Lo77uwaanne iitaa erissiya mittaa teeraappe mooppa; aissi giikko, neeni appe miido gallassi tumu haiqqana.” (Doo. 2:17) Addaameenne Hewaana Yihoowawu azazettiyaakko mule hayqqokkona shin. Yihooway eti ‘deꞌo mittaa’ teeraappe maanaadan issi wode paqqadana giidi ammaniyoogee bessiyaaba. Deꞌo mittaa teeraappe miyoogee eti ‘merinawu deꞌanaadan’b Yihooway paqqadiis giyoogaa.—Doo. 3:22.

6-7. (a) Asay hayqqanaadan merettibeennaagaa bessiya harabay aybee? (b) Ooratta alamiyan neeni oottanawu keehi koyiyoobay aybee? (Misiliyaa xeella.)

⁶ Nuuni nu deꞌo layttan erana danddayiyoogaappe aarobaa nu guuggee oyqqana danddayiyoogaa issi issi saynttistteti yootoosona. Hegee keehi maalaalissiyaaba. Nu guuggee heezzu miiloone gidiya saatiyawu duuqettida biiduwaappekka keehi aadhdhiya qofaa oyqqiyoogaa, 2010n kiyida issi xuufee yootees. He duuqettida biiduwaa beꞌanawu 300 layttaappe dariya wodiyaa koshshees. Qassi nu guuggee hegaappekka keehi aadhdhiya qofaa oyqqana danddayees. Hegee nu guuggee 70 woy 80 layttan erana danddayiyoobaappe keehi aadhdhiyaabaa oyqqanaadan oottidi Yihooway medhdhidoogaa bessees.—Maz. 90:10.

⁷ Nuuni merinawu deꞌanawu keehi koyanaadan oottidi Yihooway medhdhiis. Xoossay ‘asaa wozanan merinatettaa wottidoogaa’ Geeshsha Maxaafay yootees. (Era. 3:11) Nuuni hayquwaa nu morkkedan xeelliyo issi gaasoy hegaa. (1 Qor. 15:26) Nuuni sahettikko coo uttidi hayquwaa naagiyoo? CHii naagokko. Darotoo aakime soo boosinne issi issitoo he harggiyawu haniya xaliyaa ekkoos. Hayquwaappe attanawu nuussi danddayettida ubbabaa oottoos. Qassi yelaga gidin cima gidin, nuuni siiqiyo issi uri hayqqiyo wode daro wodiyawu azzanoos. (Yoh. 11:32, 33) Nuuni ubbatoo tamaaranawunne merinawu deꞌanawu keehi koyoos; ayssi giikko, nuna Medhdhida siiqiyaagee nuuni hegaadan hananaadan oottidi medhdhiis. I nuuni merinawu deꞌanaadan oottanaagee qoncce. SHin nuuni merinawu deꞌana danddayiyoogaa ammaniyo hara gaasotikka deꞌoosona. Yihooway ba halchchuwaa laammibeennaagaa bessiya, I beni oottidobatanne haꞌꞌi oottiiddi deꞌiyoobata ane beꞌoos.

YIHOOWAY BA HALCHCHUWAA LAAMMIBEENNA

8. Yihooway nuussi halchchidobaa xeelliyaagan Isiyaasa 55:11 yootiyoobay aybee?

⁸ Addaameenne Hewaana nagaraa oottidoogee eta naati wurssettan hayqqanaadan oottikkonne, Yihooway ba halchchuwaa laammibeenna. (Isiyaasa 55:11 nabbaba.) I haꞌꞌikka bawu ammanettida asatussi merinaa deꞌuwaa immanawu halchchi uttiis. Yihooway ba halchchuwaa polanawu yootidobatanne oottidobata pilggiyo wode nuuni hegaa akeekoos.

