Numbers
16 Then Kor′ah the son of Iz′har, the son of Ko′hath, the son of Le′vi, join together with Da′than and A·bi′ram the sons of E·li′ab, and On the son of Pe′leth, wey come from the family of Reu′ben. 2 Them join dey against Moses together with 250 men for Israel, chiefs of the people, the ones wey them choose for the people,* men wey people respect. 3 So them gather together against Moses and Aaron and tell them say: “Una own don too much! All the people dey holy, all of them, and Jehovah dey among them. So, why una de carry unaself high pass Jehovah people?”*
4 When Moses hear this one, at once, e kneel down and bow face ground. 5 Then e tell Kor′ah and all the people wey de support-am say: “For morning, Jehovah go make us know who be im own, and who dey holy, and who suppose come near-am, and anybody wey e choose go come near-am. 6 Do this one: Take the things wey them de use hold fire, you Kor′ah and all the people wey de support you, 7 and put fire inside them and put incense ontop them for front of Jehovah tomorrow, and the man wey Jehovah go choose, na im be the person wey dey holy. Una wey be sons of Le′vi, una don overdo!”
8 Then Moses tell Kor′ah say: “Abeg, listen, una wey be sons of Le′vi. 9 Na small thing for una eye say the God of Israel don separate una from Israel people and allow una to come near-am so that una go do the work for Jehovah tabernacle and stand for front of the people to serve them, 10 and say e bring you come near-am together with all your brothers, the sons of Le′vi? Why una still de try to collect the priest work? 11 Because of this one, you and all the people wey de support you, wey de gather together, dey against Jehovah. As for Aaron, who e be wey una de complain against-am?”
12 After, Moses talk say make them call Da′than and A·bi′ram the sons of E·li′ab, but them talk say: “We no de come! 13 Na small thing say you don bring us come out from land wey milk and honey de flow inside to kill us for the wilderness? Now you still want make yourself the only ruler wey go de control us?* 14 As e be, you never bring us enter inside any land wey milk and honey de flow inside or give us our own land or vine farm. You go remove the eyes of those men? We no de come!”
15 So Moses come really vex and tell Jehovah say: “No accept their grain offering. I no even take one donkey from them, and I no do any one of them bad thing.”
16 Then Moses tell Kor′ah say: “Make you, together with all the people wey de support you come front of Jehovah tomorrow, you and them and Aaron. 17 Make each person take the thing wey e de use hold fire and put incense ontop-am and each person go bring im thing wey e take de hold fire come front of Jehovah, 250 things wey them de use hold fire, together with you and Aaron, each person with im own thing wey e de use hold fire.” 18 So each of them take the thing wey e de use hold fire, and them put fire and incense ontop them and stand for the domot of the tent of meeting together with Moses and Aaron. 19 When Kor′ah don gather the people wey de support-am to stand against them for the domot of the tent of meeting, Jehovah glory appear to all the people.
20 Jehovah come tell Moses and Aaron say: 21 “Make una separate unaself from this group so that I fit destroy them finish quick-quick.” 22 With this one, them kneel down and bow face ground and talk say: “O God, the God wey give life to everybody,* na one person sin go make you vex for everybody?”
23 Then Jehovah tell Moses say: 24 “Talk to the people and tell them say, ‘Make una comot from around the tents of Kor′ah, Da′than, and A·bi′ram!’”
25 Then Moses comot and go meet Da′than and A·bi′ram, and the elders of Israel follow Moses go. 26 E tell the people say: “Abeg, make una comot from where the tents of this wicked men dey and make una no touch anything wey be their own so that God no go wipe una comot because of all their sin.” 27 Quick-quick, them comot from where the tents of Kor′ah, Da′than, and A·bi′ram dey, from all the sides, and Da′than and A·bi′ram come out and stand for the domot of their tents, together with their wives, their sons, and their small-small children.
28 Then Moses talk say: “This one go make una know say Jehovah don send me to do all this things, say no be from my own heart I de do them:* 29 If this people die normal death, the way everybody de die, and if their punishment na the same like every other person own, then no be Jehovah send me. 30 But if Jehovah do them big thing and the ground open* and swallow them and everything wey them get and them go down inside Grave* alive, then una go surely know say this men no treat Jehovah with respect.”
31 As e just talk all this things finish, the ground wey them stand ontop just divide open. 32 And the earth open* and swallow them, together with people for their house and everybody wey be Kor′ah own and all their property. 33 So them and all the people wey be their own go down inside the Grave* alive, and the earth cover them and them die from among the people.* 34 All Israel people wey dey around them run comot as them hear them de shout, because them talk say: “We de fear say the ground fit swallow us!” 35 Then fire come from Jehovah and burn the 250 men wey de do incense offering.
36 Jehovah come tell Moses say: 37 “Tell El·e·a′zar the son of Aaron the priest make e take the things wey them de use hold fire comot from the fire, because them dey holy. Still tell-am make e scatter the fire go far small. 38 The things wey them de use hold fire wey the men wey use their life pay for their sin* get, make una turn-am to thin flat metal and use-am cover the altar, because them bring them come front of Jehovah and them come dey holy. Them go be sign to Israel people.” 39 So El·e·a′zar the priest take the things wey them de use hold fire wey them make with copper wey the people wey fire burn be carry come, and e nack them to use them cover the altar, 40 just as Jehovah don tell-am through Moses. This one na to make Israel people remember say make person* wey no get the right and wey no come from Aaron family no come near to burn incense for front of Jehovah and say make nobody be like Kor′ah and im people wey de support-am.
41 The next day, all Israel people start to complain against Moses and Aaron and talk say: “Two of una don kill Jehovah people.” 42 When the people gather together against Moses and Aaron, then them turn face the tent of meeting, and see! the cloud cover-am and Jehovah glory start to appear.
43 Moses and Aaron go front of the tent of meeting, 44 and Jehovah tell Moses say: 45 “Make una comot unaself from among this people, so that I fit destroy them finish quick-quick.” With this one, them kneel down and bow face ground. 46 Then Moses tell Aaron say: “Take the thing wey them de use hold fire, put fire from the altar inside-am, and put incense ontop-am, then go quick-quick to the people and help them get forgiveness for their sin, because Jehovah don show say e de vex. The punishment don start!” 47 Quick-quick, Aaron take-am just as Moses don talk and run go where the people* dey, and see! the punishment don start to affect the people. So Aaron put the incense ontop the thing wey them de use hold fire and start to help the people get forgiveness for their sin. 48 E continue to stand between people wey don die and the people wey dey alive, and the punishment come stop. 49 The people wey die because of the punishment reach 14,700, apart from the people wey die because of Kor′ah. 50 At last when Aaron go back go meet Moses for the domot of the tent of meeting, the punishment don stop.