The First of Kings

7 And na 13 years Sol′o·mon use build im own house,* until e build the whole house finish.

2 And e build one house wey them call House of the Forest of Leb′a·non, wey long reach 100 cubits,* wide reach 50 cubits, and high reach 30 cubits. E build-am ontop four lines of cedar pillars; and big cedarwoods dey ontop the pillars. 3 Na cedarwoods them use cover-am for up, them put the cedarwoods ontop the big woods wey dey ontop the pillars; them be 45, and na 15 dey each line. 4 The house get windows wey get frames. Them arrange the windows side by side for three lines, and three lines from up go down. And each window face the other one. 5 All the place wey them de pass enter the house and the domot get frames wey be square shape,* just like the front side of the windows wey face each other, wey them arrange for three lines from up go down.

6 E build hall wey them de call Hall* of Pillars, wey long reach 50 cubits, and wide reach 30 cubits, and veranda dey the front, with pillars and roof wey cover-am.

7 E still build one place wey them de call Hall* of the Throne, where e de stay judge people matter. Them still de call this place Hall of Judgment, and them use cedarwood cover the body from ground reach the roof.

8 Them build the house* wey e go stay for the other compound, and them separate-am from the Hall,* and na the same way them build-am. Sol′o·mon still build one house wey be like this Hall for Phar′aoh daughter, wey e don marry as im wife.

9 Them build all this house, from foundation go reach the top of the wall, plus outside go reach the big compound, with stones wey cost, wey them measure before them cut, and na saw wey them de use cut stones them use cut the inside and outside of the stones well. 10 The stones wey them use do the foundation big well-well and them cost; some stones reach ten cubits, and other stones reach eight cubits. 11 And wetin dey ontop them na stones wey cost, wey them measure before them cut, plus cedarwood. 12 The big compound get fence wey surround-am. Wetin them use do the fence na three lines of stones wey them cut and one line of big cedarwoods, just like the one for the compound wey dey inside for the house of Jehovah and the veranda for the house.

13 King Sol′o·mon talk say make them go call Hi′ram, and e come from Tyre. 14 Hi′ram na the son of one widow wey come from the tribe of Naph′ta·li, and im papa na Tyre person wey de use copper make things. Hi′ram sabi make things well-well, e get experience for im work and e really know how to make anything wey them de use copper* make. So e come meet King Sol′o·mon and do all im work.

15 E use copper wey them melt make the two pillars. Each pillar high reach 18 cubits, and na measuring rope wey long reach 12 cubits na im fit go round each of the two pillars.* 16 And e use copper wey them melt do two things wey them de call capital, and e put them ontop the pillars. One capital high reach five cubits, and the other one high reach five cubits. 17 The capital wey dey ontop each pillar get something wey be like net wey them weave round with chains to decorate-am. One capital get seven and the other capital get seven too. 18 E do pomegranates* and put them for two lines round that thing wey be like net, so that e go use them decorate the capitals wey dey ontop the pillars. Na so e do for the two capitals. 19 The capitals wey dey ontop of the pillars wey dey front of the veranda be like lily flower, and them high reach four cubits. 20 The capitals dey ontop the two pillars, ontop the round part wey hold that thing wey be like net, and 200 pomegranates wey dey two lines dey round each capital.

21 E put pillars for the veranda of the temple,* e put one pillar for right side,* and name-am Ja′chin,* then e put one for the left side* and name-am Bo′az.* 22 And the top of the pillars be like lily flower. Na so e take complete the work of the pillars.

23 Then e use copper wey them melt mold something wey them de call Sea.* E dey round, and from one side of im mouth to the other side na 10 cubits. E high reach 5 cubits, and na measuring rope wey long reach 30 cubits na im fit go round-am. 24 And for under the mouth of the Sea, fine-fine image of round-round fruits dey there, and them dey round the body. Na ten of that image dey for place wey long reach one cubit, and na so e dey round the Sea. The image of the round-round fruits dey for two lines wey them join together like say na one. 25 The Sea dey ontop 12 bulls, 3 face north side, 3 face west side, 3 face south side, and 3 face east side. The Sea dey ontop of them and all their back face the center of the Sea. 26 E thick reach four fingers,* and them make im mouth like cup mouth, like lily flower wey just de come out. E de contain 2,000 bath measures* of water.

