Exodus

8 Then Jehovah tell Moses say: “Go meet Phar′aoh and tell-am say, ‘This one na wetin Jehovah talk: “Allow my people go so that them fit serve me. 2 If you still no gree allow them go, I go punish una for the whole land of Egypt with frogs. 3 And River Nile go full with frogs, and them go come out and enter inside your house, inside your room, ontop your bed, inside your servants house them and ontop your people body, inside your ovens, and inside your bowls wey you de use mix flour. 4 And the frogs go come ontop you, ontop your people, and ontop all your servants.”’”

5 After, Jehovah tell Moses say: “Tell Aaron say, ‘Stretch your hand together with your stick face the big-big rivers, the small-small rivers of River Nile, and the water wey gather for one place, and make the frogs come out and cover the land of Egypt.’” 6 So Aaron stretch im hand face the water wey dey Egypt, and the frogs start to come out and cover the land of Egypt. 7 But the priests wey de do magic do the same thing with their magic power, and them make the frogs come out to cover the land of Egypt too. 8 Then Phar′aoh call Moses and Aaron and talk say: “Beg Jehovah to comot the frogs from me and my people, because I want allow the people go, so that them fit go do sacrifice to Jehovah.” 9 Then Moses tell Phar′aoh say: “I go allow you make you tell me when I go beg God to comot the frogs from you, your servants, your people, and your house them. Them go remain for only River Nile.” 10 With this one, e talk say: “Tomorrow.” So e talk say: “Make e be as you talk so that you fit know say nobody be like Jehovah our God. 11 The frogs go comot from you, your house them, your servants, and your people. Them go remain for only River Nile.”

12 So Moses and Aaron comot from where Phar′aoh dey, and Moses beg Jehovah about the frogs wey E don use punish Phar′aoh. 13 Then Jehovah do wetin Moses say make e do, and the frogs start to die for inside the house them, the compounds, and the lands. 14 Them come de gather them together for plenty-plenty heaps, and the land start to really smell. 15 When Phar′aoh see say the condition don better, Phar′aoh make im heart strong like stone, and e no gree listen to them just as Jehovah don talk.

16 So Jehovah tell Moses say: “Tell Aaron say, ‘Stretch your stick and nack the sand of the earth, and e go turn to small-small insect wey de bite for all the land of Egypt.’” 17 And them do like that. Aaron stretch im hand with im stick and nack the sand for ground, and the small-small insect wey de bite attack people and animals. All the sand for the ground turn to small-small insect wey de bite for all the land of Egypt. 18 The priests wey de do magic try to do the same thing and use their magic power to bring small-small insect wey de bite, but them no fit. And the small-small insect wey de bite attack people and animals. 19 So the priests wey de do magic tell Phar′aoh say: “This one na God finger!” But Phar′aoh heart continue to strong like stone, and e no gree listen to them, just as Jehovah don talk.

20 Then Jehovah tell Moses say: “Get up for early morning and stand for front of Phar′aoh. See! E de come out go where the water dey! And you must tell-am say, ‘This one na wetin Jehovah don talk: “Allow my people go, so that them fit serve me. 21 But if you no allow my people go, I go bring flies wey de bite come meet you, your servants and your people, and them go enter your house them, and the house them wey dey Egypt go full with flies wey de bite. And this flies go even cover the ground wey them* stand ontop. 22 For that day, I go surely separate the land of Go′shen, where my people de stay. No fly wey de bite go dey there. And with this one, you go know say me Jehovah, I dey here for the land. 23 And I go show say my people dey different from your people. Tomorrow this sign go happen.”’”

24 So Jehovah do like that, and plenty-plenty flies wey de bite start to attack Phar′aoh house, and im servants house them, and all the land of Egypt. The flies wey de bite cause plenty trouble for the land. 25 At last, Phar′aoh call Moses and Aaron and talk say: “Go, make una go do sacrifice to una God for the land.” 26 But Moses talk say: “E no good to do like that, because wetin we go use do sacrifice to Jehovah our God go make Egypt people really vex.* If Egypt people see us de do sacrifice wey go make them vex,* them no go stone us? 27 Give us three days, we go travel go wilderness, and we go do sacrifice to Jehovah our God for there, just as e don tell us.”

28 So Phar′aoh talk say: “I go allow una go do sacrifice to Jehovah una God for wilderness. But, make una no too go far. Beg una God for me.” 29 Then Moses talk say: “Now I de comot from where you dey, and I go beg Jehovah. The flies wey de bite go leave Phar′aoh, im servants, and im people tomorrow. But make Phar′aoh no deceive us* again and talk say e no go allow the people go do sacrifice to Jehovah.” 30 So Moses comot from front of Phar′aoh and go beg Jehovah. 31 So Jehovah do as Moses talk, and the flies wey de bite leave Phar′aoh, im servants, and im people. No single one remain. 32 But Phar′aoh make im heart strong again like stone, and e no allow the people go.