Wolqqaama Metoy Deꞌishinkka Sarotettan Deꞌana Danddayaasa

1. ‘Xoossaa sarotettay’ aybee, qassi hegee nuussi deꞌiyoogan waani goꞌettiyoo? (Piliphphisiyuusa 4:6, 7)

HA ALAMIYAA asay erenna sarotettay deꞌees. Hegee nuuni woppu gaanaadan oottiya, saluwan deꞌiya nu Aawaara dabbotido gishshawu demmiyo ‘Xoossaa sarotettaa.’ Nuussi Xoossaa sarotettay deꞌiyo wode woppu goos. (Piliphphisiyuusa 4:6, 7 nabbaba.) Nuuni Yihoowa siiqiyaageetuura laggetiyo wode ufayttoos. Nuuni ‘sarotettaa Xoossaara’ dabbotiyoogankka ufayttoos. (1 Tas. 5:23) Nuuni nu Aawaa eriyo, an ammanettiyoonne awu azazettiyo wode, nuna wolqqaama metoy gakkishinkka Xoossaa sarotettay nuuni woppu gaanaadan oottees.

2. Nuuni Xoossaa sarotettaa demmana danddayiyoogaa ammanettiyoy aybissee?

² Ubbasaa gakkiya harggiyaa, daafabaa, deretettan woppay xayiyoogaa woy yedetaa mala wolqqaama metoy nuna gakkiyo wode, Xoossaa sarotettaa demmiyoogee tumuppe danddayettiyaabee? He metotuppe issoy nuna gakkiyoogeekka nuuni keehi yayyanaadan oottana danddayees. Gidikkonne, Yesuusi bana kaalliyaageeta hagaadan zoriis: “Intte hirggoppitenne yayyoppite.” (Yoh. 14:27) Ishanttinne michchontti Yesuusa zoriyaa kaallidoogee ufayssiyaaba. Yihooway maaddin, eti wolqqaama metuwaa gencciyoogan sarotettan deꞌidosona.

UBBASAA GAKKIYA HARGGIYA WODE SAROTETTAN DEꞌIYO OGIYAA

3. Ubbasaa gakkiya harggee nuuni sarotettan deꞌennaadan waati oottana danddayii?

³ Ubbasaa gakkiya harggee nu deꞌuwan darobay laamettanaadan oottana danddayees. Koronaa harggee nu deꞌuwan darobay laamettanaadan waati oottidaakko akeeka. Eta hanotaa pilggido asatuppe baggappe dariyaageeti, ha ubbasaa gakkiya harggiya wode xiskkuwaa xayidoogaa issi xinaatee yootiis. Ha koronaa harggiya wodiyan hirggiyoogee, unꞌꞌettiyoogee, ushshaanne jallissiyaabaa likkiyaappe aattidi goꞌettiyoogee, son asay issoy issuwaa qohiyoogeenne bana barkka woranawu maliyoogee kaseegaappe dariis. Neeni deꞌiyo heeran ubbasaa gakkiya harggee deꞌikko, waanada darin unꞌꞌettennan aggananne Xoossaa sarotettaa demmana danddayay?

4. Yesuusi wurssettaa gallassaa xeelliyaagan kasetidi yootidobaa eriyoogee nuuni sarotettan deꞌanaadan maaddiyoy aybissee?

⁴ Wurssettaa gallassatun “daro sohuwan” ubbasaa gakkiya harggee deꞌanaagaa Yesuusi kasetidi yootiis. (Luq. 21:11) Hegaa eriyoogee nuuni sarotettan deꞌanawu waati maaddii? Ubbasaa gakkiya harggee denddiyo wode nuuni maalaalettokko. Yesuusi hanana giidi yootidobay polettiyoogaa nuuni eroos. Yaatiyo gishshawu, Yesuusi “naagettite; hirggoppite” giidi wurssettaa wodiyan deꞌiyaageetussi zoridobaa nuuni kaalloos.—Maa. 24:6.

5. (a) Piliphphisiyuusa 4:8, 9y yootiyoogaadan, ubbasaa gakkiya harggee nunakka gakkiyo wode, nuuni aybaa xeelliyaagan woossana koshshii? (b) Cenggurssan giigida Geeshsha Maxaafaa nibaabiyaa siyiyoogee issi michchiyo waati maaddidee, qassi nuuni ippe ay tamaarana danddayiyoo?

