Xoossawu Suntti Deꞌii?

Geeshsha Maxaafaa zaaruwaa

Ubba asawu sunttay deꞌees. Xoossawukka suntti deꞌiyoogee bessiyaaba gidennee? Issi asassi buzo suntti deꞌiyoogeenne hegaa goꞌettiyoogee laggetettawu keehi koshshiyaaba. Xoossaara dabbotanawukka hegee bessiyaaba gidennee?

Geeshsha Maxaafan Xoossay, “Taani GODAA [“Yihoowa, NW”]; hegee ta sunttaa” yaagiis. (Isiyaasa 42:8) “Ubbaa Danddayiyaagaa,” “Ubbaa Haariyaagaa,” qassi “Medhdhidaagaa” giyo bonchcho sunttati awu deꞌikkokka, I bawu goynniyaageetuyyo ba buzo sunttaa yootiyoogan eta bonchchiis.—Doomettaabaa 17:1; Oosuwaa 4:24; 1 PHeexiroosa 4:19.

Daro Geeshsha Maxaafaa birshshettatun Kessaabaa 6:3n Xoossaa buzo sunttay deꞌees. He xiqisee hagaadan gees: “Taani Abrahaamayyo, Yisaaqayyoonne Yaaqoobayyo Ubbaa Danddayiya Xoossaa gidada qonccaas; shin taani, ‘GODAA’ [“Yihoowa, NW”] giyo ta sunttan, tanatettaa eta erissabeikke.”

Yihoowa giyo sunttay daro layttawu goꞌettido Xoossaa suntta. Daro eranchchati “Yahiwe” giyo sunttaa doorikkonne, Yihoowa giyo sunttay aahuwan erettidaagaa. Geeshsha Maxaafaa koyro shaahoti Ibraawettuwan xaafettidosona; he qaalan xaafettidabay ushachchappe haddirssa baggi nabbabettees. He qaalan Xoossaa sunttay oyddu guttuma pitaletun, יהוה xaafettees. Ha oyddu Ibraawetto pitaleti YHWH geetettidi xeegettoosona; hegeeti Tetragramaten geetettoosona.