9. Xoossay qaalaa gelidobay aybee? (Daaneela 12:2, 13)

⁹ Yihooway hayqqidaageeta denttidi etawu merinaa deꞌuwaa immanawu qaalaa geliis. (Oos. 24:15; Tii. 1:1, 2) Hayqqidaageeta denttanawu Yihooway keehi koyiyoogaa ammanettida bitanee Iyyoobi erees. (Iyy. 14:14, 15) Asay merinawu deꞌanawu hayquwaappe denddanaagaa hananabaa yootiya Daaneeli erees. (Maz. 37:29; Daaneela 12:2, 13 nabbaba.) Yesuusa wode deꞌida Ayhudatikka Yihooway ammanettida ba ashkkaratussi “merinaa de7uwaa” immanaagaa eroosona. (Luq. 10:25; 18:18) Yesuusi dendduwaabaa darotoo yootiis, qassi A Aaway A hayquwaappe denttiis.—Maa. 19:29; 22:31, 32; Luq. 18:30; Yoh. 11:25.

10. Beni wode asay hayquwaappe denddidoogee ay bessii? (Misiliyaa xeella.)

¹⁰ Yihooway Deꞌuwaa Immidaagaa gidiyo gishshawu asaa hayquwaappe denttiyo wolqqay awu deꞌees. Siraafita biittaa amꞌꞌee naꞌaa hayquwaappe denttanaadan Yihooway hananabaa yootiya Eelaasawu wolqqaa immiis. (1 Kaw. 17:21-23) Guyyeppe, hananabaa yootiya Elssaꞌi Xoossay maaddin SHuneema biittaa maccaasee naꞌaa hayquwaappe denttiis. (2 Kaw. 4:18-20, 34-37) Hegeetinne dendduwaabaa yootiya hara taariketi asaa hayquwaappe denttanawu Yihoowawu wolqqay deꞌiyoogaa bessoosona. Yesuusi saꞌan deꞌiyo wode, hegaadan oottiyo wolqqaa ba Aaway ayyo immidoogaa bessiis. (Yoh. 11:23-25, 43, 44) Ha wodiyan Yesuusi saluwan deꞌees, qassi “maata ubbai saluwaaninne sa7an” ayyo imettiis. Yaatiyo gishshawu, “duufuwan de7iyaageeti” ubbay merinawu deꞌanawu hayquwaappe denddanaadan oottiyoogan ba gelido qaalaa polana danddayees.—Maa. 28:18; Yoh. 5:25-29.

11. Wozoy nuuni merinawu deꞌanaadan waati oottii?

¹¹ Yihooway ba siiqiyo Naꞌay waayettidi hayqqanaadan paqqadidoy aybissee? Yesuusi hagaadan giido wode zaaruwaa yootiis: “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis.” (Yoh. 3:16) Nu nagaraa gishshawu Xoossay ba Naꞌaa wozo oottidi immiyoogan nuussi merinaa deꞌuwaa hidootay deꞌanaadan oottiis. (Maa. 20:28) Kiitettida PHawuloosi hagaadan giyoogan keehi koshshiya Xoossaa halchchuwaa qonccissiis: “Haiqoi issi asa baggaara ha sa7aa yiidoogaadan, haiqqidaageetu denddoikka qassi issi asa baggaara yiis. Aissi giikko, asai ubbai Addaameera dabbotido gishshau haiqqidoogaadan, Kiristtoosaara dabbotido gishshau, ubbai de7uwaassi denddana.”—1 Qor. 15:21, 22.

12. Yihooway ba halchchuwaa waati polanee?

¹² Yesuusi Xoossaa Kawotettay yaanaadaaninne Xoossaa shenee saꞌan hananaadan woossana mala ba erissiyo ashkkarata tamaarissiis. (Maa. 6:9, 10) Asay saꞌan merinawu deꞌanaadan oottiyoogee Xoossaa halchchotuppe issuwaa. Hegaa polanawu, Yihooway ba Naꞌay Mase Kawotettaa Kawo gidanaadan sunttiis. Xoossaa sheniyaa polanawu, Yesuusaara oottanaadan Xoossay 144,000 asata saꞌaappe shiishshiiddi takkiis.—Ajj. 5:9, 10.

