Gintagan han Dios hi Jesus hin gahum basi solusyonan an mga problema han ngatanan nga tawo. Pinaagi han mga milagro ni Jesus, iya iginpakita nga kaya niya solusyonan an ngatanan nga problema nga diri gud naton masusulbad kon ha aton la pangalimbasog. Pananglitan, may gahum hiya nga talwason kita tikang ha hinungdan han mga problema han tawo—an napanunod nga sala ngan an mga epekto hito, an sakit ngan kamatayon. (Mat. 9:​1-6; Roma 5:​12, 18, 19) An iya mga milagro nagpamatuod nga kaya niya tambalon an “tagsa nga klase” han sakit ngan banhawon pa ngani an mga patay. (Mat. 4:23; Juan 11:​43, 44) May gahum liwat hiya nga pakalmahon an makusog nga mga bagyo ngan pirdihon an magraot nga espiritu. (Mar. 4:​37-39; Luc. 8:2) Makapasarig gud hibaroan nga hi Jehova naghatag hin sugad nga gahum ha iya Anak! Bug-os nga makakasarig kita nga matutuman an tiarabot nga mga bendisyon nga hihimoon han Ginhadian han Dios. An mga milagro nga ginhimo ni Jesus han nakanhi hiya ha tuna sugad nga tawo nagtututdo ha aton kon ano an iya bubuhaton ha bug-os nga tuna sugad nga langitnon nga Hadi han Ginhadian han Dios. w23.04 3 ¶5-7

Kon aada ka ha daku nga kongregasyon ngan naabat nga kasagaran diri ka natatawag, bangin mahunahuna mo nga diri na mag-alsa han imo kamot. Pero ayaw pag-undang ha pangalimbasog nga makakomento. Pag-andam hin pipira nga komento para ha tagsa nga katirok, basi kon diri ka matawag ha tinikangan han pag-aram, magkakaada ka la gihap mga oportunidad nga magkomento samtang nagpapadayon an katirok. Kon nag-aandam para ha Pag-aram ha Barantayan, hunahunaa kon ano an koneksyon han tagsa nga parapo ha tema han artikulo. Kon bubuhaton mo ito, posible gud nga may maikukomento ka ha bug-os nga pag-aram. Puydi ka liwat mangandam pagkomento ha mga parapo nga naghihisgot hin mas higlarom nga kamatuoran nga mas makuri isaysay. Kay ano? Kay bangin pipira la an mag-alsa han ira kamot hito nga bahin han pag-aram. Pero ano man kon damu na nga katirok an linabay pero waray ka la gihapon makakomento? Antes han katirok sumati an magdudumara kon ano nga pakiana an karuyag mo batunon. w23.04 21-22 ¶9-10

Kinaburut-on nga sumunod hi Jose ha paggiya ni Jehova, ngan tungod hito nagin mas maopay hiya nga bana. Ha diri maminos tulo nga higayon, nakakarawat hiya hin mga instruksyon tikang ha Dios parte ha iya pamilya. Ha tagsa hito nga mga higayon, sinugot dayon hiya, bisan kon nagpasabot ito hin paghimo hin dagku nga pagbag-o. (Mat. 1:20; 2:​13-15, 19-21) Pinaagi ha pagsunod ha giya han Dios, ginprotektahan, ginsuportahan, ngan gintaganahan ni Jose hi Maria. An mga ginbuhat ni Jose sigurado nga nagpahilarom han gugma ngan respeto ni Maria ha iya! Mga bana, masusubad niyo hi Jose pinaagi ha pagpamiling hin sagdon nga basado ha Biblia mahitungod ha pag-ataman ha iyo pamilya. Kon iyo gin-aaplikar ini nga sagdon bisan kon nagpapasabot ito hin paghimo hin mga pagbag-o, iginpapakita niyo an iyo gugma ha iyo asawa ngan ginpaparig-on an iyo pag-asawa. An usa nga sister ha Vanuatu nga sobra 20 ka tuig na nga inasaw-an nagsiring: “Kon an akon bana namimiling ngan nasunod han giya ni Jehova, mas ginrirespeto ko hiya. Inaabat ko nga talwas ako, ngan natapod ako ha iya mga desisyon.” w23.05 21 ¶5