⁵ Ubbasaa gakkiya harggee denddiyoogee, nuuni keehi hirgganaadaaninne yayyanaadan oottana danddayees. Deezob giyo michchiyo hegaa malabay gakkiis. I aawaa ishay, I aawaa ishaa naꞌaynne dottoree koronaa harggiyan hayqqido wode, A koronan oyqqettanaakkonne, qassi cimida ba aayyiyookka oyttanaakkonne gaada yayyaasu. Koronaa harggiyaa gaasuwan oosoy xayaneeshsha gaada A hirggaasu; hegaappe denddidaagan, qumaa shammanawunne keettaa keraa qanxxanawu koshshiya miishshaa demmanaagee O qofissiis. A hegaabawu keehi hirggiyo gishshawu, qammi xiskkuwaa xayaasu. SHin Deeza zaarettada sarotettaa demmaasu. Waatada? A woppu gaanaadaaninne loꞌꞌobaa qoppanaadan Yihooway maaddana mala, hegaabaa qonccissada woossaasu. (Piliphphisiyuusa 4:8, 9 nabbaba.) A cenggurssan giigida Geeshsha Maxaafaa nibaabiyaa baggaara Yihooway O ‘haasayissiyoogaa’ siyaasu. A hagaadan gaasu: “Nabbabiyaageeti shonggaara deꞌiya cenggurssan nabbabiyoogee taani unꞌꞌettiyoogaa aggada woppu gaanaadaaninne Yihooway taassi qoppiyoogaa hassayanaadan oottiis.”—Maz. 94:19.

6. Xannaꞌiyoogeenne shiiqota shiiqiyoogee nena waati maaddii?

⁶ Ubbasaa gakkiya harggee denddiyo wode, nuuni kase oottiyo ubbabata ubbatoo oottana danddayokko; shin hegee neeni xannaꞌiyoogaanne shiiqota shiiqiyoogaa agganaadan oottoppo. Nu xuufetuuninne biidotun kiyiya deꞌuwan hanidabati, ne ishanttinne michchontti neegaa mala metoy gakkishinkka Yihoowayyo ammanettidi haggaaziyoogaa nena hassayissana. (1 PHe. 5:9) SHiiqoti neeni Geeshsha Maxaafan deꞌiya minttettiyaabata qoppanaadan maaddoosona. Neeni harata minttettanaadaaninne harati nena minttettanaadankka shiiqoti maaddoosona. (Roo. 1:11, 12) Yihooway baayyo goynniyaageeti sahettido, yayyidonne boorasido wode waati maaddidaakko loytta qoppiyo wode ne ammanoy minnana, qassi I nenakka maaddanaagaa neeni ammanettana.

7. Kiitettida Yohaannisappe ay tamaaray?

⁷ Ne ishanttuuranne michchonttuura dumma dumma ogiyan gayttanawu baaxeta. Nu mala Kiristtaanetuura deꞌiyo wodekka koronaa harggee nuuni etakko keehi matattennaadan oottana danddayees. Hegaa mala wodiyan kiitettida Yohaannisaagaadan neeyyookka siyettana danddayees. I ba laggiyaa Gaayoosaara gayttanawu koyiis. (3 Yoh. 13, 14) Gidikkonne, Yohaannisi amarida wodiyawu Gaayoosaara gayttana danddayennaagaa eriis. Hegaa gishshawu, Yohaannisi oottana danddayiyoobaa oottiis; I Gaayoosawu dabddaabbiyaa xaafiis. Neeni ne ishanttuuranne michchonttuura ubbatoo gayttada eta oychchana danddayennaba gidikko, silkkiyaaninne biiduwan dawaliyoogan woy kiitaa xaafiyoogan etaara gayttanawu baaxeta. Neeni ubbatoo hegaadan oottikko, darin boorasakka, qassi kaseegaappe aaruwan woppu gaana. Neeni unꞌꞌettikko, cimatuura gayttada eti nena siiquwan minttettiyoogan goꞌetta.—Isi. 32:1, 2.

