The First Book of Chronicles
18 After some time, David win Phi·lisʹti·a people and start to control them, and e collect Gath and the towns wey surround-am from the hand of Phi·lisʹti·a people. 2 Then e win Mo′ab, and Mo′ab people come be servants to David and de pay tax to-am.
3 David win Had·ad·e′zer wey be king of Zo′bah near Ha′math as Had·ad·e′zer dey road de go the area wey River Eu·phra′tes dey, so that e go start to control-am. 4 David seize 1,000 chariots, 7,000 soldiers wey de ride horse, and 20,000 soldiers wey de waka with leg, from-am. Then David cripple all the horse them wey de control chariots but e leave only 100 horse them. 5 When Syria people wey dey for Damascus come help Had·ad·e′zer wey be king of Zo′bah, David kill 22,000 Syria people. 6 David come put groups of soldiers for Syria wey dey Damascus, and Syria people come be David servants and de pay tax. Jehovah make David win* for anywhere wey e go. 7 Apart from that one, the round shields wey them use gold make, David collect them from the servants of Had·ad·e′zer and bring them come Jerusalem. 8 David collect plenty-plenty copper from Tib′hath and Cun, wey be cities of Had·ad·e′zer, na them Sol′o·mon use make the copper Sea, the pillars, and the things wey them make with copper wey them de use for the temple.
9 When To′u wey be king of Ha′math hear say David don win the whole army wey Had·ad·e′zer the king of Zo′bah get, 10 quick-quick, e send im son wey be Ha·do′ram go meet King David to ask-am how e dey and to greet-am well-well because e don fight and win Had·ad·e′zer (because Had·ad·e′zer be don go fight To′u many times), and e bring different-different kind of things wey them make with gold, silver, and copper. 11 King David make all this things holy to Jehovah, together with the silver and the gold wey e collect from all the nations: from E′dom and Mo′ab, from Am′mon people, Phi·lisʹti·a people, and Am′a·lek people.
12 A·bish′ai wey be the son of Ze·ru′iah kill 18,000 E′dom people for the Lowland* of Salt. 13 E put groups of soldiers for E′dom, and all E′dom people come be servants of David. Jehovah make David win* for anywhere wey e go. 14 David continue to rule all Israel people and e no de do partial when e de judge and e de do wetin correct for all im people. 15 Na Jo′ab the son of Ze·ru′iah de control the army, Je·hosh′a·phat wey be the son of A·hi′lud de write the things wey happen, 16 na Za′dok wey be the son of A·hi′tub and A·him′e·lech wey be the son of A·bi′a·thar be priests, and na Shav′sha be secretary. 17 Na Be·nai′ah wey be the son of Je·hoi′a·da de control Cher′e·thite people and Pel′e·thite people. And na the sons of David be the next people wey get high position after the king.