Exodus

5 After, Moses and Aaron go meet Phar′aoh and talk say: “This one na wetin Jehovah the God of Israel talk, ‘Allow my people go so that them fit celebrate festival to honor me for wilderness.’” 2 But Phar′aoh talk say: “Who be Jehovah, wey I go obey wetin e talk and allow Israel go? I no know Jehovah at all, and another thing be say, I no go allow Israel to go.” 3 But them talk say: “The God of Hebrew people don talk with us. Abeg, give us three days, we want travel go wilderness and do sacrifice to Jehovah our God. If no be so, e go punish us with disease and kill us with sword.” 4 The king of Egypt answer them say: “Moses and Aaron, why una de make this people stop their work? Make una go back to una work!”* 5 And Phar′aoh continue to talk say: “See how the people of the land plenty reach, and una de try to stop them make them no work.”

6 That same day, Phar′aoh command the oga them* and the men wey de assist them say:* 7 “Make una no ever give the people dry grass again to use make bricks. Make them go gather dry grass for theirself. 8 But make una make sure say them still de make the same amount of bricks as them de do before. No reduce-am for them, because them de relax.* Na because of this one them de cry say, ‘We want go, we want go do sacrifice for our God!’ 9 Make una make them work hard more-more, and always make them dey busy, so that them no go de listen to lie-lie.”

10 So the oga them and the men wey de assist them comot and go tell the people say: “See wetin Phar′aoh don talk, ‘I no go de give una dry grass again. 11 Make una go find una own dry grass by unaself, anywhere wey una fit see-am, but una work no go reduce at all.’” 12 Then the people spread for everywhere for the land of Egypt to gather grass.* 13 And the oga them continue to tell them say: “Each of una must finish una work everyday, just as una be de do when them de give una dry grass.” 14 And the people wey Phar′aoh don make as oga beat the men of Israel wey de assist them. Them ask this men of Israel wey de assist them say: “Why una no make reach the amount of bricks wey una de make before? E happen yesterday and today.”

15 So the men of Israel wey de assist the oga them go meet Phar′aoh and complain say: “Why you de treat your servants like this? 16 Them no give your servants any dry grass, instead them de tell us say, ‘Make una make bricks!’ Them de beat your servants, but na your own people get fault.” 17 But e talk say: “Una de relax,* una de relax!* Na because of this one una de talk say, ‘We want go, we want go do sacrifice to Jehovah.’ 18 So now make una go, go back to work! Them no go give una dry grass, but una go still make the same amount of bricks wey una de make before.”

19 Then the men of Israel wey de assist the oga them see say them don dey serious trouble because of this command say: “The amount of bricks wey una de make everyday before, make una no reduce-am at all.” 20 After that one, them meet Moses and Aaron wey stand there to meet them as them come out from Phar′aoh place. 21 At once, them tell them say: “Make Jehovah see wetin una don do and judge una, since una don make Phar′aoh and im servants to hate us* and una don put sword for their hand to kill us.” 22 Then Moses beg Jehovah and talk say: “Jehovah, why you don make this people suffer? Why you send me? 23 From the time wey I go meet Phar′aoh and use your name talk, the way e don treat this people don worse pass before, and you no do anything to save your people.”