Second Corinthians
3 We de start to talk good things about ourself again? Or like some people, we need letters to una or from una wey talk good things about us? 2 Na una be our letter wey them write ontop our hearts and wey everybody know and de read. 3 E clear say una be letter of Christ wey we as servants of God don write. No be ink we use write-am but na with the spirit of the God wey dey alive. No be ontop slate wey them make with stone, but na ontop slate wey them make with flesh, and this one na ontop hearts.
4 God use Christ to make us really dey sure about this one. 5 No be say na we de think say we really qualify to do anything, but na God de make us to really qualify. 6 True-true, na God make us really qualify to be servants of the new agreement, no be servants of Law wey them don write but na of the spirit; because the Law wey them write de condemn person to death, but the spirit de make person dey alive.
7 Now if the Law wey de lead to death and wey them write ontop stones come with the kind glory wey make the people of Israel no fit look the face of Moses, because im face de really shine with glory, the kind glory wey no go dey again, 8 why the work wey the spirit de do no go even shine with more glory? 9 If the Law wey de condemn people get glory, then the work wey de make people to dey righteous go even get more glory! 10 The truth be say, even wetin get glory before, them don remove the glory because of the glory wey pass-am. 11 If the thing wey no go dey again come with glory, then the thing wey still dey go even get more glory!
12 Since we get this kind hope, we really dey free to talk. 13 And we no de do wetin Moses do when e use cloth cover im face, so that the people of Israel no go fit de look the end of the thing wey no go dey again. 14 But them no understand for their mind. Come reach now, the same cloth still de cover their mind anytime wey them read the old agreement, because na only with the help of Christ the cloth fit comot. 15 The truth na say, come reach now, anytime wey them read the things wey Moses write, cloth still de cover their hearts. 16 But when person turn follow Jehovah, the cloth go comot. 17 Now na Jehovah be the Spirit, and any place wey the spirit of Jehovah dey, freedom dey there. 18 And all of us wey them no cover our face de show the honor wey Jehovah get like mirror. And we don change to be like God* and de show im glory more-more,* exactly as Jehovah wey be the Spirit* de do-am.