The First Book of Samuel
12 At last, Samuel come tell all Israel people say: “I don do* everything wey una say make I do, and I don choose king wey go rule una. 2 Now, make una see the king wey de lead una!* As for me, I don old and my hair don white, and my sons dey with una. I don lead una from when I dey young come reach today. 3 As I dey here so, make una talk for front of Jehovah and the person wey e don anoint whether I don do any bad thing: Which person bull or donkey I don collect? Or which person I play wayo or oppress? I don collect bribe* from anybody so that I go comot eye from wetin e do? If I don do that kind thing, I go give-am back to the person.” 4 Them come answer-am say: “You no play us wayo or oppress us or collect anything at all from anybody hand.” 5 So e tell them say: “Today, Jehovah na my witness, and the person wey e don anoint na still my witness, say una no see anything wey una fit take accuse me.”* The people come talk say: “E be witness.”
6 So Samuel tell the people say: “Jehovah wey choose Moses and Aaron, and wey bring una papa-papa them from the land of Egypt, na witness. 7 Now, make una come stand here, and I go judge una for front of Jehovah because of all the better things* wey Jehovah don do for una and una papa-papa them.
8 “As Jacob just enter Egypt, and as una papa-papa them start to beg Jehovah say make e help them, Jehovah send Moses and Aaron to lead them comot from Egypt, and make them stay for this place. 9 But them forget Jehovah their God, so e put them for the hand of Sis′e·ra wey be the chief of the army of Ha′zor, and for the hand of Phi·lisʹti·a people and the hand of the king of Mo′ab, and all this people fight them. 10 And them beg Jehovah say make e help them and talk say, ‘We don sin, because we don leave Jehovah go de serve the idols of Ba′al and Ash′to·reth. Now, make you save us from the hand of our enemies so that we go serve you.’ 11 Then Jehovah send Jer·ub·ba′al, Be′dan, Jeph′thah and Samuel, and them save una from the hand of the enemies wey surround una, so that una go get peace. 12 When una see say Na′hash the king of Amʹmon people don come fight una, una continue to tell me say, ‘No, we don make up our mind say we go get our own king!’ even though say na Jehovah una God be una King. 13 Now, na the king wey una don choose be this, the one wey una say una want. See! Jehovah don choose king wey go rule una. 14 If una fear Jehovah and serve-am and obey im voice, and una no go against the law of Jehovah, and if una and una king wey de rule una follow Jehovah una God, that one go good. 15 But if una no obey the voice of Jehovah, and una go against the law of Jehovah, Jehovah hand go dey against una and una papa them. 16 So make una stand for where una dey, and see the big thing wey Jehovah go do, wey una go see with una eyes. 17 Na the time wey them de harvest wheat be this, no be so? I go beg Jehovah make e send thunder and rain come, then una go know and understand how wetin una do bad reach for Jehovah eyes, as una talk say una want king wey go rule una.”
18 Samuel come beg Jehovah and Jehovah send thunder and make rain fall that day. This one come make all the people really fear Jehovah and Samuel. 19 Then all the people tell Samuel say: “Pray to Jehovah your God for your servants, because we no want die, as e be say we don add another sin join all our sins as we talk say we want king.”
20 So Samuel tell the people say: “Make una no fear, na true say una don do all this bad things, but wetin una go do be say, make una no leave Jehovah, and make una serve Jehovah with all una heart. 21 Make una no leave-am go follow empty things,* wey no get any gain and wey no go fit save una, because na empty things* them be. 22 Jehovah no go leave im people because of im great name, because Jehovah don choose una to be im people. 23 As for me, I no go ever stop to pray for una, because that one go mean say I don sin against Jehovah, but I go continue to teach una how to live better life and do wetin correct. 24 Make una just make sure say una de fear Jehovah and really serve-am with all una heart, and make una remember all the wonderful things wey e don do for una. 25 But if una continue to open eye de do bad thing, e go sweep una and una king troway.”