DAAFABAY GAKKIYO WODE SAROTETTAN DEꞌIYO OGIYAA

8. Daafabay gakkiyoogee neeni woppu geennaadan waati oottana danddayii?

⁸ Diꞌoy, biittaa qaattay woy tamay nena qohikko, he wolqqaama metuwaappe simmin neeni unꞌꞌettennan aggakka. Neeni siiqiyo uri hayqqikko woy ne keettaynne neeyyo deꞌiyaabay xayikko, neeni azzanana, hidootaa qanxxana woy ubba yiillotana danddayaasa. Hegaa giyoogee neeni aquwaa siiqaasa, woy neeyyo ammanoy pacciis giyoogaa gidenna. Wolqqaama metoy nena gakkikko, neeni hidootaa qanxxana giidi issoti issoti qoppana danddayoosona. (Iyy. 1:11) Gidikkonne, neeni sarotettan deꞌana danddayaasa. Waanada?

9. Daafabay gakkiyo wodiyawu nuuni giigettanaadan Yesuusi woygidee?

⁹ Yesuusi yootido hiraagaa hassaya. Issi issi asati banttana daafabay mule gakkenna giidi qoppoosona; shin ha wodiyan daafabay daranaagaa nuuni eroos, qassi hegeetuppe amaridaageeti nuna gakkana danddayoosona. Wurssettay yaanaappe kase, ‘biittay wolqqappe qaaxxanaagaanne’ hara daafabati gakkanaagaa Yesuusi bana kaalliyaageetussi yootiis. (Luq. 21:11) Ha wodiyan haniiddi deꞌiyaagaadan ‘makkalay daranaagaakka’ I kasetidi yootiis. Leemisuwawu, danobaa, makkalaanne shabbirssiyaageeti qohiyoogaa nuuni beꞌoos. (Maa. 24:12) Hegaa mala metoy Yihoowawu goynnenna asatu xallaa gakkana giidi Yesuusi mule yootibeenna. Yihoowawu ammanettidi haggaaziyaageetuppe darotakka hegaa mala daafabay gakkees. (Isi. 57:1; 2 Qor. 11:25) Nuna gakkana danddayiya daafabaa ubbaappe maalaalissiya ogiyan Yihooway nuna naagennaba gidikkonne, nuuni woppu gaanaadan nuussi koshshiya ubbabaa I immana.

10. Daafabay gakkiyo wodiyawu haꞌꞌi giigettiyoogee nuussi ammanoy deꞌiyoogaa bessiyaaba giyoy aybissee? (Leemiso 22:3)

¹⁰ Nuuni qoppibeennabay gakkiyo wodiyawu kasetidi giigettikko, woppu gaanawu darin metootokko. SHin kasetidi giigettiyoogee nuuni Yihoowan ammanettennaagaa bessiyaabee? CHii. Daafabay gakkiyo wode kasetidi giigettiyoogee, I nuussi koshshiyaabaa kunttanaagaa nuuni ammaniyoogaa bessiyaaba. Waatidi? Gakkana danddayiya daafabawu nuuni kasetidi giigettanaadan Geeshsha Maxaafay zorees. (Leemiso 22:3 nabbaba.) Maxeetetu, gubaaꞌe shiiqotunne erissotu baggaara Xoossaa dirijjitee nuuni qoppibeennabay merettiyo wodiyawu kasetidi giigettanaadan darotoo minttidi yootiis.c Nuuni Yihoowan ammanettiyoo? Yaatikko, haꞌꞌi daafabay gakkanaappe kase he zoriyaa kaalloos.

11. Marggaareti hanotaappe ay tamaaray?

¹¹ Marggaareto giyo michchee hanotaa beꞌa. A deꞌiyo heeran xaraga tamay denddido gishshawu, kawotettaa sunttati A ba keettaa aggada baanaadan azazidosona. Daro asay issi kutti baqatanawu baaxetiyo gishshawu, ogiyan kaamee darin ooninne kanttidi baana danddayibeenna. Cuway heeraa xumissiis, qassi Marggaareta ba kaamiyaa laaggada baana danddayabeykku. SHin, A kasetada giigettido gishshawu ba shemppuwaa ashshaasu. A he heeraappe kiyanawu hara ogiyaa demmanaadan maaddiya karttaa ba guutta borssan oyqqaasu. A kase he ogiyaara biido gishshawu, qoppibeennabay merettiyo wode awugaara baanaakko eraasu. Marggaareta kasetada giigettido gishshawu he daafaban qohettennan attaasu.

