Xannaꞌanawu Loꞌꞌo Sohuwa Koya

Buzo xinaatiyan loytta goꞌettana koyay? Kaallidi odettidabati neeni xannaꞌiyogan loytta goꞌettanaadan maaddana danddayoosona:

• Injjetiya sohuwa doora. Geeshsha gididanne loꞌꞌo pooꞌoy deꞌiyo sohuwa demmanawu baaxeta. Xarapheezaa matan uttada xannaꞌana danddayaasa; woy karen injjetiya sohuwa doorana danddayaasa.

• Nerkka takkana danddayiyo sohuwa doora. Yesuusi “wonttimaattan saꞌay xumi uttidaashin . . . asi baynnasaa” biidi woossiis. (Mar. 1:35) Asi baynnasan neeni xannaꞌana danddayennaba gidikko, ne xannaꞌana haniyogaa so asawu woy nenaara deꞌiyageetussi yoota; qassi eti he wodiyan kelttiya gelennaadan yoota.

• Issiban xeelaa wotta. Ne qofay shaahettanaadan oottiyabaappe naagetta. Neeni xannaꞌanawu silkkiya woy taabileetiya goꞌettiyaba gidikko, ne qofay shaahettenna mala cenggurssay siyettennaadan ootta woy eerplen modiyan wotta. Qassi ne oottana bessiyabay xannaꞌishin karhi giikko, simmada oottanawu dogettenna mala xaafa oyqqa. Neeni ne qofaa shiishsha ekkanawu metootikko, guuttaa shemppana woy qaaxxana danddayaasa.