Numbers

28 The next thing wey Jehovah tell Moses be say: 2 “Command Israel people and tell them say, ‘Make una make sure say una bring my offering to me, my bread. Una must do my offerings wey them make with fire as something wey get better smell* to me for the time wey I don choose.’

3 “And tell them say, ‘This one na the offering wey them make with fire wey una go bring to Jehovah: two small male sheep wey dey one year and wey well for body, each day, as offering wey them de burn from time to time. 4 You go give one small male sheep as offering for morning, and you go give the other small male sheep as offering for evening,* 5 together with the tenth part of one e′phah* of better flour wey them mix with the fourth part of one hin* of oil from olive wey them pound as grain offering. 6 Na offering wey them de burn everytime, wey them start for Mount Si′nai as something wey get better smell,* offering wey them make with fire to Jehovah, 7 together with im drink offering, give the fourth part of one hin for each small male sheep. Pour the drink wey get alcohol for the holy place as drink offering to Jehovah. 8 And you go give the other small male sheep as offering for evening.* With the same grain offering like the one wey them make for morning and with the same drink offering, you go give-am as offering wey them make with fire, as something wey get better smell* to Jehovah.

9 “‘But, for the Sabbath day, the offering go be two small male sheep wey dey well for body, and wey dey one year, and two tenth of one e′phah measure of better flour* wey them mix with oil as grain offering, together with im drink offering. 10 This one na the offering wey them de burn for the Sabbath day, together with the offering wey them de burn everytime and the drink offering.

11 “‘For the beginning of each month,* una go give to Jehovah as offering wey them de burn two young bulls, one ram, and seven small male sheep wey well for body and wey each one dey one year, 12 and three tenth measure of better flour wey them mix with oil as grain offering for each bull, and two tenth measure of better flour wey them mix with oil as grain offering for one ram, 13 and one tenth measure of better flour wey them mix with oil as grain offering for each small male sheep, as offering wey them de burn, wey get better smell,* offering wey them make with fire to Jehovah. 14 And make their drink offerings be half of one hin of wine for bull, and one third of one hin for the ram, and one fourth of one hin for small male sheep. This one na the offering wey them de burn wey them de give each month for the whole year. 15 Make una still give one young goat as sin offering to Jehovah, plus the offering wey them de burn everytime, together with im drink offering.

16 “‘For the first month, for the 14th day of the month, Jehovah Passover go dey. 17 And for the 15th day of this month, festival go dey. Una go chop bread wey no get yeast for seven days. 18 For the first day, holy convention go dey. Una no go do any serious work. 19 And una go give two young bulls, one ram, and seven small male sheep wey each of them dey one year as offering wey them de burn wey them make with fire, to Jehovah. Make una give animals wey well for body as offering. 20 Make una give them as offerings with their grain offerings of better flour wey them mix with oil, three tenth measures for one bull and two tenth measures for the ram. 21 You go give one tenth measure for each of the small male sheep from the seven small male sheep, 22 and one goat as sin offering to make sacrifice for una to get forgiveness. 23 Apart from the morning offering wey them de burn, wey be for the offering wey them de burn everytime, make you give this ones as offering. 24 Una go give this things as offerings for the same way each day for seven days as food,* na offering wey them make with fire, as something wey get better smell* to Jehovah. Make una give-am together with the offering wey them de burn everytime and im drink offering. 25 For the seventh day, make una do holy convention. Make una no do any serious work.

26 “‘For the day of the first ripe fruits, when una bring new grain offering to Jehovah, make una do holy convention for una festival of weeks.* Una no go do any serious work. 27 Una go give two young bulls, one ram, and seven small male sheep, wey each of them dey one year, as offering wey them de burn to bring better smell* to Jehovah, 28 and as their grain offering of better flour wey them mix with oil, give three tenth measure for each bull, two tenth measure for one ram, 29 one tenth measure for each of the small male sheep from the seven small male sheep, 30 and one young goat to make sacrifice for una to get forgiveness. 31 Una go give them plus the offering wey them de burn everytime and im grain offering. Make them be animals wey well for body, together with their drink offerings.