12. Qohuwaappe naagettanaadan nuussi imettiya kaaletuwaa nuuni kaalliyoy aybissee?

¹² Sunttati nunakka haratakka ashshanawu nuuni sooppe kiyennaadan, baqatanaadan woy hara kaaletota kaallanaadan oychchana danddayoosona. Issi issi asati banttawu deꞌiya aquwaa aggidi baanawu koyenna gishshawu, he kaaletota kaallokkona. Kiristtaaneti waatana bessii? Geeshsha Maxaafay hagaadan gees: “Godaa gishshau, asa higge ubbaayyo haarettite; kawoikka ubbaappe bolla gidiyo gishshau, ayyo haarettite. Qassi deriyaa haariyaageetuyyookka haarettite. Aissi giikko, eti . . . kiitettidosona.” (1 PHe. 2:13, 14) Xoossaa dirijjiteekka nuna qohuwaappe naaganawu kaaletuwaa immees. Qoppibeennabay merettiyo wode cimati nuna maaddanaadan, nu ooratta adrashaa etawu immanaadan darotoo hassayissoy etawu odettees. Neeni ne adrashaa etawu immadii? Nuuni son takkanaadan woy baqatanaadan maaduwaa waati demmanaakko woy waatidi, qassi awude harata maaddanaakko, nuussi kaaletoy imettana danddayees. Nuuni hegawu azazettana xayikko, nu shemppuwaakka cimatu shemppuwaakka daafaban yeggana danddayoos. He ammanettida ishantti nuna qohuwaappe naagiyoogaa hassaya. (Ibr. 13:17) Marggaareta hagaadan gaasu: “Cimatinne dirijjitee immiyo kaaletuwaa kaallidoogee ta shemppuwaa ashshiis.”

13. Bantta keettaa aggidi biida daro Kiristtaaneti ufayttanaadaaninne saruwan deꞌanaadan maaddidabay aybee?

¹³ Daafabaa, olaa woy deretettan woppay xayiyoogaa gaasuwan bantta keettaa aggidi biida daro ishanttinne michchontti, ooratta hanotaa meezetanawunne Yihoowawu kaseegaappe aaruwan oottanawu banttawu danddayettida ubbabaa oottidosona. Yedetaa gaasuwan harasaa baqatidi biida beni Kiristtaanetuugaadan, eti aggennan ‘qaalaa yootoosona.’ (Oos. 8:4) Sabbakiyoogee eti banttana gakkida metuwaa gidennan, Xoossaa Kawotettaabaa qoppanaadan maaddees. Hegaappe denddidaagan, eti ubbatoo ufayttoosonanne saruwan deꞌoosona.

YEDETAY DEꞌISHINKKA SAROTETTAN DEꞌIYO OGIYAA

14. Yedetay nuuni woppu giidi deꞌennaadan waati oottana danddayii?

¹⁴ Nuna yedetay gakkiyo wode nuuni woppu giidi deꞌanaadan maaddiya darobati xayana danddayoosona. Nuuni qashettana giidi yayyennan, laꞌatettan issippe shiiqiyo wode, sabbakiyo wodenne galla galla nu oottiyoobata oottiyo wode ufayttoos. Nuuni hegeeta oottennaadan digettikko, kaallidi aybi hananeeshsha gi hirggidi unꞌꞌettana danddayoos. Hegee wottin deꞌiyaaba. Gidikkonne, nuuni naagettana koshshees. Yesuusi bana kaalliyaageetuyyo, yedetay eti xubettanaadan oottana danddayiyoogaa yootiis. (Yoh. 16:1, 2) Yaatin, nuuni yedetay deꞌishinkka ubbatoo waani woppu giidi deꞌana danddayiyoo?

