Exodus

11 Then Jehovah tell Moses say: “One punishment still remain wey I want bring for Phar′aoh and Egypt. After that one, e go allow una comot from here. When e go allow una comot, na drive e go drive una comot from here. 2 Now tell the people say make all the men and women tell their neighbor to give them things wey them make with silver and gold.” 3 And Jehovah make Egypt people to show im people favor. Apart from that one, Moses don really get respect for the land of Egypt among Phar′aoh servants and among the people.

4 Then Moses talk say: “This one na wetin Jehovah don talk, ‘Around midnight I go go inside Egypt, 5 and all the firstborn for the land of Egypt go die, from the firstborn of Phar′aoh wey sitdown for im throne, go reach the firstborn of the slave girl wey de work with grinding stone, and all the firstborn of the animals. 6 For the whole land of Egypt, serious cry go dey, the type wey never happen before and wey no go ever happen again. 7 But no dog go even bark* for Israel people, the men or their animals, so that una go know say Jehovah fit separate Egypt people from Israel people.’ 8 And all your servants go surely bring theirself down come meet me and bow down for me, and de talk say, ‘Go, you and all the people wey follow you.’ After that one, I go go.” So e vex comot for where Phar′aoh dey.

9 Then Jehovah tell Moses say: “Phar′aoh no go listen to una, so that my miracles go plenty for the land of Egypt.” 10 Moses and Aaron do all this miracles for front of Phar′aoh, but Jehovah allow Phar′aoh heart to strong like stone, so that e no allow Israel people comot from im land.