Judges
10 After A·bim′e·lech, To′la the son of Pu′ah, the son of Do′do, wey be man wey come from the tribe of Is′sa·char, stand up to save Israel. E live for Sha′mir for the area wey mountains dey for E′phra·im. 2 E judge Israel for 23 years. Then e die and them bury-am for Sha′mir.
3 After To′la, Ja′ir wey be Gil′e·ad person stand up and judge Israel for 22 years. 4 E get 30 sons wey de ride ontop 30 donkeys, and them get 30 cities, wey them de call Hav′voth-ja′ir till today; them dey the land of Gil′e·ad. 5 After that one, Ja′ir die and them bury-am for Ka′mon.
6 Israel people do wetin bad for Jehovah eyes again, and them start to serve Ba′al idols,* Ash′to·reth image them, the gods of A′ram,* the gods of Si′don, the gods of Mo′ab, the gods of Am′mon people, and the gods of Phi·lisʹti·a people. Them abandon Jehovah and them no serve-am. 7 Then Jehovah vex for Israel no be small, and e put them for the hand of* Phi·lisʹti·a people and Am′mon people. 8 That year, them show Israel people pepper and them suffer them no be small—for 18 years them suffer all Israel people wey dey the side of River Jordan, wey be the land of Am′or·ite people for Gil′e·ad before. 9 Am′mon people go still cross River Jordan to go fight Judah, Benjamin, and the children-children of E′phra·im; and this one make life tire Israel people no be small. 10 Then Israel people beg Jehovah to help them, and talk say: “We don sin against you, because we abandon our God and serve Ba′al idols.”*
11 But Jehovah tell Israel people say: “No be me save una from Egypt and from Am′or·ite people, Am′mon people, Phi·lisʹti·a people, 12 Si′don people, Am′a·lek people, and Mid′i·an people when them suffer una? When una beg me, I save una from their hand. 13 But una abandon me and serve other gods. Because of this one, I no go save una again. 14 Make una go meet the gods wey una don choose and call them make them come help una. Make them save una when una dey for trouble.” 15 But Israel people tell Jehovah say: “We don sin. Do us anything wey good for your eyes. But abeg, just save us this time.” 16 And them remove the lie-lie gods wey dey with them and serve Jehovah, sotey e no fit bear-am again as* Israel people de suffer.
17 After some time, Am′mon people gather together to fight war, and them put their camp for Gil′e·ad. So Israel people gather together and put their camp for Miz′pah. 18 The people and the leaders of Gil′e·ad tell each other say: “Who go lead us go fight against Am′mon people? We go make-am chief for all the people wey de live for Gil′e·ad.”