27 Then e use copper make ten things wey be like truck wey them de use carry load.* Each of this things wey be like truck long reach four cubits, e wide reach four cubits, and e high reach three cubits. 28 Na like this them make those things wey be like truck: Na something wey flat like zinc them use make the body, and this things wey flat like zinc dey the middle of rods wey cross each other. 29 And them carve lions, bulls, and cherubs for the parts wey flat like zinc, wey dey the middle of the rods wey cross each other. And na this same design dey the up of the rods wey cross each other. Them still carve some things wey be like wire wey them weave together, for ontop and under the place wey them carve the lions and the bulls. 30 And each of this things wey be like truck get four copper tyres and copper rods wey de connect the tyres, and the things wey dey the four corners na im de hold the tyres and the rods wey de connect them. For the down part of the basin, e get things wey de hold-am, wey them carve things wey be like wire wey them weave together for each side. 31 The basin mouth dey inside the top part of the thing wey be like truck, from the under of the basin go reach the top part of that thing wey be like truck, na one cubit; and from the under of the thing wey hold the basin go reach the up-up part of that thing wey be like truck, na one and half cubits, and that up part dey round, and e get things wey them carve round-am. And the parts wey flat like zinc get square shape, no be round shape. 32 The four tyres dey the down part of the parts wey flat like zinc, them fix the things wey de hold the tyres for this thing wey be like truck, and each of the tyres high reach one and half cubits. 33 And them make the tyres like the tyres wey de dey for chariots. Them use copper wey them melt mold the things wey de hold them, their rims, spokes, and hubs. 34 The four corners of each of this things wey be like truck get four things wey de hold them, and them mold this things join the body of this thing wey be like truck. 35 Something wey be like crown dey the up part of this thing wey be like truck, e dey round and e high reach half cubit, and this up part with the frames and the parts wey flat like zinc, them mold them join the body of this thing wey be like truck. 36 E carve cherubs, lions, and palm trees for the body of the frames and the parts wey flat like zinc, according to the space wey dey each of them, and them still get the thing wey resemble rope wey them weave together all around them. 37 Na like this e take make the ten things wey be like truck; e mold all of them the same way, them get the same measurement and the same shape.

38 E make ten copper basins, and each basin fit contain 40 bath measures* of water. Each basin na four cubits. One basin dey ontop each of the ten things wey be like truck. 39 Then e put five of this things wey be like truck for the right side of the house and the other five for the left side of the house. And e put the Sea wey e mold for the right side of the house, for the side wey de face east.*

40 Hi′ram still make other basins, e make shovels and bowls.

At last, Hi′ram finish all the work wey e do for King Sol′o·mon for the house of Jehovah. E make: 41 the two pillars, and the capitals wey their shape be like bowl wey dey ontop the two pillars, the two nets wey cover the two capitals wey their shape be like bowl wey dey ontop the pillars, 42 the 400 pomegranates wey dey the two nets, two lines of pomegranates for each of the net wey de cover the two capitals wey their shape be like bowls wey dey ontop the two pillars, 43 the ten things wey be like truck, and the ten basins wey dey ontop this things wey be like truck, 44 the Sea wey them mold, and the 12 bulls wey dey under the Sea, 45 the containers, the shovels, the bowls, and all the other things wey Hi′ram use copper wey de shine make for King Sol′o·mon, for the house of Jehovah. 46 The king use clay containers mold this things for the area for Jordan wey dey between Suc′coth and Zar′e·than.

47 Sol′o·mon no measure all the things wey them make because them plenty no be small. Them no even know how the copper wey them use make them heavy reach. 48 Sol′o·mon make everything wey them go use for the house of Jehovah: the altar wey them use gold make, the table wey them use gold make wey them de put the showbread ontop; 49 the lampstands wey them use pure gold make, five of the lampstands dey for the right side and the other five dey for the left side for front of the room wey dey inside-inside; the trees wey de produce flowers, the lamps, and the things wey them use de hold lamp thread, na gold e use make all of them; 50 the basins, the things wey them de use quench fire, the bowls, the cups, and the things wey them use de carry charcoal fire, na pure gold e use make all of them; and the things wey de hold the doors for the room wey dey inside-inside, wey be the Most Holy Room, and for the doors of the house of the temple, e use gold make all of them.

51 Na so King Sol′o·mon take complete all the work wey e suppose do for the house of Jehovah. Then e bring the things wey im papa David don make holy come inside, and e put the silver, the gold, and all the other things for inside the place them wey them de keep better-better things for the house of Jehovah.