13. Yihooway ha wodiyan ay oottiiddi deꞌii, qassi neeni ay oottana koshshii?

¹³ Yihooway ha wodiyan “zawai bainna daro asaa” shiishshiiddinne eti ba Kawotettawu haarettanaadan loohissiiddi deꞌees. (Ajj. 7:9, 10; Yaaq. 2:8) Ha alamiyan daro asay ixuwaanne olaa gaasuwan shaahettidaba gidikkonne, ‘zaway baynna daro asay’ ixxiyoogaa agganawu minnidi oottiiddi deꞌees. Eti bantta bisuwaa marasha kessanawu qoxxiiddi deꞌiyoogaa bantta oosuwan bessoosona. (Mik. 4:3) Eti daro asaa hayquwawu gaaso gidida olan hashetiyoogaappe asaa Xoossaabaanne A halchchuwaabaa tamaarissiyoogan asay “tumu de7uwaa” demmanaadan maaddoosona. (1 Xim. 6:19) Xoossaa Kawotettawu eti exatido gishshawu, geella soo asay eta ixxana danddayees woy miishshaa metootana danddayoosona; shin eti banttawu koshshiyaabaa demmanaagaa Yihooway qaalaa geliis. (Maa. 6:25, 30-33; Luq. 18:29, 30) Ha ubbabati Xoossaa Kawotettay beettiyaagaa keenaa qoncce gidiyoogaanne ubbatoo Yihoowa halchchuwaa polanaagaa nuuni ammanettanaadan oottoosona.

KEEHI LOꞌꞌO WODEE NUNA NAAGEES

14-15. Yihooway hayquwaa merinawu xayssanawu gelido qaalay waani polettanee?

¹⁴ Ha wodiyan Yesuusi saluwan Xoossaa Kawotettaa Kawo; qassi I Yihooway qaalaa gelido ubbabay polettanaadan oottana. (2 Qor. 1:20) Yesuusi 1914ppe doommidi ba morkketa xooniiddi deꞌees. (Maz. 110:1, 2) Inne aara haariyaageeti matan iita asa ubbaa xayssana.—Ajj. 6:2.

¹⁵ SHaꞌu Layttaa Haaruwaa wode, Yesuusi hayqqidaageeta denttananne Yihoowawu azazettiya ubbay wottiyoobi baynnaageeta gidanaadan maaddana. Wurssetta paaciyaappe simmin Yihooway xillota giidi pirddiyoogeeti “biittaa laattananne yan merinau de7ana.” (Maz. 37:10, 11, 29) ‘Wurssetta morkkee hayqoy xayanaagee’ ufayssiyaaba.—1 Qor. 15:26.

16. Nuuni Yihoowawu oottiyo waanna gaasoy ayba gidana koshshii?

¹⁶ Nuuni ha huuphe yohuwan beꞌidoogaadan, merinaa deꞌuwaa hidootawu denddoy Geeshsha Maxaafaa. He hidootay nuuni ha wayssiya wurssetta gallassatun ammanettidi deꞌanaadan maaddees. SHin Yihoowa ufayssanawu, nuuni merinawu deꞌanawu koyiyoogaappe aadhdhiyaabaa oottana koshshees. Nuuni Yihoowawunne Yesuusawu ammanettidi deꞌiyo waanna gaasoy, eta keehippe siiqiyoogaa. (2 Qor. 5:14, 15) Hegaadan siiqiyoogee nuuni eta milatanaadaaninne nuussi deꞌiya hidootaa haratussi yootanaadan oottees. (Roo. 10:13-15) Nuuni nu xallaa siiqennaageetanne kehiyaageeta gidiyo wode, Yihooway merinawu ba dabbo oottanawu koyiyo asa gidoos.—Ibr. 13:16.

17. Nuuni ubbay ay oottana koshshii? (Maatiyoosa 7:13, 14)

¹⁷ Nuuni merinaa deꞌuwaa demmanee? Hegaa demmanaadan Yihooway hanotaa giigissiis. Nuuni deꞌuwawu efiya ogiyaa dooridi yan deꞌana koshshees. (Maatiyoosa 7:13, 14 nabbaba.) Nuuni merinawu ay mala deꞌuwaa deꞌanee? Ha oyshaa zaaruwaa kaalliya huuphe yohuwan beꞌana.