15. Nuuni yedetaa yayyana koshshennay aybissee? (Yohaannisa 15:20; 16:33)

¹⁵ Xoossaa Qaalay hagaadan gees: “Kiristtoos Yesuusan Xoossaa milatidi de7anau dosiya ubbai yedetettana.” (2 Xim. 3:12) Anddira giyo ishay I deꞌiyo biittan nu oosoy teqetti simmin, Yihoowawu haggaaziya ubbaa yedetay gakkiyoy aybissakko ammananawu metootiis. I hagaadan qoppiis: ‘Hagan keehi daro Yihoowa Markkati deꞌoosona. Sunttati nuna ubbaa waatidi qachchana danddayiyoonaa?’ Anddiroy hegaadan qoppiyoogee I woppu gaanaadan oottiyoogaappe ubbatoo unꞌꞌettanaadan oottiis. Hara ishantti Yihoowan ammanettidosona, qassi qashettokko giidi qoppibookkona. Eti qashettana danddayiyoogaa erikkonne, Anddiroogaadan darin unꞌꞌettibookkona. Hegaa gishshawu, I etaagaadan qoppanawu kuuyiis, qassi Yihoowan loytti ammanettiis. Daro takkennan I woppu giis, qassi daro metoy deꞌishinkka I haꞌꞌi ufayttees. Nuuppe darotu hanotaykka hegaara issi mala. Yesuusi nuna yedetay gakkanaagaa yootido wode, nuuni ammanettidi deꞌana danddayiyoogaakka nuussi yootiis.—Yohaannisa 15:20; 16:33 nabbaba.

16. Yedetay gakkiyo wode nuuni kaallana bessiya kaaletoy aybee?

¹⁶ Nu oosoy teqettikko woy muleera digettikko, macara biiruwaappenne cimatuppe nuussi kaaletoy imettana danddayees. Hegee nuna naagees, ayyaanaa qumaa ubbatoo demmanaadan oottees, qassi nuussi danddayettida keenan ubbatoo sabbakanaadan maaddees. Issi kaaletoy imettido gaasuwaa neeni loytta erana xayikkonne, hegawu azazettanawu neessi danddayettida ubbabaa ootta. (Yaaq. 3:17) Qassi erana bessenna urawu, nu ishanttubaanne michchonttubaa woy gubaaꞌiyaabaa xeelliyaagan xuurabaa mule yootana koshshenna.—Era. 3:7.

17. Koyro xeetu layttan deꞌida kiitettidaageetuugaadan, nuuni ay oottanawu murttana koshshii?

¹⁷ Seexaanay Xoossaa asaa bolli olaa denttido waanna gaasotuppe issoy, eti ‘Yesuusabaa’ markkattiyo gishshataassa. (Ajj. 12:17) Seexaanaynne ha alamee nena yashissanaadan oottoppa. Harati eqettishinkka sabbakiyoogeenne tamaarissiyoogee nuuni ufayttanaadaaninne sarotettan deꞌanaadan oottees. Koyro xeetu layttan kiitettidaageeti sabbakennaadan Ayhuda sunttati diggido wode, eti Xoossawu azazettanawu dooridosona. Eti aggennan sabbakido gishshawu ufayttidosona. (Oos. 5:27-29, 41, 42) Nu oosoy teqettikko, nuuni sabbakiyo wode akeekanchcha gidana koshshees. (Maa. 10:16) SHin nuuni nuussi danddayettida ubbabaa oottikko, Yihoowa ufayssiyoogaaninne shemppuwaa ashshiya mishiraachuwaa haratussi yootiyoogan beettiya sarotettaa demmana danddayoos.

‘SAROTETTAA XOOSSAY NENAARA GIDANA’

18. Nuuni tumu sarotettaa ooppe demmana danddayiyoo?

¹⁸ Nuuni keehi wayssiya wodiyan deꞌikkokka, sarotettaa demmana danddayiyoogaa ammanetta. Hegaa mala wodetun, Yihoowa xallay immana danddayiyo, Xoossaa sarotettay nuussi koshshiyoogaa nuuni hassayana bessees. Ubbasaa gakkiya harggee, daafabay woy yedetay nena gakkiyo wode an ammanetta. A dirijjitiyaakko matattada deꞌa. Sinttappe nena naagiya ufayssiya wodiyaa qoppa. Neeni yaatikko, ‘sarotettaa Xoossay nenaara gidana.’ (Pili. 4:9) Kaalliya huuphe yohuwan, metoy gakkiiddi deꞌiyo nu mala Kiristtaaneti Xoossaa sarotettaa demmanaadan nuuni waati maaddana danddayiyaakko beꞌana.